लुका 17
17
येसुङा ओचेलाचि पाप हिट्नुङ् बिस्वास बारेङि हिसिक्टुचिगा
(मात्ति १८:६-७,२१-२२; मारकुस ९:४२)
1येसुङा ओचेलाचि लोडुचे, “छेम्बा डोक्, याप्मि लाउङ्सा पापङिना वारिक्ङि ठेम्माना रिङ्चिउम् ओटायुक्, टरो इनामा, जुन् याप्मिङा नागा रिङ् टाडुटु! 2ना ठिक्ए खाट्टियुना पिच्छालोङ्सा पाप चोक्मेप्मा नुङ्ना हिट्ना पापि याप्मिङाना ओठोॽवारिक्ङि झाँटा रेक्टुम्बिडुमुङ् सामुन्दराङि लेप्टुम्नाँ डोक् हिट्ना लोङ्सा ओचेट्नुना लियुक्॥ 3हिट्डेउङ् पाक् आचोक्येट्ना ओछेक्छेक् चोगा॥
“काझान्झाङा कानिङ्ग्वा टानिना टोॽवा चोगुए भोने हिट्ना ‘नाड्डेना टोॽवा चोक्निम्गा’ पिक्सा लोडु, हिट्नुङ् ओपापलाम्मा काएल्-काबु चोगुङ् नोक्युक् भोने छेमा पिडु॥#मात्ति १८:१५
4“हिट्नुङ् हिट्नाङा याप्मा खेप् कानिङ्ग्वा टानिना एकेलेङ् टोॽवा चोगुए हिट्नुङ् सोरोक् खेप् खान्ङि आप्युङ् ‘छेमा याङ्पिडा’ मालोडे भोने हिट्ना छेमा पिडु॥”
5मुलिचेलाचिङा येसु डाङ्बा ओलोडुए, “आन्याँ टाङ्बा, आन्याँलोङ्सा माङ्हाङ्ङि आझा बिस्वास चोक्मा घुवार याप्मि फाडा॥” 6येसु डाङ्बाङा हिट्नागा लोडुचे, “खानिङि पाट्छेयो सागा ओगेडा टेउना एडोक् बिस्वास युङ्ग्वा भोने, खानिङा ना किम्बु उघुङ्मा ‘ओजारालोक् आङ्सा खाडाउङ् सामुन्दराङि लेट्सिङा खाडा’ लोमा आहिडुम्टुम्, हिट्नुङ् खानिङा आमाट्टुम् गाड्डे डोक् हिट्ना लियुक्॥
बिस्वासिलो चाकार
7“मिट्टानुम्, खानि माड्डे ठिबाङ्ङाना हालि आथाबा ठुँबा कापुबा चाकार वाहेट्, हिट्ना बेङ्सिङि टोॽवा चोगुङ् नोक्यु टानाङा पाक् खान्ङा हिट्ना ‘हाट्ले आबा हिट्नुङ् चामा चासिङा युङा’ पिक्सा आलोडुटुनि टे? 8हिड्डेलोमा साट्टो, खान्ङा हिट्ना आलोडुटु, ‘आङालोङ्सा चामा ओमाक् ठुक्टु हिट्नुङ् टेयार लिसाउङ् आङालोङ्सा चामा पागु हिट्नुङ् आङा चामा हिडुङ् एडोक् खान्ना चो॥’ 9खान्ना आलोडु गाड्डे हिट्ना चाकारङा चोगुनाङा पाक् खान्ङा हिट्ना पोए-पोए आलोडुटुनि टे? माखाक् हिट्नाड्डे आलोडुन्ना॥ 10हिट्डेडोक् खान्याँ चा मालोडिगा रिङ्चि चोक्मा आहिडुम्मुङ् खानि नाड्डे पिगानि, ‘आन्याँउम्टे खान्ङाना काम लाहाब् लिसिन्नागा काचाकारचि एरोक् ए॥ आन्याँम्टे खान्ङा आमाट्टु गाड्डे एडोक् चोगुएसुम्मे॥’”
येसुङा ठिक्मेक् याप्मिचि नुमानिङ् चोगुचिचि
11ठिक् लेम्बा येसु यरुसलेमलेङ् खाडागेट्टाना बेला सामारिया हिट्नुङ् गालिल छेट्राङिना ओसाँधेरि लिसा खाडे॥ 12ठिक् युक्ताम्ङि लिगानाङा ठिमेक् जाना कुस्टा रोगि याप्मिचि उन्ङा टुबुचे॥ 13हिट्नागा चिपा याम्बा ओयेबाउङ् राट्सा ओलोडुए, “हाउ येसु आन्याँ डाङ्बा, लुक्मा याप्मिटुक्टा॥”
14येसुङा हिट्नागा पुसा लोडुचे, “खानि खाडानिउङ् पुजारिचि निमेट्टानुम्चिम्#लेबि १४:२-३२ हिट्नुङ् हिट्नागाँ जाँचाङा माचोगेॽयाक्॥” हिट्नुङ् हिट्नागा ओखाडागेट्टाना बेला डोक् कोर रोगालाम्मा उनुए॥ 15हिट्नागा माड्डे ठिबाङ् टुगानाँ उन् नुयाना ठाहा टोगुङ् ठेना ओसोरा चोगुङ् माङ्हाङ्ङाना उनिङ् चोन्सा नोक्टा आबे॥ 16हिट्नुङ् हिट्ना येसुङाना ओटोकानाइ हाम्बोम्फोप् चोगाउङ् स्या मेट्टुए हिट्नुङ् येसु पोए-पोए लोडुए॥ हिट्नाम्बाक् सामारि छोङ्बा याप्मि डाना॥ 17येसुङा उन्लोक् ओवासागा याप्मिचि सिलाप्टुचे, “पाक् ठिक्मेक् याप्मिचि डोक् ना रोगालाम्मा नुमानिङ् उलिसागा माहि टे? आरु याङ् जानाम्बाक् खोनाइ ओखाडेगा टे? 18पाक् ना सामारि छोङ्बा एलोक् माङ्हाङ् निङ् चोन्सिङा नोक्टा आबेनि?” 19हिट्नुङ् येसुङा हिट्ना लोडुए, “कोबाउङ् खाडा॥ काबिस्वासङा खान् आनुए॥”
माङ्हाङ् उमुलुक्
(मात्ति २४:२३-२८,३७-४१)
20ठिक् लेम्बा आम्टेप्मा फारिसि याप्मिचिङा येसु उसिलाप्टुए, “माङ्हाङ् उमुलुक् खोना बेला टायुॽना टे?”
येसुङा हिट्नागा लोडुचे, “माङ्हाङ् उमुलुक् खानिङा आनिसुम्लोक् टानिना॥ 21याप्मिचि खोनाङा चा माङ्हाङ् उमुलुक् ‘नाहि टाइसे’ आथाबा ‘हिट्नालेङ् टाइसे’ नुङ् पिक्मा उहिनिगा॥ पोङ्भोने खेम्सानुम्, माङ्हाङ् उमुलुक् खानि माझै डोक् युङ्ग्वा॥”#१७:२१ आथाबा “खानि भिट्रा डोक् युङ्ग्वा॥”
22हिट्नुङ्ना येसुङा ओचेलाचि लोडुचे, “हिट्डेना बेला चा टायुक्, खानिङा याप्मि छा उमुलुक्ङि ठिक्खेप् पुमा लोङ्सा चा निङ्ग्वा आचोगुम्टुम्, टरो खानिङा निमा आटोक्निम्ना॥ 23याप्मिचिङा खानि ‘उन् नाहि वायेट्’ आथाबा ‘उन् हिट्नि वायेट्’ पिक्सा मालोडिटि टरो हिट्नागा बिस्वास चोग्नेनुम्चिम्॥ 24पोङ्भोने खोड्डेउङ् टाङ्साङ्ङि झालाक् झिलिक् लिनाँ ठिक् छेउलाम्मा आरको छेउ व्हाङ् चोगुटु, हिट्डेडोक् याप्मि छा उङ्ना बेला चा सोब्बे याप्मिचिङा उनिसुटु॥ 25टरो ना सोब्बे लिमा नुङ्ना पाइले आङा याप्मि छाङा जोम् याङ्छामा आङ्मा कोन्युक् हिट्नुङ् ना टालागा याप्मिचिङा एङ्फुट् याङ्ओचोॽयुक्॥
26“हिट्नुङ् याप्मि छा उङ्ना बेला नोआ ओलोडुना याप्मि ओपालाङि लिसाना रिङ् गाड्डे डोक् लियुक्॥#उत्पति ६:५-८ 27हिट्ना बेला नोआ चुवाखोङ्डाङ्ङि लिक्निगेट्निलोक् सोम्मा याप्मिचि चामा-ठुङ्मा हिट्नुङ् भ्याबारि ओचोगेट्टागा॥ हिट्नुङ् नोआ नाउङि लिगे हिट्नुङ् नाराङि आड्डिक् ठेना वेहेट् टाए हिट्नुङ् फ्याङ् याप्मिचि उलुमा उसिए॥#उत्पति ७:६-२४
28“हिट्डेडोक् आङा सासान् चोक्ङा टाङाना बेला लोत ओलोडुना याप्मि ओपालाङि लिसा गाड्डे डोक् लियुक्॥ हिट्ना बेला चा सादोम खालाङ्गाङिगा याप्मिचि साडे गाड्डे डोक् चासाठुङ्सा, छोङ्सा-इन्सा ओचोगेट्टागा, चासोङ् ओलेट्टुएट्टुगा हिट्नुङ् पाङ् ओचोगुएट्टुगा॥ 29टरो जब लोतङा सादोम खालाङ्गा नाडुङ् होन्डे, टोनालोग्लाम्मा मिङा ओसाङ् हिट्नुङ् गान्धाक् ठायाउङ् सोब्बे याप्मिचि उसिए॥#उत्पति १८:२०–१९:२५ 30हिट्डेडोक् याप्मिचि टेयार उलिनिगेट्निना बेला याप्मि छा चा माहिमाङि ठेट्युक्॥
31“हिट्डेना बेला कौसिङि उलिसागा याप्मिचि उन्चि चिजाबिजा लोहोट्सिङा पाङ् भिट्रा उलिक्निचा॥ हिट्डेडोक् बेङ्सिङि टोॽवा चोक्येट्ना याप्मि पाङ्ङि ओनोक्निचा॥#मात्ति २४:१७-१८; मारकुस १३:१५-१६ 32खोड्डे पारिक् लोतङाना ओटालिमाङ् सिएना हिट्ना रिङ् मिट्टानुम्॥#उत्पति १९:२६ 33जुन् याप्मिङा ओचोला जोगाँ चोक्मा कोलुटु, हिट्नाङा लाट्निना चोला मासुटु, टरो जुन् याप्मि ओचोला जोगाँ चोक्मा कोलुन्ना, हिट्नाङा लाट्निना चोला टुबुटु॥#मात्ति १०:३९; १६:२५; मारकुस ८:३५; लुका ९:२४; युहान्ना १२:२५ 34आङा खानि लोनाँनि, हिट्ना बेला युसा इप्पाङ् ठिक्ए डोलेन्चाङि एक्केउ इम्साचिगा माङ्हाङ्ङा ठिबाङ् खाट्टुटु हिट्नुङ् आरको नाडुढोटु॥ 35इप्पाङ् मेन्झेमाचि झाँटा रुट्चेट्चिगा माड्डे माङ्हाङ्ङा ठिबाङ् खाट्टुटु, हिट्नुङ् आरको नाडुढोटु॥ 36हिट्डेडोक् इप्पाङ् याप्मिचि एक्केउ बेङ्सिङि टोॽवा काचोक्बाचिङि ठिबाङ् माङ्हाङ्ङा खाट्टुटु, हिट्नुङ् आरको नाडुढोटु॥”
37हिट्नुङ् ओचेलाचिङा येसु उसिलाप्टुए, “ना खोनाइ लियुक्ना टाङ्बा?” येसुङा हिट्नागा लोडुचे, “सिनो लिसाना सोरि डोक् सेम्माङ् भेम्माङ्चि उछुम्युक्॥”
Currently Selected:
लुका 17: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
