Makitiko Ga Maapostolo 2

1Na pala ligono lya Pentekote likamaliti kufika, wakayili woha pandu pamonga. 2Na kipwitukile yikahumili kunani njwawila ngati kupupuma kwake mbepo ya makakala muni, na yikamemisi nyumba yoha pala wakayili mu kutama pasi. 3Na gakawawonekili malambi gakugawikana, kihwanakiso kya mwoto; na ukatulili pa ayi yoha wa wombe. 4Na woha wakamemiti nu Roho Mbalafu, na wakatumbwili kulongela ni nimi singi, umu Roho akayili kuwapela kupisa malowe.

5Leka wakayili wakuhwela pa Yerusalem waYehudi, wakugwilakimbo na wene, kihumile mhuku uyi woha pasi pa mafundi. 6Na pala njwawila iyi yikayufwaniki, lipuga likawunganiki pamonga, ni wakayambaniki mwoyo, ndawa ayi yoha akawayufwini wombe na wajowa pa njowelo ya yombe mwene. 7Na woha wakaganaganiti ni kukangacha, kukita, Lola, si wohawa wajowa apa waGalilaya? 8Ni wuli tiyufwana, ayi yoha pa njowelo yake mwene, umu tahogolakili? 9waParthi ni waMedi ni waElam, na wala wakuhwela pa Mesopotamia, pa Yudaya ni Kapodokia, pa Ponto ni Asia, 10pa Frugia ni Pamfulia, pa Egupto ni pa malundu ga Lubia lisi lya Kurene, ni wageni wa Roma, waYehudi na kawili waproselute, 11waKrete ni waArabu, tiwayufwana ni walongela pa njowelo situ makitiko makulungu ga Mulungu. 12Na wakaganaganiti woha, na wakayili mu kukangachila, yumonga kujowa ni njini, Kiki iki? 13Koma wangi kudoga wakajowiti, Awa wagaliti mvinyo wa hino.

14Koma Petro, akayimi pamonga na kumi na yumonga, akakuwiti lilowe lyake, naakawapisili malowe kukita, Wagosi wa Yudaya, na mwenga wakuhwela pa Yerusalem mwawoha, iki kimanyike kwinu, ni mutegaye makutu kwa malowe gangu. 15Pakuya awa nukuya wakugala, umu muholela; 16pakukita iyii saa yakadatu ya musi; koma iki kiyii kikajowiki ni wakulweta Yoel;

17Na yakiye pa magono ga kumalakila, ajowa Mulungu,

Yanipungulile ya Roho wangu pa nyama iyi yoha:

Na wana winu wagosi na wadala yawalwete,

Na wapalo winu yawawone ndoto,

Na wakulungu winu yawalote kilotile:

18Ena, na pa wawanda wangu wagosi ni wadala pa magono gagalagala

Yanipungulile ya Roho wangu; leka yawalwete.

19Ni yanilase finyantiti pa mafundi kunani,

Ni fiwalalilo fya pa ndima pasi;

Mwasi, nu mwoto, ni mfuki wa lyosi:

20Lijuwa yaling’anamwike kutama lwisi,

Ni mwesi kutama mwasi,

Lyakona lyangafika ligono lya Bambo,

Lila likulungu ni lyakuwonekela:

21Ni yakitame kukita ayi yoha uyu yalikemelele lihina lya Bambo yayokoleke. 22Wagosi wa Israel, muyufwanilaye malowe aga: Yesu wa Nazareti, mundu wakuyitikalika nu Mulungu kwa mwenga, pa fya mbafu ni finyantiti ni fiwalalilo, fila Mulungu akafikiti pa yombe pagati pa mwenga, umu mumanyila mwawene; 23yuyu mukambambiti pa msalaba ni kunkoma, pa luhala lwakuwikika ni kumanya palongolo kwa Mulungu, pa mawoko ga wandu wangayufwanila: 24uyu Mulungu akanjimwisi, apa akawopwili fyakuwina fya kifwa: ndawa nukuhotoleka kukita akamulike nakyo. 25Pakuya Daudi ajowa ya yombe,

Nikamweni Bambo pa miho pangu magono goha;

Ndawa ayi pa kiwoko kyangu kya kigosi, nausi nisikangika:

26Ndawa iyi mwoyo wangu ukasangalwiki, ni lulimi lwangu lukalulwiti;

Ena, nyama yangu kawili yayihwele pa kihuwalilo:

27Ndawa yauleke lepa wumi wangu pandu pa mahoka,

Haka kumpela Mbalafu wako awone kuyanangika, yaupele lepa.

28Ukanimanyisi ndila sya kulama;

Yaunimemese ni kusangaluka pa kyene kyako.

29Walongo, niwajowele mwenga ya dadi wa mwandi Daudi, kukita akafwili na kawili akawikiki mu manyinja, ni linyinja lyake liyii bahapa nu tenga mpaka lilino. 30Mumu pakuya wakulweta, ni kumanya kukita Mulungu akandapalili, kukita kuwuka pa fipambiko fya mu kiwuno mwake yamwike pa kitihu kyake; 31akaweni palongolo, ni akajowiti ya kusyuka kwake Kristo, kukita nakulekeka pandu pa mahoka, haka nyama yake nakuwona kuyanangika. 32Uyu Yesu Mulungu akanjimwisi, na tenga tawoha tiyii walungamakiso. 33Mumu yombe, wakukwisika pa kiwoko kya ndilo kya Mulungu, ni wakuyupa pa Dadi kilago kya Roho Mbalafu, wapungulili iki, kila mukiwona ni kuyufwana. 34Pakuya Daudi akakweliti lepa kunani: koma ajowa ya mwene,

Bambo akanjowili Bambo wangu, Tama pa kiwoko kyangu kya ndilo,

35Mpaka pala yaniwawike wa mitumba wako kyakuwikila kya njayo syako.

36Mumu nyumba yoha ya Israel yiwalalile, kukita Mulungu wankiti uyu Yesu, yula mukambambiti pa msalaba, Bambo nu Kristo.

37Koma pala wakayufwini wakahomiki mu mwoyo, na wakawajowili Petro na maapostolo wangi, Walongo yatikite kiki? 38Ni Petro akawajowili, Mupelaye, ni mubatasike ayi yoha wa mwenga pa lihina lya Yesu kwa kulekelekesa sambi sinu; ni yamuyupe kya waka kya Roho Mbalafu. 39Pakuya kilago kiyii kwa mwenga, ni kwa wana winu, ni kwa wohawa wayii patali, wayii woha wala Bambo Mulungu witu yawakemelele kwake. 40Na pa malowe gangi gangi ga mahele akawalasiti ulungamakiso ni kuwakila, kukita, Mwikengelele pa kihogosi iki kya mibidu‐mibidu. 41Na wombe wala wakayupiti lilowe lyake wakabatasiki: ni wakayonjakesiki kwawe ligono lililalila mawumi ngati maelfu gadatu. 42Na wakayili mu kukangamala pa mayigaliso ga maapostolo ni pa kuhasangana, ni pa kumetula nkate, ni pa sala.

43Na woga ukawagwili mwoyo uyi woha: ni finyantiti fya mahele ni fiwalalilo fikakitiki pa maapostolo. 44Na wohawa wakukela wakayili pamonga, ni wakayili kuhasangana pa fyoha; 45na wayii mu kuhemesa fyuma fyawe na fila wakayili nafyo, ni kuwagawila woha, umu fyansowili mundu. 46Ni ligono ni ligono, kikangamalile nu mwoyo umonga mu hekalu, ni pa kumetula nkate nyumba kwa nyumba, wakayili kupokelana kyakulya ni kuyangala ni kwa umoyo umonga, 47kundumba Mulungu, ni kuganisa nu nsafi woha. Leka Bambo akayili mu kuwayonjakasela wala wayii mu kuyokoleka ligono ni ligono.

Currently Selected:

Makitiko Ga Maapostolo 2: MGS1937

Highlight

Copy