मारकुस 8
8
येसुङा टेम्बोक् हाजार याप्मिचि ख्वाप् चोगुचिगा
(मात्ति १५:३२-३९)
1हिट्ना बेला फेरि जोम् याप्मिचिगा खिमेयाङ्मे येसु लिसाना डेन्ङि उछुमे॥ हिट्नागाँ चामा-ठुङ्मागा थोक्चि सोब्बे ओलाट्टुजोगा डागा॥ हिट्नुङ् येसुङा ओचेलाचि छेम्डुचिउङ् लोडुचे, 2“नागा याप्मिचि निसुङ्चिङुङ् आङाना आड्डिक् आलुक्मा टुगाइसे, पोङ्भोने नागा आङालोक् ओवासागा हाट्ले सुम्बोक् लेम्बा लिमैडे, हिट्नुङ् नागालोक् चामा-ठुङ्मागा थोक् पाक्चा वाइना॥ 3नागा याप्मिचि पाक्चा मिचाए पाङ्ङि पाङ्माचि भोने, लाम्बोङि डोक् कुम्सामेट्ङा लाबुचिउङ् फाङ् उलियुक्, पोङ्भोने कोइ-कोइ आड्डिक् लाप्माङ् डेन्लाम्मा ओटाइसे॥”
4ओचेलाचिङा उन् ओलोडुए, “खोलो, ना खुसुना डेन्ङि नाटेप्मा औधि याप्मिचि ख्वाबा चोक्माचि लोङ्सा खोनिलाम्मा चालेपा टाप्माना?”
5येसुङा हिट्नागा सिलाप्टुचे, “खानिलोक् काइ गोटा चालेपा युङ्ग्वाना?”
हिट्नागाँ “सि गोटा चालेपा युङ्ग्वा” पिक्सा ओलोडुए॥
6हिट्नुङ् येसुङा याप्मिचि चाउरिङि युङ्सानुम्चि पिक्सा लोडुचे॥ हिट्नुङ् उन्ङा सि गोटा चालेपा कोबुङ् माङ्हाङ्ङि पोए-पोए ठाङ्सुङ् एगुए, हिट्नुङ् याप्मिचि हान्डाबिडानुम्चि नुङ् ओचेलाचि पिडुचे हिट्नुङ् हिट्नागाँ याप्मिचि ओहान्डुबिडुचे॥ 7हिट्नागालोक् आम्टेप्मा खाटिटिउगा ङासाचि चा ओडागा, हिट्नुङ् येसुङा ङासा चा माङ्हाङ्ङि पोए-पोए ठाङ्सुङ् ओचेलाचि हाम्मा लोङ्सा पिडुचे॥ 8सोब्बे याप्मिचिङा फोक् उइप्टालोक् ओचोए, हिट्नुङ् चेलाचिङा मोन्डागा ओखान्डा ओखान्डि सि डालो टेप् उछुम्सुए॥ 9हिट्नि टेम्बोक् हाजार याप्मिचि ओडागा॥ हिट्नुङ् येसुङा याप्मिचि उन्चि पाङ्ङि पाङ्सुचे॥ 10हिट्नुङ् येसु ओचेलाचिलोक् हिट्ना बेला डोक् नाउङि ठाङाउङ् दलामानुथा छेट्राङि खाडे॥
फारिसि याप्मिचिङा मिक्सेन्ङाना रिङ् ओहोट्टुना
(मात्ति १६:१-४)
11फारिसि याप्मिचि येसुङि ओटायाउङ् उन्लोक् बादबिबाद चोक्मा ठालाँ ओचोगुए॥ हिट्नागाँ येसुङाना उनिङ्ग्वा कोन्सा “टोनालोग्लाम्मा ठिक् चिन्ना याप्मिनिमेट्टा” पिक्सा ओलोडुए॥#मात्ति १२:३८; लुका ११:१६
12ना रिङ् खेम्सुङ् येसुङा केलोक् ओसोक्मा साडुङ् लोडुचे, “पोङ् ना टालाङिगा याप्मिचिङा डोङ् ठोङ्डिना चिन्ना पुमा ओकोन्युक्गा? छेम्बा आङा खानि लोनानि, ना टालाङिगा याप्मिचिङा खोना चा चिन्ना निमा ओटोगुन्ना॥”#मात्ति १२:३९; लुका ११:२९ 13हिट्नुङ् हिट्नागा हिट्नि डोक् नाडुचिउङ् दलामानुथालाम्मा ओचेलाचिलोक् उन् फेरि नाउङि ठाङाउङ् याहाँपारा लाम्टिए॥
फारिसि याप्मिचिगा हिट्नुङ् हेरोदङाना खामिर
(मात्ति १६:५-१२)
14चेलाचि नाउलाम्मा ओखाडानाँ उन्चि लोङ्सा युडुचिलोक् चालेपा खाप्मा उमुन्डुए, हिट्नुङ् उन्चिलोक् नाउङि ठिक् एडोक् चालेपा डाना॥ 15येसुङा हिट्नागा ओछेक्छेक् चोक्सा लोडुचे, “खानि फारिसि याप्मिचिगा हिट्नुङ् हाङ्बा हेरोदङाना खामिरलाम्मा ओछेक्छेक् युङानि॥”#लुका १२:१ 16टरो चेलाचिङा उन्चिलोक् चालेपा वानेट्निनाउङ् येसुङा हिट्डे लोडुचिगा नुङ् उन्चि उन्चिङि रिङ्पान् चोक्मा ठालाँ ओचोगे॥ 17हिट्नागा उन्चि उन्चि रिङ्पान् ओचोगागा येसुङा ठाहा टोगुङ् हिट्नागा लोडुचे, “खानिलोक् चालेपा वाइना नुङ् पोङ् खानि रिङ्पान् आचोगिटिगा? पाक् आझै खानिङा आनिनिम्गै हिट्नुङ् बुजा ओचोक्निम्गै? पाक् खानि निङ्ग्वा हुप्टाइसेनि? 18खानि मिक् युङ्ग्वाउङ् चा पाक् आनिनिम्गै? पाक् खानि नुभेक् हुडैसेनि? हिट्नुङ् पाक्चा आमिट्निम्गै?#यारमिया ५:२१; इजिकिएल १२:२; मारकुस ४:१२ 19आङा लेम्बोक् गोटा चालेपा एगुङ् लेम्बोक् हाजार याप्मिचि ख्वाप् चोगुङ्चिङ्नाँ खानिङा मोन्डागा चालेपा ओखान्डा ओखान्डि आम्टेप्मा डालो आछुम्सुम्मेगा?”
हिट्नागाँ ओलोडुए, “बारो डालो छुम्सुम्मे॥”
20हिट्नुङ् येसुङा फेरि सिलाप्टुचे, “सि गोटा चालेपाङा टेम्बोक् हाजार याप्मिचि चामा पिडुङ्चिङ्नाँ खानिङा मोन्डागा ओखान्डा ओखान्डि आम्टेप्मा डालो आछुम्सुम्मेगा?”
हिट्नागाँ ओलोडुए, “सि डालो छुम्सुम्मे॥”
21हिट्नुङ् येसुङा हिट्नागा सिलाप्टुचे, “पाक् खानिङा आझै चा बुजा आचोक्निम्गै?”
येसुङा याङ्कानिनिबा याङ्निसुलोक् चोगुटु
22हिट्नुङ्ना येसु ओचेलाचिलोक् बेथसेदा ओलोडुना युक्ताम्ङि होन्डा टाए॥ हिट्नि याप्मिचिङा ठिबाङ् याङ्कानिनिबा याप्मि उन् सोरि ओटाडुए, हिट्नुङ् “ना याप्मि खोट्टुङ् नुमानिङ् चोगु लो” पिक्सा येसुङि स्या ओठाङ्सुए॥ 23हिट्नुङ् येसुङा हिट्ना याङ्कानिनिबा उमुक्ङि लाबुङ् युक्ताम्लाम्मा भारा खाट्टुए, हिट्नुङ् उमिक्ङि ओठ्या नेक्टुबिडुङ् उमुक् युङ्सुङ् सिलाप्टुए, “पाक् खान्ङा आनिसुएट्टुनि?” 24हिट्नुङ् हिट्नाँ याम्बा-नायाम्बा पुयुङ् माट्टुए, “याप्मिचि निमाउङ् निसुएटुङ्चिङ्, टरो हिट्नागा सिङ् उभुङ्मा ओलाम्टियागा गाड्डे गो निसुएट्टुङ्चिङ्॥” 25येसुङा फेरि हिट्ना याप्मिङाना उमिक्ङि उमुक्ङा खोट्टुए, हिट्नुङ् हिट्नाँ नुलोक् पुयुनाँ सोब्बे थोक्चि पारचिन्दा निमा हिडुलोक् लिसे॥ 26येसुङा हिट्ना याप्मि योम्बो-टोम्बो युक्टाम्ङि मिहोन्ने कापाङ्ङि सारासार खाडा लोडुए॥
येसु साइना?
(मात्ति १६:१३-२०; लुका ९:१८-२१)
27हिट्नुङ्ना येसु ओचेलाचिलोक् कैसारिया फिलिप्पि ओलोडुना खालाङ्गाङाना याम्बा-नायाम्बाङिगा युक्ताम्लेङ् खाडे॥ लाम्बोङि येसुङा ओचेलाचि सिलाप्टुचे, “याप्मिचिङा आङा साइना नुङ्” याङ्ओलोङागा?
28हिट्नागाँ ओलोडुए, “कोइङा बाप्टिस्मा कापि युहान्ना मालोना, कोइङा एलिया मालोना, हिट्नुङ् आम्टेप्माङा माङ्काटाचिङि ठिबाङ् मालोना॥”#मारकुस ६:१४-१५; लुका ९:७-८
29येसुङा सिलाप्टुचे, “खानिङाम्बाक् आङा साइना नुङ् आलोडिटिङागा टे?”
पाटरुसङा लोडुए, “खान् खिरिस्ट#८:२९ खिरिस्टङाना उटुप्बाक् क्याङा आभिसेक चोक्मा लियुक्॥ मात्ति १०:३८; लुका १४:२७; युहान्ना ६:६८-६९; ८:३४ ए॥” 30हिट्नुङ् येसुङा हिट्नागा “आङाना बारेङि साक्चा लोनेनुम्चिम्,” पिक्सा काडा आग्याँ पिडुचे॥
येसुङा उन्ङाना सिमाना बारेङि माट्टुना
(मात्ति १६:२१-२३; लुका ९:२२)
31हिट्नुङ् येसुङा हिट्नागा नाड्डे लोसा हिसिक्मा ठालाँ चोगुचे, “याप्मि छाङा जोम् याङ्छामा आङ्मा कोन्युक्, हिट्नुङ् याहुदि ओठेडोङ्चिङा, गाडुवाडाङ्बाचि हिट्नुङ् धारमाबिधि काहिसिक्बाचिङा इन्कार ओचोगुटु, ओसेडुटु हिट्नुङ् सुम्बोक् लेम्बा सियुङ् उहिङ्ग्वाट् लियुङ् फेरि कोब्युक्॥” 32ना रिङ् येसुङा ओचेलाचि पारचिन्दा लोडुचे, हिट्नुङ् पाटरुसङा येसु याम्बालेङ् खाट्टुङ् खेमालाप्मा ठालाँ चोगुए॥ 33टरो येसु रिसाउङ् ओचेलाचि पुयुचिउङ् नाड्डे पिक्सा पाटरुस खेमा लाप्टुए, “हाउ सैतान, आङालाम्मा या खाडा, पोङ्भोने खान् माङ्हाङ् गाड्डे आमिट्निना, टरो याप्मिङाना निङ्ग्वा गाड्डे आमिट्ना॥”
चेला लिमा चोक्माना टोॽवा
(मात्ति १६:२४-२८; लुका ९:२३-२७)
34हिट्नुङ् येसुङा ओचेलाचि हिट्नुङ् हिट्नि उलिसागा याप्मिचि छेम्डुचिउङ् हिट्नागा लोडुचे, “खेम्सानुम्, खानि माड्डे आचेला लिमा आकोलिटि भोने, खानिङा आप्पे लोङ्सा माया चोक्मा नामा कोन्युक्, हिट्नुङ् ओखाप्चे आप्पे खुयुङ् आएङ् ओआप्याक्॥#मात्ति १०:३८; लुका १४:२७ 35पोङ्भोने जुन्ङा आप्पे ओसोक्मा हिङ्मा कोलुटु, हिट्नाङा हिट्ना मासुटु, टरो आङालोङ्सा हिट्नुङ् नुना खाबोर लोङ्सा ओसोक्मा जाखाम् चोगुटु भोने हिट्नाँ टुबुटु॥#मात्ति १०:३९; लुका १७:३३; युहान्ना १२:२५ 36पोङ्भोने याप्मिङा ना नाराङिगा ख्वाप्पा थोक्चि टोगु चा ओसोक्माम्बाक् जाखाम् चोगुटु भोने, हिट्ना लोङ्सा पाक् ओचेट्नुना लिसेना टे? 37आथाबा याप्मिङा ओसोक्माङाना ओसाट्टोङि पाक् पिमा हिडुटुना टे? 38हिट्नुङ् इम्मेप्माजामा टोॽवा काचोक्बाचि लोक् पापि टालाङिगा याप्मिचि आङालोक् हिट्नुङ् आङाना रिङ्लोक् मोन्युसियुक् भोने, याप्मि छा चा उन्ङाना माङ्हाङ् पाबाङाना माहिमा हिट्नुङ् सेङ्सेङ्ना माङ्हाङ् रिङ् काउग्बाचिलोक् उङ्ना बेला हिट्नालोक् मोन्युसियुक्॥”
Currently Selected:
मारकुस 8: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
