MATTHAI 5

Mualtungah Thuhilh A Kipatna

(Mat 5-7)

1Jesuh in tua bangin mihon tampi tak a muh ciangin mualtung lamah kahto-in tusuk a, a nungzuite zong ama nai-ah hong tu uh hi. 2Tua ciangin a kam ka-in amaute tungah thu hilh ding kipan a,

Thuphate

(Luk 6:20-23)

3“Kha thu lamah

zawngkhal a kisate sungah

vantung ki-ukna thu om ahih manin

thupha ngah mi ahi uh hi.

4Dahin a thum a tau mite

Pasian in amaute

hehnem ding ahih manin

thupha ngah mi ahi uh hi.#Isa 61:2.

5A lungnem mite in

Pasian’ ciamsa leitang

ngah ding uh ahih manin

thupha ngah mi ahi uh hi.#La 37:11.

6Pasian’ deihteng

sep ding a hanciamte

Pasian in lungkimna

ngahsak ding ahih manin

thupha ngah mi ahi uh hi.#Isa 55:1-2.

7Midang a hehpih mite tungah

Pasian in hehpihna

pia ding ahih manin

thupha ngah mi ahi uh hi.

8Lungsim takpi tawh

Pasian a zong mite in

Pasian mu ding ahih manin

thupha ngah mi ahi uh hi.#La 24:3-4.

9Kilem nading deihin

a hanciam mite in

Pasian’ tate cihna

ngah ding uh ahih manin

thupha ngah mi ahi uh hi.

10Pasian’ deihna bangin

a gamtat manin

bawlsiatna a thuak mite

vantung ki-ukna sungah

a omte ahih manin

thupha ngah mi ahi uh hi.#1Pe 3:14.

11“Midangte in keima hangin a man lopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi.#1Pe 4:14. 12Note a dingin vantungah thaman lianpi hong kikoih kholhsak ahih manin tua bang na tuah uh ciangin nuamin na lungdam un. Note’ hun ma-a kamsangte zong tua bangmahin a na kibawlsia ngei ahi hi.#2Khang 36:16; Sawl 7:52.

Ci le Khuavak

(Mrk 9:50; Luk 14:34-35)

13“Note pen leitung mite a dingin ci tawh na kibang uh hi. Ahi zongin ci a alna bei leh i alsakkik theih nading lampi om nawn lo hi. A kizat nading bangmah om nawn lo a, mite’ tuatcilgawp dingin kipaai lel hi.#Mrk 9:50; Luk 14:34-35.

14“Note pen leitung mite a dingin khuavak tawh na kibang uh hi. Mual dawnah a om khua kiseelcip thei lo hi.#Joh 8:12; 9:5. 15Mei a vak khit ciangin kuamah in lawh khuhlo hi. Meivakna mun sangah koihzaw a, innsung khempeuh a taangsak hi.#Mrk 4:21; Luk 8:16; 11:33. 16Midangte in na gamtatna hoihte uh a muh ciangin vantungah a om na Pa uh min a phat theih nadingun mite mai-ah na gamtat hoihna uh khuavak bangin na kilangsak un.#1Pe 2:12.

Thukham tawh kisai Jesuh’ Genna

17“Moses Thukham le kamsangte’ thuhilhnate a phiat dingin hong pai hi, ci-in hong ngaihsun kei un. Tuate a phiat dingin a hong pai hi loin, amaute’ hilhna a kicingsak dingin a hong pai ka hizaw hi. 18Hoihtakin na phawk ding uh thu panin: Van le lei a bei mateng, hih thukhamte a neupen khat nangawn’ deihna tangtung lopi-in mawkmai lo ding hi.#Luk 16:17. 19Tua ahih manin hih thukhamte lakpan a neupente khat bek nangawn zuikha loin, midangte in zong a zuih loh nadingin a gen mite pen vantung ki-ukna sungah mi neupen hi ding uh hi. Ahi zongin hih thukhamte zui-in, midangte in zong a zuih nadingin a hilh mite pen vantung ki-ukna sungah milian hi ding uh hi. 20Tua ahih manin Pasian’ deihna bangin gamtat nading thu-ah Thukham hilh siate le Farisi mite sangin na cihtakzawk uhleh vantung ki-ukna sungah a om thei bek ding na hi uh hi.

Hehna tawh kisai Jesuh’ Genna

(Luk 12:57-59)

21“Tanglai mite tungah, ‘Mi that kei un. Mi that peuhmah in sihna thuak ding hi,’ ci-in a kigenna thu na zaksa uh ahi hi.#Pai 20:13; Thkna 5:17. 22Ahi zongin ke’n note kiangah kong genin-ah: A sanggampa tungah a heh mi in thukhenna thuakkha thei ding hi. A sanggampa kiangah, ‘Bangmah a kimang lo,’ ci-in a ko bawl mi in uliante mai-ah thusitna thuak thei ding a, a sanggampa kiangah, ‘Mi hai,’ ci-in a simmawh mi in hell meikuang sungah khulna thuak thei ding hi. 23Tua ahih manin Pasian tungah biakna a pia dingin biakna tau mai-ah na om laitakin na sanggamte khat peuhpeuh na tungah a lungkim lohna thu na phawk leh, 24Pasian na biak nading nate, a biakna tau mai-ah nusia photin, pai-in na sanggampa tawh va kilem phot inla, tua khit ciangin hong paikikin Pasian biakna pia in. 25Nangma tungah mi khatpeuh lungkim loin zumah hong khiat leh, zum na tun ma-un hun om lai-in na kilem pak nadingin hanciam in. Tua hikeileh zum na tun uh ciangin thukhente khutsung na tung ding a, thukhente in palikte khut sungah hong apin, palikte in thong sungah hong khum ding hi. 26A mantakin kong genin-ah: Na liau sum na piak khit dong matengin thong sung panin na suakta ngei kei ding hi.

Numei tawh Mawhna thu Jesuh’ Genna

27“‘Mi zi tungah na mawh kei ding hi,’ ci-in a kigenna thu na zaksa uh ahi hi.#Pai 20:14; Thkna 5:18. 28Ahi zongin ke’n kong genin-ah: Mawhpih nopna lungsim tawh numei khat a en mi peuhmah in a lungsimah tua numei tawh a mawh ahi hi. 29Tua ahih manin na mit taklam in na mawh nading hong piansak leh khelkhia inla paai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi. 30Na taklam khut in na mawh nading hong piansak leh sattan inla paai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi.#Mat 18:8; Mrk 9:43.

Kimakna tawh kisai Jesuh’ Genna

(Mat 19:9; Mrk 10:11-12; Luk 16:18)

31“‘A zi a ma mi peuhmah in a zi tungah makna lai pia ta hen,’ ci-in a kigenna zong na zak khitsa uh ahi hi.#Thkna 24:1-4; Mat 19:7; Mrk 10:4. 32Ahi zongin ke’n note kiangah kong genin-ah: Mi khat peuhmah in pasal dang tawh a mawhna hang lobuang, a zi a mak peuhmah a, a zi in pasal a neihkik leh mi tawh a mawh dingin a bawl a suak hi. Tua a kima numei a tenpihte, numei tawh a mawh mah ahi hi.#Mat 19:9; Mrk 10:11-12; Luk 16:18; 1Kor 7:10-11.

Kiciamna tawh kisai Jesuh’ Genna

33“Tanglai-in mite tungah, ‘Pasian tungah na kiciamnate uh pelh kei unla, ama tungah na kiciam bangun tungsak un,’ ci-in a kigenna na zaksa uh ahi hi.#Siam 19:12. #Gam 30:2; Thkna 23:21. 34Ahi zongin ke’n note kiangah kong genin-ah: Hih ding khat peuhpeuh na neih uh ciangin kiciamna na zang vet kei un. Kiciamna-in vantung na zang kei un - Pasian’ tokhom hi veve hi.#James 5:12. #Isa 66:1; Mat 23:22. 35Leitung zong kiciamna-in na zang kei un - Pasian’ khengakna mah hi veve hi. Jerusalem khuapi zong kiciamna-in na zang kei un - Kumpi lian ahi Pasian’ khuapi mah hi veve hi.#Isa 66:1. #La 48:2. 36Kiciamna-in na lutang zong na zang kei in. Na lu tunga om samzang khat bek nangawn a kangsa vomsak thei loin, a vom pen na kangsak thei kei hi. 37Na gen peuhmah ahi ahihleh, ‘Hi,’ ci inla, ahi lo ahihleh, ‘Hilo,’ cihna tawh kicingsak in. Tua bang hi loin kiciamna kam na zat ciangin Dawimangpa tawh kizomin thuman lo na hih lamtak hong kilang hi.

Thukkikna tawh kisai Jesuh’ Genna

(Luk 6:29-30)

38“Note in, ‘Mittang khat tang ding mittang khat, ha khat tang ding ha khat,’ ci-in a kigenna na zaksa uh ahi hi.#Pai 21:24; Siam 24:20; Thkna 19:21. 39Ahi zongin note kiangah ke’n kong genin-ah: A gilote na thukkik kei un. Mi khatpeuh in na paang taklam hong bet leh a langkhat zong na dawh lai zaw in. 40Mi khatpeuh in na puansungsilh a ngahnop manin zumah hong khia-in hong laksak leh na puantungsilh zong na piathuah lai in. 41Galkapte khatpeuh in tai khat sung a van pua dingin hong sawl leh a valin tai khat sung mah na puaksak lai in. 42Mi khat peuhpeuh in na khat peuhpeuh hong nget leh na pia inla, nang kiang panin na a hong leitawi mite na pia in.

Galte Itna

(Luk 6:27-28,32-36)

43“Note in, ‘Na vengte uh na it unla, na galte uh na mudah un,’ ci-in a kigenna thu na zaksa uh ahi hi.#Siam 19:18. 44Ahi zongin ke’n note kiangah kong genin-ah: Na galte uh na it unla, no hong bawlsiate a dingin thu na ngetsak un. 45Tua hileh vantungah a om na Pa uh tate na hi thei ding uh hi. Bang hang hiam cih leh amah in mihoihte le misiate tungah a kibangin ni taangsak khawm a, a gamtat phate le a gamtat siate tungah zong a kibang mahin guah zusak khawm hi. 46Tua ahih manin no hong itte bek na it uhleh Pasian in bang thaman hong pia zenzen ding ahi hiam? Siahdongte nangawn in amau a itte it thei uh hi. 47Na lawmte bek uh hopihin thupha na piak uhleh mi mawkmawkte sangin na hoihzawkna uh bang om ahi hiam? Gentail mite nangawn in tua bang ciang lel hih thei uh hi. 48Tua ahih manin vantungah a om na Pa uh a cingtaak mah bangin note zong lungsim citakin na cingtaak nading uh na hanciam un.#Siam 19:2; Thkna 18:13.

Currently Selected:

MATTHAI 5: TDB

Highlight

Copy