MATTHAI 6

Cit Piakna tawh kisai Jesuh’ Genna

1“Biakna tawh kizomin na hoih khat peuhpeuh na sep uh ciangin mite’ phat ding deihna tawh a kilang theithei dingin na sepkhak loh nadingun na kingaihsun un. Tua bangin gamta le-uhcin, vantungah a om na Pa uh kiang panin thaman na ngah kei ding uh hi. #Mat 23:5.

2“Tua ahih manin mi cimawhte tungah huhna na piak uh ciangin, mite in a phat ding uh a deihna tawh a kineihkhem mite in kikhopna innsung le kongzing lakah a kilang theithei-in a hih uh bangin na hih kei un. Tua bangin a hih mite in thaman a ngah khinta ahihna thu limtakin na phawk un. 3Ahi zongin note in mi cimawhte citna tawh na huh uh ciangin na lawm naihuai pente uh nangawn in hong theih loh nadingun pia unla, 4kuamah theisak kei un. Tua hileh kuama muh lohin na gamtatna uh a mu na Pa un note tungah thaman hong pia ding hi.

Thungetna tawh kisai Jesuh’ Genna

(Luk 11:2-4)

5“Note in thu na nget uh ciangin mite’ muh theih dingin a kineihkhem mite in kikhopna innsung le kongzing lamka lai-ah a ngetnop se uh bangin na gamta kei un. Tua bangin a gamtate in thaman a ngah khinta ahihna uh limtakin phawk un. #Luk 18:10-14. 6Ahi zongin thu na nget uh ciangin na innsung uhah tumin kong khak unla, na muh theih loh uh na Pa uh kiangah na ngen un. Tua hileh kuama muh lohin na gamtatna uh a hong mu na Pa un note’ tungah thaman hong pia ding hi.

7“Thu na nget uh ciangin i thunget sau leh Pasian in hong pia deuh ding hi, ci-in a ngaihsun Gentail mite bangin khiatna a nei tum lo kam tampi na luilui kei un. 8Tua na thunget ma nangawnun na Pa un note’ kisapna teng hong theikhin ahih manin Gentail mite na bang kei un. 9Tua ahih manin thu na nget uh ciangin hih bangin na ngen un:

‘Vantunga om kote’ Pa aw,

na min siangtho kizahtak hen.

10Na ukna hun hong tung hen la,

vantung bangin leitungah zong

na deih bangin kigamta hen.

11Nisim khamkhop

an hong pia in.

12Kote tungah a hong mawhte

mawh maisakna ka neih bangun

ko’ mawhna zong

hong maisak in.

13Ze-etna lian

hong thuaksak ke’n.

Gilo’ kiang pan

hong honkhia in,’

(Uk zawhna, vangliatna,

minthanna, na nei tawntung hi. Amen.)

ci-in na ngen ding uh hi. 14Note in midangte’ hong mawhna na maisak uhleh vantungah a om na Pa un zong note’ mawhna hong maisak ding hi. 15Ahi zongin note in midangte’ hong mawhna na maisak kei uhleh vantungah a om na Pa un zong note’ mawhna hong maisak lo ding hi. #Mrk 11:25-26.

Antanna tawh kisai Jesuh’ Genna

16“An na tan’ uh ciangin a kineihkhem mite bangin maikhingin om kei un. Amaute in an a tanlam uh mite in a theih ding uh a ut manun gilkial mai pua-in a om uh hi. Amaute in a antan’ thaman uh a ngah khinta ahih lamtak limtakin thei un. 17Ahi zongin an na tan’ uh ciangin na mai uh phiatin na sam uh hiat un. 18Tua hileh midangte in na an tanlam uh a theih loh hangin na muh theih loh na Pa un hong thei veve ding a, kuama theih lohin na tanlam uh a hong thei na Pa un note’ tungah thaman hong pia ding hi.

Vantungah Sumkholna

(Luk 12:33-34)

19“Nget in ne-in a kekseu theihna, gutate in luhin a guktheihna hih leitungah na sum uh khol kei un. #James 5:2-3. 20Nget in a nek theih lohna, a kekseu theih lohna, gutate in luhin a guk theih lohna mun vantungah note a dingin kholzaw un. 21Bang hang hiam cih leh na sum omna uhah na lungsim uh om tawntung ding hi.

Pumpi Khuavak

(Luk 11:34-36)

22“Mittang pen pumpi a dingin meivak tawh kibang hi. Na mit uh ciim leh na pumpi un hoihtakin khua mu thei hi. 23Ahi zongin na mit uh maang leh na pumpi uh a dingin khua a mial hi. Tua ahih manin note’ sunga a om khuavak pen a mial hileh tua mialna pen nasia mahmah ding hi.

Pasian le Leitung Sum

(Luk 16:13)

24“Kuamah, to nih’ sila hikhawm thei lo hi. Khat mudahin khat it ding a, khat tungah thumanin khat simmawhbawl ding hi. Note in Pasian’ na le leitung sum na na semkhawm zo kei ding uh hi.

25“Tua ahih ciangin note kiangah kong genin-ah: Na nuntak nadingun bang ne-in bang dawn ding cih ahi a, na pumpi uh a dingin bang silh ding cih ahi zongin lunghimawh lua kei un. Nuntakna pen an sangin thupizaw a, pumpi pen puan sangin thupizaw hi lo ahi hiam?

Kinna le Lunghihmawhna

(Luk 12:22-31)

26“Vanah a leeng vasate ngaihsun dih un: Amaute in khai tuh lo, an zong la lo, sal sungah zong khol lo napi-in vantungah a om na Pa un tuate a nek ding uh tasamsak lo hi. Tua vasate sangin note manphazaw thampek hi lo na hi uh hiam? 27Na lunghihmawh manun kua in na khan uh kum bangzah sotto thei na hi uh hiam? 28Bang hangin puansilh ding lunghimawh na hi uh hiam? Gamlak a om paakte a nuntakzia ngaihsun dih un: Amaute in amau a dingin na lah sem lo, khau zong kheek lo napi-in, 29a hau mahmah Solomon nangawn a hoihpenin a kizep ciangin zong hih paakte banzo nai lo lai hi. #1Kum 10:4-7; 2Khang 9:3-6. 30Tua ahih ciangin tuni-in hingin, a zing ciang mahin meikhukah a kikhultum lel hih gamlak lopate Pasian in puansilh guan ahihleh note hong lim guatzaw ding ahih manin na upna uh a neu mahmah ahi hi. 31Tua ahih manin bang ne ding a, bang dawn ding a, bang silh ding ihi hiam, ci-in lunghimawh lua kei un. 32(Gentail mite in lunghihmawh penin a neihte uh hih bangte ahi hi.) Hih nate khempeuh na kisap lamtak uh vantungah a om na Pa un a thei hi. 33Thudang khempeuh sangin Pasian’ ukna le ama deihna na zuih theih nading uh thupi ngaihsut masazaw un. Tua hileh hih na kisapna dangte khempeuh uh zong hong piathuah veve ding hi.

34“Tua ahih manin zing ciang huna ding ma lungkham masa kei un. Zing ciang thu ding ama thu-in omsak lel un. Tuni thu pen tuni thu mah tawh beisak unla, lungkham ding behlap se kei un.

Currently Selected:

MATTHAI 6: TDB

Highlight

Copy