मुलिचेला टोॽवा 1
1
माङ्हाङ्ङा चामारसिङा चोगुना सेङ्सेङ्ना हाङ्सा
1-2आनि पान्चा पागारि थियोफिलास, आङा पाइले छेप्टुङ्ना छाप्लाङि येसुङा सेगुचिगा मुलिचेलाचि सेङ्सेङ्ना हाङ्सालाम्मा लोडुचि गाड्डे टोनालोग् मिखाप्मे सोम्मा येसुङा चोगुना टोॽवाचि हिट्नुङ् हिसिक्टुचिगा ख्वाप्पा हिसिक्माचि छेप्मा हिडुएसुङ्ङे॥#लुका १:१-४ 3येसुङा याङ्छामा आङ्डुङ् सिए, हिट्नुङ् चालिस लेम्बा सोम्मा छेम्बा डोक् उहिङ्ग्वाट् लिसाना रिङ् मुलिचेलाचि निमेट्मा उन् छुट्लुक् छुट्लुक् ठेट्टे, हिट्नुङ् माङ्हाङ् उमुलुक्ङाना रिङ् उन्ङा मुलिचेलाचि खेम्मेट्टुचे॥ 4ठिक् लेम्बा उन्ङा हिट्नागालोक् चामा चासिङा युङाना बेला उन्ङा हिट्नागा नाड्डे लोडुचे, “खानि यरुसलेमलाम्मा खोनि चा खाट्नेनिन्, टरो टोनालोग्ङिना आङाना माङ्हाङ् पाबाङा सेङ्सेङ्ना हाङ्सा पिनाँनि पिक्सा चोगुना चामारसिङा खानिङा हाङ्सानुम्॥ ना रिङ्उम्टे पाइला आङा लोनानिगा खानिङा आखेम्सुएसुम्मे॥#लुका २४:४९ 5युहान्नाङाउम्टे चुवाङा खानि बाप्टिस्मा मापिडिए, टरो आम्टेप्मा ओएङ्स्वालेङ् सेङ्सेङ्ना हाङ्साङा खानि बाप्टिस्मा आलिसिटि॥”#मात्ति ३:११; मारकुस १:८; लुका ३:१६; युहान्ना १:३३
येसु टोनालोग् खाडाना
(मारकुस १६:१९-२०; लुका २४:५०-५३)
6ठिक् लेम्बा मुलिचेलाचि येसुलोक् एक्केउ ओवासाना बेला उन् उसिलाप्टुए, “टाङ्बा, पाक् ना बेला डोक् इस्राएलि याप्मिचि छुट्कारा आपिडुचिउङ् आन्याँ मुलुक् उटुम् आचोगुटिनि टे?”
7येसुङा हिट्नागा लोडुचे, “खोना बेला ना रिङ् टायुक्ना नुङ् निमा कोम्मा खानि टोॽवा माखाक्॥ हिट्नाउम्टे टोनालोग्ङिना माङ्हाङ् पाबाङा आप्पे ओआधिकारङि युङ्सुएसुए॥ 8टरो सेङ्सेङ्ना हाङ्सा खानिङि टायुक् हिट्नुङ् खानिङा बोल् आटोगुम्टुम् हिट्नुङ् खानि यरुसलेमङि, याहुदिया छेट्राङि, सामारिया छेट्राङि, हिट्नुङ् ख्वाप्पा नाराङि आङाना बारेङि कामाप्बा आलिसिटि॥”#मात्ति २८:१९; मारकुस १६:१५; लुका २४:४७-४८
9येसुङा हिट्नाडे माप्मा हिडुङ् उन् हिट्नागाँ उपुयुगेट्टुलोक् टो-टो खिमेमाङि कोबाडे हिट्नुङ् हिट्नागाँ उनिस्वाट्टुन्॥#मारकुस १६:१९; लुका २४:५०-५१
10हिट्नागाँ टाङ्साङ्लेङ् उन् खाडाना पुसा ओयेबैसाना बेला फुट्ना लोट्लिङ् वाडाचुगा इप्पाङ् माङ्हाङ् रिङ् काउग्बाचि हिट्ना बेला डोक् हिट्नागा सोरि येबाचे, 11हिट्नुङ् माट्टाचुए, “हाउ गालिलि याप्मिचि, पोङ् खानि टाङ्साङ्लेङ् पुसा नाहि आयेबेसिएगा? येसु खानिलाम्मा टोनालोग्लेङ् खाप्माहिडे, येसु टोनालोग्ङि फोगा खाडि गाड्डे डोक् उन् ठिक् लेम्बा फेरि नोक्यु उङ्युग्॥”
याहुदा ओसाट्टोङि मात्तियास ओसेगुना
12मुलिचेलाचि जैतुन झोन्झोबालाम्मा यरुसलेम ओनोक्टे॥ ना झोन्झोबा यरुसलेमलाम्मा ठिक् किलो मिटार लाप्माङ्साना॥ 13हिट्नागा खालाङ्गाङि ओटासुङ् उन्चि उयुङागा उठुङ्ङिना टालाङि हिट्नागा उलिगे॥ हिट्नि पाटरुस, युहान्ना, याकुब, आन्दरियास, फिलिप, थोमा, बारथोलोमाइ, मात्ति, आल्फायासङा उइछा याकुब, देस भाक्ता सिमोन, हिट्नुङ् याकुबङा उइछा याहुदा डाना॥#मात्ति १०:२-४; मारकुस ३:१६-१९; लुका ६:१४-१६ 14हिट्नागा ख्वाप्पा एक्केउ उलिसाउङ् सोरोक् बिन्टि ओचोगायाक्टे॥ हिट्नि येसुङा उमा मारियाम हिट्नुङ् आरु मेन्झेमाचि, हिट्नुङ् येसुङाना येम्बेछा उन्झाचि चा ओडागा॥
15हिट्ना बेला पाटरुस ठिक् साए बिस जाना टेप्मा बिस्वासिचि माझाङि येबाउङ्, 16-17हिट्नागा लोडुचे, “आम्भु-आन्झाचि, याहुदा इस्कारियोतङा आनिलोक् डोक् युङाउङ् माङ्हाङ्ङाना सेवा चोक्माना ओभागा चा टोगुना॥ टरो सेङ्सेङ्ना हाङ्साङा पाइला डोक् दाउद हाङ्बालाम्मा येसु लाप्मा लोङ्सा याप्मिचि लाम्बो कानिमेप्बा याहुदाङाना बारेङि धारमाछाप्लाङि छेप्टाना रिङ् युमा डोक् कोन्युक् पिक्सा लोडुए॥”
18ना याहुदा याप्मिङा ओचाफेन्ना टोॽवा चोगुङ् कामाँ चोगुना ओफाबालाम्मा ठिक् बेङ्सि उइनुबिडुएसुना॥ हिट्ना बेङ्सिङि डोक् ओचाफेन्लोक् कोसाउङ् ओमाभोक् हेडे, हिट्नुङ् उहिडुवा होन्डाउङ् सिए॥ 19हिट्नुङ् यरुसलेमङिगा ख्वाप्पा याप्मिचिङा ना रिङ् ठाहा ओटोगुङ् हिट्ना बेङ्सिङाना उनिङ् उन्चि रिङ्ङि “आखेल्दामा” उयुङ्सुए॥ हिट्नाङाना उटुप् हेलिक्ङाना बेङ्सि लियुक्॥#मात्ति २७:३-८
20पाटरुसङा फेरि लोडुचे, “नाड्डेउङ् ना रिङ् छाम्लोमा छाप्लाङि नाड्डे छेप्टेसे–
‘हिट्ना युङ्ना पाङ्ठाङ् सुमुन्डेलेक् उलियाक्॥ हिट्नुङ् हिट्नि साक्चा उयुङ्नेयाक्॥’
हिट्नुङ् ‘उन्ङा चोगुना टोॽवाङाना जिम्मा आरुङा डोक् ओटोगुवाक्॥’#छाम्लोमा छाप्ला ६९:२५; १०९:८
21“हिड्डेउङ् येसु डाङ्बाङाना बारेङि कानिबा हिट्नुङ् उन्लोक् एक्केउ वासाना आनिलोक् ओवाहेट्गा याप्मिचि माड्डे याहुदाङाना ओसाट्टोङि ठिबाङ् याप्मि सेप्मा डोक् कोन्युक्॥ 22ना याप्मि बाप्टिस्मा कापिबा युहान्नाङा बाप्टिस पिमा उटुम् चोगुना बेलालाम्मा आनिलाम्मा येसु डाङ्बा टोनालोग्लेङ् खाडाना बेला सोम्मा ठाहा टोगुना हिट्नुङ् हिट्नाङा येसु डाङ्बा सियाउङ् उहिङ्ग्वाट् लिसाना रिङ् आनिलोक् डोक् कामाप्बा लिमा कोन्युक्॥”#मात्ति ३:१६; मारकुस १:९; १६:१९; लुका ३:२१; २४:५१
23हिड्डेउङ् हिट्नागाँ बारसाबास ओलोडुना योसेफ (ना युस्तास चा ओलोडुए) हिट्नुङ् मात्तियास ओलोडुना ओआप्टुचे॥ 24हिट्नुङ् हिट्नागाँ नाड्डे पिक्सा बिन्टि ओचोगे, “आन्याँ टाङ्बा, खान्ङा याप्मिचिगा निङ्ग्वा ठाहा आटोगुटु॥ 25मुलिचेलाङाना टोॽवा चोक्मा लोङ्सा नागाचि इप्पाङ्ङि खान्ङा साक् आसेगुएसुएना आन्याँ याप्मिनिमेट्टा॥ पोङ्भोने याहुदाङा ना टोॽवा नाडुए हिट्नुङ् उन् सिए हिट्नुङ् उन् खान्डुना डेन्ङि खाडे॥” 26हिट्नुङ् हिट्नागाँ हिट्नागाचि इप्पाङ् याप्मिचि निङ्ङि चिट्ठा ओठेन्डुए, हिट्नुङ् हिट्ना मात्तियास उनिङ्ङि चिट्ठा ठाए॥ हिट्नुङ् मात्तियास एघार मुलिचेलाचिलोक् ओनेडुए॥
Currently Selected:
मुलिचेला टोॽवा 1: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
