मारकुस 9
9
1हिट्नुङ् येसुङा हिट्नागा लोडुचे, “छेम्बा डोक्, आङा खानि लोनाँनि, नाहि ओयेब्गा याप्मिचि माड्डे कोइ-कोइङा माङ्हाङ्ङा साक्तिलोक् सासान् चोगुना मिने सोम्मा उसिनिगा॥”
येसुङाना उरुप् फेराँ लिसाना
(मात्ति १७:१-१३; लुका ९:२८-३६)
2हिट्नुङ् साङ् लेम्बा ओएङ्स्वा येसुङा पाटरुस, याकुब हिट्नुङ् युहान्ना ठिक् केना झोन्झोबाङि खाट्टुचे॥ हिट्नि उन्चि एरोक् ओवासेट्टागा, हिट्नुङ् उन्चि सोरि डोक् येसुङाना उरुप् फेराँ लिसे#२ पाटरुस १:१७-१८ , 3हिट्नुङ् येसुङा ओलोट्लिङ् आड्डिक् फुटुम्बुरि फुट्ना लिसाउङ् ओम्से, नाड्डे औधि फुट्ना लिलोक् नाराङि साङा चा लोट्लिङ् होप्मा उहिडुन्ना॥ 4हिट्नि हिट्नागा सोरि एलिया हिट्नुङ् मोसा ठेट्टाचे, हिट्नुङ् येसुलोक् मुन्डुप्मा ठालाँ ओचोगुए॥
5हिट्नुङ् पाटरुसङा येसु लोडुए, “काहिसिक्बा, आनि नाहि लिसिना ओचेट्नु डोक् लिसे॥ आनि नाहि सुम्बोक् युङ्माना याक्सा चोगुम्, ठिक् खान् लोङ्सा, ठिक् मोसा लोङ्सा हिट्नुङ् ठिक् एलिया लोङ्सा॥” 6पाटरुसङा पाक् माप्माना नुङ् उनिङ्ग्वाङि मिप्मा हिडुवाट्टुन्, पोङ्भोने हिट्नागा सुम्बाङ् आड्डिक् उकिट्टाइसागा॥ 7हिट्नुङ् खिमेमा टायाउङ् हिट्नागा उरिमेट्ङा टेप्टुचे, हिट्नुङ् खिमेमालाम्मा नाड्डेना सोरा ओखेम्सुए, “ना आङाना आमायालु छा, उन्ङा मालोडिगा रिङ् खेम्सानुम्॥”#मात्ति ३:१७; मारकुस १:११; लुका ३:२२ 8हिट्नुङ् नाड्डेना रिङ् ओखेम्सुनामे चेलाचिङा याम्बा-नायाम्बा उपुयुनाँ उन्चिलोक् येसु एरोक् उनिसुए, आरु साक्चा उनिस्वाट्टुन्चिन्॥
9हिट्नुङ् उन्चि झोन्झोबालाम्मा युमा उङ्सागेट्टाना बेला येसुङा हिट्नागा सुम्बाङ् ओचेलाचि आग्याँ पिडुचे, “याप्मि छा सियुङ् उहिङ्गुवाट् लियुङ् मिकोब्मे सोम्मा खानिङा ना आनिसुम्ना रिङ् साक्चा लोनेनुम्चिम्॥”
10हिट्डेउङ् हिट्नागाँ हिट्ना रिङ् उन्चि निङ्ग्वाङि एरोक् उयुङ्सुए, टरो सिमालाम्मा उहिङ्ग्वाट् लिमा कोब्मा नुङ् पाइना पिक्सा उन्चि उन्चि रिङ्पान् चोक्मा ठालाँ ओचोगुए॥ 11हिट्नुङ् हिट्नागाँ येसु नाड्डे पिक्सा उसिलाप्टुए, “धारमाबिधि काहिसिक्बाचि पोङ् खिरिस्ट टामा नुङ्ना पाइले एलिया टामा डोक् कोन्युक् नुङ् उपिग्युग्गा?”#मालाकि ४:५; मात्ति ११:१४
12येसुङा हिट्नागा नाड्डे लोडुचे, “छेम्बा डोक्, एलिया पाइले टायुक्, हिट्नुङ् उन्ङा सोब्बे रिङ् टोङ्सुटु॥ हिट्नुङ् याप्मि छाङा याङ्छामा आङ्मा कोन्युक् हिट्नुङ् सोब्बेङा इन्कार ओचोगुटु नुङ् पोङ् धारमाछाप्लाङि छेप्टेसेना टे? 13टरो आङा खानि लोनाँनि, एलिया टामाहिडे, उन्ङाना बारेङि छेप्टि गाड्डे डोक् उन् खोड्डे चोक्मा उमिट्टे हिट्नागाँ हिड्डे डोक् ओमेट्टुए॥”
टोन्डेबाङा खोट्टुना पिच्छा नुयाना
(मात्ति १७:१४-२१; लुका ९:३७-४३)
14हिट्नुङ् उन्चि आरु चेलाचिङि होन्डा ओटायानाँ हिट्नागा जोम् याप्मिचिगा खिमेयाङ्मेङा उपुप्टुचिगा हिट्नुङ् हिट्नागालोक् धारमाबिधि काहिसिक्बाचि बादबिबाद ओचोगेट्टागा उनिसुचे॥ 15याप्मिचिगा खिमेयाङ्मेङा उन् उनिसुनामे हिट्नागा आड्डिक् डोङ् ओठोङ्डे, हिट्नुङ् हिट्नागा उन् स्या चोक्माउङ्सा पिन्सा ओखाडे॥ 16हिट्नुङ् येसुङा हिट्नागा सिलाप्टुचे, “खानि नागालोक् पाक् रिङ्ङि खेमाबुङ्मा आचोगिटिगा?”
17हिट्नुङ् याप्मिचिगा खिमेयाङ्मेलाम्मा ठिबाङ् याप्मिङा उन्ङि बिन्टि ठाङ्सुङ् लोडुए, “काहिसिक्बा, आइछा ओकेलुबा काचोक्बा रिमेट्ङा लाबुएसुए, हिट्नुङ् खान् सोरि आप्टुएसुङे॥ 18हिट्ना ओचाफेन्ना रिमेट्ङा लाबुङ् आइछा खाम्ङि ठाम्सुना, हिट्नुङ् ओयासिटेप् ठ्याबुज् होट्टुना, ओकेङ् चान्डुना हिट्नुङ् पोट्राकाक् चोगुना॥ आङा काचेलाचि हिट्ना ओचाफेन्ना रिमेट् आइछालाम्मा होट्टानुम् पिक्सा बिन्टि चोगुङ्चिङे, टरो हिट्नागाँ होप्मा उहिडुवाट्टुन्॥”
19येसुङा हिट्नागा लोडुचे, “खोड्डेगा बिस्वास मालेगा याप्मिचि, आङा खानिलोक् खोना बेला सोम्मा युङ्ङाना? आङा खोट्टेप्मा खानि आङ्नानिगा? खोलो हिट्ना आङा सोरि आप्टानुम्॥” 20हिट्नुङ् हिट्नागाँ हिट्ना पिच्छा येसु सोरि ओआप्टुए॥ येसु निसुनामे हिट्ना ओचाफेन्ना रिमेट्ङा पिच्छा ठाम्सुएट्टुए, हिट्नुङ् ठोट् मेट्टुङ् खाम्ङि कोसुए॥ हिट्नुङ् हिट्ना पिच्छाङा ओयासिटेप् ठ्याबुज होट्टुङ् गुकुलुक् गुकुलुक् कोमा ठालाँ चोगुए॥ 21हिट्नुङ् येसुङा हिट्ना उप्पा सिलाप्टुए, “ना पिच्छा नाड्डे लिसाना खोट्टेप्मा लिसेना?”
हिट्नाङा लोडुए, “ना ओओ बेलालाम्मा डोक् नाड्डे लिसाना॥ 22ना ओचाफेन्ना रिमेट्ङा जाखाम् चोक्मा लोङ्सा याप्मा खेप् मि लोक् चुवाङि चा ठेन्डुएसुए॥ टरो खान्ङा आहिडुटु भोने आन्याँ लुक्मा याप्मि टुक्टाउङ् घुवार याप्मि फाडा॥”
23येसुङा हिट्ना लोडुए, “चोक्मा आहिडुटु नुङ् पोङ् याङ्आलोङाना? बिस्वास काचोक्बाचि लोङ्सा सोब्बे रिङ् लिमा हियुक्॥” 24ना रिङ् खेम्सुङ् हिट्ना बेला डोक् उप्पा राट्टाउङ् लोडुए, “काहिसिक्बा, आङा बिस्वास चोगुङ्टुङ्॥ आझा जोम् बिस्वास चोक्मा काहिबा लिमा लोङ्सा घुवार याङ्फाडा॥”
25याप्मिचिगा खिमेयाङ्मे सोरोम् पिन्सा ओआबागा निसुचिउङ् उन्ङा ओचाफेन्ना रिमेट् नाड्डे लोडुङ् खेमा लाप्टुए, “हाउ ओकेलुबा हिट्नुङ् याङ्काखेन्निबा काचोक्बा टोम्गाचिगा, आङा खान् आग्याँ पिनाँ, हिट्ना पिच्छालाम्मा भारा होन्डालेट्टा, हिट्नुङ् फेरि खोना बेला चा हिट्नाङि लिक्नेन्॥” 26हिट्नुङ् हिट्ना ओचाफेन्ना रिमेट् टाराङ्-टाराङ् राट्सा हिट्ना पिच्छा आड्डिक् टुक्लोक् ओट्ठोक् चोगुङ् ठाम्सुङ् होन्डाउङ् खाडे, हिट्नुङ् हिट्ना पिच्छा फाङ् लिसाउङ् सिया गाड्डे डोक् लिसे॥ हिट्नुङ् इम्टेप्मा याप्मिचिङा पिच्छाम् सिएना रैछो नुङ् उमाट्टुए॥ 27टरो येसुङा हिट्ना पिच्छाङाना उमुक्ङि लाबुङ् फोगुए हिट्नुङ् हिट्ना पिच्छा मुठिलिक् वाठिलिक् कोबे॥
28जब येसु पाङ् भिट्रा लिगे हिट्नुङ् ओचेलाचि उन् ओएकेले लिसाना बेला नाड्डे उसिलाप्टुए, “आन्याँम्बाक् हिट्ना ओचाफेन्ना रिमेट् पोङ् होट्मा हिनेट्निम्माना?”
29हिट्नुङ् येसुङा हिट्नागा ओचेलाचि लोडुचे, “ना पारागा टोंडेबाउम् बिन्टि चोगुमुङ् एरोक् रिक्मा हिडुम्टुम्॥”
येसुङा उन् सिना रिङ् लोडुचिगा
(मात्ति १७:२२-२३; लुका ९:४३-४५)
30हिट्नुङ् येसु लोक् ओचेलाचिङा हिट्ना डेन् ओपोक्टुङ् गालिलङाना लाम्बो उलिसाउङ् ओखाडे॥ ना रिङ् आरु साङा चा ठाहा ओटोगुन्नुङ् येसुङाना उनिङ्ग्वाङि डाना, 31पोङ्भोने येसुङा ओचेलाचि सिकाँ चोगुएट्टुचिगा, हिट्नुङ् हिट्नागा लोडुचे, “याप्मि छा ओलाबुङ् याप्मिचि मुक्ङि उपिडुटु, हिट्नुङ् हिट्नागाँ ओसेडुटु, टरो उन् सियुङ् सुम्बोक् लेम्बा फेरि उहिङ्ग्वाट् लियुङ् कोब्युक्॥” 32टरो ओचेलाचिङा उन्ङा लोडुचिगा रिङ्ङाना उटुप् बुजा ओचोग्वाट्टुन्, हिट्नुङ् उन् सिलाप्मा चा उकिट्टे॥
सोब्बे नुङ्ना ठेना साइना?
(मात्ति १८:१-५; १०:४२; लुका ९:४६-५०)
33येसु लोक् ओचेलाचि काफारनाहुम खालाङ्गाङि होन्डा ओटाए हिट्नुङ् पाङ् भिट्रा उलिगाउङ् येसुङा ओचेलाचि सिलाप्टुचे, “लाम्बोङि खानि पाक् रिङ् आचोगिएट्टिगा?” 34टरो हिट्नागा ओचेक्नेट्नि, पोङ्भोने हिट्नागा “आनि माड्डे सोब्बे नुङ्ना ठेना साइना?” नुङ् उन्चि उन्चि बादबिबाद ओचोगेट्टागा॥#लुका २२:२४ 35हिट्नुङ् येसु युङाउङ् बारो जाना ओचेलाचि डोक् छेम्डुचे, हिट्नुङ् लोडुचे, “कोइ याप्मि पाइले लिमाना निङ्ग्वा चोगुटु भोने, हिट्ना सोब्बे नुङ्ना एङ्स्वा लिमा कोन्युक्, हिट्नुङ् सोब्बे याप्मिचिगा सेवा चोक्मा कोन्युक्॥”#मात्ति २०:२६-२७; २३:११; मारकुस १०:४३-४४; लुका २२:२६ 36हिट्नुङ्ना येसुङा ठिबाङ् खाट्टियुना पिच्छा उन्चि सोरि आप्टुए हिट्नुङ् हिट्ना पिच्छा याङुङ् ओचेलाचि लोडुचे, 37“जुन्ङा आनिङ्ङि नाड्डेगा खाट्टिउगा ओओचि माया चोगुचिचि, हिट्नाँ आङा चा माया याङ्चोक्युक्, हिट्नुङ् जुन्ङा आङा माया याङ्चोक्युक् हिट्नाँ आङा माखाक्, टरो आङा याङ्पाङ्साना माङ्हाङ् पाबा माया चोगुटु॥”#मात्ति १०:४०; लुका १०:१६; युहान्ना १३:२०
38युहान्नाङा येसु लोडुए, “काहिसिक्बा, ठिबाङ् याप्मिङा कानिङ्ङि ओचाफेन्गा रिमेट्चि होट्टुएट्टुचिगा निसुम्मे, हिट्नुङ् आन्याँ हिट्डे चोक्मा छाक्टुम्मे, पोङ्भोने हिट्ना आनिलोक् एक्केउ वानिना॥”
39टरो येसुङा हिट्नागा लोडुचे, “हिट्ना हिड्डे चोक्मा छाक्नेनुम्, पोङ्भोने आनिङ्ङि साक्तिङाना टोॽवा काचोक्बाङा हिट्ना बेला डोक् आङाना बिरुद्दाङि ओचाफेन्ना रिङ् माट्टुन्ना॥ 40पोङ्भोने आनि बिरुद्दाङि उलिनिगा याप्मिचि आनिलेङ् डोक् उलियुक्॥#मात्ति १२:३०; लुका ११:२३ 41आङा छेम्बा डोक् खानि लोनाँनि, जुन् याप्मिङा खानि खिरिस्टङा ओयाप्मिचि नुङ् आनिङ्ङि ठिक् खोरे चुवा एडोक् ठुङ्मा मापिडिटि, हिट्नाँ उन्ङाना इनाम् खोना बेला चा मासुन्ना॥”#मात्ति १०:४२
पापङाना बारेङि हिसिक्मा
(मात्ति १८:६-९; लुका १७:१-२)
42येसुङा फेरि लोडुचे, “जुन्ङा आङाङि बिस्वास काचोक्चि नाड्डेगा खाट्टिटियुगा याप्मिचि पाप चोक्मा मेट्टुटु भोने, हिट्नालोङ्सा ओठोॽवारिक्ङि ठिक् ठेना लुङ्गेॽवाङाना झाँटा रेक्टुम्बिडुमुङ् सामुन्दराङि लेप्टुम्नाँ डोक् हिट्ना लोङ्सा ओचेट्नुना लियुक्॥ 43खानि मुक्ङा पाप चोक्मा मामेट्टिटि भोने, हिट्ना खोक्टानुमुङ् लेप्टाडिसानुम्॥ इप्पोक् मुक्लोक् डोक् खोना बेला चा सिनिना योनालोग्ङिना मि भुङ्रोङि ठामा नुङ्ना ठिक् मुक् माले डोक् लाट्निना चोलाङि लिग्मा नुलोक् लियुक्॥#मात्ति ५:३० 44(योनालोग्ङि फेबाचि चा उसिनिगा, हिट्नुङ् काइले चा मि भुङ्रो सिनिना॥) 45हिट्नुङ् कालाङ्ङा पाप चोक्मा मामेट्युक् भोने, हिट्ना खोक्टुडिसु॥ इप्पोक् लाङ्लोक् खोना बेला चा सिनिना योनालोग्ङिना मि भुङ्रोङि ठामा नुङ्ना ठिक् लाङ्माले डोक् लाट्निना चोलाङि लिग्मा नुलोक् लियुक्॥ 46(हिट्ना योनालोग्ङि फेबाचि चा उसिनिगा, हिट्नुङ् काइले चा मि भुङ्रो सिनिना॥) 47हिट्डेडोक् कामिक्ङा पाप चोक्मा मामेट्युक् भोने, हिट्ना होट्टुङ् लेप्टुडिसु, पोङ्भोने इप्पोक् मिक्लोक् खोना बेला चा सिनिना योनालोग्ङिना मि भुङ्रोङि ठामा नुङ्ना ठिक् मिक् माले माङ्हाङ् उमुलुक्ङि लिग्मा नुलोक् लियुक्॥#मात्ति ५:२९ 48हिट्ना योनालोग्ङि फेबाचि चा उसिनिगा, हिट्नुङ् काइले चा मि भुङ्रो सिनिना॥#यासैया ६६:२४
49“पोङ्भोने युम्ङा भोक् चोखो चोगि गाड्डे डोक् सोब्बे याप्मिचि मिङा चोख्याँ चोक्युक्॥#९:४९ साब्दिक् आनुबाद: पोङ्भोने सोब्बे लोङ्सा मिङा डोक् नुम्नुम् चोगुटु॥ 50युम् नुना ए, टरो युम्ङाना ओसाम् खाडे भोने, हिट्ना खोड्डेउङ् युम्युम् लोना चोक्माना? हिट्नुङ् खानि चोला युम् गाड्डे डोक् नुम्नुम् चोगानुम्, हिट्नुङ् सोब्बेलोक् टोङानिउङ् युङानि॥”#मात्ति ५:१३; लुका १४:३४-३५
Currently Selected:
मारकुस 9: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
