युहान्ना 20
20
ओहुम्पा एना
(मात्ति २८:१-८; मारकुस १६:१-८; लुका २४:१-१२)
1आइताबार एका भ्यानिक् कुरिक्वारिक् व्हाङ्ङि मारियाम माग्दालिनि ओहुम्पाङि खाडे, हिट्नुङ् हिट्नाङा ओहुम्पाङिना लिङ्गेॽवा ओसोन्डुना निसुए॥ 2ना निसुङ् हिट्ना सिमोन पाटरुस लोक् येसुङा माया चोगुना चेलाङि पिन्सा खाडाउङ् हिट्नागाचि लोडुचे, “हिट्नागाँ टाङ्बाङाना ओयेम् उहुम्पालाम्मा ओहोट्टुङ् ओखाट्टुएना रैछो, हिट्नुङ् उन् खोनाइ ओखाट्टुङ् उयुङ्सुएना आनि ठाहा टोक्निम्ना॥” 3हिट्डेउङ् पाटरुस लोक् आरको चेला भारा होन्डाचिउङ् उहुम्पालेङ् खाडाचे॥ 4हिट्नागाचि इप्पाङ् एक्केउ पिन्डाचे, टरो आरको चेलाम्बाक् पाटरुस नाडुङ् एला पिन्सा खाडाउङ् पाइले ओहुम्पाङि टासुए॥ 5हिट्नाङा ओहुम्पाङि गुङ् चोगाउङ् पुयुनाँ हिट्नि मोरो रिग्बालाक् सुति लोट्लिङ् एडोक् निसुए, टरो हिट्ना उहुम्पा भिट्रा लिग्नेट्नि॥ 6सिमोन पाटरुसउम्बाक् हिट्नाङाना ओएङ्-ओएङ् खाडे, हिट्नुङ् ओहोम्पाङि लिगे, हिट्नुङ् उन्ङा चा मोरो रिग्बालाक् सुति लोट्लिङ् एडोक् हिट्नि निसुए॥ 7ओटेहेक्ङि रेग्बालाक् लोट्लिङ्उम्बाक् सुति लोट्लिङ्लोक् वानेट्निना डाना, टरो आल्लागा ठोङ्ङि उरिगुङ् उयुङ्सुएसुना॥ 8हिट्नुङ् ओहुम्पाङि पाइले होन्डाटायानाँ आरको चेला चा ओहुम्पाङि लिगे, हिट्नुङ् हिट्ना रिङ् निसुङ् हिट्नाङा बिस्वास चोगुए॥ 9(पोङ्भोने हिट्नागाँ उन् सियानालाम्मा उहिङ्ग्वाट् लियुङ् कोप्मा कोन्युक् नुङ् धारमाछाप्लाङि छेप्बालाक् रिङ् हाट्ले सोम्मा बुजा चोक्मा उहिडुन्गेट्टुन्ना डाना॥) 10हिट्नुङ्ना हिट्नागाचि इप्पाङ् चेलाचि पाङ्लेङ् नोक्टाचे॥
येसु मारियाम माग्दालिनिङि ठेट्युक्
(मात्ति २८:९-१०; मारकुस १६:९-११)
11टरो मारियामबाक् ओहुम्पा भारा हाप्सा येबाइसाना॥ हिट्नाङा हाप्सा ओहुम्पालेङ् गुङ् लिसाउङ् पुयुए, 12हिट्नुङ् येसुङाना मोरो उयुङ्सुना सोरि हिट्नाङा हिट्नि फुटुम्बुरिना लोट्लिङ् वाडाचुगा इप्पाङ् माङ्हाङ् रिङ् काउग्बाचि निसुचे॥ ठिबाङ्म्बाक् येसुङाना ओटेहेक्लेङ् हिट्नुङ् आरकोम्बाक् ओलाङ् लिसाना डेन्लेङ् युङेसाचिगा॥ 13हिट्नागाचिङा मारियाम सिलाप्टाचुए, “आनो, खान् पोङ् आहाब्युक्ना?”
उन्ङा हिट्नागाचि लोडुचे, “पोङ्भोने हिट्नागाँ आटाङ्बा ओखाट्टुएना रैछो, टरो उन् खोनाइ उयुङ्सुएना आङा ठाहा टोक्निङ्ना॥”
14नागा रिङ् लोमा हिडुचिउङ् एङ्स्वालेङ नोक्टानाँ उन्ङा येसु येबाइसाना निसुए, टरो येसु डोक् नुङ् उन्ङा मिसेन् निस्वाट्टुन्॥
15येसुङा हिट्ना लोडुए, “आमो, खान् पोङ् आहाब्युक्ना? खान्ङा साक् आकोलुएट्टुना?”
हिट्नाङा उन् बाकेंचाङि टोॽवा काचोक्बा गाड्डे लोसाउङ् लोडुए, “आडाङ्बा, खान्ङा येसु नाहिलाम्मा आखाट्टुना भोने, खान्ङा उन् खोनाइ आयुङ्सुएसुएना याङ्लोडा, हिट्नुङ् आङा खाट्नाउङ् उन् खाट्टुङ्टुङ्॥”
16येसुङा लोडुए, “मारियाम!”
मारियाम उन्लेङ् नोक्टाउङ् हिब्रु रिङ्ङि लोडुए, “राब्बोनि!” (ना रिङ्ङाना उटुप् “काहिसिक्बा” लियुक्॥)
17येसुङा हिट्ना लोडुए, “आङा याङ्खोट्नेन्, पोङ्भोने ना बेला सोम्मा आङा माङ्हाङ् पाबा सोरि खाट्निङ्गेट्निङ्ना॥ टरो भुम्भु-झान्झाचिङि खाडाउङ् हिट्नागा लोडुचि, ‘आप्पा लोक् खानि पाबा, आङाना माङ्हाङ् हिट्नुङ् खानि माङ्हाङ्ङि आङा खाट्नागेट्नाँ॥’”
18हिट्नुङ् मारियाम माग्दालिनि खाडाउङ् चेलाचि खेम्मेट्टुचे, “आङा टाङ्बा निसुङे॥” हिट्नुङ् उन्ङा लोडुना रिङ् हिट्नागा लोडुचे॥
चेलाचि सोरि येसु ठेट्टाना
(मात्ति २८:१६-२०; मारकुस १६:१४-१८; लुका २४:३६-४९)
19हिट्ना आइताबारङाना युसाना पाका चेलाचि याहुदिचिलोक् उकिट्टाउङ् ढुवारिक् उछुप्टुङ् भिट्रा उयुङासागा॥ हिट्ना बेला डोक् येसु होन्डा टायाउङ् हिट्नागा माझाङि येबे, हिट्नुङ् हिट्नागा लोडुचे, “खानि बाबा चोक्नाँनि!” 20नाट्डे लोडुचिउङ् उन्ङा उमुक् लोक् ओकोखा हिट्नागा निमेट्टुचे॥ हिट्नागा चेलाचिङा टाङ्बा उनिसुङ् आड्डिक् हारका उलिसे॥ 21येसुङा फेरि हिट्नागा लोडुचे, “खानि बाबा चोक्नाँनि! आङा पाबाङा याङ्पाङ्सा गाड्डे डोक्, आङा चा खानि पाङ्नाँनि॥” 22हिट्नुङ् उन्ङा हिट्नागाङि ओसोक्मा मुट्टुङ् लोडुचे, “सेङ्सेङ्ना हाङ्सा लाडानुम्॥ 23जुन्ङाना पाप खानिङा छेमा आचोगुम्बिडुम्चिम्चिम्, हिट्नागाँगा पाप छेमा लियुक्॥ टरो जुन्ङाना पाप खानिङा छेमा आचोक्निम्बिनिम्चिम्गा, हिट्नागाँ छेमा ओटोगुन्ना॥”#मात्ति १६:१९; १८:१८
येसु हिट्नुङ् थोमा
24येसु चेलाचि सोरि टायानाँ बारो जाना माड्डेङि ठिबाङ् दिदुमास ओलोडुना थोमाम्बाक् हिट्नागालोक् वानेट्निना डाना॥ 25हिड्नाड्डेउङ् आरु चेलाचिङा हिट्ना ओलोडुए, “आन्याँ टाङ्बा निसुम्मे॥”
टरो हिट्नाङा हिट्नागा लोडुचे, “जब सोम्मा आङा आप्पे उमुक्ङि काँटि ओरोक्टुना ओडोब् निनिङ्ना, हिट्नुङ् आप्पे आङ्गुलिक् हिट्ना काँटिङाना ओडोब्ङि ठेन्निङ्ना, हिट्नुङ् आमुक्ङा ओकोखाङि खोट्निङ्ना, टब सोम्मा आङा बिस्वास डोक् चोक्निङ्ना॥”
26साङ् लेम्बा एङ्स्वा येसुङा ओचेलाचि फेरि पाङ् भिट्रा डोक् ओवासेट्टागा॥ थोमा चा हिट्नागालोक् वासेट्टाना॥ ढुवारिचि उछुप्टुएसुना डाना, टरो येसु भिट्रा लिगाउङ् हिट्नागा माझाङि येबाउङ् लोडुचे, “खानि बाबा चोक्नाँनि!” 27हिट्नुङ् उन्ङा थोमा लोडुए, “काआङ्गुलि नेहि ठेन्डु, हिट्नुङ् आमुक्चि पुयुचि॥ कामुक्ङा आकोखाङि टेम्डु॥ साङ्का चोक्नेन्, टरो बिस्वास चोगु॥”
28थोमाङा उन् लोडुए, “खान् आटाङ्बा हिट्नुङ् आमाङ्हाङ् ए!”
29हिट्नुङ् येसुङा हिट्ना लोडुए, “खान्ङाम्टे आङा याङ्आनिसाङाउङ् बिस्वास आचोगुए, टरो जुन्ङा आङा मिनिङे बिस्वास ओचोगुटु, हिट्नागा माङ्हाङ्ङा आसिक् पिडुचिचि॥”
छाप्लाङाना आरको मुलि रिङ्
30येसुङा आरु याप्मा डोङ् ठोङ्डिगा चिन्नाचि हिट्नुङ् टोॽवाचि चा ओचेलाचि सोरि चोगुए, टरो हिट्नागा रिङ्उम्बाक् ना छाप्लाङि छेप्निगेट्निना॥ 31टरो येसुम्बाक् खिरिस्ट, माङ्हाङ् छा नुङ् बिस्वास चोगानुम्, हिट्नुङ् बिस्वासलाम्मा उन्ङि खानिङा चोला टोगानुम् नुङ् ना छाप्लाङि छेप्टेसे॥
Currently Selected:
युहान्ना 20: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
