मुलिचेला टोॽवा 3
3
पाटरुसङा लोङ्लेन् याप्मि नुमानिङ् चोगुना
1ठिक् लेम्बा पाटरुस हिट्नुङ् युहान्ना लेम्बाङिना सुम्बोक् बाजाँ लिसाना बेला बिन्टि चोक्माना बेला माङ्ठानाङि खाडाचे॥ 2हिट्नि ओचेट्नुना ओलोडुना माङ्ठानाङिना ढुवारिक्ङि याप्मिचिङा लोङ्लेन् लिसाउङ् पोङ्साना याप्मि माङ्ठानाङि बिन्टि चोक्ङा ओखाड्गालोक् ओफाबा ओनाक्टुजो नुङ् सोरोक् लेम्बा हिट्नि याप्मिचिङा उखुयुङ् ओआप्टुङ् उयुङ्सुना डाना॥ 3हिट्नाङा पाटरुस हिट्नुङ् युहान्ना माङ्ठानाङि खाडागेट्टाचिगा निसुचे हिट्नुङ् ओफाबा नाक्टुचे॥ 4हिड्डेउङ् पाटरुस लोक् युहान्नाङा हिट्नालेङ् पुयाचुए हिट्नुङ् पाटरुसङा लोडुए, “आन्च्याँलेङ् पुयु!” 5हिट्नाङा चा “पाक् गोलो टोगुङ्टुङ्ना नुङ् उनिङ्ग्वाङि मिट्टुङ्” पुयुए॥
6पाटरुसङा लोडुए, “आङालोक् साम्मेङ् रुपाक् वाइना, टरो आङालोक् जे युङ्ग्वा हिट्ना डोक् पिनाँ॥ नासारातङिना येसु खिरिस्टङा उनिङ्ङि कोबाउङ् लाम्टिया॥” 7हिट्नुङ् पाटरुसङा हिट्ना लोङ्लेन् उछुप्टाङ् उमुक्ङि लाबुङ् फोगुए॥ हिट्ना बेला डोक् हिट्ना याप्मिङाना उलाङ् उमुक् नुमानिङ् लिसे, हिट्नुङ् लाम्टिमाना बोल् टोगुए॥ 8हिट्नुङ् उन् कोबाउङ् फोट्रोक् फोट्रोक् आम्सा लाम्टिए॥ हिट्नुङ् फोट्रोक् फोट्रोक् आम्सा माङ्हाङ्ङाना उनिङ् चोन्सा पाटरुस हिट्नुङ् युहान्नालोक् माङ्ठानाङि खाडे॥ 9हिट्नि ख्वाप्पा याप्मिचिङा हिट्ना लाम्टियाना हिट्नुङ् माङ्हाङ्ङाना उनिङ् चोन्डुना उनिसुए॥ 10हिट्नागाँ नाउम्टे माङ्ठानाङिना ओचेट्नुना ओलोडुना ढुवारिक्ङि सोरोक् याङ्नाक्सा युङाना, हिट्नुङ् लाम्टिमा हिनिना याप्मि नुङ् मिसेन् उनिसुएट्टुए॥ हिट्नुङ् “ना खोड्डेउङ् लाम्टिमा हिडेना” पिक्सा याप्मिचि आड्डिक्लोक् डोङ् ओठोङ्डे॥
पाटरुसङा माङ्ठानाङि नुना खाबोर पारचार चोगुना
11हिड्डेउङ् हिट्ना याङ्कानाक्बा याप्मिङा पाटरुस हिट्नुङ् युहान्ना लाबुचिगा याप्मिचिङा उनिसुङ् डोङ् ओठोङ्डे हिट्नुङ् माङ्ठानाङिना सोलोमान ओलोडुना टेल्लाङ्ङि सोब्बे याप्मिचि पिन्सा ओआबाउङ् उछुमे॥ 12हिट्नुङ् पाटरुसङा याप्मिचि निसुचिउङ् हिट्नागा लोडुचे, “इस्राइलि याप्मिचि, खानि पोङ् ना रिङ्ङि डोङ् आठोङ्डिटिगा टे? पाक् ना याप्मि आन्च्याँ बोल् हिट्नुङ् भाक्टिलाम्मा नुयाना नुङ् खानि आमिट्टिटिगि? 13हिट्नाडे माखाक्, आनि टुबाठेबा आब्राहाम, इसाहाक लोक् याकुबङाना माङ्हाङ्ङा डोक् ओसेवाक् येसु माहिमित चोगुए॥ उन् खानिङा आलाबुमुङ् सेप्मा कोन्युक् पिक्सा सासाक्चि मुक्ङि आपिडुम्मे हिट्नुङ् पिलातासङा येसु लेप्मा निङ्ग्वा चोगु चा खानिङा उन् लेडुन् पिक्सा आलोडुमे॥#पारस्थान ३:१५ 14खानिङा सेङ्सेङ्ना हिट्नुङ् धारमोति याप्मिङाना ओसाट्टो याप्मि कासेट् ‘आन्याँलोङ्सा याप्मिलेडाबिडा’ पिक्सा आलोडुमे॥#मात्ति २७:१५-२३; मारकुस १५:६-१४; लुका २३:१३-२३; युहान्ना १९:१२-१५ 15नाड्डेउङ् खानिङा चोला आपिना आसेडुमे, टरो माङ्हाङ्ङा उन् सियानालाम्मा उहिङ्ग्वाट् चोगुए॥ ना रिङ् काखेम्बा हिट्नुङ् कानिबा आन्याँ वासेट्टिङा॥ 16हिट्नुङ् ना खानिङा मिसेन् आनिसुम्ना याप्मि येसु उनिङ्ङि बिस्वास चोगुना हिट्नुङ् उनिङ्ङि डोक् बोल्लेउ लिसाना खानिङा आनिसुम्मे॥ ना याप्मिङा येसु उनिङ्ङि बिस्वास चोगुनाँ नाहि खानि टोकानाङि डोक् नुए॥
17“हाउ आम्भु-आन्झाचि, खानि हिट्नुङ् खानि सासाक्चिङा पाक् ओचोगुएना हिट्ना ठाहा मिटोक्ङे येसु आसेडुम्ना रिङ् आङा ठाहा टोगुएसुङ्ङे॥ 18टरो खिरिस्टङा याङ्छामा आङ्मा कोन्युक् नुङ् माङ्हाङ्ङा सोब्बे माङ्काटाचिलोक् माट्टुना रिङ् युडोसुए॥ 19हिट्डेउङ् हाट्ले खानि काएल्-काबु लिसानिउङ् खानि पापलाम्मा माङ्हाङ्लेङ् नोक्टानि, हिट्नुङ् उन्ङा खानि पाप माटुगिबिडिटि॥ हिट्नुङ् माङ्हाङ्लाम्मा खानिङा हाङ्हाङ् हिट्नुङ् बोल् आटोगुम्टुम्॥ 20हिट्डेउङ् उन्ङा पाइला डोक् सेगुना काहिङ्ग्मेप्बा येसु खिरिस्ट खानि लोङ्सा पाङ्सुटु॥ 21टरो माङ्हाङ्ङा आच्छो बेलालाम्मा डोक् उन्ङाना सेङ्सेङ्ना माङ्काटाचिलोक् चोगुना माङ्हुप् गाड्डे ख्वाप्पा रिङ् फेरि ओछोङ्ग्वाट् चोक्माना बेला मिटाए सोम्मा येसु खिरिस्ट टोनालोग्ङि डोक् लिमा कोन्युक्॥ 22मोसाङा चा नाड्डे माट्टुए, ‘माङ्हाङ् डाङ्बाङा आङा याङ्सेगि गाड्डे डोक् खानि आप्पे याप्मिचिलाम्मा ठिबाङ् माङ्काटा सेगुटु॥ उन्ङा माट्टुना ख्वाप्पा रिङ् खानिङा खेम्मा कोन्युक्॥ 23टरो हिट्ना माङ्काटाङाना रिङ् ओखेम्सुन्गा याप्मिचि माङ्हाङ्ङा ओयाप्मिचिलाम्मा साम्डुचिचि हिट्नुङ् हिट्नागा फ्याङ् मेगुचिचि॥’#धारमाबिधि १८:१५,१८,१९
24“हिट्नुङ् सामुएल माङ्काटा हिट्नुङ् ओएङ्स्वागा ख्वाप्पा माङ्काटाचिङा हाट्लेसेन्गा बारेङि डोक् ओमाट्टुए॥ 25हिट्नुङ् खानि हिट्नागा माङ्काटाचि हिट्नुङ् माङ्हाङ्ङा खानि टुबाठेबाचिलोक् चोगुना माङ्हुप्ङाना छालेट्चि ए॥ माङ्हाङ्ङा आब्राहाम नाड्डे लोडुए, ‘काछालेट्चिलाम्मा डोक् नाराङिगा ख्वाप्पा छोङ्बाचिङा आसिक् ओटोगुटु॥’#उत्पति २२:१८ 26हिट्डेउङ् माङ्हाङ्ङा खानिगा ओभेन्गा टोॽवालाम्मा नोक्माउङ् खानि आसिक् पिमा नुङ् उन्ङाना आप्पे ओसेवाक् येसु सोब्बे नुङ्ना पाइला खानि इस्राएलि याप्मिचिङि पाङ्सुए॥”
Currently Selected:
मुलिचेला टोॽवा 3: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
