मुलिचेला टोॽवा 5
5
हानानिया हिट्नुङ् साफिरा
1टरो हिट्नि ठिबाङ् हानानिया ओलोडुना येम्बेछा याप्मि डाना, ओटालिमाङ् उनिङ्बाक् साफिरा॥ हिट्नागाचिङा चा ठिक् ओखान्डा बेङ्सि छोङ्साचुए॥ 2हिट्नुङ् आम्टेप्मा ओफाबा ओटालिमाङ्ङा ठाहा टोगुलोक् ठोबुङ् युङ्सुए॥ हिट्नुङ् आम्टेप्मा ओफाबा मुलिचेलाचि सोरि आप्टुए॥
3टरो पाटरुसङा सिलाप्टुए, “हाउ हानानिया, पोङ् सैतान कानिङ्ग्वाङि युङ्मा आपिडुङ् सेङ्सेङ्ना हाङ्सा ढाँट् आफोक्टुएना? हिट्नुङ् पोङ् आछोङ्सुना स्वाँराङाना खाट्टिप्मा ओफाबा आप्पेलोङ्सा आठोबुङ् आयुङ्सुएना? 4नाम्टे छोङ्मा नुङ्ना पाइले खान्ङाना डोक् डाना॥ हाट्ले खान्ङा आछोङ्सुए हिट्ना ओफाबा चा खान्ङाना डोक् डाना॥ खोड्डे पारिक् कानिङ्ग्वाङि ओचाफेन्ना चोक्मा आमिट्टुएना? खान्ङाउम्टे याप्मि एडोक् माखाक्, टरो माङ्हाङ् चा ढाँट् आफोक्टुए॥”
5हिट्नुङ् हानानियाङा ना रिङ् खेम्सुनामे हिट्नि डोक् खाम्मि कोसे हिट्नुङ् ओसोक्मा होन्डे॥ हिट्नुङ् हिट्नि लिसाना घाट्ना ओखेम्सुङ् याप्मिचि आड्डिक् उकिट्टे॥ 6हिट्नुङ् हिट्नि आम्टेप्मा ठाङ्बेन्चि ओआबे हिट्नुङ् कापाडाङा उरिगुङ् भारा ओखाट्टुङ् उहुमुए॥
7हिट्नुङ् सुम्बोक् घान्टा एङ्स्वालेङ् हानानियाङाना ओटालिमाङ् साफिरा चा हिट्ना पाङ्ङि टाए॥ टरो ओयेम्बेछा पाक् लिसेना हिट्ना रिङ् ठाहा डोक् टोगुन्गेट्टुन्ना डाना॥
8पाटरुसङा हिट्ना सिलाप्टुए, “याङ्लोडाटे, खान्चिङा स्वाँरा आछोङ्साचुङ् आटोगाचुना ओफाबा नाट्टेप्मा एडोक् इ?” हिट्नाङा चा लोडुए, “आए, नाट्टेप्मा एडोक्॥”
9हिड्डेउङ् पाटरुसङा हिट्ना लोडुए, “पोङ् खान्चि इप्पाङ्ङा टाङ्बाङाना ओहाङ्सा टेप्माना निङ्ग्वा आचोगाचुएना? खेम्सु, कायेम्बेछा हुम्मा ओखाडागा याप्मिचि ढुवारिक्ङि एडोक् ओहोन्डाटाइसे॥ हिट्नागाँ कालास चा उखुयुङ् हुम्मा भारा ओखाट्टुटु॥”
10हिट्ना बेला डोक् हिट्ना साफिरा चा पाटरुसङाना ओटोकाना सोरि घाट्टाङ् कोसाउङ् सिए॥ जब हिट्नागा ठाङ्बेन् याप्मिचि पाङ् ओहोङि उलिगानाँ साफिरा चा सियाना उनिसुए हिट्नुङ् हिट्ना उखुयु ओखाट्टुङ् ओयेम्बेछा सोरि डोक् उहुमुए॥ 11हिट्नुङ् ना घाट्ना उनिसुगा ख्वाप्पा बिस्वासिचि हिट्नुङ् सोब्बे याप्मिचि आड्डिक् उकिट्टे॥
मुलिचेलाचिङा जोम् उटुगागा याप्मिचि नुमानिङ् ओचोगुचिगा
12हिट्नुङ् मुलिचेलाचिङा जोम् डोङ् ठोङ्डिना टोॽवाचि हिट्नुङ् रिङ्चि याप्मिचिगा माझाङि ओचोगुए॥ हिट्नुङ् ख्वाप्पा बिस्वासिचि सोलोमानङाना टेल्लाङ्ङि सोरोक् उछुमागा डागा॥ 13आबिस्वासिचिङा हिट्नागालोङ्सा आड्डिक् मान्-साम्मान् ओचोगुचे टरोचा साक्चा हिट्नागालोक् टोङ्माना आँट् चोक्मा उहिडुवाट्टुन्॥ 14हिट्नाडे लिसा चा टाङ्बाङि बिस्वास काचोक्चि मेन्झेमा हिट्नुङ् येम्बेछाचि झान् जोम् लिसा ओखाडे॥ 15हिड्डेउङ् पाटरुस हिट्नालाम्मा खाट्ना बेला उरिमेट् उटुगागा याप्मिचि उठुङ्ङि ठानाँ नुमानिङ् उलियाक् नुङ् याप्मिचिङा उटुगागा याप्मिचि ओआप्टुचे हिट्नुङ् लाम्बो-लाम्बोङि उन्चि डोलेन्चालोक् उयुङ्सुचे॥ 16यरुसलेम याम्बा-नायाम्बा युक्ताम्लाम्मा चा हिट्नि जोम् याप्मिचि उछुमे॥ हिट्नागाँ उटुगागा रोगिचि हिट्नुङ् ओचाफेन्ना रिमेट्ङा याङ्छामा चाट्टुचिगा याप्मिचि चा हिट्नि ओआप्टुचे, हिट्नुङ् ख्वाप्पा उनुए॥
मुलिचेलाचिगा याङ्छामा
17हिट्नुङ् सानिङ्डाङ्बा हिट्नुङ् सादुकि छुम्माङिगा ओसाइबाचिङा मुलिचेलाचि सिसा उहिडुवाट्टुन्चिन्॥ 18हिट्नुङ् हिट्नागाँ मुलिचेलाचि ओलाबुचिउङ् खाम्बाङ्ङि ओछाक्टुचे॥ 19टरो टाङ्बाङाना ठिबाङ् माङ्हाङ् रिङ् काउग्बाङा युसा ढुवारिक् ओङ्सुबिडुचे, हिट्नुङ् भारा होट्टुचिउङ् हिट्नागा लोडुचे, 20“माङ्ठानाङि खानि खाडानि हिट्नुङ् लाट्निना चोलाङाना खाबोर ख्वाप्पा याप्मिचि लोडानुम्चिम्॥” 21हान्डेङ् एका भ्यानिक माङ्ठानाङि हिट्नागा ओखाडे हिट्नुङ् याप्मिचि हिसिक्मा ठालाँ ओचोगुचे॥
टरो सानिङ्डाङ्बा हिट्नुङ् ओसाइबाचि काचाहरिङि उछुमे॥ हिट्नुङ् हिट्नागाँ याहुदि काचाहारि-कुन्डालङिगा सादास्सेचि हिट्नुङ् इस्राइलिचिगा सोब्बे ओठेडोङ्चि चा याहुदि काचाहारि-कुन्डालङि ओछेम्डुचे, हिट्नुङ् मुलिचेलाचि खाम्बाङ्लाम्मा आप्टानुम्चिम् पिक्सा खाम्बाङ्ङिगा हाकिमचि हिट्नागाँ ओलोडुचे॥
22टरो हिट्नागा खाम्बाङ्ङि ओटासुनाँ मुलिचेलाचि हिट्नि उटुबुवाट्टुन्चिन् हिट्नुङ् हिट्नागा ओनोक्टा ओखाडाउङ् नाड्डे ओलोडुचे, 23“आन्याँ खाम्बाङ्ङि टासुमानाँ ढुवारिक् नुलोक् डोक् छुप्टाइसाना, हिट्नुङ् काकोबा उपिङ्बाचि चा ढुवारिक्ङि डोक् ओयेबैसागा, टरो आन्याँ ढुवारिक् ओङ्सुम्नाँ हिट्नि साक्चा ओवानेट्निगा॥”
24माङ्ठाना काकोबा काप्तान हिट्नुङ् गाडुवाडाङ्बाचिङा ना रिङ् ओखेम्सुङ् “हाट्ले पाक् लियुक्ना होला?” पिक्सा हिट्नागा डोङ् ओठोङ्डे॥ 25हिट्नुङ् हिट्नि ठिबाङ् याप्मि आबे हिट्नुङ् हिट्नागा नाड्डे लोडुचे, “खेम्सानुम्, खानिङा खाम्बाङ्ङि आछाक्टुम्चिम्गा याप्मिचिम् टे या माङ्ठानाङि ओयेबाउङ् याप्मिचि उहिसिक्टुएट्टुचि॥” 26हिट्नुङ् काप्तानङा उपिङ्बाचि खाट्टुचिउङ् मुलिचेलाचि पाक्चा मिचोक्ङे काचाहारि-कुन्डालङि आप्टुचे, पोङ्भोने याप्मिचिङा हिट्नागा लुङ्गेॽवाङा ओलेप्टु ओसेडुचिचि नुङ् उन् किट्टे॥ 27हिट्नागाँ मुलिचेलाचि ओआप्टुचिउङ् काचाहारि-कुन्डाल सोरि येप्मा ओमेट्टुचे हिट्नुङ् सानिङ्डाङ्बाङा हिट्नागा लोडुचे, 28“आन्याँ ना उनिङ्ङि याप्मिचि पाक्चा खानिङा सिकाँ चोक्नेनुम्चिम् नुङ् लोनानिगा, टरो पुयानुम्, यरुसलेमङाना सोब्बेलेङ् खानि हिसिक्माङा इप्टुएसुए हिट्नुङ् ना याप्मि सियाना फाट्टुर चा आन्याँ टेहेक्ङि खुमेप्मा आकोलेएट्टिगा रैछो॥”#मात्ति २७:२५
29टरो पाटरुस हिट्नुङ् आरु मुलिचेलाचिङा हिट्नागा ओलोडुचे, “आन्याँम्टे याप्मिचिगा नुङ्ना माङ्हाङ्ङाना रिङ् डोक् टेम्मा नुयुक्॥ 30खानिङा खाप्चेङि आछुडुमुङ् आसेडुम्ना येसु आन्याँ टुबाठेबाचिङा माङ्ध्यान् ओचोगुना माङ्हाङ्ङा उहिङ्ग्वाट् चोगुए॥ 31इस्राएलि याप्मिचि पापलाम्मा काएल्-काबु लिमा हिट्नुङ् पाप छेमा टोक्माउङ्सा माङ्हाङ्ङा उन् हाङ्बा हिट्नुङ् काहिङ्मेप्बा डाङ्बा चोगुउङ् उछुप्टाङ् उमुक्लेङ् युङ्सुए॥ 32नागा रिङ्चि आन्याँ हिट्नुङ् सेङ्सेङ्ना हाङ्साङा माप्मा हिडुम्टुम्मा॥ माङ्हाङ्ङाना आग्याँ ओटेन्गालाउङ्सा उन्ङा सेङ्सेङ्ना हाङ्सा पिडुएसुचे॥”
33हिट्नुङ् ना रिङ् हिट्नागाँ ओखेम्सुङ् काचाहारि-कुन्डालङि उलिसागा याप्मिचिगा आड्डिक् उन्चि याक्लेडे हिट्नुङ् मुलिचेलाचि सेडुम्चिम् पिक्सा निङ्ग्वा ओचोगुए॥ 34टरो हिट्नि धारमाबिधि काहिसिक्बाचि हिट्नुङ् ख्वाप्पाङा याप्मिचिङा मान् उपिडुना उनिङ् गामालिएल लिसाना फारिसि याप्मि येबे, हिट्नुङ् हिट्नागाँ मुलिचेलाचि छोप्मोङ् भारा ओपाङ्सुचे॥ 35हिट्नुङ् हिट्नाँ काचाहारि-कुन्डालङिगा याप्मिचि नाड्डे लोडुचे, “इस्राइलि याप्मिचि, नागा याप्मिचि खानिङा पाक् चोक्माना निङ्ग्वा आचोगुएसुम्मेना? खानि ओछेक्छेक् चोगानि, 36आम्टेप्मा बारखा पाइले थियादास ओलोडुना याप्मि टाए॥ हिट्ना ‘आङा सोब्बे नुङ्ना ठेना’ पिक्सा माट्सा टाए॥ हिट्नुङ् टेम्बोक् साए याप्मिचिङा चा रोक् उरिक्टुए॥ टरो याप्मिचिङा उन् ओसेडुए हिट्नुङ् हिट्नालोक् ओवासागा याप्मिचि चेम्बेलेङ् उलिसाउङ् ओमेगे हिट्नुङ् उनिङ् डोक् मुक्मा नाडुए॥ 37हान्डेङ् निङ् छेप्माना रिङ् होन्डाना बेला गालिलङिना याहुदा याप्मि ओलोडुना टाए हिट्नुङ् आम्टेप्मा याप्मिचिलोक् टोङाउङ् बिद्रो चोगे॥ टरो उन् चा याप्मिचिङा ओसेडुए हिट्नुङ् उन् रोक् कारिक्बाचि चा चेम्बेलेङ् उलिसाउङ् ओमेगे॥ 38हिट्डेउङ् नागा याप्मिचि पाक्चा मेट्नेनुम्चिम् हिट्नुङ् लेडानुम्चिम् पिक्सा आङा खानि लोनाँनि॥ पोङ्भोने नागा याप्मिचिङा उहिसिक्टुएटुचिगा रिङ् याप्मिलाम्मा भोने, नागा याप्मिचि ओमेग्युएट्युक्॥ 39टरो माङ्हाङ्लाम्मा भोने खानिङा नागा याप्मिचि कोसाइगारि चा छाक्मा आहिनिम्चिम्गा, टरो खानि गोलो माङ्हाङ्ङाना बिरोधङि आकोबि गाड्डे आलिसिटि॥”
40उन्ङा माट्टुना रिङ्ङि हिट्नागा ओटेने॥ हिट्नुङ् हिट्नागाँ मुलिचेलाचि ओछेम्डुचिउङ् कोरराङा लेम्सा “हाट्ले ना येसुङाना उनिङ्ङि खानिङा चेक्मा आटोक्निम्ना” पिक्सा आग्याँ उपिडुचिउङ् हिट्नागा ओलेडुचे॥
41हिट्नुङ् मुलिचेलाचि काचाहारि-कुन्डाललाम्मा भारा ओहोन्डाउङ् “माङ्हाङ्ङाना ओनाजारङि आनिम्टे येसु लोङ्सा चिम्मा फुट्मा हिट्नुङ् याङ्छामा आङ्मा आखान्युक्” पिक्सा आड्डिक् उन्चि चाप् टाए॥ 42हिट्नुङ् लेम्बासेम्बा हिट्नागा माङ्ठानाङि हिट्नुङ् पाङ्-पाङ्ङि ओखाडाउङ् “येसु डोक् माङ्हाङ्ङा चामारसिङा चोगुना खिरिस्ट ए” पिक्सा ना नुना खाबोर सोरोक् सिकाँ चोक्सा पारचार ओचोगुए॥
Currently Selected:
मुलिचेला टोॽवा 5: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
