युहान्ना 19
19
येसु सेप्मा लाउङ्सा ओखाट्टुना
1हिट्नुङ् पिलातासङा येसु खाट्टुङ् कोररा लाहाब् चोक्मा मेट्टुचे॥ 2हिट्नुङ् टिलिङ्गाचिङा टिउँबाङाना मुकुट् ओचोगुङ् ओटेहेक्ङि ओमेट्टुबिडुए, हिट्नुङ् बैजानि राङ्गाङाना हाङ्बाङा वाडुना गाड्डेना लोट्लिङ् ओमेट्टुए॥ 3हिट्नुङ् उन् सोरि ओआबाउङ् ओलोडुए, “याहुदिचिगा हाङ्बा, लाउ बाबा ए!” हिट्नुङ् हिट्नागाँ ओनाभाक्ङि ओलेम्सुए॥
4पिलातासङा फेरि भारा होन्डाउङ् याप्मिचिगा खिमेयाङ्मे लोडुचे, “पुयानुम्, आङा ना याप्मि खानि सोरि भारा आप्टुङ्गेट्टुङ्, हिट्नुङ् ना याप्मि फाट्टुर ठेम्माना रिङ् आङा पाक्चा टुब्नेट्निङ्ना रिङ् खानिङा ठाहा टोगानुम् नुङ् खानि लोनाँनि॥” 5हिट्नुङ् येसु टिउँबाङाना मुकुट् लोक् बाइजानि राङ्गाङाना लोट्लिङ् वाडुङ् डोक् भारा आबे, हिट्नुङ् पिलातासङा हिट्नागा लोडुचे, “लु ना याप्मि, पुयानुम्!”
6गाडुवाडाङ्बाचि लोक् माङ्ठाना काकोबाचिङा येसु उनिसुङ् नाड्डे पिक्सा ओराट्टे, “हिट्ना खाप्चेङि छुडु, हिट्ना खाप्चेङि छुडु!”
पिलातासङा हिट्नागा लोडुचे, “हिड्डे भोने खानिङा डोक् ना खाट्टानुमुङ् खाप्चेङि छुडानुम्, पोङ्भोने ना याप्मि फाट्टुर ठेम्माना रिङ् आङा पाक्चा टुब्नेट्निङ्॥”
7याहुदि ओठेडोङ्चिङा ओलोडुए, “आन्याँ धारमाबिधिङा माट्टु गाड्डे हिट्ना सिमा डोक् कोन्युक्, पोङ्भोने हिट्नाङा आङा माङ्हाङ् छा पिक्सा माट्टुएसुए॥”
8ना रिङ् खेम्सुङ् पिलातास झान् टुक्लोक् किट्टे॥ 9उन्ङा फेरि येसु खाट्टुङ् उन् युङ्ना पाङ्ङि लिगे हिट्नुङ् उन् सिलाप्टुए, “खान् खोनिलाम्मा आटायाना?” टरो येसुङा उन् पाक्चा लोडुवाट्टुन्॥ 10हिड्नाड्डेउङ् पिलातासङा उन् लोडुए, “पोङ् आङालोक् आचेक्निना? पाक् खान् लेप्माना आधिकार आङालोक् युङ्ग्वा, हिट्नुङ् खान् खाप्चेङि छुमाना आधिकार चा आङालोक् युङ्ग्वा नुङ् खान्ङा ठाहा आटोगुन्ना इ?”
11येसुङा लोडुए, “खान् माङ्हाङ्ङा मापिनेट्नि भोने, आङा उठुङ्ङि खान्ङाना पाक्चा आधिकार लिनिना॥ हिड्नाड्डेउङ् आङा कामुक्ङि जिम्मा कापिबा याप्मि आझा जोम् पापङाना दोसि लियुक्॥”
12ना रिङ् खेम्सुङ् पिलातासङा उन् लेप्माडिमाना निङ्ग्वा चोगुए॥ टरो याहुदिचि नाड्डे पिक्सा ओराट्टे, “हिट्ना खान्ङा आलेडुए भोने, खान् रोमि हाङ्बा कैसारङाना ओसाइबा आलिनिना॥ आप्पेलाउङ्सा हाङ्बा पिक्सा उमाट्टुगा याप्मिचि ख्वाप्पा कैसारङाना बिरुद्दाङि ओकोब्युक्॥”
13पिलातासङा ना रिङ् खेम्सुङ् येसु भारा लिङ्गेॽवाङा चोक्बालाक् टेल्लाङ्ङि आप्टुए (ना हिब्रु रिङ्ङि गाब्बाथा ओलोडुना), हिट्नुङ् हिट्नि उन् न्याए चोक्माना बैठाक्ङि युङे॥ 14हिट्ना बेला छुट्कारा चाडाङाना टेयार लिमाना लेम्बा बारो टेप्मा बाजाँ लिसाइसाना॥#१९:१४हिट्ना बेला याहुदिचिङा छुट्काराङाना भातेर लाउङ्सा ठुँबा ओसेडुना डागा॥ न्याए चोक्माना डेन्ङि युङाउङ् पिलातासङा याहुदिचि लोडुचे, “पुयानुम्, खानि हाङ्बा!”
15टरो हिट्नागा नाड्डे पिक्सा टाराङ्-टाराङ् ओराट्टे, “हिट्ना खाट्टानुम्, खाट्टानुम्, हिट्ना खाप्चेङि छुडानुम्!”
पिलातासङा हिट्नागा सिलाप्टुचे, “पाक् आङा खानि हाङ्बा खाप्चेङि छुडुङ्नि?”
गाडुवाडाङ्बाचिङा ओलोडुए, “कैसार हाङ्बा माले आन्याँना आरको हाङ्बा वाइना॥”
16हिट्नुङ् पिलातासङा येसु खाप्चेङि छुमाउङ्सा हिट्नागाँगा मुक्ङि पिडुचे॥
येसु खाप्चेङि
(मात्ति २७:३२-४४; मारकुस १५:२१-३२; लुका २३:२६-४३)
हिड्नाड्डेउङ् टिलिङ्गाचिङा येसु जिम्मा ओलाडुए॥ 17येसुङा उन्ङाना खाप्चे आप्पे खुयुङ् नाम्जिङ् ओलोडुना डेन्ङि लाम्टिए (हिट्ना ठोङ् हिब्रु रिङ्ङि गालगाथा ओलोडुना)॥ 18हिट्ना ठोङ्ङि ओटासुङ् हिट्नागाँ उन् खाप्चेङि उछुडुए हिट्नुङ् उन्लोक् आरु इप्पाङ् चा ठिबाङ् छुप्टाङ्लेङ् हिट्नुङ् आरकोम्बाक् फेन्साङ्लेङ् ओचोगुचिउङ् खाप्चेङि उछुडुचे, हिट्नुङ् येसुम्बाक् हिट्नागाचि माझाङि ओचोगुङ् उछुडुए॥ 19पिलातासङा ठिक् सुचाना चा छेप्टुङ् खाप्चेङाना उठुङ्ङि खेङ्सुए॥ हिट्नि नाड्डे छेप्टाइसाना, “नासारातङिना येसु, याहुदिचिगा हाङ्बा॥”
20हिट्ना सुचानाङि छेप्टाना रिङ् जोम् याहुदि याप्मिचिङा पोढाँ ओचोगुए, पोङ्भोने येसु खाप्चेङि उछुडुना डेन् खालाङ्गा नेहेट्टाङ् डाना॥ हिट्नुङ् हिट्ना सुचाना हिब्रु, ल्याटिन लोक् गिरिक् रिङ्ङि छेप्टाइसाना॥ 21गाडुवाडाङ्बाचिङा पिलातास ओलोडुए, “‘याहुदिचिगा हाङ्बा’ माखाक्, टरो ‘ना याप्मिङा माट्टुए, आङा याहुदिचिगा हाङ्बा ए’ नुङ् छेप्टु॥”
22पिलातासङा लोडुचे, “आङा जे छेप्टुङे, छेप्टुङे॥”
23हिट्नुङ् टिलिङ्गाचिङा येसु खाप्चेङि उछुडुङ् हिट्नागाँ ओलोट्लिङ् ओयाङुङ् टेम्बोक् जानालाउङ्सा ओभागा ओचोगुङ् ओहान्डुए॥ उन्ङाना भारा वाप्माना लोट्लिङ् चा ओयाङुए, टरो हिट्ना लोट्लिङ्म्बाक् उखिमालेना उठुङ्लाम्मा उछिक् सोम्मा ओठागुङ् चोग्बालाक् डाना॥ 24हिड्नाड्डेउङ् हिट्नागा उन्चि उन्चि उपिगे, “ना सेङ्निम् चा, टरो ना साङा ओभागै ठायुक्ना नुङ् चिट्ठा ठेन्डुम्॥”
धारमाछाप्लाङि छेप्टाना ना रिङ् युमा लोङ्सा डोक् नाड्डे लिसे, “हिट्नागाँ आङाना लोट्लिङ् उन्चि उन्चिङि ओहान्डुजोए, हिट्नुङ् भारा वाडुङ्ना लोट्लिङ्ङि चिट्ठा ओठेन्डुए॥”#छाम्लोमा छाप्ला २२:१८ हिट्नुङ् टिलिङ्गाचिङा हिड्डे डोक् ओचोगुए॥
25हिट्नुङ् येसुङाना खाप्चे नेहेट्टाङ् उमा, उमाङाना मेन्झेमा उन्झा, क्लोपासङाना ओपाङ्ढाङ्मा मारियाम हिट्नुङ् मारियाम माग्दालिनि ओयेबैसागा॥ 26येसुङा आप्पे उमा लोक् उन्ङा माया चोगुना चेला नेहेट्टाङ् येबाइसाचिगा निसुचिउङ् उमा लोडुए, “आमो पुयु, ना याप्मि काइछा ए॥” 27हिट्नुङ् हिट्ना चेला चा लोडुए, “पुयु, ना कामा ए॥” हिट्ना लेम्बालाम्मा हिट्ना चेलाङा येसुङाना उमा मारियाम आप्पे ओपाङ्ङि खाट्टुए॥
येसु सियाना
(मात्ति २७:४५-५६; मारकुस १५:३३-४१; लुका २३:४४-४९)
28हिट्नुङुना येसुङा सोब्बे टोॽवा लाट्टाना रिङ् ठाहा टोगुङ् धारमाछाप्लाङि छेप्टाना रिङ् उयुयाक् नुङ् उन्ङा माट्टुए, “आवेप्मा काडे॥”#छाम्लोमा छाप्ला ६९:२१; २२:१५ 29हिट्नि सुना आङ्गुरङाना युमालिङ्ङा इप्टाना ठिक् भाँडा डाना॥ हिट्डेउङ् हिट्नागाँ झुम्रो हिट्नि उलुम्सुङ् ठिक् हिसापङाना हागेप्पाङि ओहेप्टुङ् येसुङाना ओयासिङि हिट्नागाँ ओठेन्डुबिडुए॥ 30जब येसुङा हिट्ना ठुङुए, हिट्नुङ् माट्टुए, “हाट्ले लाट्टे॥” हिट्नुङ् उन्ङा ओटेहेक् गुङ् चोगुङ् ओसोक्मा लेडुए॥
येसुङाना ओकोखाङि टिक्फेङा ओरोक्टुना
31हिट्ना लेम्बा टेयारिङाना लेम्बा डाना, हिट्नुङ् हान्डेङ्म्बाक् आड्डिक् सेङ्सेङ्ना युङ्माना लेम्बा डाना॥ नाड्डेउङ् याहुदिचिङा युङ्माना लेम्बा याप्मिचिगा येम् खाप्चेङि डोक् लिसागा उन्चि नुलोक् ओलोनिगा डागा, हिट्नुङ् हिट्नागा पिलातासङि ओखाडाउङ् हिट्नागाँगा उन्चि लाङ् ओएगुचिउङ् खाप्चेलाम्मा उन्चि येम् होप्मा लाउङ्सा बिन्टि ओठाङ्सुए॥ 32हिट्नुङ् टिलिङ्गाचि ओआबाउङ् येसुलोक् खाप्चेङि उछुडुचिगा इप्पाङ् याप्मिचिगा पाइले उन्चि लाङ् ओएगुबिडुचे॥ 33टरो जब हिट्नागा येसु सोरि ओआबे हिट्नागाँ उन् हाले डोक् सियाडाना उनिसुए, हिट्नुङ् हिट्नागाँ उन्ङाना ओलाङ् ओएगुवाट्टुन्॥ 34टरो ठिबाङ् टिलिङ्गाङा ओकोखाङि तिक्फेङा रोक्टुए, हिट्नुङ् हिट्ना बेला डोक् ओकोखालाम्मा हेलिक् लोक् चुवा होन्डे॥
35खानिङा चा बिस्वास चोगानुम् नुङ् डोक् नागा घाट्ना कानिबाङा माट्टुना ए॥ हिट्नुङ् उन्ङा माट्टुना साँचिम्बाक् छेम्बाना ए, हिट्नुङ् उन्ङा माट्टुना रिङ् छेम्बाना नुङ् उन्ङा ठाहा टोगुटु॥ 36“हिट्नागाँ उन्ङाना ठिक् चा ओसारुॽवा ओएगुन्ना”#पारस्थान १२:४६; गान्ति ९:१२; छाम्लोमा छाप्ला ३४:२० नुङ् धारमाछाप्लाङि छेप्टाना रिङ् युमा डोक् ना रिङ् लिसाना ए॥ 37हिट्नुङ् फेरि आरको ठोङ्ङि चा धारमाछाप्लाङा नाड्डे माट्टुएसुए, “साङा उन् ओरोक्टुए, हिट्नागाँ उन् उपुयुटु॥”#जाकारिया १२:१०; पारकास १:७
ओहुम्पाङि येसु उहुमुना
(मात्ति २७:५७-६१; मारकुस १५:४२-४७; लुका २३:५०-५६)
38हिट्नि आरिमाथिया युक्टाम्लाम्मा टायाना योसेफ उनिङ् लिसाना ठिबाङ् याप्मि डाना॥ याहुदि ओठेडोङ्चिलोक् किट्टाउङ् साक्चा ठाहा मिपिङे उन् येसुङाना ओचेला लिसाइसाना॥ उन्ङा येसुङाना मोरो खाट्मा ओटोगुङ् नुङ् पिलातास नाक्टुए॥ हिट्नुङ् पिलातासङा चा खाट्मा पिडुए, हिट्नुङ् योसेफ खाडाउङ् येसुङाना मोरो खाप्चेलाम्मा होट्टुङ् खाट्टुए॥ 39हिट्नुङ् येसु युसा टुब्मा खाडाना निकोदेमास चा योसेफलोक् डाना॥ हिट्नाङाम्बाक् तिस किलो टेप्मा मुररा लोक् एलाबाङा चोक्बालाक बुङ्बुङ् नाम्ना आट्टार मिसाङा चोगुङ् आप्टुङ् आबे॥#युहान्ना ३:१-२ 40हिट्नागाचिङा लास हुम्माना याहुदि चालान् चाल्ति गाड्डे येसुङाना ओयेम्ङि बुङ्बुङ् नाम्ना आट्टार युङ्साचुङ् सुति लोट्लिङ्ङि रिगाचुए॥ 41येसु खाप्चेङि उछुडुना डेन्ङिना नेहेट्टाङ् ठिक् बाकेंचा डाना॥ हिट्ना बाकेंचाङि खोना बेला साक्चा उहुमुन्गेट्टुन्ना ठिक् ओछोङ्ग्वाट् ओहुम्पा डाना॥ 42पोङ्भोने याहुदिचिगा टेयारि लेम्बा डाना, हिट्नुङ् हिट्ना ओहुम्पा चा नेहेट्टाङ् डाना, हिट्नुङ् हिट्नागाँ येसुङाना ओयेम् हिट्ना ओहुम्पाङि डोक् उयुङ्सुए॥
Currently Selected:
युहान्ना 19: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
