Luka 1
1
1Pakuya wa mahele wakikamwisi kulemba ndumi sya fila fimalasiki pa tenga, 2umu wakafipelakili kwa tenga, wala wakayili walungamakiso na wakutumakila wa lilowe, kukaniwonakili wicho nenga kawili, 3wakukisa ndila sya findu fyoha pangali kuhoka kitumbulile pakutumbula, kukulembela umu fikisili, bambo nnofu Teofilo; 4nausi upate kumanya fya chakaka fya malowe gala ukayigilasiwi.
5Pa magono ga Herode, mutwa wa Yudaya, akayili kasisi lihina lyake Zakaria, wa lipuga lya Abia: nu mhanu mundu wa wana wadala wa Harun, ni lihina lyake Elisabeti. 6Leka woha awa wawili wakayili wagolofu pa miho ga Mulungu, wakugenda pa mimbi syoha ni mapawuliko ga Bambo wangahoka. 7Na wakayili lepa nu mwana, ndawa Elisabeti akayili ngida, na woha wawili wakayili wagogolo pa magono gawe.
8Leka yikayili kukita, pa magono ga kuwikika nyambiko pa miho ga Mulungu pa lukumbi lwa kuyupilana, 9kwa nkuwu wa mahengo ga kasisi, kukandondalili kuyingila pandu papakape pa Bambo kukwelesa lubani. 10Ni lipuga lyoha lya nsafi likayili mu kuluwa kunja pa lukumbi lwa lubani. 11Leka akambonakili malaika wa Bambo wakuyima pa kiwoko kya ndilo kya mathbahu ga lubani. 12Nu Zakaria akalipwiki mwoyo pala akambweni, nu woga ukangwilili. 13Leka malaika akanjowili, Ukotoke kuyogopa, Zakaria; pakuya liluwo lyako liyufwaniki, ni mhanuwo Elisabeti yakuhogolele mwana, nawe yaunkemele lihina lyake Yohana. 14Na yakiye kwako kiheko nu kuyangala; na wingi yawahekelele pa kuhogoleka kwake. 15Ndawa yaaye nkulungu pa miho ga Bambo, na yanywe lepa mvinyo, haka mvinyo wa kuwawa; na yamene nu Roho Mbalafu, ena kihumile mu luleme lwa nyina. 16Na wingi wa wana wa Israel yawakilawuse kwa Bambo Mulungu wawe. 17Na yalongolele pa miho gake pa roho ni mbafu sya Eliya, kwikilawusa mioyo ya wakadadi kwa wana, na wala wangayufwa pa malango ga wakukita malinga; kuwikila ngani kwa Bambo nsafi wa kutendekeseka ngani. 18Na Zakaria akajowiti kwa malaika, Kwa ndingo wuli yanimanye iki? pakuya nenga ngogolo, nu mhanu wangu nya malango pa magono gake. 19Na akahigiti malaika, nakajowiti kwa yombe, Nenga na Gabriel, wakuyima pa miho ga Mulungu; na nikatumiki kulongela na wenga, na kukutolela ndumi sinofu isi. 20Na lola, yauye kinunu, nukuhotola lepa kulongela, mpaka ligono lila findu ifi yafipate kuya, ndawa ukela lepa malowe gangu, gala yagamalasike pa lukumbi lwake. 21Nu nsafi ukayili mu kundolalela Zakaria, ni wakayili ni kuganagana pa kusyela yombe pa hekalu. 22Leka pala akapititi, akahotwili lepa kulongela nawo: ni wakawalalili kukita aweni lingumbisi pa hekalu: nuyombe akayili mu kuwakinyila, na akayili kisiwasi. 23Ni yikayili kukita, baha gakamaliki magono ga kutumakila kwake, akabiti kwake.
24Leka panyuma pa magono aga Elisabeti mhanu mundu akayili nu luleme; 25ni akifihiti miesi mhano, kujowa, Wiwila anikitili Bambo pa magono gala akanilolalili, kuwusa kudogeka kwangu pa wandu.
26Leka pa mwesi wa ntanda malaika Gabriel akatumiki kuhuma pa Mulungu ku likaya lya Galilaya, lihina lyake Nazareti, 27kwa bikira wa kuhongeka ni ngosi lihina lyake Yosefu, wa nyumba ya Daudi; lihina lya bikira yula Mariamu. 28Na akayingili kwake, nakajowiti, Salaam, wakumema nu neema, Bambo ayii pamonga nawe. 29Leka yombe akalipwiki mwoyo pa lilowe lila, na akaholiti kulamusa uku kuyii wuli. 30Na malaika akajowiti kwa yombe, Ukotokuyogopa, Mariamu: pakuya ukikolili neema kwa Mulungu. 31Na lola, yauyime luleme, ni yauhogole mwana, na yaukemele lihina lyake YESU. 32Yombe yaaye nkulungu, na yakemaleke Mwana wa Yula wa kunani nyamhope: nu Bambo Mulungu yampele kitihu kya dadi mundu Daudi: 33na yaaye mutwa panani pa nyumba ya Yakobo kwa miaka ni miaka; ni kumalika kwa utwa wake yakuye lepa. 34Leka Mariamu akajowiti kwa malaika, Iki yakiye wuli, ndawa ngosi nakumanya lepa? 35Na pakahigiti malaika akajowiti kwa yombe, Roho Mbalafu yakuhichile, ni mbafu ya Yula wa kunani nyamhope yakulekele kifwili: ndawa ya iki kawili kila yakihogoleke yakikemaleke kiwalafu, Mwana wa Mulungu. 36Na lola, Elisabeti ndongowo, yombe kawili ayimi luleme lwa mwana ngosi pa ugogolo wake: nu mwesi uwu wa ntanda kwa yula akemaleka ngida. 37Ndawa nukuya lilowe lya kuhumila pa Mulungu yalitame lyangali mbafu. 38Nu Mariamu akajowiti, Lola, mbanda wa Bambo; kunitamile kwa ndingo wa lilowe lyako. Na malaika akawukiti kundeka.
39Leka Mariamu akawukiti pa magono gala, nakagenditi ku ndima wa fidunda ni ukiki, ku likaya lya Yudaya; 40na akayingili mu nyumba ya Zakaria na akandamwisi Elisabeti. 41Ni yikayili kukita baha na baha, pakayufwini Elisabeti kulamusa kwa Mariamu, kanyehe kakajumbiti mu luleme lwake; 42nu Elisabeti akamemasiki nu Roho Mbalafu; na akakuwiti ni lilowe likulungu, nakajowiti, Nya kihomo wenga pa wadala, ni nya kihomo kipambiko kya luleme lwako. 43Na kuhumila kuliku niyii nakyo iki, kukita nyina wa Bambo wangu anihichile nenga? 44Pakuya lola, baha lilowe lya kulamusa kwako likayingili mu makutu gangu, kanyehe kakajumbiti mu luleme lwangu pa kiheko. 45Na wakusengwa yula akakeliti; pakuya yakuye kumalakisa findu ifi filongaliki kwa yombe nu Bambo. 46Nu Mariamu akajowiti,
Wumi wangu umkwisisya Bambo,
47Roho wangu uhekalili pa Mulungu, Njokosi wangu.
48Pakuya auloliti uchoko wa mbanda wake:
Pakuya lola, kitumbulile lilino fihogosi fyoha yafinikemele mwene kihomo.
49Ndawa mwene mbafu anikitili makulungu;
Ni lihina lyake liyii pa lyakape.
50Ni lipyana lyake liyii mpaka fihogosi ni fihogosi
Kwa wala wakunjogopa.
51Akiti mbafu kwa kiwoko kyake;
Awayambanisi wa kinywinda pa maholo ga mioyo yawe.
52Awusiti wene mbafu pa fitihu fyawe,
Awanyanyamwili wala wayii pasi.
53Awatupilisi ni finofu wakuwona njala;
Awapili wakafi mwanja mawoko ga waka.
54Antangatili Israel mpalo wake,
Kukumbukila lipyana
55(Umu atawili ni wakadadi witu)
Kwa Ibrahim nu mbeyu yake kwa miaka.
56Leka Mariamu akahweliti pamonga nuyombe ngati miesi yidatu, ni akakilawiki ku nyumba yake.
57Leka lukamalasiki lukumbi lwake Elisabeti lwa kusinda; na akahogwili mwana ngosi. 58Na wakayufwini wenesi wake na walongo mundu kukita Bambo akwisisye lipyana lyake pa yombe; ni wahekalili pamonga nako. 59Ni yikayili kukita pa ligono lya nane, wakachiti kukasilamusa kamwana kala; na wayili mu kukakemela Zakariya, kwa lihina lya dadi mundu. 60Nu nyina pakahigiti akajowiti, Lepa: koma yakemaleke Yohana. 61Na wakajowiti kwa yombe, Payilepe yumonga wa walongowo wakukemaleka lihina ili. 62Leka wakakinyili kwa dadi mundu, kukita ngaalonditi akemeleke lihina wuli. 63Ni pakaluwiti kapondo ka kulembela, akalembiti, Yohana liyii lihina lyake. Ni wakakangichi woha. 64Leka ndomo wake ukadinduliki hino apa, nu lulimi lwake lukawopwiki, na akalongili, kundumba Mulungu. 65Nu woga ukawagwilili woha wala wayili wenesi: ni pa ndima woha wa fidunda fya Yudaya fikalongaliki poha poha findu ifi fyoha. 66Na woha awa wayufwini wakafiwiki pa mioyo yawe, kujowa, Kiki kamwana aka yakiye? Ndawa kiwoko kya Bambo kikayili pamonga nuyombe.
67Nu Zakaria dadi mundu akamemasiki nu Roho Mbalafu, na akalwetiti, kujowa,
68Ahikaliki Bambo, Mulungu wa Israel;
Ndawa alolalili nsafi wake ni kuwakombola.
69Na atutawisi linyelo lya uyokosi kwa tenga
Pa nyumba ya Daudi nsafi wake
70(Umu akajowili pa ndomo pa wakulweta wake wawalafu wala wayili baho kitumbulile kuupanga ndima),
71Uyokosi pa wa mitumba witu, na pa mawoko ga woha wakutiwipila;
72Kumalisa lipyana kwa wakadadi witu,
Kukumbukila malangano gake mawalafu;
73Kila andapalakisi dadi witu Ibrahim.
74Kutipela tenga kukita wona tiyokwiki pa mawoko ga wa mitumba witu,
Tintumakile pangali woga,
75Pa uwalafu ni ugolofu pa miho gake magono goha ga kulama kwitu.
76Na wenga mwana, yaukemeleke wakulweta wa Yula wa kunani nyamhope:
Ndawa yaulongolele pa miho ga Bambo kuwikila ngani ndila syake;
77Kumanyisa nsafi wake uyokosi
Pa kuwalekelekesa sambi syawe,
78Ndawa ya mwoyo wa lipyana wa Mulungu witu,
Mumu kiwumbu kuhumila kunani yakitilolalele tenga,
79Kuwamulikila wala wakutama pa lwisi ni pa kifwili kya kifwa;
Kulongosa njayo situ pa ndila ya kindamba.
80Leka kamwana kakakuliti, ni kakakangamasiki pa roho, na akayili mu mapululu mpaka ligono lya kulasika kwake kwa Israel.
Currently Selected:
Luka 1: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
