Luka 5

1Ni yikayili kukita, apa lipuga likanfinyikisi ni kuyufwanila lilowe lya Mulungu, akayili mu kuyima mu makigi ga nyanja ya Genesaret; 2na akaweni maboti gawili gayimi pa makigi ga nyanja: leka wakulowa somba wakafuwiki, na wakayili mu kuguyula njafu syawe. 3Na yombe akayingili mu liboti limonga, lya Simon, nankotiti akulule pachokope kuhuma pa ndima. Leka pakatemi pasi akayigalisi mapuga pa liboti. 4Leka baha na baha pakakotwiki kulongela, akajowiti kwa Simon, Kulula ku china, ulekele njafu sinu, ukite litengo. 5Ni pakahigiti Simon, akajowiti, Bambo, tihumbusiki kilo kyoha, tikapatiti lepa kindu: leka pa lilowe lyako yanilekele njafu. 6Na pala wakakiti iki, wakawunganisi somba nyingi ngulungu; leka njafu syawe sikayili mu kukachuka; 7na wakawakinyili wala wakukunganila pa liboti lingi, wahiche kuhapulana nawo. Na wakachiti, wakamemisi maboti goha gawili, mpaka gakatumbwili kuyiwila. 8Koma pakaweni Simon Petro, akagwili pasi pa mafugamilo ga Yesu, kujowa, Wuka pa nenga; ndawa niyii mundu mwene sambi, Bambo. 9Pakuya ntendemu ukankamwili yombe, ni woha wala wakayili pamonga nuyombe, pa litengo lya somba lila wakaliwunganisi; 10na wiwila Yakobo nu Yohana, wana wa Zebedayo, wala wakakunganili na Simon. Nu Yesu akajowiti kwa Simon, Usiyogopa; kitumbulile hino yauye wakulowa wandu. 11Na pala wakakwesiti maboti gawe pa ndima, wakalekiti fyoha, na wakankisiti yombe.

12Ni yikayili kukita, pakuya yombe pa likaya limonga; lola, mundu wakumema ni matana: leka pa akambweni Yesu, akagwili ukupama, nakampembisi, kujowa, Bambo, wona ulonda, uhotola kuniguyula. 13Na akatambalisi kiwoko kyake, akankwafiti, kujowa, Nilonda: uguyulikaye. Na hino apa matana gakambukiti. 14Nuyombe akantaukili asitawila haka kwa mundu: koma ubitaye pa mwanja wako, wilase kwa kasisi, na ulekele kwa kuguyulika kwako, ngati umu Musa akataukili, kutama ulungamakiso kwawe. 15Leka kulutila muni mbili yikawandasiki ya yombe: na gakawungini pamonga mapuga makulungu kuyufwanila, na kulamasika pa ulegelefu wawe. 16Leka yombe akagwaliti mu mapululu, ni akasaliti.

17Ni yikayili kukita pa ligono limonga lya gala, yombe akayili mu kuyigalisa; na wakayili waFarisayo watemi pasi ni walimu wa torah, wala wakahumiti pa likaya liyi lyoha lya Galilaya ni Yudaya ni Yerusalem: ni mbafu ya Bambo yikayili nuyombe nausi alwase. 18Na lola, wagosi wapinda pa ndengati mundu wa kindengu‐ndengu: na wakalonditi‐londiti kunjingisa, ni kumbika yombe pa miho gake. 19Na apa wakaweni lepa ndila ya kunjingisa yombe ndawa ya lipuga, wakakweliti panani pa king’ango kya nyumba, na wakanselisi mugati mwa matalao ga king’ango pamonga ni kandengati kake pagatigati palongolo pa Yesu. 20Na pakaweni kiyitakiso kyawe, akajowiti, Mundu, sambi syako silekelasiki. 21Na wakulembela na waFarisayo wakatumbwili kupindikana yungi ni njini, kujowa, Nani uyu ajowa blasfemia? Nani ahotola kelekelekesa sambi, lema yumonga wakape yuyu Mulungu? 22Leka Yesu pakawalalili kupindikana kwawe, akahigiti nakajowiti kwa wombe, Mupindikana kiki pa mioyo yinu? 23Kiliku kya manyata, kujowa, Sambi syako silekelasiki; pangi kujowa, Yima, ugendegende? 24Leka nausi mumanye kukita Mwana wa adam ayii ni chengo pa ndima kulekelekesa sambi (akajowiti kwa yula wa kindengundengu), Nikujowela wenga, Uyime, ni upinde kandengati kako, ubitaye ku nyumba yako. 25Na hino apa akayimi pa miho gawe, na akanyanyamwili kya kugonela kila, nakabiti ku nyumba yake, kunkwisa Mulungu. 26Leka ntendemu ukawagwilili woha, na wakankwisiti Mulungu; na wakamemiti nu woga, kujowa, Tifiweni finyantiti lilino.

27Na panyuma pa findu ifi akapititi, na akandolakisi mundu wa kuyupa nsongo, lihina lyake Levi, atamaga pa kuyupa nsongo, nakajowiti kwa yombe, Unikise nenga. 28Na akalekiti fyoha, nakayimiti na akankisiti yombe. 29Nu Levi akankitili kyakulya kikulungu pa nyumba yake: ni likayili lipuga likulungu lya wakuyupa nsongo na wayawe wakutama pa kyakulya pamonga nuyombe. 30Na waFarisayo na wakulembela wawe wakawanung’unikili wanafunsi wake, kujowa, Ndawa kiki mulya na munywa pamonga na wakuyupa nsongo na wene sambi? 31Ni pakahigiti Yesu, akawajowili, Wa kusangaluka walonda lepa nganga; koma watamu. 32Nichiti lepa kuwakemela wagolofu koma wene sambi kwa kupela. 33Leka wakajowiti kwa yombe, Wanafunsi wa Yohana wakunga kyakulya apa ni apa, na wakitila maluwo: kimongamonga wanafunsi wa waFarisayo; leka wako walya ni wanywa. 34Leka Yesu akajowiti kwa wombe, Muhotola ati kuwakungisa wana wa nyumba ya nduwusi, apa ntuwusi ayii pamonga nawo? 35Leka magono yagahiche; na pala ntuwusi yayupike kwawe, bahalapala yawakunge magono gala. 36Leka akawajowili ngongo kawili; Pa waka mundu akachula kiwamba kya mwingila wa hino ni kukiwambila pa mwingila wa mwandi; leka wona akita wila, yakachule wula wa hino, ni kiwamba kya wula wa hino yakilinganile lepa ni wula wa mwandi. 37Na pa waka mundu alekela mvinyo wa hino pa mahako ga mwandi; leka wona akita wiwila, mvinyo wa hino yaupufuke mahako, na wene yauyitike, na mahako yagayanangike. 38Leka mvinyo wa hino ngaulekaliki pa mahako mapya. 39Na pa waka mundu pala anywili mvinyo wa mwandi ni alonda wa hino: pakuya ajowa, Wa mwandi uyii unofu.

Currently Selected:

Luka 5: MGS1937

Highlight

Copy