Luka 7

1Panyuma pakamaliti malowe gake goha pa makutu ga wandu, akayingili mu Kapernaum.

2Ni mbanda wa nunuyu kenturion, wakuganika nuyombe, akalwaliti ni papipi kufwa. 3Leka pakayufwini ya Yesu, akatumiti kwake wakulu‐wakulu wa waYehudi, kumpembesa kukita ahiche kundamisa mbanda mundu. 4Leka wombe apa wakahegalili kwa Yesu, wakampembisi kwa ukiki, kujowa, Ayii wakulinganila unkitile iki: 5pakukita agana mhuku witu, nayombe mwene akatijengili sunagoge yitu. 6Leka Yesu akagenditi pamonga nawo. Na pakayili lepa patali pa nyumba, kenturion akatumiti kwa yombe wakosi mundu, kunjowela, Bambo, ukotoke kwifwahisa: ndawa nilinganila lepa kukita uyingile pasi pa msagasa wangu: 7ndawa iyi nikiwalingi lepa namwene wakuyenela kukuchila: koma utawile lilowe, nu mpalo wangu yalamasike. 8Pakuya nenga nani niyii mundu wakuwikika pasi pa chengo, ni askari niyii nawo pasi pa nenga: ni ninjowela uyu, Genda, ni agenda; nu yungi, Hicha, ni ahicha; nu mbanda wangu, Kita iki, ni akikita. 9Leka Yesu pakayufwini aga, akahikalili pa yombe, na apa akang’anamukili akajowiti kwa lipuga lya kunkisa yombe, Niwajowela mwenga, Nikakolili lepa kiyitakiso ngati iki, haka pa Israel. 10Na apa wakakilawukili pa nyumba wala wakatumiki, wakankolili mbanda yula asangaluka.

11Ni yikayili kukita panyuma pake pachokope, akagenditi mwanja ku likaya likemeleka Nain; Na wakagenditi pamonga nako wanafunsi wake, ni lipuga likulungu. 12Leka baha na baha akawandamili pa ndyango wa likaya, na lola, mundu wa kufwa wakupindika kunja, mwana ngosi wakape wa nyina, nuyombe mfwili: ni lipuga likulungu lya pa likaya likayili nuyombe. 13Ni pakambweni yombe Bambo, akatoliki ni lipyana pa yombe, ni akanjowili, Ukotoke kulila. 14Ni akachiti bahapa, nakakwafiti kitala: leka wakupinda wakayimi. 15Na akajowiti, Mpalo, nikujowela, Yimuka. Na wakufwa yula akatemi utama, na akatumbwili kulongela. 16Na akampeliki kwa nyongolo. Leka woga ukawakamwili woha: na wakankwisiti Mulungu, kujowa, Wakulweta nkulungu ayimusiki pa tenga: nu, Mulungu alolalili nsafi wake. 17Ni mbili iyi yikapititi ya yombe pa Yudaya poha, ni pa ndima woha wakusyungutila.

18Ni wanafunsi wa Yohana wakantawili yombe findu ifi fyoha. 19Ni Yohana, pakawakemili wawili wa wanafunsi wake, akawatumiti kwa Bambo, kujowa, Wenga uyii wakuhicha yula, pangi tindolalela yungi? 20Leka apa wamhegalili wagosi wala, wakajowiti, Yohana Wakubatisa akatitumiti kwako, kujowa, Wenga uyi wakuhicha yula, pangi tindolalela yungi? 21Pa saa yiyilayila akawalamisi wingi pa mautamu gawe ni mitimbo ni roho siwifu; na wingi wakukoyoka miho akawapili kulola kawili. 22Na pakahigiti, akajowiti kwa wombe, Mugendaye mwanja, mupindilaye Yohana ndumi sya ifi mufiweni ni kuyufwana; wakukoyoka miho walola kawili, wakuchipila wagendagenda, wa matana waguyulika, wa kisiwasi wayufwa, wakufwa wasyusika, na kwa wagaju yiwandasika evangel. 23Na wakusengwa ayii yula akuwasika lepa pa nenga.

24Leka apa wakalutiti watenga wa Yohana, akatumbwili kuwajowela mapuga ya Yohana, Kulolakesa kiki mukapititi mu lipululu? lideti lya kunyukanyuka ni mbepo? 25Koma kuwona kiki mukapititi? mundu wa kufwatika ni fya kuyolowa? Lola, wakufwata nguo sya malidadi, ni walya pa finofu, wayii pa nyumba sya watwa. 26Koma kuwona kiki mukapititi? wakulweta? Ena, niwajowela, ni wakulutila wakulweta. 27Uyu yuyu yilembiki ya yombe,

Lola, nituma ntenga wangu pa miho gako,

Yula yatendekese ndila yako palongolo pako.

28Niwajowela, Nkulungu kulutila uyu Yohana pa wala wahogoleka ni wadala pa waka: leka nchoko pa utwa wa Mulungu nkulungu ayii kulutila yombe. 29Na pakayufwini wandu woha, na wakuyupa nsongo, wakampisiti Mulungu wa malinga, ndawa wakabatiswi nu ubatiso wa Yohana. 30Leka waFarisayo na wa Torah wakakaniti luhala lwa Mulungu, ndawa wakabatiswi lepa nuyombe. 31Mumu ni kiki yanihwanakise wandu wa kihogosi iki, wahwanangana ni kiki? 32Wahwanangana nu twana tututama pa machengo, na wakemelana; tula tujowa, Tikawakuwili kitulilo, na mukahiniti lepa; tikaliliti malilo, na mukaliliti lepa. 33Pakuya achiti Yohana Wakubatisa, alya lepa nkate, anywa lepa mvinyo; na mujowa, Ayii ni daimon. 34Achiti Mwana wa adam, alya na anywa; na mujowa, Lola, mundu wa lulyo pa kulya ni wakunywa mvinyo, nkosi wa wakuyupa nsongo na wene sambi! 35Na luhala lupisika lwa malinga pa wana wake woha.

36Leka yumonga wa waFarisayo akankotiti alye pamonga nuyombe. Nakayingili mu nyumba ya mFarisayo, nakatemi pasi kulya. 37Na lola, ndala uyu nuyombe akayili pa likaya, mwene sambi; uyu apa akamanyiti kukita atama pasi pa nyumba ya mFarisayo, akatoliti kisupa kya alabastero ya mafuta, 38na pakayimi panyuma pa magulu gake, kililile, akatumbwili kumhulusila masoli pa magulu gake, nakagasungwili ni liyunju lya pa mutu wake, nakamiangiti njayo syake, nakabakisi mafuta gala. 39Leka mFarisayo yula akankemili, pakaloliti, akalongili mugati mwake, kujowa, Uyu, wona ayii wakulweta, ngawalalili nani ni wa ntundu wuli ndala uyu ankwafya yombe, kukita ayii mwene sambi. 40Ni pakahigiti Yesu, akajowiti kwa yombe, Simon, niyii ni kindu kyakutawila kwa wenga. Nakajowiti, Mwalimu, utawile. 41Nunuyu wakupingisa akayili ni wa misigilo wawili: yumonga akayili ni nsigilo wa denario mia mhano, leka yungi makumi mhano. 42Na pala wakayili lepa ni kyakulipa, akawalekelakisi woha wawili. Mumu yuliku wa wombe yalutakise kungana? 43Simon akahigiti nakajowiti, Niwona yula akandekelakisi fyakulutila. Leka akajowiti kwa yombe, Upawili malinga. 44Na pakang’anamukili ndala yula, akajowiti kwa Simon, Ulola ndala uyu? Nikayingili mu nyumba yako, machi kwa njayo syangu ukanipili lepa: leka uyu akanihulusili masoli gake pa magulu gangu, ni liyunju lyake akanisungwili. 45Kununa ukanipili lepa: leka uyu, kiyingalile nenga, akotwiki lepa kumianga njayo syangu. 46Mutu wangu ni mafuta ukanibakisi lepa: leka uyu ni muro akanibakisi njayo syangu. 47Ndawa ya iki nikujowela, Sambi syake, sikayili mingi, silekelasiki; ndawa akaganiti kwingi: leka uyu alekelasiki pachoko, yombe agana pachoko. 48Na akajowiti kwa yombe, Sambi syako silekelasiki. 49Na wala wakutama pasi pamonga nuyombe pa kulya wakatumbwili kujowa mugati mwawe, Nani uyu wakulekelekesa haka sambi? 50Leka akajowiti kwa ndala, Kiyitakiso kyako kikuyokwili; bita pa kindamba.

Currently Selected:

Luka 7: MGS1937

Highlight

Copy