Luka 3

1Leka pa mwaka wa kumi ni mhano wa mutwa Tiberio Kaisar, pa kutama Pontio Pilato mpawusi wa Yudaya, ni Herode tetrako wa Galilaya, nu Filipo nung’una mundu tetrako wa Ituraya ni Trakonitis, ni Lusania tetrako wa Abilene, 2ni pa ukasisi ukulungu wa Anna nu Kayafa, lilowe lya Mulungu likanchilili Yohana mwana wa Zakariya mu lipululu. 3Na akachiti mu ndima woha wakusyungutila wa Yordani, kuwandisa ubatiso wa kupela kwa kulekelekesa sambi; 4umu yilembekili pa kitabu kya malowe ga Isaya wakulweta,

Njowelo ya wakukuwa mu mapululu,

Muwikile ngani ndila ya Bambo,

Mugolosaye barabara yake.

5Likefu liyi lyoha yalimemeseke,

Ni kidunda kiyi kyoha ni kikweso yakiseleseke;

Ni fya mibidu‐mibidu yafiye fyakugoloka,

Ni pa nyaulema yapaye tye tye tye;

6Nyama yiyi yoha yayiwone uyokosi wa Mulungu.

7Mumu akagajowili mapuga gala gakapititi kubatasika nuyombe, Fihogosi fya mamoma, nani akawalasiti mwenga kukimbila pa kudada kula kuyii mu kuyicha? 8Mumu mupambikaye fipambiko fyakulinganila kupela, ni musitumbula kujowa mugati mwinu, Dadi tiyii nako Ibrahim: ndawa niwajowela, Mulungu ahotola kunjimikila Ibrahim wana kuhuma pa maganga aga. 9Leka hino apa liwago liwikiki ngani pa ndela wa mikongo: mumu nkongo uyi woha wona ulema kupambika fipambiko finofu udumulika, ni kutagika mu mwoto. 10Ni mapuga gakankotiti, Mumu tikite kiki? 11Leka pakahigiti, akawajowili, Yula ayii ni mingila yiwili, angawile yula ayii nayo lepe; ni yula ayii ni fyakulya, akite wiwi. 12Na wakanchilili wakuyupa nsongo kawili kubatiswa, na wakajowiti kwa yombe, Mwalimu, tikite kiki? 13Leka akajowiti kwa wombe, Musinyaka kulutila kila kyakutaukilika kwa mwenga. 14Leka askari kawili wakankotiti, kujowa, Apa tenga, tikitaye kiki? Ni akajowiti kwa wombe, Musindigidisa mundu ayi yoha, haka kukupikisa musikupikisa; ni mwisinge ni njombe yinu.

15Leka pa kulolalela nsafi, ni pa kujowana‐jowana woha pa mioyo yawe ya Yohana, ngati kwali ayii Kristo; 16akahigiti Yohana, kuwajowela woha, Nenga nani ni machi niwabatisa mwenga; leka ahicha mwene mbafu kulutila nenga, niyilepe wakulinganila kuwopola lugoyi lwa sapato syake: yombe yawabatise nu Roho Mbalafu nu mwoto: 17kyakupepetela kyake kiyii pa kiwoko kyake, kuguyula ngani liwala lyake, ni kwiwunganisa trigo pa kikokoli kyake; leka mayufya yagakunge mwoto wangasimika.

18Mumu pa kukila kwingi akawandisi yombe evangel kwa nsafi; 19koma Herode tetrako, pakapeliwi mhalo nuyombe ndawa ya Herodia ndala wa mamaye, na ya fyoha fiwifu fila Herode akafikiti, 20akayonjakisi iki panani pa fyoha, kukita akandindalili Yohana pa kukungika.

21Leka yikayili kukita pala nsafi woha ukabatasiki, nu Yesu nayombe kawili akabatiswi, nu kusali, kunani kukadinduliki, 22nu Roho Mbalafu akaselili, ni kihwanakiso kya mbili wake ngati njiwa, kuntulila yombe, ni njowelo yikahumili kunani, Wenga uyii mwanangu wakuganika muni; pa wenga niganisiki nyamhope.

23Nu Yesu mwene, pa ndumbulo wa mahengo gake, akayili ngati wa miaka makumi gadatu, pakuya (umu kikaholiki) mwana wa Yosefu, 24mwana wa Heli, mwana wa Matthat, mwana wa Levi, mwana wa Melchi, mwana wa Yannai, mwana wa Yosefu, 25mwana wa Mattatiya, mwana wa Amos, mwana wa Nahum, mwana wa Esli, mwana wa Naggai, 26mwana wa Maath, mwana wa Mattatiya, mwana wa Semein, mwana wa Yosek, mwana wa Yoda, 27mwana wa Yoanan, mwana wa Resa, mwana wa Zerubbabel, mwana wa Salatiel, mwana wa Neri, 28mwana wa Melchi, mwana wa Addi, mwana wa Kosam, mwana wa Elmadam, mwana wa Eri, 29mwana wa Yesu, mwana wa Eliezer, mwana wa Yorim, mwana wa Matthat, mwana wa Levi, 30mwana wa Simeon, mwana wa Yuda, mwana wa Yosefu, mwana wa Yonam, mwana wa Eliakim, 31mwana wa Melea, mwana wa Menna, mwana wa Matatha, mwana wa Nathan, mwana wa Daudi, 32mwana wa Yesse, mwana wa Obed, mwana wa Boaz, mwana wa Salmon, mwana wa Nahshon, 33mwana wa Aminadab, mwana wa Arni, mwana wa Hezron, mwana wa Perez, mwana wa Yuda, 34mwana wa Yakobo, mwana wa Isaak, mwana wa Ibrahim, mwana wa Tera, mwana wa Nahor, 35mwana wa Serug, mwana wa Reu, mwana wa Peleg, mwana wa Eber, mwana wa Shelah, 36mwana wa Kainan, mwana wa Arfaksad, mwana wa Shem, mwana wa Noah, mwana wa Lamek, 37mwana wa Methusala, mwana wa Enok, mwana wa Yared, mwana wa Mahalaleel, mwana wa Kainan, 38mwana wa Enos, mwana wa Seth, mwana wa Adam, mwana wa Mulungu.

Currently Selected:

Luka 3: MGS1937

Highlight

Copy