मुलिचेला टोॽवा 2
2
पेन्तिकोसङाना लेम्बा सेङ्सेङ्ना हाङ्सा
1पाइलेना लेम्बा पेन्तिकोस ओलोडुना याहुदिचिगा चाडा बेला यरुसलेमङि सोब्बे बिस्वासिचि ठिक्ए डेन्ङि उछुमाइसागा॥#लेबि २३:१५-२१; धारमाबिधि १६:९-११ 2हिट्ना बेला डोक् हिट्नि ठेना हिॽवा फेन्डि गाड्डे टोनालोग्लाम्मा ठिक् साब्दा मुक्टे, हिट्नुङ् हिट्ना हिॽवाङाना साब्दाङा येसुङि बिस्वास काचोक्चि उयुङागा पाङ् ख्वाप्पा इप्टुए॥ 3हिट्नुङ् मिङाना ओसाङ् लेक्फा गाड्डेना ओफारा ओफारा लिसाउङ् ठिबाङ् ठिबाङ् याप्मिचिगा टेहेक्ङि युङाना हिट्नागाँ उनिसुए॥ 4हिट्नुङ् हिट्नागा सेङ्सेङ्ना हाङ्साङा इप्टुचे हिट्नुङ् सेङ्सेङ्ना हाङ्साङा पिडुचि गाड्डे हिट्नागाँ आरु रिङ्ङि चेक्मा ठालाँ ओचोगुए॥
5हिट्ना बेला धारमोति याहुदि याप्मिचि नाराङिगा ख्वाप्पा देसलाम्मा चाडाङि यरुसलेमङि ओटाइसागा॥ 6ना साब्दा मुक्टाना ओखेम्सुङ् हिट्ना डेन्ङि जोम् याप्मिचि उछुमे हिट्नुङ् हिट्नागा डोङ् ओठोङ्डे, पोङ्भोने नागाँ उन्चि रिङ्ङि हिट्नागा बिस्वासिचि ओचेक्टागा ओखेम्सुए॥ 7हिट्नुङ् हिट्नागा आसाक्का डोङ् ओठोङ्डाउङ् उपिगे, “माखाक् हाउ, पाक् नागा ख्वाप्पा ओचेक्येट्गा गालिलि याप्मिचि माहि टे? 8नागा याप्मिचि खोड्डेउङ् आनिगा आ-आप्पे रिङ्ङि ओचेक्येट्गा? 9नाहि आनिउम्टे पारथि छेट्राङिगा, मादि, एलामि, मेसोपोटामिया, याहुदिया, कापाडोकिया, पोन्टास, एसिया, 10फिरगिया, पामफिलिया, मिस्रा, कुरेनि नेहेट्टाङ्ङिना लिबिया, हिट्नुङ् रोमलाम्मा आबिगा, 11(याहुदिचि हिट्नुङ् याहुदि धारमाङि बिस्वास काचोक्चि आरु छोङ्बाचि), केरेटङि युङिगा, हिट्नुङ् आराब देसलाम्मा आबिगा याप्मिचि चा वासेट्टि॥ हिट्नागाँउम्टे आनिगा सोब्बेङा आ-आप्पे रिङ्ङि माङ्हाङ्ङा चोगुना डोङ् ठोङ्डिना टोॽवाचि उमाट्टुगा खेम्सुएट्टुम्॥” 12हिट्नागा ख्वाप्पा डोङ् ओठोङ्डे हिट्नुङ् फाम्लेङ् उलिसाउङ् “नाड्डेगा पाइगा गोलो?” पिक्सा उन्चि उन्चि सिलाप्गा सिलाप् ओचोगे॥
13टरो आम्टेप्मा याप्मिचिङा खिसि ओचोगुचिउङ् ओलोडुचे, “नागाँ याप्मा इमालिङ् उठुङुङ् ओटेडुएसुचे॥”
पाटरुसङाना पारचार
14टरो पाटरुसङा एघार मुलिचेलाचिलोक् येबाउङ् ठेना साब्दाङि ख्वाप्पाङा ओखेम्सुलोक् लोडुचे, “याहुदि टाक्चि हिट्नुङ् यरुसलेमङिगा याप्मिचि, ना पाक् लिसाना नुङ् आङा माट्टुङ्टुङ्, आरिङ् खेम्सानुम्, 15नागा याप्मिचि खानिङा आमिट्टुम् गाड्डे टेडुन्गेट्टुन्चिन्गा॥ ना बेला भ्यानिक्ङाना याङ् एडोक् मुक्टाइसे॥ 16टरो हाट्ले खानिङा आनिसुम्गा हिट्नुङ् आखेम्सुम्गा रिङ्चि योएल ओलोडुना माङ्काटाङा माट्टुना हिट्ना रिङ् युडैसे–
17‘माङ्हाङ्ङा माट्टुएसुए, आखेरि लेम्बा आहाङ्सा ख्वाप्पा याप्मिचि उठुङ्ङि ठेन्डुङ्टुङ्॥
हिट्नुङ् खानि छाचिङा माङ्हाङ्लाम्माना रिङ् ओमाट्टुटु,
हिट्नुङ् खानिगा ठाङ्बेन् छाचिङा निमापुमा उनिसुटु,
हिट्नुङ् खानि पासिङ्चिङा सेम्माङ् ओमाक्टुटु॥
18हिट्ना लेम्बा आटोॽवा काचोक्चि येम्बेछा हिट्नुङ् मेन्झेमा उठुङ्ङि आहाङ्सा ठेन्डुङ्टुङ्,
हिट्नुङ् हिट्नागाँ माङ्हाङ्लाम्माना रिङ् ओमाट्टुटु॥
19हिट्नुङ् आङा टो टाङ्साङ्ङि डोङ् ठोङ्डिना टोॽवाचि चोगुङ्टुङ्, हिट्नुङ् नाराङि चा मिक्सेन्ङाना टोॽवाचि चोगुङ्टुङ्॥
हिट्नि हेलिक्, मि हिट्नुङ् मिखुमाङ् खानि निमेट्नाँनि॥
20हिट्नुङ् टाङ्बाङाना माङ्ठेना हिट्नुङ् डोङ् ठोङ्डिना लेम्बा टामा पाइले,
टाङ्साङ्ङि नाम् छेमा नाडुङ् डुम् लियुक्, हिट्नुङ् लालिप्माङ् हेलिक् गाड्डे फाबालेङ् फाना लियुक्॥
21टरो टाङ्बा उनिङ् ओलाडुगा सोब्बे उहिङ्युक्॥’#योएल २:२८-३२ ”
22“इस्राइलि याप्मिचि, ना रिङ् खानिङा खेम्सानुम्, माङ्हाङ्ङा डोङ् ठोङ्डिना टोॽवा हिट्नुङ् चिन्नालोक् नासारातङिना येसु खानिङि पाङ्सुए, हिट्नुङ् खानिङा उन्ङा चोगुगा टोॽवाचि ठाहा आटोगुएसुम्मे॥ 23माङ्हाङ्ङा चोगुना निङ्ग्वा गाड्डे चोक्माउङ्सा येसु खानि मुक्ङि मापिडिए हिट्नुङ् दुस्टा याप्मिचिगा मुक्लाम्मा खानिङा उन् खाप्चेङि आछुडुमुङ् आसेडुमे॥#मात्ति २७:३५; मारकुस १५:२४; लुका २३:३३; युहान्ना १९:१८ 24टरो माङ्हाङ्ङा उन् सिमाना याङ्छामालाम्मा छुट्कारा पिडुए हिट्नुङ् उहिङ्ग्वाट् चोगुए, पोङ्भोने सिमाना रिङ्ङा उन् छाक्मा हिडुवाट्टुन्॥#मात्ति २८:५-६; मारकुस १६:६; लुका २४:५ 25दाउद हाङ्ङा खिरिस्टङाना बारेङि नाड्डे पारा छेप्टुए–
‘सोरोक् आटाङ्बा आटोकानाङि निसुङे हिट्नुङ् आङा किट्निङ्ना,
पोङ्भोने उन् आछुप्टाङ्लेङ् युङ्ग्वा॥
26हिट्डेउङ् आनिङ्ग्वा भेरेङ् लिसाइसे हिट्नुङ् माङ्हाङ् उनिङ् चोन्डुङ्टुङ्॥
ना आयेम् सिचा आङा आसाङि हिङ्ङा॥
27पोङ्भोने आमाङ्हाङ्, आङा सिङा चा उहुम्पाङि याङ्आनानिङ्ना
हिट्नुङ् कासेवाक्ङाना ओयेम् उहुम्पाङि खान्ङा रोग्मा आपिडुन्ना॥
28आङा फेरि हिङ्ग्माना लाम्बो याङ्आनिमेट्टे॥
हिट्नुङ् आङा काटोकानाङि वाङाना खान्ङा आनिङ्ग्वा हारकाङा आइप्माबिङा॥’#छाम्लोमा छाप्ला १६:८-११”
29“हाउ आम्भु-आन्झाचि, आङा छेम्बा डोक् ना रिङ् माप्मा हिडुङ्टुङ्, आनि टुबाठेबा दाउद सियाउङ् चा याप्मिचिङा उहुमुए हिट्नुङ् उहुम्पा नागा बेला सोम्मा चा युङ्ग्वा॥ 30टरो उन् माङ्काटा डाना हिट्नुङ् आप्पे उपुङ्लालाम्मा उन् गाड्डे डोक् हाङ्बा चोगुटु नुङ् माङ्हाङ्ङा चोगुना चामारसिङा उन्ङा ठाहा टोगुएसुना॥#छाम्लोमा छाप्ला १३२:११; २ सामुएल ७:१२-१३ 31हिट्नुङ् दाउदङा हान्डेङ् खिरिस्ट उहिङ्ग्वाट् लिना रिङ् पाइले डोक् ठाहा टोगुए॥ हिट्नुङ् उन्ङा नाड्डे माट्टुए, ‘माङ्हाङ्ङा उन् उहुम्पाङि नाडुवाट्टुन्, हिट्नुङ् ओलास चा उहुम्पाङि रोग्मा पिडुवाट्टुन्॥’
32“माङ्हाङ्ङा येसु सियानालाम्मा उहिङ्ग्वाट् चोगुना रिङ् आनि ख्वाप्पाङा निसुएसुम्मे॥ 33हिट्नुङ् उन् माङ्ठेना चोगुङ् माङ्हाङ्ङा उछुप्टाङ्लेङ् युङ्सुएसुए॥ माङ्हाङ् पाबाङा सेङ्सेङ्ना हाङ्सा येसुङि पाङ्माना माङ्हुप् चोगुए, हिट्ना हाङ्सा डोक् येसु डाङ्बाङा आनि उठुङ्ङि ठेन्डुना रिङ् खानिङा आनिसुएट्टुम् हिट्नुङ् आखेम्सुएट्टुम्॥ 34-35दाउद हाङ्बा आप्पे टो टोनालोग् खाड्नेएट्नि, टरोचा उन्ङा माट्टुए–
‘माङ्हाङ्ङा आटाङ्बा नाड्डे लोडुए,
“आङा कासाट्टुरचि कालाङ्घेप्पा उछिक्ङि मिचोक्ङे सोम्मा खान् आछुप्टाङ्लेङ् डोक् युङा॥”’#छाम्लोमा छाप्ला ११०:१
36“हिड्डेउङ् ख्वाप्पा इस्राएलि याप्मिचि खानिङा खाप्चेङि आछुडुमुङ् आसेडुम्ना येसु डोक् माङ्हाङ्ङा डाङ्बा हिट्नुङ् काहिङ्ग्मेप्बा खिरिस्ट चोगुना रिङ् ठाहा टोगानुम्॥”
37जब ना रिङ् काखेम्बाचिगा उन्चि निङ्ग्वा खोट्टुए हिट्नुङ् पाटरुस हिट्नुङ् आरु मुलिचेलाचि उसिलाप्टुचे, “आम्भु-आन्झाचि, हाट्ले आन्याँ पाक् चोग्याँगा टे?”
38हिट्नुङ् पाटरुसङा हिट्नागा लोडुचे, “खानि पापलाम्मा छेमा टोक्मा लोङ्सा काएल्-काबु लिसानिउङ् येसु खिरिस्टङाना उनिङ्ङि बाप्टिस्मा चोगानि॥ हिट्नुङ् सेङ्सेङ्ना हाङ्साङाना बारदान आटोगुम्टुम्॥ 39पोङ्भोने ना सेङ्सेङ्ना हाङ्साङाना चामारसिङा खानि, हिट्नुङ् खानि छालेट्चि, हिट्नुङ् ख्वाप्पा लाप्माङ् लाप्माङ्ङि ओवाहेट्गा आनि माङ्हाङ् टाङ्बाङा छेम्डुचिगा सोब्बे लोङ्सा ए॥” 40हिट्नुङ् पाटरुसङा आरु जोम् रिङ् माट्टुङ् “खानि नागा ओभेन्गा याप्मिचि हिट्नुङ् नागा उठुङ्ङि टाना साजाएलाम्मा हिङ्ग्माना टोॽवा चोगानि पिक्सा ओछेक्छेक् चोगुचे॥” 41हिड्डेउङ् याप्मा याप्मिचिङा पाटरुसङाना रिङ् उन्चि निङ्ग्वाङि उयुङ्सुए हिट्नुङ् बाप्टिस्मा ओचोगे॥ हिट्ना लेम्बालाम्मा सुम्बोक् हाजार नुङ्ना चा जोम् याप्मिचि उलिसे॥ 42हिट्नुङ् हिट्नागा मुलिचेलाचिगा हिसिक्मा, साङ्गातिङि, चामा-ठुङ्माङि हिट्नुङ् बिन्टिङि सोरोक् लाहाब् उलिसे॥
बिस्वासिचिगा साङ्गाटि
43हिट्नुङ् जोम् मिक्सेन् हिट्नुङ् डोङ् ठोङ्डिना टोॽवाचि मुलिचेलाचिङा ओचोगुना उनिसुङ् ख्वाप्पा याप्मिचि डोङ् ओठोङ्डे॥ 44हिट्नुङ् ख्वाप्पा बिस्वासिचि सोरोक् एक्केउ टुब्मा ठालाँ उलिसे हिट्नुङ् उन्चिगा थोक्चि चा सोरोक् चालाँ ओचोगुए॥ 45हिट्नुङ् हिट्नागाँ उन्चिगा माक्फेन्सुबेन् हिट्नुङ् आरु थोक्चि छोङ्सा चाहाबा उलिसागा याप्मिचिलोङ्सा ओहान्डुबिडुचे॥ 46हिट्नागा ठिक्ए निङ्ग्वा ओचोगुङ् लेम्बासेम्बा माङ्ठानाङि उछुमागा डागा, उन्चिगा पाङ्-पाङ्ङि माङ्खोइ ओचोगा डागा, हिट्नुङ् आनान्दा चोक्सा हिट्नुङ् हारका लिसा चामा-ठुङ्मा ओहान्डुजोए॥ 47माङ्हाङ्ङाना उनिङ् ओचोन्डुए हिट्नुङ् याप्मिचिङा उन्चि निङ्ग्वा ओटाडुचे॥ हिट्नुङ् उदार ओटोगुगा याप्मिचि लेम्बासेम्बा टाङ्बाङा पोयुचे॥
Currently Selected:
मुलिचेला टोॽवा 2: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
