लुका 16
16
ओचाप्पाङ् कोटेरिबा
1येसुङा ओचेलाचि ठिक् मुन्डुम् लोडुचे, “ठिबाङ् जोम् माक्फेन्सुबेन् काप्टुना याप्मिङाना ओपाङ्ठाङ् काकोबा ठिबाङ् कोटेरिबा डाना॥ ठिक् लेम्बा आम्टेप्मा याप्मिचि वागाठेगा याप्मि सोरि ओखाडाउङ् ‘ना कोटेरिबाङा सोब्बे कामाक्फेन्सुबेन् खेरोक् लाट्टुएट्टु’ पिक्सा ओलोडुए॥ 2हिट्नुङ् वागाठेगा याप्मिङा हिट्ना कोटेरिबा छेम्डुए हिट्नुङ् लोडुए, ‘खान्ङाना बारेङि आङा ओचाफेन्ना रिङ् खेम्सुएट्टुङ्, खान्ङा आयुङ्सुना ख्वाप्पा आमाक्फेन्सुबेन्ङाना हारहिसाब् याङ्निमेट्टा, पोङ्भोने आङा खान् ना काटोॽवालाम्मा होट्नागेट्नाँ॥’
3“हिट्नुङ् हिट्ना कोटेरिबा उनिङ्ग्वाङि नाड्डे मिट्टे, ‘हाट्ले आडाङ्बाङा आटोॽवा याङ्नाप्टालाबे, आङा पाक् चोक्ङाना? आङा टोॽवालासि चा चोक्मा हिनिङ्ना हिट्नुङ् नाक्माजामा चा मोन्नासिङाना॥ 4हाट्ले आङा पाक् चोक्मा कोन्युक्ना हिट्ना मिप्मा हिडुङे॥ आङा कोटेरिबा टोॽवालाम्मा होन्नाउङ् याप्मिचिङा उन्चि पाङ्ङि आङा खोड्डे पारिक् ओचेट्नुलोक् चाट्ला याङ्ओचोग्ङागा हिट्ना रिङ् पुयुङ्टुङ्॥’
5“हिट्नुङ्ना हिट्ना कोटेरिबाङा ओडाङ्बाङाना नाॽवा ओखाट्टुगा लोङ्सा ठिबाङ् ठिबाङ् चोक्सा छेम्डुचे, हिट्नुङ् पाइलेना याप्मि सिलाप्टुए, ‘खान्लोक् आडाङ्बाङाना नाॽवा खोट्टेप्मा केङ्ग्वाना?’ 6हिट्ना याप्मिङा माट्टुए, ‘आङि सुम्बोक् हाजार जारकिन् टेप्मा जैतुनङाना क्या हुङ्माना केङ्ग्वा॥’ हिट्ना कोटेबारिङा लोडुए, ‘कोए काभोरपाइ एला चार साए जारकिन क्या छेप्टु॥’
7“हिट्नुङ् हिट्ना कोटेरिबाङा आरको सिलाप्टुए, ‘खान्ङा आम्टेप्मा नाॽवा हुङ्माना युङ्ग्वाना?’ हिट्ना याप्मिङा माट्टुए, ‘आङा ठिक् हाजार पाटिडालि गाहुँ नाॽवा हुङ्माना केङ्ग्वा॥’ हिट्नुङ् हिट्ना चा लोडुए, ‘काभोरपाइङि एला याङ् साए पाटिडालि छेप्टु॥’
8“हिट्डेउङ् ओडाङ्बाङा हिट्ना बेमान कोटेरिबाङाना ओचाप्पाङ् टोॽवा चोगुना निसुङ् उनिङ् चोन्डुबिडुए॥ पोङ्भोने माङ्हाङ्ङि बिस्वास ओचोगुन्गा याप्मिचि#१६:८ माङ्हाङ्ङि बिस्वास ओचोगुन्गा याप्मिचिगिरिक्ङि ना नाराङिगा छालेट्चि नुङ् बुजा लियुक्॥ उन्चि टाक्चिलोक् ओचाप्पाङ् चाट्ला ओचोग्गा, टरो माङ्हाङ्ङि बिस्वास ओचोगुगा याप्मिचि#१६:८ माङ्हाङ्ङि बिस्वास ओचोगुगा याप्मिचिगिरिक्ङि व्हाङ्ङाना छालेट्चि नुङ् बुजा लियुक्॥ नागाटेप्मा ओचाप्पाङ् उलिनिगा॥
9“आङा खानि ना मुन्डुम्लाम्मा सिकाँ लिसानि नुङ् लोनाँनि, ‘ना नाराङिना ओफाबा जाइले टाइले चा लिनिना, हिट्डेउङ् ओफाबा पिडानुम्चिउङ् टाक् चोगानुम्चिम्, जब खानि टोनालोग्ङि आखाडिटि माङ्हाङ्ङा खानि स्वागाट् माचोगिटि॥’”
खाटियुना टोॽवाङि चा बिस्वासिलो लिमा कोन्युक्
(मात्ति ६:१४)
10येसुङा फेरि लोडुचे, “खाट्टिउना रिङ्ङि बिस्वासिलो लिना याप्मि ठेना रिङ्ङि चा बिस्वासिलो लियुक्॥ हिट्डेडोक् खाट्टियुना रिङ्ङि बिस्वासिलो लिनिना याप्मि ठेना रिङ्ङि चा बिस्वासिलो लिनिना॥ 11हिट्डेडोक् खानि नाराङिना माक्फेन्सुबेन्ङि बिस्वासिलो आलिसेट्टिन् भोने, खानि साङा छेम्बाना माक्फेन्सुबेन्ङाना जिम्मा मापिडिटिना टे? 12खानि आरुङागा माक्फेन्सुबेन्ङि बिस्वासिलो आलिसिन्गा भोने, खानि आप्पेङाना माक्फेन्सुबेन् साङा मापिडिटिगा टे?
13“खोना चा चाकारङा इप्पाङ् डाङ्बाङाना सेवा चोक्मा हिडुन्ना॥ पोङ्भोने हिट्नाङा ठिबाङ् चिम्मा फुट्टुटु हिट्नुङ् आरको माया चोगुटु, ठिबाङ्ङा लोडुना रिङ् खेम्सुटु आरकोङा लोडुना रिङ् खेम्सुन्ना॥ हिट्डेउङ् खानिङा माङ्हाङ् हिट्नुङ् माक्फेन्सुबेन् इप्पोक्ङाना डोक् सेवा चोक्मा आहिनिम्ना॥”#मात्ति ६:२४
येसुङाना आरु हिसिक्माचि
(मात्ति ११:१२-१३; ५:१८,३२)
14नागा सोब्बे रिङ् ओखेम्सुङ् फारिसि याप्मिचिङा येसु ओरेट्टुजोए॥ पोङ्भोने हिट्नागा माक्फेन्सुबेन्ङि ओटोम्सागा ओडागा॥ 15येसुङा हिट्नागा लोडुचे, “खानि याप्मिचि ओटोकानाङि ओचेट्नुलोक् एडोक् लिमा आकोलिगा, टरो माङ्हाङ्ङा खानि निङ्ग्वाङिना रिङ् ठाहा टोगुटु॥ हिट्नुङ् याप्मिचिङा टो ओचोन्डुगा रिङ्चि माङ्हाङ्ङा चिम्मा फुट्टुटु॥
16“हिट्नुङ् बाप्टिस्मा कापि युहान्ना ओबेला सोम्मा मोसाङाना धारमाबिधि हिट्नुङ् माङ्काटाचिङा ओछेप्टुगा रिङ् याहुदि ओठेडोङ्चिङा याप्मिचि उहिसिक्टुचे॥ बाप्टिस्मा कापि युहान्ना नुङ् नाॽया माङ्हाङ् उमुलुक्ङाना नुना खाबोर पारचार चोगाइसे, हिट्नुङ् याप्मिचि ना मुलुक्ङि लिक्मा ओकोन्येट्॥#मात्ति ११:१२-१३ 17ना नारा हिट्नुङ् टोनालोग् मेग्मा हियुक्, टरो धारमाबिधिङि छेप्टाना ठिक्ए खाट्टियुना रिङ् चा मानिना॥#मात्ति ५:१८
18“जुन् याप्मिङा ओटालिमाङ् नाडुङ् आरको भ्या चोगुटु, हिट्नाङा इम्मेप्माजामा टोॽवा चोगुटु॥ हिट्नाडेडोक् जुन् याप्मिङा ओयेम्बेछाङा नाडुना मेन्झेमा भ्या चोगुटु हिट्नाङा चा इम्मेप्माजामा टोॽवा चोगुटु॥”#मात्ति ५:३२; १ कोरिन्थि ७:१०-११
वागाठेगा याप्मि हिट्नुङ् लाजारस
19येसुङा फेरि ठिक् मुन्डुम् लोडुचे, “एक् बेला ठिबाङ् वागाठेगा याप्मि डाना॥ हिट्नाँ सोरोक् ओफाङ्-ओफाङ् लोट्लिङ् वाडुगा डागा हिट्नुङ् लेन्सेन् चासाठुङ्सा मोज्मोज्जा चोक्सा युङाना डाना॥ 20ठिबाङ् ओयेम्ङि खेसिक् पुप् लिसाना पाक्चा वानेट्निना लाजारस ओलोडुना याप्मि चा वासेट्टाना॥ याप्मिचिङा ना वागाठेगा याप्मिङाना ओटेल्लाङ्ङाना ठेना ढुवारिक्ङि उयुङ्सुना डाना॥ 21हिट्ना वागाठेगा याप्मिङा चोना डेन्लाम् ठायागा सिटासिटि चामा टोगुङ्टुङ् नुङ् हिट्ना पाक्चा वानेट्निना लाजारसङा चामाना उनिङ्ग्वाङि मिट्टे॥ हिट्नुङ् कोछुबाचिङा चा ओखेसिक्चि ओलेगुबिडुना डाना॥
22“ठिक् लेम्बा हिट्ना गारिब लाजारस सिए हिट्नुङ् माङ्हाङ् रिङ् काउग्बाचिङा उखुयुङ् ओखाट्टुङ् आब्राहाम सोरि उयुङ्सुए॥ हिट्ना वागाठेगा याप्मि चा सिए हिट्नुङ् याप्मिचिङा उहुमुए॥ 23हिट्नुङ् हिट्ना वागाठेगा याप्मिङाना ओहाङ्सा योनालोग्ङि ठायाउङ् आड्डिक् टुक्लोक् याङ्छामा टोगुए॥ हिट्नाङा ओनाभाक् फोगुङ् पुयुनाँ लाप्माङ् आब्राहाम सोरि लाजारस युङाना निसुए॥
24“हिट्नुङ् वागाठेगा याप्मि राट्सा पिगे, ‘हाउ आप्पा आब्राहाम, आङा लुक्मा याङ्टुक्टाउङ् नाहि लाजारस याङ्पाङ्साबिडा॥ हिट्नुङ् हिट्नाङा ओआङ्गुलिक् ओछोम्बो चुवाङि लुम्सुङ् आलेक्फाङि याङ्ठेन्युबियुङ् चिसो याङ्ओचोक्ङाबिङा, पोङ्भोने आङा ना मि भुङ्ग्रोङि टुक्लोक् याङ्छामा टोगुएट्टुङ्॥’
25“टरो आब्राहामङा हिट्ना लोडुए, ‘आइछा, खान्ङा मिट्टुटे, नाराङि आवासानाँ खान्ङा चाहाबा आलिसागा सोब्बे ओचेट्नुगा थोक्चि काचोलाङि आटोगुए, टरो ना लाजारसम्बाक् जाइले टैइले याङ्छामा एडोक् टोगुए॥ टरो हाट्ले ना लाजारस नाहि सुखि लिसैसे हिट्नुङ् खान्ना हिट्नि याङ्छामा आआङ्डुएट्टु॥ 26हिट्टेप्मा एडोक् माखाक्, आन्याँलोक् खानि माझै ठेना भाड्कालो युङ्ग्वा हिट्नाङा जाइले टैइले लोङ्सा आसाम्युक्॥ हिट्डेउङ् नाहिलाम्मा साक्चा खान् आवायेॽट्ना डेन्ङि खाप्मा उहिनिगा हिट्नुङ् आन्याँ वासेट्टिङाना डेन्ङि चा हिट्निलाम्मा साक्चा आप्मा उहिनिगा॥’
27“हिट्नुङ् हिट्ना वागाठागा याप्मिङा लोडुए, ‘आप्पो, हिट्नाडे भोने हिट्ना लाजारस आप्पा पाङ्ङि याङ्पाङ्साबिडा नुङ् बाबा चोक्नाँ, 28हिट्नि आङाना लेम्बोक् आम्भु-आन्झाचि उयुङ्ग्वा॥ हिट्नागा ओछेक्छेक् ओचोगुच्याक्, हिट्डेउङ् हिट्नागा ना याङ्छामा टोगुम्ना डेन्ङि ओकाट्निचा॥’ 29टरो आब्राहामङा हिट्ना लोडुए, ‘उन्चिलोक् मोसाङा हिट्नुङ् माङ्काटाचिङा ओछेप्टुना छाप्लाचि उयुङ्ग्वा, हिट्ना डोक् ओखेम्सुवाक्॥’ 30हिट्ना वागाठेगा याप्मिङा लोडुए, ‘आप्पा आब्राहाम, हिट्टेप्माँ एडोक् लिनिना॥ टरो कोइ ठिबाङ् याप्मि ओसियागालाम्मा उहिङ्ग्वाट् लियुङ् हिट्नागा सोरि खाडे भोने, हिट्नागा उन्चि पापलाम्मा माङ्हाङ्लेङ् ओनोक्युक्॥’
31“टरो आब्राहामङा हिट्ना नाड्डे लोडुए, ‘हिट्नागाँ मोसा हिट्नुङ् माङ्काटाचिङा ओछेप्टुना छाप्लाचि ओखेम्सुङ् बिस्वास ओचोगुन्गा भोने, खोना याप्मि चा सियुङ् उहिङ्ग्वाट् लियुङ् खाट्चा हिट्नागाँ बिस्वास ओचोगुन्ना॥’”
Currently Selected:
लुका 16: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
