Luka 2
2
1Leka yikayili kukita pa magono gagalagala, lukapititi luwimbi kwa Kaisar Augusto, kukita ndima woha ulembiki. 2Uku kuku kulembeka kwa kutumbula pala Kurenio akayili mpausi wa Suria. 3Na wakabiti woha kwilembesa, ayi yoha ku likaya lyake mwene. 4Leka Yosefu kawili akakweliti kuhuma pa Galilaya, pa likaya lya Nazareti, ku Yudaya, ku likaya lya Daudi, lila likemeleka Bethlehem, pakuya yombe wa nyumba nu nsafi wa Daudi; 5kwilembesa pamonga nu Mariamu, wakuhongeka nuyombe, uyu akayili nu luleme. 6Leka yikayili kukita, pa kuya wombe bahapa, magono gake ga kusinda gakamemasiki. 7Na akahogwili mwana mundu ngosi wa kiwele; na akamniembiti ni nguo, ni akangoniki pa kulila ng’ombe, ndawa pakayili lepe pandu kwa wombe pa nyumba ya wageni.
8Na wakudima wakayili pa ndima wula wakugona kunja, ni kulindalila kilo pa lipuga lya mambelele gawe. 9Ni malaika wa Bambo akayimiti pa wombe, nu kukwisika kwa Bambo kukawamulikili kuwasyungutila: na wakayogwipi kulutila. 10Na malaika akawajowili, mukotokuyogopa; pakuya lola, niwatola ndumi sinofu sya kiheko kikulungu kila yakiwatamile nsafi woha: 11pakuya ahogoliki lilino Njokosi, yuyu Kristo Bambo, pa likaya lya Daudi. 12Ni iki kiwalalilo kwa mwenga; Yamukolele kamwana kaniembiki ni nguo, ni kagonakiki pa kulila ng’ombe. 13Na kikenyemukile ukayili pamonga na malaika wingi wa libanja lya kunani, kundumba Mulungu, ni kujowa,
14Kukwisika kwa Mulungu kunani,
Ni pa ndima kindamba kwa wandu wa ulongo unofu.
15Ni yikayili kukita, pala wakawukiti wamalaika kiyingalile kunani, wakudima wala wakalongili wangi ni wayawe, Tiwuke, tibitaye mpaka pa Bethlehem, ni tikalole iki kipatiti kuya, kila Bambo atimanyisi tenga. 16Na wakachiti kiyumbatakile, na wakankolili Mariamu ni Yosefu, na kamwana kala kagonakiki pa kulila ng’ombe. 17Na pawakaweni, wakamanyisi lilowe lila likatawaliki kwa wombe ya kamwana aka. 18Na woha wala wakayufwini wakagana‐ganiti kwa findu ifi fikalongaliki kwawe na wakudima. 19Koma Mariamu akagohiti malowe aga, kugalinga pa mwoyo wake. 20Na wakakilawiki wakudima wala, kunkwisa ni kundumba Mulungu kwa goha gala wakagayufwini na kugawona, ngati umu fikalongaliki kwawe.
21Na pala magono nane gakamemasiki ga kunsilamusa yombe, lihina lyake likakemaliki YESU lila likakemaliki wiwila na malaika akona kutoleka mu luleme.
22Na pala magono ga kuguyulika kwawe gakamemasiki kwa ndingo wa torah ya Musa, wakakweliti nako ku Yerusalem, 23kundasa kwa Bambo (umu yilembekili pa torah ya Bambo, Ngosi ayi yoha uyu adindula luleme yakemaleke wapakape kwa Bambo), 24ni kulekela nyambiko kwa ndingo wa lila lyakitiki pa torah ya Bambo, Ngunda siwili, pangi mawela gawili gaga njiwa. 25Na lola, akayili bahalapala mundu pa Yerusalem, lihina lyake Simeon; nu mundu uyu akayili ngolofu ni wakugwilakimbo, ni akayili mu kulindalila mapembeseko kwa Israel: nu Roho Mbalafu akayili pa yombe. 26Ni kukafunukuliki kwake nu Roho Mbalafu, kukita yawone lepa kifwa, akona ngambona Kristo wa Bambo. 27Na pa Roho akayingili mu hekalu: na pala wakumhogola wake wakayingili ni kamwana Yesu, kunkitila kwa ndingo wa torah, 28bahalapala akanjupiti pa mawoko gake, na akandumbiti Mulungu, ni akajowiti,
29Hino umpele mwanja mbanda wako, Bambo,
Umu ukajowili, pa kindamba;
30Pakuya miho gangu gauweni uyokosi wako,
31Wula wawikili ngani pa miho pa misafi yoha;
32Lulangalila kwifunukulila Mihuku,
Nu kukwisika kwa nsafi wako Israel.
33Nu dadi mundu nu nyina wakayili mu kuganagana pa aga gakalongaliki ga yombe: 34nu Simeon akawapili kihomo, nakajowiti kwa Mariamu nyina mundu, Lola, uyu awikiki kwa kugwa ni kuwuka kawili kwa wingi pa Israel; ni kwa kiwalalilo kya kukaniwa; 35ena na pa wumi wako wamwene yauholote upanga; nausi maholo ga mioyo mingi gafunukulike. 36Na akayili Anna, wakulweta, mwana ndala wa Fanuel, wa nsafi wa Asher (yombe akayili wa magono, akalamiti pamonga ni ngwana mundu miaka saba kitumbulile wali wake, 37nayombe akayili mfwili mpaka miaka themanini na ncheche), uyu akapatwiki lepa pa hekalu, kitumakile ni kukunga kyakulya na maluwo kilo ni musi. 38Ni saa yiyilayila pa akayimiti akansengwisi Mulungu, ni akalongili ya yombe kwa woha wala wakayili mu kulindalila kukombola kwa Yerusalem. 39Na pala wakamaliti fyoha kwa ndingo wa torah ya Bambo, wakakilawiki ku Galilaya, ku likaya lyawe wene Nazareti.
40Leka kamwana kakakuliti, ni kakakangamili, kumemaseka nu luhala: ni neema ya Mulungu yikayili pa yombe.
41Ni wakumhogola wake wakabiti mwaka nu mwaka ku Yerusalem pa ligono likulungu lya Pasaka. 42Na apa yombe akayili wa miaka kumi ni yiwili, wakakweliti kwa ndingo wa nkuwu wa ligono likulungu; 43na pala wakamalisi magono, pa kukilawuka wombe, nsongolo Yesu akahweliti pa Yerusalem; 44ni wakumhogola wakamanyiti lepa; koma pa kuhola kukita ayii pa mwanja, wakagenditi ligono limo; na wakandonditi‐ndonditi pa walongo wawe na pa wakusyowelanila nawo: 45na apa wakamkolili lepa, wakakilawukili pa Yerusalem, kundonda‐ndonda. 46Ni yikayili kukita, panyuma pa magono gadatu wakankolili pa hekalu, atemi pagatigati pa walimu, na ayufwaneye, na awakoteye wombe: 47na woha wala wakanjufwanili yombe wakakangichi pa kuwalalila kwake ni mahigo gake. 48Na apa wakambweni, wakakangichi nganila: nu nyina akajowiti kwa yombe, Mwana, utikitili wuli tenga wila? lola, dadiyu nu nenga tikakulonditi‐londiti kihumbusikile. 49Ni akajowiti kwa wombe, Ndawa kiki mukanilonditi‐londiti? mumanya lepa ati kukita nenga nilinganila kuya pa fila fya Dadi wangu? 50Na wakawalalili lepa lila akatawili kwa wombe. 51Na akaselili nawo, na akachiti ku Nazareti: ni akiwikiti pasi pa wombe: nu nyina mundu akagohiti aga goha gatawaliki pa mwoyo wake.
52Nu Yesu akagenditi palongolo pa luhala ni pa ntunda, ni pa kugana kwa Mulungu ni kwa wandu.
Currently Selected:
Luka 2: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
