युहान्ना 21
21
येसु सि जाना चेलाचिङि ठेट्टाना
1आरकोना बेला येसु फेरि चेलाचि सोरि तिबेरियास तालङाना#२१:१ तिबेरियास ताल गालिलङाना ताल चा ओलोडुना॥ ओधारङि ठेट्टे, हिट्नुङ् उन्ङा आप्पेलाउङ्सा नाड्डे पारिक् पारकाट् चोगुए॥ 2हिट्नि सिमोन पाटरुस, दिदुमास ओलोडुना थोमा, गालिलङाना कानालाम्मा आबाना नाथानेल, जाब्दियाङाना इप्पाङ् उइछाचि#२१:२ जाब्दियाङा इप्पाङ् उइछाचि याकुब लोक् युहान्ना॥ हिट्नुङ् आरु इप्पाङ् येसुङा ओचेलाचि एक्केउ ओडागा॥ 3सिमोन पाटरुसङा हिट्नागा लोडुचे, “आङा ङासा लाब्सिङा खाट्नागेट्नाँ॥”
आरु चेलाचिङा ओलोडुए, “आन्याँ चा खान्लोक् खाडिटिङा॥” हिट्नुङ् हिट्नागा चा ओखाडाउङ् नाउङि ओठाङे, टरो हिट्ना युसा हिट्नागाँ ठिक् ङासा चा ओलाबुवाट्टुन्॥#लुका ५:५
4भ्यानिक् व्हाङ् लिसालाबानाँ येसु तालङाना ओधारङि येबाइसाना डाना॥ टरो चेलाचिङा उन् येसु डोक् नुङ् मिसेन् उनिस्वाट्टुन्॥ 5येसुङा हिट्नागा लोडुचे, “हाउ साइबाचि, खानिङा ङासाचि आलाबुम्चिम्मेगि?”
हिट्नागाँ ओलोडुए, “माइना॥”
6येसुङा हिट्नागा लोडुचे, “नाउङाना छुप्टाङ्लेङ् चेल्ले लेप्टानुम्, हिट्नुङ् खानिङा ङासा आटुबुम्टुम्॥”#लुका ५:६ हिट्नुङ् हिट्नागाँ येसुङा लोडुचिगा ठोङ्ङि चेल्ले ओलेप्टुए, हिट्नुङ् ङासा जोम् ओठायानाङा हिट्नागाँ चेल्ले साप्मा डोक् उहिडुवाट्टुन्॥ 7ना रिङ् निसुङ् येसुङा माया चोगुना चेलाङा पाटरुस लोडुए, “उन् उम्टे टाङ्बा गोलो रैछो॥” “उन् टाङ्बा गोलो इ” नुङ् खेम्सुनामे सिमोन पाटरुसङा फेन्डुना ओलोट्लिङ् ओयेम्ङि रिगुङ् चुवाङि आम्से॥ 8आरु चेलाचिम्बाक् नाउङि डोक् उयुङाउङ् ङासाङा इप्टुना चेल्ले साट्सा ओफेरोङि ओआबे॥ हिट्नागा खाम्ङि होम्मा याप्मा लाप्माङ् ओवानेट्निगा, टरो होप्मो साए मिटार टेप्मा एडोक् लाम्माङ् ओडागा॥
9हिट्नागा ओफेरोङि होन्डा ओटासुङ् ओहोन्डानाँ हिट्नागाँ मिभुप्रोङि ङासा हिट्नुङ् चालेपा उनिसुए॥ 10येसुङा हिट्नागा लोडुचे, “खानिङा लोप्मो आलाबुम्गा ठिक् इप्पोक् ङासा आप्टानुम्॥” 11हिट्नुङ् सिमोन पाटरुस नाउङि ठाङाउङ् ठिक् साए तिरपोन्ना गोटा ठे-ठेगा ङासाङा इप्टुना चेल्ले साडुङ् भारा आप्टुए॥ टरो नाटेप्मा जोम् ङासाङा चेल्ले इप्टुचा सेङ्नेट्नि॥ 12येसुङा हिट्नागा लोडुचे, “आबानिउङ् पालोवालो चायानुम्॥” चेलाचि माड्डेङि साङा चा “खान् साइना?” नुङ् सिलाप्मा आँट् चोग्मा उहिडुवाट्टुन्, पोङ्भोने हिट्नागाँ उन् टाङ्बा नुङ् मिसेन् उनिसुएसुना॥ 13हिट्नुङ् येसुङा चालेपा कोबुङ् हिट्नागा पिडुचे, हिट्नाडेडोक् ङासा चा कोबुङ् हिट्नागा पिडुचे॥
14सियानालाम्मा उहिङ्ग्वाट् लिसा कोबाउङ् येसु चेलाचिङि ठेट्टाना नाम्बाक् तेस्रो खेप् डाना॥
येसु हिट्नुङ् पाटरुस
15हिट्नागाँ चामा उहिडुङ् येसुङा सिमोन पाटरुस लोडुए, “युहान्नाङा उइछा सिमोन, पाक् खान्ङा आङा नागा नुङ्ना याप्मा माया याङ्आचोक्ङानि?”
पाटरुसङा लोडुए, “आए टाङ्बा, खान्ङा ठाहा आटोगुटु, आङा खान् माया चोक्नाँ॥”
येसुङा उन् लोडुए, “आङाना ठुँबाचि लोङ्सा उन्चि आहारा पिडुचि॥”#२१:१५ येसुङा नाहि आठुँबाचि नुङ् उन्ङि बिस्वास काचोक्बा याप्मिचि बारेङि माट्टुना॥
16येसुङा फेरि आरको खेप् उन् सिलाप्टुए, “युहान्नाङा उइछा सिमोन, पाक् खान्डा आङा माया याङ्आचोक्ङानि?”
पाटरुसङा लोडुए, “आए टाङ्बा, खान्ङा ठाहा आटोगुटु, आङा खान् माया चोक्नाँ॥”
येसुङा उन् लोडुए, “आङाना ठुँबाचि पुयुचि॥”
17हिट्नुङ् येसुङा उन् सुम्बोक् खेप् सिलाप्टुए, “युहान्नाङा उइछा सिमोन, पाक् खान्ङा आङा माया आचोक्ङानि?” येसुङा उन् सुम्बोक् खेप् “पाक् खान्ङा आङा माया आचोक्ङानि?” नुङ् सिलाप्टुनाँ पाटरुसङाना आड्डिक् उनिङ्ग्वा टुगे॥
पाटरुसङा लोडुए, “टाङ्बा, खान्ङा सोब्बे थोक् ठाहा आटोगुटु॥ आङा खान् माया चोक्नाना नुङ् खान्लाउङ्सा ठाहा युङ्ग्वा॥”
येसुङा उन् लोडुए, “आठुँबाचि लोङ्सा उन्चि आहारा पिडुचि॥ 18छेम्बा डोक्, आङा खान् लोनाँ, खान् ठाङ्बेन् आलिसानाँ खान्ङा निङ्ग्वा आचोगुगा चोक्मा आहिडुगा डागा, आप्पे काफोॽइ आरेक्टुगा डागा, हिट्नुङ् खोनि निङ्ग्वा आचोगुए, हिट्नि आखाडे॥ टरो पासिङ् आलियुङ् खान्ङा कामुक् सोट् आचोगुटु हिट्नुङ् आरुङा कामुक् खाप्चेङि मारेक्युबियुक्, हिट्नुङ् खान् खोनि खाप्मा आटेन्निना हिट्नि माखाट्युक्॥” 19(पाटरुसङा माङ्हाङ्ङाना माहिमा चोक्मा खोड्डेउङ् सिमा कोन्युक्ना नुङ् येसुङा ना रिङ् माट्टुना डाना॥)#२१:१९ उन्चि चालान् गाड्डे तिस बारखा आथाबा ६४-६५ एडि ओएङ्स्वालेङ् पाटरुस ओटेहेक् युमा ओचोगुङ् खाप्चेङि उछुडु ओसेडुए॥ हिट्नुङ् येसुङा पाटरुस लोडुए, “खान् आएङ् लाहाब् लिसा॥”
येसुङा माया चोगुना चेला
20पाटरुसङा एङ्स्वालेङ् नोक्टाउङ् पुयुनाँ येसुङा माया चोगुना चेला ओएङ्-ओएङ् आबागेट्टाना निसुए॥ (नाङा डोक् युसा पाकाना चामा चामा बेला उन्ङि लेखेप् खेप्टाउङ् नाड्डे पिक्सा सिलाप्टुए, “टाङ्बा, खान् धोका कापिबा साइना हाउ?”)#युहान्ना १३:२५ 21हिट्ना निसुङ् पाटरुसङा येसु सिलाप्टुए, “टाङ्बा, नाङानाम्बाक् पाक् लियुक्ना टे?”
22येसुङा पाटरुस लोडुए, “आङा टानिङ्लोक् सोम्मा उन् उहिङ्याक् नुङ् आनिङ्ग्वा लिचा खान्ङाम्बाक् नाङाना बारेङि पाक्ङाना चासो आचोगुटुना? खान्ङाम्बाक् आङा रोक् याङ्रिक्टा॥”
23येसुङा नाड्डे लोडुचिनाङा हिट्ना चेला सिनिना रिङ् आरु चेलाचिङि मुक्टे॥ टरो येसुङा हिट्ना सिनिना नुङ् माट्टुवाट्टुन्ना डाना, टरो उन्ङा “आङा मिटाए सोम्मा उन् उहिङ्याक् नुङ् आनिङ्ग्वा लिचा खान्ङाम्बाक् नाङाना बारेङि पाक्ङाना चासो आचोगुटुना?” पिक्सा माट्टुना डाना॥
24ना चेलाङा डोक् नागा सोब्बे रिङ्चि बारेङि साँचि पिडुटु, हिट्नुङ् नागा रिङ् छेप्टुए, हिट्नुङ् उन्ङाना साँचि छेम्बाना नुङ् आनि ठाहा टोगुम्टुम्॥
आखेरिङि
25येसुङा आरु चा जोम् टोॽवा चोगुए॥ हिट्नागा सोब्बे ठिक्-ठिक् चोक्सा छेप्मा भोने, आङा नाड्डे लोङा, हिट्ना बारेङि छेप्बालाक् छाप्लाचि नारा टेप् वाङ्डुवाट्टुन् बे॥
Currently Selected:
युहान्ना 21: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
