मुलिचेला टोॽवा 4
4
पाटरुस हिट्नुङ् युहान्ना काचाहारि-कुन्डालङि
1पाटरुस हिट्नुङ् युहान्ना याप्मिचिलोक् रिङ्पान् चोगेट्टाचिगा बेला पुजारिचि, माङ्ठाना काकोबा उपिङ्बाचिगा काप्तान हिट्नुङ् सादुकि याप्मिचि हिट्नि ओटाए॥ 2मुलिचेलाचिङा येसु सियानालाम्मा उहिङ्ग्वाट् लिसा गाड्डे आरु याप्मिचि चा उसियागालाम्मा उहिङ्ग्वाट् उलिगा रिङ् पारचार ओचोगुना रिङ् ओखेम्सुङ् हिट्नागा याप्मिचिगा आड्डिक् उन्चि याक्लेडे॥ 3हिट्नागाँ पाटरुस हिट्नुङ् युहान्ना ओलाबुचे हिट्नुङ् युसाना पाका लिसानाँ हिट्नागाँ हान्डेङ् भ्यानिक् सोम्मा खाम्बाङ्ङि हिट्नागाचि ओछाक्टुचे॥ 4टरो नुना खाबोर काखेम्बाचि जोम् याप्मिचिङा येसुङि बिस्वास ओचोगुए॥ येम्बेछा बिस्वासिचि याप्मा उलिसाउङ् लेम्बोक् हाजार टेप्मा उलिसे॥ 5हिट्नुङ् हान्डेङ् भ्यानिक् गाडुवाडाङ्बाचि, ओठेडोङ्चि, हिट्नुङ् धारमाबिधि काहिसिक्बाचि यरुसलेमङि उछुमे॥ 6हिट्नि सानिङ्डाङ्बा हान्नास हिट्नुङ् कैयाफा, युहान्ना, आलेक्जेन्डर हिट्नुङ् सानिङ्डाङ्बा हान्नासङा ओपाङ्ङिगा याप्मिचि चा उछुमाइसागा॥ 7हिट्नुङ् हिट्नागाँ युहान्ना हिट्नुङ् पाटरुस ओठेडोङ्चि टोकानाङि ओआप्टुचे हिट्नुङ् नाड्डे पिक्सा उसिलाप्टुचे, “खान्चिङा खोना बोल्लाम्मा हिट्नुङ् साङा उनिङ्ङि नाड्डेना टोॽवा आचोगाचुएना?”
8हिट्नुङ् सेङ्सेङ्ना हाङ्साङाना बोल्ङा इप्टुङ् पाटरुसङा हिट्नागा लोडुचे, “याप्मिचिगा सासाक्चि हिट्नुङ् ओठेडोङ्चि, 9हाट्ले आन्च्याँ ना लोङ्लेन् याप्मि घुवार फाडाचुङाना रिङ् हिट्नुङ् खोड्डे पारिक् ना याप्मि नुयेना नुङ् ठाहा टोक्मा आकोलेएटिगि॥ 10हाट्ले खानि हिट्नुङ् इस्राएलि ख्वाप्पा याप्मिचिङा ना रिङ् ठाहा टोगानुम्, ना याप्मि नासारातङिना येसु खिरिस्टङाना बोल्ङा नुयाउङ् खानि सोरि येबाइसे॥ खानिङा येसु खाप्चेङि आछुडुमुङ् आसेडुमे, टरो माङ्हाङ्ङा उन् सियानालाम्मा उहिङ्ग्वाट् चोगुए॥ 11उन्ङाना बारेङि धारमाछाप्लाङि नाड्डे छेप्टेसे–
‘लुङ् काछेट्बाचिङा ओलेप्टुना लिङ्गेॽवा डोक् पाङ् ओजाग्ङि छेट्माना उसुरङिना मुलि लिङ्गेॽवा लिसे॥’#छाम्लोमा छाप्ला ११८:१९
12“येसु खिरिस्टलाम्मा एडोक् याप्मिचिङा मुक्टि ओटोगुटु॥ पोङ्भोने ना नाराङि याप्मिङा मुक्टि टोक्मा लोङ्सा खोना चा आरु निङ् वाइना॥”
13जब याहुदि ओठेडोङ्चिङा पाटरुस लोक् युहान्ना मिकिट्ए चेक्टाचिगा उनिसुचे हिट्नुङ् नागाचि पोढाँ लिचिन्गेट्चिन्गा याप्मिचि रैछो नुङ् ठाहा ओटोगुए॥ हिट्नागा ओठेडोङ्चि आड्डिक् छाक्का उलिसे, हिट्नुङ् नागाचि येसुलोक् एक्केउ वासाचिगा याप्मिचि नुङ् ठाहा ओटोगुए॥ 14टरो हिट्ना नुयाना याप्मि चा हिट्नागाचिलोक् येबाना उनिसुनाँ हिट्नागा पाक्चा चेक्मा उहिनेट्नि॥ 15हिड्डेउङ् याहुदि ओठेडोङ्चिङा पाटरुस हिट्नुङ् युहान्ना काचाहारि-कुन्डाललाम्मा भारा होप्मा ओमेट्टुचे हिट्नुङ् हिट्नागा नाड्डे पिक्सा उन्चि उन्चि रिङ्पान् ओचोगे, 16“हाट्ले नागा याप्मिचि पाक् चोगुम्चिम्गा टे? नागाचिङा डोङ् ठोङ्डिना टोॽवा चोगाचुना यरुसलेम उयुङ्गा ख्वाप्पा याप्मिचिङा उनिसुएसुए हिट्नुङ् आनि चा ना रिङ् माखाक् नुङ् पिक्मा हिडिन्गा॥ 17टरो ना रिङ् याप्मिचि सोरि नेहिलाम्मा या छिम्मा लिमा डोक् लिनिना॥ हिट्नुङ् हिट्नागालोङ्सा ‘हाट्लेलाम्मा ना निङ्ङि पाक्चा चेक्नेनिन् हिड्डे आचोगिए भोने, खानिङा साजाए आटोगुम्टुम्’ नुङ् हिट्नागा लोमाचि कोन्युक्॥”
18हिड्डेउङ् हिट्नागाँ हिट्नागाचि ओछेम्डुचिउङ् “येसुङा उनिङ्ङि चेक्मा हिट्नुङ् हिसिक्मा नाडाचु” पिक्सा आग्याँ उपिडुचे॥ 19टरो पाटरुस हिट्नुङ् युहान्नाङा माट्टाचुए, “हाट्ले पाक् माङ्हाङ् रिङ् माखाक्, याप्मिचिगा रिङ् खेम्मानि? ना रिङ् छेम्बाना इ माखाक् खानिङा डोक् मिट्टानुम्॥ 20पोङ्भोने आन्याँम्टे येसुङा चोगुना टोॽवा निसुम्माना हिट्नुङ् खेम्सुम्माना रिङ्चि मिमाट्ङे हिमा डोक् हिनिम्माना॥” 21हाट्ले याहुदि ओठेडोङ्चिङा पाक् साजाए पिमाचिगा उन्चि निङ्ग्वाङि डोक् उटिग्वाट्टुन्, पोङ्भोने ख्वाप्पा याप्मिचिङा हिट्नि लिसाना घाट्ना उनिसुङ् माङ्हाङ्ङाना उनिङ् ओचोन्डुएट्टुना॥ हिट्नुङ् हिट्नागाँ हिट्नागाचि इप्पाङ् मुलिचेलाचि हाट्ले नुङ् नाड्डे चोक्नेनिन् पिक्सा ओलेडुचे॥ 22डोङ् ठोङ्डिना टोॽवालाम्मा नुयाना याप्मि टेम्बोक् मेक् नुङ्ना चा याप्मा बारखा टासुएसुना॥
आँट् टोक्मा बिस्वासिचिगा बिन्टि
23हिट्नुङ् पाटरुस लोक् युहान्ना हिट्नालाम्मा होन्डाचिउङ् उन्चि साइबाचि टुब्सिङा खाडाचे॥ हिट्नुङ् हिट्नागाचिङा गाडुवाडाङ्बाचि लोक् ओठेडोङ्चिङा ओलोडुचिगा ख्वाप्पा रिङ् हिट्नागा सोरि माट्टाचुए॥ 24हिट्नुङ् हिट्नागाँ ना रिङ् ओखेम्सुङ् सोब्बे ओटोङाउङ् ठिक्ए निङ्ग्वा ओचोगुङ् माङ्हाङ्ङि नाड्डे पारा बिन्टि ओचोगे, “हाउ माङ्ठेना आनि माङ्हाङ् डाङ्बा, खान्ङा ना नारा, टोनालोग् हिट्नुङ् सामुन्दरा हिट्नुङ् हिट्नि लिसागा ख्वाप्पा थोक्चि आचोगुचे॥#पारस्थान २०:११; नाहेम्याह ९:६; छाम्लोमा छाप्ला १४६:६ 25सेङ्सेङ्ना हाङ्सालाम्मा कासेवाक् आन्याँ टुबाठेबा दाउद हाङ्बाङाना ओयासिलाम्मा खान् नाड्डे पारिक् आचेक्टे–
‘पानिछोङ्बाचिगा पोङ् उन्चि याग्लेडेना,
हिट्नुङ् पोङ् याप्मिचिङा माङ्जोगा रिङ्चिगा योजाना ओचोगुटुगा?
26नाराङिगा हाङ्चि हिट्नुङ् सासाक्चि माङ्हाङ् डाङ्बा
हिट्नुङ् काहिङ्मेप्बा डाङ्बा खिरिस्टङाना बिरुद्दाङि एक्केउ उछुमे॥’#छाम्लोमा छाप्ला २:१-२
27“छेम्बा डोक् हेरोद हाङ्बा, पान्तियास पिलातास, पानिछोङ्बाचि हिट्नुङ् इस्राएलि याप्मिचि खान्ङा आसेगुना सेङ्सेङ्ना सेवाक् येसुङाना बिरुद्दाङि ना खालाङ्गाङि उछुमाइसागा॥#मात्ति २७:१-२; मारकुस १५:१; लुका २३:१,७-११; युहान्ना १८:२८-२९ 28सोब्बे थोक्चि काबोल् हिट्नुङ् खान्ङा पाइले डोक् कानिङ्ग्वाङि आमिट्टु गाड्डे हिट्नागाँ ओचोगुए॥ 29टाङ्बा, नागा ओठेडोङ्चिङा आन्याँ किप्मा याप्मिलाम्डाना रिङ्ङि कानिङ्ग्वा टिसु, हिट्नुङ् कासेवा काचोक्चि लोङ्सा कारिङ् ढुक्कालोक् चेक्मा बोल् आन्याँ याप्मिपिडा॥ 30हिट्नुङ् सेङ्सेङ्ना कासेवाक् येसुङाना उनिङ्ङि याप्मिचि नुमानिङ् चोक्माना, डोङ् ठोङ्डिना मिक्सेन् हिट्नुङ् टोॽवाचि काबोल्लाम्मा उलियाक्॥”
31हिट्नागा बिन्टि चोक्मा उहिडाउङ् उन्चि उछुमाउङ् उयुङाना डेन् वान्डे॥ हिट्नुङ् हिट्नागा ख्वाप्पा सेङ्सेङ्ना हाङ्साङा इप्टुचे, हिट्नुङ् माङ्हाङ्ङाना रिङ् मिकिट्ङे चेक्मा ठालाँ ओचोगुए॥
आभोरङि हाम्माजामा
32सोब्बे बिस्वासिचिङा ठिक्ए निङ्ग्वा ओचोगुए॥ हिट्नुङ् उन्चिलोक् युङागा थोक्चि “ना खान्ङाना ना आङाना” उपिक्नेयाट्नि हिट्नुङ् उन्चिलोक् लिसागा थोक्चि सोब्बेङा ओहान्डुजोए॥#मुलिचेला टोॽवा २:४४-४५ 33हिट्नुङ् मुलिचेलाचिङा येसु डाङ्बा उहिङ्ग्वाट् लिसाना रिङ् मिकिट्ए पारचार ओचोगुए, हिट्नुङ् सोब्बे बिस्वासिचि माङ्हाङ्ङा जोम् आसिक् पिडुचे॥ 34हिट्नागा साक्चा चाहाब्ङि ओठानेयाट्नि, पोङ्भोने उन्चिलोक् लिसागा स्वाँरा हिट्नुङ् पाङ्ठाङ् ओछोङ्सुए, 35हिट्नुङ् ओफाबा ओआप्टुङ् मुलिचेलाचि उपिडुचे हिट्नुङ् उन्चि चाहाबा उलिसाना बेला ओहान्डुजोए॥ 36-37ठिक् खेप् योसेफ उनिङ् ओलोडुना लेबि पुङ्लाङिना साइपारस युङ्ना याप्मिङा चा ठिक् ओखान्डा बेङ्सि छोङ्सुङ् ओफाबा मुलिचेलाचिङि आप्टुए॥ मुलिचेलाचिङा हिट्ना बारनाबास चा ओलोडुए (नाङाना उटुप् आरु आँट् कापिबा लियुक्)॥
Currently Selected:
मुलिचेला टोॽवा 4: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
