Makitiko Ga Maapostolo 3

1Leka Petro nu Yohana wakayili kukwela kuyingila pa hekalu saa ya sala, ya mhano na ncheche. 2Leka mundu nunuyu wakuchipila kihumile mu luleme lwa nyongolo atuwulikaga, yula wambikaga ligono ni ligono pa ndyango wa hekalu wakukemaleka Wakuniamba, nausi aluwe fya lukolo kwa wala wayingila mu hekalu; 3yula akawaweni Petro nu Yohana walondaga kuyingila mu hekalu, akaluwiti kukita ayupe fya lukolo. 4Leka Petro, akalolakisi, pamonga nu Yohana, akajowiti, Utilolalele tenga. 5Leka yombe akawalolalili, kuhuwalila kuyupa kindu kwawe. 6Koma Petro akajowiti, Ndarama ni zahabu niyii nasyo lepa; leka ikyo niyii nakyo nikupela. Pa lihina lya Yesu Kristo wa Nazareti, ugendaye. 7Leka akankamwili kiwoko kyake kya ndilo, ni akanjimisi: na hino apa njayo syake sikangamasiki ni fisekeseke fyake. 8Ni akajumbiti, akayimiti, na akatumbwili kugendagenda; na akayingili nawo mu hekalu, kugendagenda ni kujumba, kundumba Mulungu. 9Leka wandu woha wakambweni ni agendagenda ni kundumba Mulungu: 10ni wakamwalalili yombe, kukita uyu akayili wakutama pasi nausi apate fya lukolo pa ndyango Wakuniamba wa hekalu: ni wakamemiti ni makangacho ni kukenyamuka pa kila kikamgwili yombe.

11Leka apa akawakamwili Petro nu Yohana, wandu woha wakawakimbalili pamonga pa lufuka lwakukemaleka lwa Solomoni, wakenyamuka waka. 12Leka Petro pakaweni, akahigiti kwa nsafi, Wagosi wa Israel, mukangacha kiki pa uyu? pangi mutilolakesa kiki tenga, ngati tenga kwa mbafu situ takape pangi pa kugoloka kwitu tinkiti uyu kugendagenda? 13Mulungu wa Ibrahim, ni wa Isaak, ni wa Yakobo, Mulungu wa wakadadi witu, akankwisisi Mwana mundu Yesu; uyu mwenga mukamfumbwili, na mukankaniti pa kyene kya Pilato, pala akapawili yombe kumbopola. 14Leka mukankaniti Mbalafu nu Wakugoloka yula, ni mukaluwiti kukita mundu wakukoma apelekeke waka kwinu, ni Wakulongosa wa wumi mukankomiti; 15uyu Mulungu akansyusiti pa wakufwa; wa yuyu tenga tiyii walungamakiso. 16Na kwa kukela pa lihina lyake, yuyu mundolakesa na mummanya, lihina lyake likankangamisi: ena, na kukela kuyii kwa yombe, kukampili kulama kula pa mbili woha pa miho ga mwanga mwawoha. 17Na hino, walongo, nimanya kukita mukakiti pangali kumanya, umu wakulu‐wakulu winu kawili. 18Leka Mulungu akafimalisi wiwi, fila akalasiti palongolo pa ndomo wa wakulweta woha, kukita Kristo wake yahumbusike. 19Mumu mupelaye, ni mung’anamukaye, nausi sambi sinu sisimike, kukita ngumbi syakuhulusa sifike kuhumila pa kyene kya Bambo; 20leka antume Kristo uyu awikikingani kwinu, yuyu Yesu: 21yula mafundi galinganila kunjupa mpaka ngumbi sya kukilawusa fyoha, sila Mulungu akajowiti pa ndomo pa wakulweta wake wawalafu kitumbulile ndumbulo ya ndima. 22Musa nuyombe akajowiti, Bambo Mulungu yanjimasile wakulweta pa walongo winu ngati nenga; munjufwanilaye yombe pa fyoha fila yalongele nu mwenga. 23Leka yakuye kukita wumi uyi woha uwu nawombe nukuyufwana lepa wakulweta yuyula, yatagike kitagikile pa nsafi. 24Ena, na wakulweta woha kitumbulile Samuel na wala wakunkisa yombe, wala woha wakajowiti, wakawandisi nawombe kawili sya magono aga. 25Na mwenga muyii wana wa wakulweta, na wa kilago kila Mulungu akalagini nawo wakadadi winu, kunjowela Ibrahim, Ni pa mbeyu yako mitangilo yoha ya ndima yayipelewe kihomo. 26Kwinu pakutumbula Mulungu, pakayimiki Mwana mundu, akantumiti kuwapela mwenga kihomo, pa kung’anamusa ayi yoha wa mwenga kuleka fiwifu finu.

Currently Selected:

Makitiko Ga Maapostolo 3: MGS1937

Highlight

Copy