Luka 4
4
1Leka Yesu, wa kumema nu Roho Mbalafu, akakilawiki pa Yordan, na akalongosiki nu Roho mu mapululu magono makumi ncheche, ni kugeseka ni diabolo. 2Ni akalili lepa kindu pa magono gala: na pa gakamalasiki, akaweni njala. 3Leka diabolo akajowiti kwa yombe, Wona uyii Mwana wa Mulungu, utawile kwa liganga ili nausi likitike nkate. 4Nu Yesu akamhigiti, Yilembiki, Nukuya nu nkate wakape yalamile mundu. 5Ni kundongosa, akandasiti mautwa goha ga pa ndima pa kalukumbi. 6Na diabolo akajowiti kwa yombe, Wenga yanikupele chengo iki kyoha, nu kukwisika kwake: pakuya kipelekiki kwangu; ni yula nilonda kwake yanimpelekele. 7Mumu wenga wona ugwile kimbo pa miho pangu, yakiye kyako kyoha. 8Na akahigiti Yesu nakajowiti kwa yombe, Yilembiki, Ugwile kimbo kwa Bambo Mulungu wako, nuyombe wakape untumakilaye. 9Leka akandongisi ku Yerusalem, na akanjimisi pa lusongo lwa king’ango kya hekalu, nakajowiti kwa yombe, Wona uyii Mwana wa Mulungu, witage pasi kuhumila apa: 10pakuya yilembiki,
Yawataukile wamalaika wake ya wenga, wakugohe: 11ni,
Pa mawoko gawe yawakunyanyamule,
Usikuwala lwayo lwako pa liganga.
12Nu Yesu pakahigiti akajowiti kwa yombe, Gajowiki, Usingesa Bambo Mulungu wako.
13Nu diabolo pakamaliti ligeso liyi lyoha, akapatwiki pa yombe kwa lukumbi.
14Nu Yesu akakilawiki pa mbafu ya Roho ku Galilaya: ni mbili ya yombe yikapititi pa ndima wa kusyungutila uyi woha. 15Na akayigalisi mu masunagoge gawe, na akakwesiki na woha.
16Na akachiti pa Nazareti, pala akaleliwi: na akayingili, umu akasyowalili, pa ligono lya sabato pa sunagoge, na akayimi kusoma. 17Na akapeliwi kitabu kya wakulweta Isaya. Na akakifunukwili kitabu, nakakolili pala pakalembiki,
18Roho wa Bambo ayii panani pa nenga,
Ndawa akanibakisi kuwandisa evangel kwa wagaju:
Anitumiti kuwandisa kuwopoleka kwa wa pa migoyi,
Ni kuwona kawili kwa wakukoyoka miho,
Kuwapela ukamba wakuhumbusika,
19Kuwandisa mwaka wakuyitikalika wa Bambo.
20Na akasingiti kitabu kila, nakakilawisi kwa mpalo, nakatemi pasi: na miho ga woha wa mu sunagoge gakayili mu kundolakesa. 21Ni akatumbwili kuwajowela, Lilino limemasiki lilembo ili mu makutu ginu. 22Na woha wakandungamakili yombe, ni wakakangichi pa malowe ga neema gala gapititi pa ndomo wake: ni wakajowiti, Si uyu mwana wa Yosefu? 23Na akajowiti kwa wombe, Chakaka yamujowe kwa nenga ngongo iyi, Nganga, wilwasaye wamwene: fiyi fyoha fila tikafiyufwini fikakitiki pa Kapernaum, ufikite na kuni kawili pa ndima wako wamwene. 24Leka akajowiti, Chakaka niwajowela, Nukuya wakulweta wakuyupika pa ndima wake mwene. 25Leka pa fya chakaka niwajowela, Wakayili wafwili wingi pa Israel pa magono ga Eliya, pala kunani kukadindiki miaka yidatu ni miesi ntanda, baha ukayili ulali ukulungu pa ndima woha; 26na nukuya mundu wa wombe yula akatumiki Eliya kwa yombe, lema ku Zarefat wakape, pa ndima wa Sidon, kwa ndala mfwili. 27Na pakayili wa matana wingi pa Israel lukumbi lwa Elisha wa kulweta; haka yumonga wa wombe akaguyuliki, lema Naaman mSuria. 28Na woha wakamemasiki nu kuwina mwoyo mu sunagoge pa wakayufwini ifi; 29na wakayimiti, na wantagiti kunja kwa likaya, na wantolili ku ligema lya kidunda apa likajengiki likaya lyawe, nausi wankange pasi. 30Leka yombe pakalutiti pagati pawe akabiti pa mwanja wake.
31Na akaselili pa Kapernaum, likaya lya Galilaya. Na akayili mu kuwayigalisa pa ligono lya sabato: 32ni wakakangichi nyahope pa mayigaliso gake; pakuya lilowe lyake likayili lya mwene chengo. 33Ni pa sunagoge pakayili mundu, ayii nayo roho ya daimon ya wafu; ni akakuwiti ni njowelo yikulungu, 34Ah! kiki kwa tenga na wenga, Yesu wa Nazareti? uchiti kutiyananga ati? nikumanya wenga uyii nani, Mbalafu yula wa Mulungu. 35Nu Yesu akandakalili, kujowa, Tama kinunu, na pita pa yombe. Ni daimon pakantagiti pasi pagati, akapititi pa yombe, nukumpoteka lepa kindu. 36Nu ntendemu ukawagwilili woha, na wakalongili wangi na wayawe, kujowa, Lilowe liki ili? ndawa ni chengo ni mbafu ataukila roho sya wafu, na sipita. 37Ni mbili yake yikalutiti pa ndima woha wa kusyungutila kula.
38Leka pakayimiti yombe kulekana ni sunagoge, akayingili mu nyumba ya Simon. Ni nkwii mundu wa Simon akayili mu kukamulika nu utamu wa kuhiluka kukulungu; na wakankotiti ya yombe. 39Na pakayimi pala pa yombe, akalakalili kuhiluka kula; na kukandekiti: na bahalapala pakayimi akawatumakili wombe.
40Leka pa kuyiwila lijuwa, woha wala wakayili nawo wakulwala na mautamu ga misafi‐misafi wakawapinditi kwake; leka yombe akawikiti mawoko gake pa ayi yoha wa wombe na akawalwasiti. 41Na madaimon kawili gakapititi pa wingi, kukuwa na kujowa, Wenga uyii Mwana wa Mulungu. Na kugalakalila, akagayitakili lepa kulongela, ndawa gamanyiti kukita ayii Kristo.
42Leka apa yikayili musi, akapititi nakagenditi mwanja pandu pa mapululu: na mapuga gakandonditi, na wakachiti mpaka pa yombe, na wakalonditi kunkamula, nausi akotoke kulekana nawo. 43Koma yombe akajowiti kwa wombe, Pa makaya gangi kawili nakukotoka nenga kuwandisa evangel ya Utwa wa Mulungu: pakuya ndawa ya iyi nikatumiki.
44Na akayili mu kuwandisa mu masunagoge ga Galilaya.
Currently Selected:
Luka 4: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
