Makitiko Ga Maapostolo 1

1Kitabu kila kyakutumbula nikakiti, Teofilo, ya fyoha fila Yesu akatumbwili kufikita ni kufiyigalisa, 2mpaka ligono lila akatoliki munani, pakamaliti kuwataukila pa Roho Mbalafu maapostolo wala akawahagwili: 3kwa wala iwikiti kawili wa wumi panyuma pa kuhumbusika kwake ni fiwalalilo fya mahele, kuwawonekela awa pangi pangi pa magono makumi ncheche, ni kulongela nawo sya utwa wa Mulungu: 4ni pakusyowelela pamonga na wombe, akawataukili kukita wasihama kuwuka pa Yerusalem, koma mlindalile kilago kya Dadi, ikyo mwayufwini pa nenga: 5pakuya Yohana nuyombe akabatisi ni machi; koma mwenga yamubatasike nu Roho Mbalafu panyuma pa magono nukuya mingi.

6Mumu wala, pawakachiti pamonga, wayili mu kunkota kujowa, Bambo, pa magono aga yauyimise kawili utwa pa Israel? 7Nuyombe akawajowili, Nukuya kwinu kupata kumanya miaka ni ngumbi, sila Dadi akasiwikiti pa chengo kya mwene wakape. 8Koma yamuyupe mbafu, Roho Mbalafu wona awachilili mwenga: leka yamuye walungamakiso wangu pa Yerusalem, ni pa Yudaya poha, ni pa Samaria, ni mpaka songo sya ndima uwu. 9Na pakajowiti aga, mukulola waka wombe, akatoliki kunani; ni lifundi likanjupiti kuhuma pa miho gawe. 10Na baha na baha wayili mu kundolakesa kunani mukubita mwanja yombe, lola, wandu wawili wakayimiti bahalapala pa wombe ni mingila miwalafu; 11wala wakajowiti kawili, Wagosi wa Galilaya, muyima wuli kilolalile kunani? yuyu Yesu, uyu akatoliki munani kuwuka pa mwenga kiyingalile kunani, yayiche mumulamula umu mwambonili niabita mwanja munani.

12Bahalapala wakilawukili ku Yerusalem kuhumila ku kidunda kyakukemaleka kya Miseituni, iki kiyii papipi ni Yerusalem, kugenda ligono lya Sabato. 13Leka pala wakayingili, wakakweliti pa kindemula pala wayii mu kuhwela; Petro na kawili Yohana nu Yakobo nu Andrea, Filipo nu Tomaso, Bartolomayo nu Mattayo, Yakobo wa Alfayo, nu Simon mZelote, nu Yuda wa Yakobo. 14Awa woha wayili mu kukangamala nu mwoyo umonga pa sala, pamonga nu wadala, nu Mariam nyongolo wa Yesu, ni walongo mundu.

15Na pa magono gagalagala Petro akayimiti pagatigati pa walongo, na akajowiti (ni pakayili lipuga lya mahina tengelemu ngati mia ni makumi gawili), 16Walongo, galinganili malembo aga kumemeseka, gaga akajowiti mwandi Roho Mbalafu pa ndomo wa Daudi panani pa Yuda, uyu akawalongwisi wala wakakamwili Yesu. 17Pakuya akawalangiki pagati pa tenga, ni akakolili lilundu lyake pa lihengo ili lyakutumakila. 18(Mundu uyu akapatiti ngunda ni njombe ya usokosi wake; ni pakagwili mutu pasi, akakaywiki lileme, na matumbo gake goha gakayambaniki. 19Ni ikamanyiki na woha wakuhwela pa Yerusalem; mpaka pandu pala pakemaleka pa njowelo yawe wene Akeldama, lili, Ngunda wa mwasi.) 20Pakuya ilembiki pa kitabu kya Saburi,

Pakutamila pake papate kuya lipululu.

Na mundu asitama mumu:

ni,

Lihengo lyake atole yungi.

21Mumu kulinganila kuhagula yumonga wa wandu wala wakagenditi pamonga na tenga pa magono goha pala Bambo Yesu akayingili nu kupita pa tenga, 22kitumbulile pa ubatiso wa Yohana, mpaka ligono lila pala akatoliki kutileka, atame ndungumakiso wa kusyuka kwake pamonga na tenga. 23Na wakawikiti wawili, Yosef akakemaliki Barsaba, uyu akemaleka kawili Yusto, ni Mattiya. 24Na wakasaliti kujowa, Wenga, Bambo, wakuyimanya mioyo ya wandu woha, 25ulase yuliku wa awa wawili uhagwili yumonga, kuyupa pandu pa kutumakila kula ni lihengo lya apostolo, lila Yuda akalihokili, kubita mwanja pandu pa yombe wakape. 26Na wakalondolili pa wombe; nu uganga ukagwili pa Mattiya; na akawalangiki pamonga na maapostolo kumi ni yumonga.

Currently Selected:

Makitiko Ga Maapostolo 1: MGS1937

Highlight

Copy