Yohana 21

1Panyuma pa ifi Yesu akilasiti mwene kawili kwa wanafunsi pa nyanja ya Tiberia; na akilasiti naha. 2Wakayili pamonga Simon Petro, ni Tomaso wa kukemeleka wa mapasa, ni Nathaniel wa Kana pa Galilaya, ni wana wa Zebedayo, na wawili wangi wa wanafunsi wake. 3Simon Petro awajowela, Niwuka kulowa. Wanjowela, Nati tihicha na wenga. Wakapititi, na wakayingili mu liboti; ni kilo kila wakapatiti lepa kandu. 4Leka pa kiwumbu, Yesu akayimiti mu masekwa; koma wanafunsi wakamanyiti lepa kukita ayii Yesu. 5Mumu Yesu awajowela, Wana, muyii ni kindu kya kulya? Wakamhigiti, Pa waka. 6Leka akajowiti kwa wombe, Mulekelaye luwafu lisi lya ndilo lya liboti, ni yamukolele. Mumu wakalekili, ni hino nakuhotola kulufuta kwa somba kufuluka. 7Mumu mwanafunsi yula Yesu anganiti anjowela Petro, Yuyu ayii Bambo. Mumu Simon Petro apa akayufwini kukita yuyu ayii Bambo, akikungiti kifwato kyake mu kiwuno mwake (pakuya akayili kibuna), na akitagiti mu nyanja. 8Leka wanafunsi wangi wakachiti mu liboti (pakuya wakatalukini lepa kuhuma pa ndima, koma ngati mikono mia siwili), kukifuta kilepa ni somba sila. 9Mumu apa wakafuwik pa ndima, walola mwoto wa makenya ukosiki, ni somba siwikiki, ni nkate. 10Yesu awajowela, Mutolaye pa somba isi mukalowiti hino. 11Mumu Simon Petro akalutiti, na akafutili kilepa ku ndima, kya kumema ni somba sikulungu, mia na hamsini ni sidatu: haka syayili sya mahele wila, kilepa kyapapwiki lepa. 12Yesu awajowela, Muhichaye, mulyaye kya kulauka. Na pa waka wa wanafunsi wakugana kunkotekesa, Wenga uyii wa naa? pa kumanya kukita ayii Bambo. 13Yesu ahicha, na ayupa nkate, na awapela wombe, ni somba wiwila. 14Apa hino pa kadatu Yesu akilasiti kwa wanafunsi, apa akasyukiti pa wakufwa.

15Mumu apa wakaluwiki, Yesu anjowela Simon Petro, Simon wa Yohana, unigana nenga kulutila awa? Anjowela, Ena, Bambo: wenga umanya kukita nikugana wenga. 16Anjowela, Lisa wana wa ling’osi wangu. Anjowela pa kawili, Simon wa Yohana, unigana nenga? Anjowela, Ena, Bambo, umanya kukita nikugana wenga. Anjowela, Dima mambelele gangu. 17Anjowela pa kadatu, Simon wa Yohana, unigana nenga? Akaniongoniki Petro ndawa akajowiti kwa yombe pa kadatu, Unigana nenga? Nakajowiti kwa yombe, Bambo, umanya fyoha; umanya kukita nikugana wenga. Yesu anjowela, Lisa mambelele gangu. 18Chakaka, chakaka, nikujowela, Apa ukayili nsongolo, wikungeye mu kiwuno wa mwene, ni ugendeye uko ulonditi: leka baho yaugogoloke, yautambalise mawoko gako, ni yungi yakukunge, na yakutole uko ulonda lepa. 19Leka akajowiti ili kulasa ndingo wa kufwa yankwise Mulungu nawo. 20Na apa akajowiti iki, anjowela, Unikise nenga. Petro, apa akang’anamwiki, andola mwanafunsi yula akanganiti Yesu akisa; uyu kawili akanjegamileye pa kifimba kyake pa kyakulya kya ndalilo, nakajowiti, Bambo, wa kukufumbula ayii nani? 21Mumu Petro apa akambweni anjowela Yesu, Bambo, leka uyu kiki? 22Yesu anjowela, Wona nilonda uyu kuhwela mpaka pala nihicha, kiki kwa wenga? wenga unikise nenga. 23Mumu lilowe ili likapititi pa walongo, kukita mwanafunsi yula nukufwa lepa: leka Yesu akajowiti lepa kwa yombe kukita yawone kufwa lepa; koma, Wona nilonda uyu kuhwela mpaka pala nihicha, kiki kwa wenga?

24Uyu ayii mwanafunsi yula alungamakila aga, ni akalembiti aga: na timanya kukita ulungamakiso wake uyii wa chakaka.

25Na gayii mingi gangi kawili gaga akitaga Yesu, aga na gombe wona galembikaye limonga limonga, nihola haka ndima wene ngaulinganili lepa kwa fitabu ifi ngafilembiki.

Currently Selected:

Yohana 21: MGS1937

Highlight

Copy