Ja̰ 19

Bɔyɛ kɔl tɨma cay Jesu

1Ɨni na, Piladɨ ay noyi bɨn̰ asɨgarn̰əŋ gɨ na ɨren̰ge dan̰ Jesu duroy gulɔŋ koyi gɨŋ bɨ, sɨmdayge dan̰ bɨraw. 2Kɨɗɨn̰ ga kan somdiige ɨni na, asɨgarn̰əŋ gaɗɨge jagɨwa-tɨrɨmbala ga ni gɨsɨm dobiige cayi gɨ ni sogii bɨ, kan dobiige badɨge ga yɨle pen̰ ga ni tɨrɨmbala gusi nee bɨ. 3Bɨ kan ɨrgage mɨnde gusi bɨ yeyige hɨn̰: «Lapɨya ton̰ kɨlma gɨ da Jubɨn̰əŋ!» Bɨ ayge te ɓajɨde maŋji.

4Piladɨ andaŋ doŋ ɗaŋ coŋ, bɨ yen̰ Jubɨn̰əŋ ye hɨn̰: «Sɨlagɨŋ ɨŋ kɨya ɨrgan̰ danayi doŋ gusɨgɨŋ kɛ, agɨŋ sol gɨ ɨŋ wa kɔl pɨna wo̰ gɨ ƴɨma cayi naŋ.» 5Kɨɗɨn̰ ga nee le, Jesu andaŋ doŋ dan̰ jagɨwa-tɨrɨmbala ga ni gɨsɨm cayi bɨ, dan̰ badɨge ga yɨle pen̰ gusi bɨ. Ɨni na, Piladɨ yege hɨn̰: «Sɨlagɨŋ ungo le ba kɔ.» 6Ama kɨɗɨn̰ ga ka-cay ka-bɔgɛ kɨbar bɨ, dan̰ asɨgarn̰əŋ ga ka-game ƴaa-Kumu gɨ da Jubɨn̰əŋ bɨ, soliige ɨni na, kan dege sɨle cayi yege hɨn̰: «Dɨɗii a cay sɨya-gɨ-dagɨli gɨŋ, dɨɗii a cay sɨya-gɨ-dagɨli gɨŋ.» Piladɨ yege hɨn̰: «Ƴaygɨŋ bɨ, kɨŋ-gandi gusɨgɨŋ dɨɗiigɨŋ a cay sɨya-gɨ-dagɨli gɨŋ. Ɨŋ-bandi na, ɨŋ waa kɔl pɨna wo̰ gɨ ƴɨma cayi naŋ.» 7Jubɨn̰əŋ jɨga dɨbiige cay nee yeyige hɨn̰: «Ni-gandi ni orɨn̰ dan̰ gasɨn̰-kɔl koni nee bɨ, dan̰ gɨyəŋ gɨ da gasɨn̰-kɔl gɨ nee le ojɨ gɨ ban kɨya mare, kɨya wa ban lee gusi leen̰ Kurɨn̰-Kumu.»

8Kɨɗɨn̰ ga Piladɨ je kɔl gɨ nee le ɨni na, hundɔrɔ leeyi jɨn̰ tumɔ tumɔ. 9Ban jogɨ ƴen̰ duroy ƴaadi gɨŋ bɨ, ɨngɨrɨn̰ Jesu hɨn̰: «Kɛ ji-bandi le, ji sayga na cay gɨsəŋ ga ani gaŋ ga?» Ama Jesu dɨbi kɔl pɨna wo̰ cay nee naŋ. 10Ɨni na, Piladɨ yeyi hɨn̰: «Kɛ na ɨŋ-bandi ma mɨn̰ kan̰ yɔŋ kɔl le ga? Ji sɨla gɨ ɨŋ ɓala gɨ ni ɗeen̰ daa bɨ, gɨ ni gagɨlɨn̰ a cay sɨya-gɨ-dagɨli gɨŋ bɨ naŋ ga?» 11Ɨni na, Jesu jɨga dɨbi cay nee yeyi hɨn̰: «Tumɔ, ban gɨ som daa nii le ni na bɨn̰ dɔnɔ naŋ na, ji ni kɨya ɓale lɔɔ hɨnga pɨna danaŋ naŋ. Na toy di hɨn̰ wo̰ ma, ɨsɨna gɨ da ban gɨ ba dɔbɔŋ kobɨn̰ le gumu tɔgɨ dɨn̰ kon̰ coŋ.»

12Ayɨn̰ toy kɨɗɨn̰ ga nee gaŋ le, Piladɨ mal gɨyəŋ gɨ ni ɗen̰ Jesu daa. Ama Jubɨn̰əŋ ayge te dɔgɛ-sɨle yen̰ge hɨn̰: «Hɨn̰ gɨ ji na ɗayi daa na, ji na Sejar ba-pogii naŋ. Kɨya wa waŋ waŋ gɨ na laa gusi laan̰ kɨlma gɨ gumu na, ban lee gusi leen̰ na ba-baa gɨ da Sejar.» 13Kɨɗɨn̰ ga Piladɨ je kɔl gɨ nee le ɨni na, ban andɨn̰ dan̰ Jesu doŋ. Bɨ Piladɨ or sɔmɛ a cay kali di ni bon̰ kɔl dɨŋ, a cay kɨɗɨn̰ ga say daa lam gaŋ ga leege dan̰ garma, na kɨɗɨn̰ ga hogi daa, ga nee le ma kan teegege dan̰ kɨbɨ əbɨro naa Gabada le. 14Na wɔlɛ gɨ ni ƴomɨn̰ cay tɨbay kɨdɨrɛ gɨ ni Pakɨ. Tɨwa ɨn ɗɨrɨj wo̰. Ɨni na, Piladɨ yen̰ Jubɨn̰əŋ hɨn̰: «Sɨlagɨŋ kɨlma kogɨŋ le.» 15Ɨni na, kan ayge te dɔgɛ-sɨle yen̰ge ye hɨn̰: «Diɗii na dɨɗe, diɗii na dɨɗe! Gagɨlayigɨŋ na gagɨle a cay sɨya-gɨ-dagɨli gɨŋ.» Piladɨ jɨga ɨngɨrge hɨn̰: «Kɛ kɨŋ gey gɨ ɨŋ na gagɨla kɨlma kogɨŋ a cay sɨya-gɨ-dagɨli gɨŋ ga?» Ka-cay ka-bɔgɛ kɨbar dɨbiige cay nee yeyige hɨn̰: «Ni-gandi na, ni ɨran̰ dan̰ kɨlma gɨ ɗaŋ naŋ, na kɨlma gɨ gumu Sejar ƴɔbɨ.» 16Ɨni na, ban dobɨ Jesu kobɨge ɗe kan na gagɨliige cay sɨya-gɨ-dagɨli gɨŋ. Ɨni na, asɨgarn̰əŋ say ƴomiige orɨn̰ge danayi.

Gagɨlge Jesu a cay sɨya-gɨ-dagɨli gɨŋ

(Matɨyo 27:32-44; Marg 15:21-32; Lug 23:26-43)

17Jesu gusi ba-aye sɨya koyi gɨ dagɨli, den̰ kɨɗɨn̰ andɨn̰ a cay ƴaa-di-gumu di Jerusalɛm dɨŋ doŋ bɨ, orɨn̰ andɨn̰ kɨɗɨn̰ ga teegege Isi-ca, gɨ kan teege dan̰ kɨbɨ əbɨro naa Golgota le. 18Kan gagɨliige a cay sɨya-gɨ-dagɨli gɨŋ. Na a kɨɗɨn̰ ga nee gaŋ le ma kan gagɨldege kalaŋ ga pɨna wo̰ won̰ge sɔɔ a cay sɨya-gɨ-dagɨli koge gɨŋ danayi. Pɨna a cay kobi gɨ bara gɨŋ bɨ, pɨna a cay kobi gɨ masa gɨŋ bɨ, ban duroyge. 19Piladɨ wal kɔl boy sɨya gɨ habɨli gɨŋ de a cay sɨya-gɨ-dagɨli gɨŋ le. Kɔl gɨ kan ba walge le ba kɛ: «Na Jesu gɨ Najarɛt, kɨlma gɨ da Jubɨn̰əŋ.» 20Jubɨn̰əŋ kondɨ ɗoŋsɨge kɔl le, kɨya wa kɨɗɨn̰ ga kan gagɨlɨn̰ge Jesu cay sɨya-gɨ-dagɨli gɨŋ nee le, woy mɨnde dan̰ cay ƴaa-di-gumu. Walge kɔl le na dan̰ kɨbɨ əbɨro bɨ, kɨbɨ latḛ#19:20 kɨbɨ latḛ le, na kɨbɨ wɔɔ gɨ da kalaŋ ga Rɔm. bɨ, kɨbɨ Gɨrɛg bɨ. 21Ɨni na, ka-cay ka-bɔgɛ kɨbar yen̰ge Piladɨ ye hɨn̰: «“Wale gɨ ban naa kɨlma gɨ da Jubɨ naŋ”, ama ji wala “ungo gɨ kɛ le ye gɨ ɗi naa kɨlɨma gɨ da Jubɨn̰əŋ.”» 22Piladɨ dɨbɨge cay nee yege hɨn̰: «Kɔl gɨ ɨŋ wal ɨni na, kɨya wɔyɛ na hɨn̰ gɨ ɨŋ ba wal le kɔ.»

23Kɨɗɨn̰ ga asɨgarn̰əŋ gagɨlge Jesu a cay sɨya-gɨ-dagɨli gɨŋ coŋ ɨni na, kan donge badɨge kayi gosɨnɨge kɨɗɨn̰ poɗɨn̰ ojɨn̰ cayge pɨna pɨna. Baa na badɨge kayi ga ni cay ga ƴen̰ gaŋ: Badɨge ga nee le ɨran̰ dan̰ kɨɗɨn̰ cɔngɨɗɛdɨge naŋ. Na kɨbɨ badɨge ga pɨna ƴɔbɨ, ga sayga daa bɨrɨŋ andaŋ dugo. 24Ɨni na, asɨgarn̰əŋ yen̰ge gusɨge kɔl duroyge yege hɨn̰: «Gumɔjɨ le sagɨdenagɨŋ naŋ, ama jɨbɨnagɨŋ ɓɛlɛ ana solɨn̰gɨŋ, ungo gɨ ɓɛlɛ na ƴɨmayi na, ɗe ay.» Lee gɨ kɔl gɨ kan walge duroy Magtubu Kɨbe-Kɨra dɨŋ le, na or a kɨɗɨn̰di gaŋ, kɔl le ba kɛ:

«Kan gosɨnɨn̰ge gusɨge badɨge kange bɨ,

Jɨbɨge ɓɛlɛ a cay gumɔjɨ hɨnge gɨ ƴen̰ gɨŋ bɨ.»#19:24 Ayge na duroy: Psaumes 22:19.

Na ban ma na hɨnga ga asɨgarn̰əŋ leege le.

25Jesu ƴoyi bɨ, tɨm ƴoyi bɨ, Mari di ni tam Kɨlopas bɨ, Mari di cay gulɔŋdo na Magɨdala bɨ, ɨrege mɨnde dan̰ sɨya-gɨ-dagɨli le. 26Kɨɗɨn̰ ga Jesu sol ƴoyi bɨ, ba-aye-cay-tɨbayi gɨ ban geyi tɔgɨ ɨre mɨnde durdo bɨ na, ban yen̰ ƴoyi hɨn̰: «Tama,#19:26 Sɨlagɨŋ: Ja̰ 2:4. Ɗɨngɨsagɨŋ kɔl gɨ walge dugo. sɨla kurɔndɛɛ ba kɔ.» 27Kardi nee ban yen̰ ba-aye-cay-tɨbayi yeyi hɨn̰: «Sɨla, na ƴon̰ ba ɨre kɔ.» Bɨ ayɨn̰ toy a tɨwadi di nee dɨŋ le, ba-aye-cay-tɨbayi le orɨn̰ danaa a tayi.

Jesu ma

(Matɨyo 27:45-56; Marg 15:33-41; Lug 23:44-49)

28Kardi nee, Jesu sol gɨ te hɨnga nɔm ayaŋ ɨni na, ban ye kɔl ɗe gɨ hɨnga ga kan ba walge duroy Magtubu di da Kumu dɨŋ le, na or kɨɗɨn̰dɨge gaŋ. Ban ye hɨn̰: «Gamase dəŋ.»#19:28 Sɨlagɨŋ: Psaumes 22:16; 69:22. 29Ɓɨri gɨ pɨna wo̰ gɨ cɛrɛ di suru gɨ dasi wanɨn̰ boy nee woy a kɨɗɨn̰ ga nee gaŋ le. Ɨni na, asɨgarn̰əŋ dobɨge hɨnga ga pɨna wo̰ ga gɨlɨn̰ hɨn̰ ja̰a̰ wo̰ boy nee bɨ, dobɨge kɨbɨ sɨya gɨ ni ijopɨ gɨŋ bɨ, ayge daa si mɨnde dan̰ kɨbi. 30Kɨɗɨn̰ ga Jesu ƴɨbe cɛrɛ gɨ dasi le sol ɨni na, ban ye hɨn̰: «Te hɨnga nɔm ayaŋ coŋ ɨni.» Ɨni na, ban de cayi dugo bɨ, hɨmbɨ.

Asɨgar gɨ pɨna wo̰ jɨbɨ gasɨbi Jesu

31Na wɔlɛ gɨ kan ƴomɨn̰ge cay tɨbay wɔlɛ gɨ ni dɔrɛ gɨlale gɨ da Jubɨn̰əŋ. Jubɨn̰əŋ geyge gɨ gundi kalaŋ na gɨ wɔyɛ daa a cay sɨya-gɨ-dagɨli gɨŋ dan̰ wɔlɛ gɨ ni dorɨn̰ gɨlale naŋ. Bɨ wɔlɛ gɨ ni dɔrɛ gɨlale le na wɔlɛ gɨ gumu. Lee gɨ kan ɨngɨrɨn̰ge Piladɨ gɨ ban na pɨya tɨbayge bɨ, kan na gɨsɨngege coŋ a cay sɨya-gɨ-dagɨli gɨŋ. 32Kɨɗɨn̰ ga nee le kalaŋ ga kan gagɨldɨge a cay sɨya-gɨ-dagɨli koge gɨŋ pɨna dan̰ Jesu le, asɨgarn̰əŋ ɨrgage poyge tɨbay ban gɨ cay wase bɨ, kardi nee poyge tɨbay ban gɨ ni sɔɔdɨge bɨ. 33Kɨɗɨn̰ ga kan bugoŋge a cay Jesu ɨni na, kan solge gɨ ban ma ɨni, lee gɨ pɨyage tɨbayi naŋ. 34Ama asɨgar gɨ pɨna wo̰ jɨb gasɨbi dan̰ dagɨɗɨ, ɨni na, kɔl gɨ kɨbɨna kɛ bɨ, kɨbar dan̰ kaŋ bɨ, andɨgaŋ. 35Ungo gɨ ba dor kardi hɨnga ga nee le, sol hɨnga ga nee le dan̰ cɨndi, lee gɨ tɨmon̰ toy or pɨna dan̰ kɔl gɨ cɨndi: Ungo gɨ nee le sol gɨ ɗi na ye na kɔl gɨ cɨndi ɗe gɨ kɨŋ-gandi kalɨn̰ ma kɨŋ na bɨgan̰ kuduroygɨŋ cay kɔl gɨ cɨndi gɨ da ba-lɔɔ tɨmon̰ le. 36Kɨya wa hɨnga ga nee le nɔm lee gusɨge na ɗe kɔl gɨ kan walge duroy Magtubu di da Kumu dɨŋ le, na or kɨɗɨn̰do gaŋ. Kan walge hɨn̰: «Isidi pɨna wo̰ kalɨn̰ ma, kɨya buyoŋ naŋ.»#19:36 Sɨlagɨŋ: Exode 12:46; Nombres 9:12; Psaumes 34:21. 37Kɔl gɨ kan walge duroy Magtubu di ɗaŋ dɨŋ kalɨn̰ ma ye nee coŋ hɨn̰: «Kan kɨya aye cɨndɨge solɨn̰ ban gɨ kan jɨbiige dan̰ dagɨɗɨ le.»#19:37 Ayge na duroy: Zacharie 12:10.

Kan dɨbɨge tɨmay Jesu boy umboŋ gɨŋ

(Matɨyo 27:57-61; Marg 15:42-47; Lug 23:50-56)

38Kardi nee na, Jɨsɛb gɨ na ungo gɨ a cay ƴaa-di-gumu di Arimate gɨ na ba-aye-cay-tɨbay Jesu, ama wosɨ gusi kɨya wa ban hɨndar ka-dɔɔ cay Jubɨn̰əŋ. Ban ɨngɨrɨn̰ Piladɨ ɗe na, ɗe gɨyəŋ bii ay na dorɨn̰ gundi Jesu. Piladɨ gey, lee gɨ ban ɨrga dor gundi Jesu le. 39Nigodɛm gɨ tumɔ ɨrga gusi Jesu duroy son̰do dɨŋ le kalɨn̰ ma, ɨrga bɨ. Ban ɨrgan̰ dan̰ sɔŋ di ɨdɨr gɨ pɨna wo̰ gɨ kan leege dan̰ bɨn̰e di hɨya mir bɨ, dan̰ bɨn̰e di hɛɗɨmɛ ga ni alowe bɨ, gɨ nɨn̰edɨge ɓal hɨn̰ kɨlo tɔɔ-sɨbɨ wo̰. 40Lee gɨ Jɨsɛb dan̰ Nigodɛm ayge gundi Jesu bɨ. Kan nongɨrdiige dan̰ kɨbɨ badɨge ga kan sagɨdege tɨdɨrdege ɨdɨr cay nee. Dan̰ gɨyəŋ di hada da n̰ane tɨma di da Jubɨn̰əŋ. 41A kɨɗɨn̰ ga tumɔ kan ba gagɨlɨn̰ge Jesu nee le, yage gɨ pɨna wo̰ gɨ kan busoŋge hɨya boy nee woy mɨnde kɨway nee. A boy yage gɨ nee gɨŋ le, umboŋ gɨ kan leege gasɨbi garma gɨŋ gɨ hɨrɨwa gɨ dɨbɨge ungo nee naŋ ƴee woy nee. 42Kɨya cay ƴɔmɛ cay tɨbay wɔlɛ dɔrɛ gɨlale gɨ da Jubɨn̰əŋ bɨ, hɨn̰ gɨ kamɨn̰aŋ le ba woy mɨnde bɨ na, kan dɨbɨge gundi Jesu na a kɨɗɨn̰ ga nee gaŋ.

Currently Selected:

Ja̰ 19: gab

Highlight

Copy