मारकुस 7
7
टुबाठेबाचिगा रितिथितिङाना बारेङि हिसिक्मा
(मात्ति १५:१-९)
1ठिक् लेम्बा यरुसलेम खालाङ्गालाम्मा ओटायागा फारिसि याप्मिचि हिट्नुङ् धारमाबिधि काहिसिक्बाचि येसुङाना याम्बा-नायाम्बा उछुमे॥ 2हिट्नुङ् कोइ-कोइ येसुङा ओचेलाचिङा उन्चि मुक् मिवासिङे ओचोगा हिट्नागाँ उनिसुए॥ 3पोङ्भोने फारिसि याप्मिचि हिट्नुङ् आरु सोब्बे याहुदि याप्मिचिङा उन्चि टुबाठेबाचिलाम्मा लिसाडायाना चालान् चाल्ति गाड्डे उन्चि मुक् मिवासिङे ओचोन्गा॥ 4हिट्डेडोक् खालाङ्गालाम्मा ओटायुङ् चा हिट्नागा एॽवा ओलोयुङ् चोख्याँ मिचोक्ङे पाक्चा ओचोन्गा॥ नाट्टेप्मा एरोक् माखाक् हिट्नागाँ उन्चि खोरेचि, भाँडाकुँडाचि हिट्नुङ् झारके भाँडाकुँडाचि चा उन्चि रिति गाड्डे चोख्याँ मिचोक्ङे चालाँ ओचोगुन्गा॥
5हिड्डेउङ् फारिसि याप्मिचि हिट्नुङ् धारमाबिधि काहिसिक्बाचिङा येसु उसिलाप्टुए, “पोङ् काचेलाचि टुबाठेबाचिङा ओचोगु टाडुना रितिथिति गाड्डे ओचोक्निगा, हिट्नुङ् उन्चि मुक् चोख्याँ मिचोक्ङे चामा-ठुङ्मा ओचोक्युग्गा?” 6येसुङा हिट्नागा लोडुचे, “खानि निङ्ग्वा ओमाक्पाचि बारेङि माङ्हाङ् रिङ् कामाप्बा यासैया माङ्काटाङा छेप्टुना ना रिङ् छेम्बा खानिलोक् टोङ्युक्–
‘नागा याप्मिचिङा उन्चि यासिङा एडोक् आङा मान् याङ्ओचोक्ङागा,
टरो उन्चि निङ्ग्वाम्बाक् आङालेङ् वाइना॥
7हिट्नागाँ बिथाङि आङाना माङ्ध्यान् ओचोगुएट्टु,
पोङ्भोने हिट्नागाँ याप्मिचिङा ओचोगुगा रितितिथि एरोक् उहिसिक्टुचिगा॥’#यासैया २९:१३
8खानिङा माङ्हाङ् उरिङ् आनाडुमुङ् याप्मिचिगा चालान् मानाँ आचोगुम्गा॥”
9हिट्नुङ् उन्ङा लोडुचे, “खानि आड्डिक् डोक् ओचाप्पाङ् आलिसिउङ् टुबाठेबाचिङा ओचोगुटाडुगा रितिथिति चोक्मा माङ्हाङ्ङाना आग्याँ डोक् आनाडुम्गा॥ 10पोङ्भोने मोसाङा नाड्डे छेप्टुएसुए, ‘काप्पा-कामा मान् चोगुचि,’#पारस्थान २०:१२; धारमाबिधि ५:१६ हिट्नुङ् ‘पाबा-मामाङाना बिरुद्दाङि ओचाफेन्ना रिङ् काचेक् सेप्मा डोक् कोन्युक्॥’#पारस्थान २१:१७; लेबि २०:९
11“टरो ‘खानिङा उन्चि पाबा-मामा नाड्डे लोडानुम्चिम् पिक्सा आहिसिक्टुम्चिम्गा रैछो, खेम्सानुम्, खानिलोङ्सा आङालाम्मा पिमाना कुरबान’ ए आथाबा ‘आङा सोब्बे थोक् माङ्हाङ् लोङ्सा ठाङ्मा हिडुङे॥’ 12हिड्डेउङ् खानिङा हिट्ना उप्पा-उमा घुवार फामा आछाक्टुम्ना॥ 13हिट्नुङ् खानिङा लिसाडायागा रितिथिति पालान् चोक्मा कोन्युक् पिक्सा याप्मिचि आहिसिक्टुम्चिमुङ् माङ्हाङ्ङाना आग्याँम्बाक् जाखाम् आचोगुम्गा॥ हिट्नुङ् नाड्डेगा जोम् आरु टोॽवाचि खानिङा आचोगुएट्टुम्॥”
येसुङा आसुद्दो बारेङि हिसिक्टुचिगा
(मात्ति १५:१०-२०)
14येसुङा फेरि याप्मिचि उन् सोरि छेम्डुचिउङ् लोडुचे, “खानि सोब्बेङा निङ्ग्वा पिडानुमुङ् आरिङ् खेम्सानुम् हिट्नुङ् बुजा चोगानुम्॥ 15याप्मिङा ओयासिलाम्मा चोगा खोना थोक्चिङा चा याप्मि आसुद्दो चोगुन्ना, टरो उनिङ्ग्वा भिट्रालाम्मा भारा होन्गा रिङ्चिङा एरोक् याप्मिचि आसुद्दो चोगुटु॥ 16खेम्माना नुभेक् लोक्गाँ ना रिङ् नुलोक् खेम्सानुम्॥”#७:१६ बाइबलङाना मुलि सोरोतङि ना पोद वाइना॥
17हिट्नुङ् येसुङा हिट्नागा याप्मिचि पोक्टुढोचिउङ् उन् पाङ् भिट्रा लिगे, हिट्नुङ् ओचेलाचिङा ना मुन्डुम्ङाना उटुप् पाइना पिक्सा उसिलाप्टुए॥ 18उन्ङा हिट्नागा लोडुचे, “पाक् हाट्ले चा खानिङा बुजा आचोक्नेट्निम्नि? चाम्गा थोक्चिङा याप्मि आसुद्दो चोगुन्ना नुङ् खानिङा ठाहा आटोक्निम्नै इ? 19पोङ्भोने हिट्नाउम् निङ्ग्वाङि लिक्निना, टरो हिट्नाउम् माभोक् भिट्रा लिक्युक् हिट्नुङ् भारा होन्युङ् खाट्युक्॥” (हिट्डेउङ् उन्ङा सोब्बे चामागा थोक्चि फाकाट्ना लियुक् पिक्सा लोडुचे॥)
20उन्ङा आझै हिट्नागा लोडुचे, “याप्मिलाम्मा जे भारा होन्युक्, हिट्नाँ आसुद्दो चोगुटु॥ 21पोङ्भोने याप्मिङाना उनिङ्ग्वालाम्मा ओचाफेन्ना निङ्ग्वा, इम्मेप्माजामा टोॽवा, याप्मि सेप्मा, मेन्झेमा-येम्बेछाङि इम्मेप्माजामा चोक्मा, याङ्खुट्मा, 22लोभि लिमा, रिङ् टेप्मा, वालाफेडुबा वालाफेडुमा लिमा, रिङ् खुना, खिजेक्पा चाट्मा, आङा डोक् चोक्मा हिट्नुङ् मुरखा टोॽवा चोक्मा रिङ् ओहोन्युक्॥ 23नागा सोब्बे ओचाफेन्गा रिङ् याप्मिङाना उनिङ्ग्वा भिट्रालाम्मा भारा ओहोन्युक्, हिट्नुङ् याप्मि आसुद्दो चोगुटु॥”
पानिछोङ्मा मेन्झेमाङाना बिस्वास
(मात्ति १५:२१-२८)
24हिट्नुङ्ना येसुङा हिट्ना डेन् पोक्टुढोङ् टुरोस लोक् सिदोन छेट्रालेङ् खाडाउङ् ठिबाङ् याप्मि ओपाङ्ङि लिगे॥ उन् हिट्नि टायाना रिङ् साङा चा ठाहा ओटोगुन्चा नुङ् उनिङ्ग्वाङि मिट्टाइसाना, टरो उन् ठोप्मा हिनेट्नि॥ 25हिट्ना बेला डोक् ठिबाङ् ओचाफेन्ना रिमेट्ङा याङ्सुना मेच्छाङाना उमाङा येसु टायाना रिङ् खेम्सुनामे उन्ङि आबाउङ् ओटोकानाङि गुङ् चोगाउङ् स्या मेट्टुए॥ 26हिट्ना सिरिया छेट्राङिना फोनिके ओलोडुना डेन्ङि पोङ्साना ठिबाङ् पानिछोङ्मा मेन्झेमा डाना॥ हिट्ना मेन्झेमाङा “आइछा मेन्झेमाङिना टोम्गाचिगा होट्टुचि लो” पिक्सा येसुङि बिन्टि ठाङ्सुए॥ 27येसुङा हिट्ना मेन्झेमा लोडुए, “पाइले पिच्छाचिलोङ्सा चालेपा खुवाबा चोक्माचि कोन्युक्, पोङ्भोने पिच्छाचिगा चालेपा कोछुबाचि चामा पिमा नुना लिनिना॥”
28हिट्ना मेन्झेमाङा माट्टुए, “छेम्बा डोक् आडाङ्बा, टरो कोछुबाचिङा चा टे पिच्छाचिङा ओचोगा ठोङ्लाम्मा ओठेन्डुगा टुक्राचि ओचोगा टे॥”
29ना रिङ् खेम्सुङ् येसुङा हिट्ना मेच्छेमा लोडुए, “खान्ङा ठिक्का डोक् आमाट्टुए, हाट्ले ढुक्कालिसाउङ् कापाङ्ङि खाडा, काइछा मेन्झेमालाम्मा टोम्गाचिगा होन्डाउङ् खाप्माहिडे॥” 30हिट्नुङ् हिट्ना मेन्झेमा नोक्टाउङ् ओपाङ्ङि टासुनाँ उइछा नुमानिङ् लिसाउङ् डोलेन्चाङि इम्सेसाना निसुए, हिट्नुङ् ओचाफेन्ना रिमेट्ङा हिट्ना लेडुडिसुना डाना॥
येसुङा ओकेलुबा याप्मि नुलोक् चोगुना
31हिट्नुङ्ना येसु टुरोस छेट्रालाम्मा होन्डाउङ् सिदोन छेट्रा लिसा डेकापोलिस#७:३१ डेकापोलिस ठिमेक् खालाङ्गा चा ओलोडुए॥ छेट्राङाना लाम्बो लिसा गालिलि तालङि खाडे॥ 32हिट्नि याप्मिचिङा ठिबाङ् उनुभेक् याङ्खेम्निना ओकेलुबा याप्मि उन् सोरि ओआप्टुए, हिट्नुङ् “हिट्ना याप्मि खोट्टुङ् नुलोक् चोगु” पिक्सा येसुङि बिन्टि ओचोगुए॥ 33येसुङा याप्मिचिगा खिमेयाङ्मेलाम्मा हिट्ना याप्मि चिपा याम्बा खाट्टुए॥ हिट्नुङ् हिट्नाङाना उनुभेक्ङि येसुङा ओआङ्गुलि ठेन्डुए, हिट्नुङ् उन्ङा ठ्या ठोक्टुए हिट्नुङ् हिट्नाङाना ओलेक्फाङि खोट्टुबिडुए॥ 34येसुङा टोनालोग्लेङ् पुयुङ् केना ओसोक्मा लेडुङ् हिट्ना लोडुए, “इफ्फाता” आथाबा नाङाना उटुप् “ओङ्साडा” लियुक्॥ 35हिट्ना बेला डोक् हिट्ना याप्मिङा याङ्खेम्सुए हिट्नुङ् ओलेक्फा टायाउङ् पारचिन्दा चेक्मा ठालाँ चोगुए॥ 36हिट्नुङ् येसुङा हिट्नागा याप्मिचि “ना रिङ् साक्चा लोनेनुम्चिम्” पिक्सा आग्याँ पिडुचे॥ टरो येसुङा ना रिङ् माट्नेनुम् लोडुचि चा याप्मिचिङा झान् ना रिङ् ओमाट्टुए॥ 37ना रिङ् याप्मिचिङा ओखेम्सुङ् हिट्नागा आड्डिक् डोङ् ओठोङ्डाउङ् नाड्डे उपिगे, “उन्ङा सोब्बे रिङ् आड्डिक् नुलोक् चोगुएसुए॥ हिट्नुङ् उन्ङा याङ्ओखेम्सुन्गा हिट्नुङ् ओकेलुबा चा नुमानिङ् चोगुचिचि॥”
Currently Selected:
मारकुस 7: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
