Ja̰ 18

Ƴomge Jesu

(Matɨyo 26:47-56; Marg 14:43-50; Lug 22:47-53)

1Kɨɗɨn̰ ga Jesu ol Kumu hɨn̰ wo̰ ɨni na, ban dan̰ ka-aye-cay-tɨbayi andaŋge orge jɨn̰ nii kɨway kuray gɨ teeyige Sadəro̰. Kɨɗɨn̰ ga kan ba orge nee le, na yage gɨ kan busoŋge hayaŋ boy nee. 2Sɨlagɨŋ, Judasɨ ba-aye cay Jesu le sol kɨɗɨn̰ ga nee le kuɗa. Kɨya wa Jesu dan̰ ka-aye-cay-tɨbayi daydaŋge nee tɨba kondɨ. 3Ɨni na, Judasɨ baa tumoy te asɨgarn̰əŋ ga dan̰ kondige bɨ, dan̰ asɨgarn̰əŋ ga ka-ame ƴaa-Kumu bɨ, ga na ka-cay ka-bɔgɛ kɨbar dan̰ Parɨsɨn̰an̰əŋ ba gɨygɨge. Judasɨ orɨn̰ danage boy yage gɨ kan busoŋge hayaŋ boy nee le. Kalaŋ ga nee le orɨn̰ge dan̰ lamba bɨ, dan̰ dɨngɛ bɨ, dan̰ hɨnga ga ni wɔrɨn̰ɛ bɨ kobɨge.

4Jesu sol hɨnga nɔm ga ba kɨya andaŋ cayi le. Ban or ojɨge bɨ, ɨngɨrge yege hɨn̰: «Kɛ kɨŋ mal na waŋ ga?» 5Kan dɨbiige cay nee yeyige hɨn̰: «Ni mal na Jesu gɨ Najarɛt.» Ban yege hɨn̰: «Na ɨŋ-bandi ba ɨre kɛ.» Judasɨ ba-aye cay Jesu le, ɨre danage nee bɨ. 6Kɨɗɨn̰ ga Jesu ba yege hɨn̰: «Na ɨŋ-bandi ba ɨre kɛ» na, kan jogɨge dan̰ kardɨge bɨ, laydange. 7Ban ɨngɨrge ɗaŋ coŋ yege hɨn̰: «Kɨŋ mal na waŋ ga?» Kan dɨbiige cay nee yeyige hɨn̰: «Ni mal na Jesu gɨ Najarɛt.» 8Jesu dɨbɨge cay nee yege hɨn̰: «Ɨŋ yəgɨŋ tumɔ, na ɨŋ-bandi ba ɨre kɛ. Hɨn̰ gɨ naa ɨŋ-bandi ma magɨŋ na malaŋ na, ɗagɨŋ kan ga kɛ ɗe orge.» 9Jesu ye hɨn̰ wo̰, na ɗe kɔl gɨ ban ba ye tumɔ hɨn̰: «Kan ga Banɨ ba bəŋ danage le, ungo pɨna nɛŋ kalɨn̰ ma kayaŋ naŋ» le, ɗe na or kɨɗɨn̰di gaŋ.

10Kɨɗɨn̰ ga nee le, Simo Pɨyɛr orɨn̰ dan̰ pəlɨm gusi bɨ, dor colɨn̰ marɨna ba-gɨye gɨ da mangɨl gɨ da ka-cay ka-bɔgɛ kɨbar sɨmayi gɨ bara nɛŋ dɨbɨ coŋ. Marɨna ba-gɨye le gusondi na Malgus. 11Ɨni na, Jesu yen̰ Pɨyɛr hɨn̰: «Jɨgan̰ dan̰ pəlɨm ton̰ dɨba duroy ƴaado dɨŋ. Kɛ, ɨŋ gɨ sɔɔ hɨnga ga a duroy kobo gɨle-cɨn̰ gɨ da Banɨ gɨŋ ga ba ɗe gɨsin̰ canɨ le naŋ ga?»

Orɨn̰ge dan̰ Jesu tumoyi Han

(Matɨyo 26:57-58; Marg 14:53-54; Lug 22:54)

12Kɨɗɨn̰ ga nee le, te asɨgarn̰əŋ dan̰ kondige dan̰ ba-aye cayge bɨ, ka-game ƴaa-Kumu gɨ da Jubɨn̰əŋ bɨ, ƴomge Jesu saɗɨdiige. 13Cay wase na, kan orɨn̰ge danayi na a da Han. Kɨya wa Han na Kayip mon̰di. Kayip na mangɨl gɨ da ka-cay ka-bɔgɛ kɨbar boy ɨlgedi gɨ nee gɨŋ le. 14Na Kayip gɨ nee le gaŋ ba naa tumɔ bogɨn̰ Jubɨn̰əŋ kɔl kuduroyge yege hɨn̰: «Hɨn̰ gɨ ungo pɨna naa ba mara kɨya cay te kalaŋ kana na, na golgo le.»#18:14 Sɨlagɨŋ: Ja̰ 11:50.

Pɨyɛr man̰ kɨbi gɨ ɗi na ba-aye-cay-tɨbayi Jesu naŋ

(Matɨyo 26:69-70; Marg 14:66-68; Lug 22:55-57)

15Simo Pɨyɛr dan̰ ba-aye-cay-tɨbay Jesu gɨ ɗaŋ kobɨge kardi Jesu. Ba-aye-cay-tɨbayi Jesu gɨ ɗaŋ gɨ nee le, mangɨl gɨ da ka-cay ka-bɔgɛ kɨbar solii. Na toy di hɨn̰ wo̰ ma, ban way gɨyəŋ andɨn̰ pɨna duroy gulɔŋ gɨ da mangɨl gɨ da ka-cay ka-bɔgɛ kɨbar gaŋ. 16Ama Pɨyɛr na, ɨre doŋ mɨnde dan̰ kɨbɨ-ƴaa. Ɨni na, ba-aye-cay-tɨbay Jesu gɨ ɗaŋ gɨ nee le, mangɨl gɨ da ka-cay ka-bɔgɛ kɨbar ba solii le, gɨ andɨgaŋ doŋ yen̰ tama di ɗe-game kɨbɨ-ƴaa kɔl, bɨ ban orɨn̰ dan̰ Pɨyɛr ƴen̰. 17Tama ɗe-gɨye, ɗe game kɨbɨ-ƴaa le, ɨngɨrɨn̰ Pɨyɛr yeyi hɨn̰: «Ji-bandi, ji na ba-aye-cay-tɨbay gɨlmi gɨ nee le bɨ naŋ ga?» Ɨni na, ban dɨboo cay nee yoo hɨn̰: «Cə cə!»

18Marɨne ka-gɨye dan̰ ka-game ƴaa-Kumu, leege tɨwa di cɨwɨl kɨya kal gɨ dii, bɨ somge kɨbɨ nee ƴobge. Pɨyɛr kalɨn̰ ma ɨrga ƴobɨ tɨwa danage bɨ.

Gumu gɨ da ka-cay ka-bɔgɛ kɨbar ɨngɨrɨn̰ Jesu kɔl

(Matɨyo 26:59-66; Marg 14:55-64; Lug 22:66-71)

19Gumu gɨ da ka-cay ka-bɔgɛ kɨbar ay te ɨngɨrɨn̰ Jesu kɔl ojɨ cay ka-aye-cay-tɨbayi bɨ, ojɨ cay gɨle kɔl koyi bɨ. 20Jesu dɨbi cay nee yeyi hɨn̰: «Ɨŋ ye kɔl hɨnge na cɨn̰ kalaŋ nɔm. Tumɔ, ɨŋ gɨlɨn̰ kalaŋ hɨnga daa daa na a duroy ƴaa-daye-di-da-Jubɨn̰əŋ nɔm bɨ, duroy gulɔŋ ƴaa-di-da-Kumu, di Jubɨn̰əŋ nɔm dayaŋge nee bɨ. Ɨŋ ya kɔl pɨna kɨɗɨn̰ wɔsɛ gaŋ naŋ. 21Kɛ ji ɨngɨrəŋ ɨŋ-bandi na kɨya wa ga? Kɔl gɨ ɨŋ ba ye le ɨngɨrɨn̰ kalaŋ ga ba jege kɔl hɨnge le: Kɔl gɨ ɨŋ ba ye le kan solge kuɗa.»

22Kɨɗɨn̰ ga Jesu ye kɔl gɨ nee le hɨn̰ wo̰ dɨbɨ dugo ɨni na, ba-game ƴaa-di-da-Kumu gɨ pɨna wo̰ gɨ ɨre a kɨɗɨn̰ ga nee le, ɨmbi pəj a maŋji bɨ, yeyi hɨn̰: «Kɛ mangɨl gɨ da ka-cay ka-bɔgɛ kɨbar gusi mɨn̰ dɨbii kɔl cay nee hɨn̰ wo̰ ga?» 23Jesu dɨbi cay nee yeyi hɨn̰: «Kɔl gɨ ɨŋ ba ye le, hɨn̰ gɨ naa dan̰ gɨyəŋ di naŋ na, gɨl hɨnga ga dan̰ gɨyəŋdɨge naŋ ga ɨŋ ba ye le. Ma hɨn̰ gɨ kɔl gɨ ɨŋ ba ye le, naa dan̰ gɨyəŋdi na, ji dəŋ na kɨya wa? 24Ɨni na, Han gɨyɨn̰ dan̰ Jesu dan̰ kobi gɨ saɗi a da Kayip, mangɨl gɨ da ka-cay ka-bɔgɛ kɨbar.»

Pɨyɛr jogɨ man̰e cay kɨbi gɨ ɗi na sɨla Jesu naŋ

(Matɨyo 26:71-75; Marg 14:69-72; Lug 22:58-62)

25Simo Pɨyɛr som kɨɗɨn̰ ga nee gaŋ mɨjagɨ ƴobɨ tɨwa. Ɨni na, ungo gɨ pɨna wo̰ yeyi hɨn̰: «Kɛ, ji-bandi kalɨn̰ ma ji na ba-aye-cay-tɨbay Jesu gɨ pɨna duroy ka-aye-cay-tɨbayi bɨ naŋ ga?» Pɨyɛr man̰ kɨbi coŋ ye hɨn̰: «Cə cə.» 26Ɨni na, ba-gɨye gɨ pɨna wo̰ duroy ka-gɨye gɨ da mangɨl gɨ da ka-cay ka-bɔgɛ kɨbar le yeyi kɔl. Kan na karme dan̰ ban gɨ Pɨyɛr ba de sɨmayi boy le. Bɨ ban yen̰ Pɨyɛr hɨn̰: «Kɛ, ɨŋ sɨlan̰ danayi duroy yage gɨ busoŋge hɨya boy nee le naŋ ga?» 27Pɨyɛr man̰ kɨbi ɗaŋ coŋ, ɨni na kɨɗɨn̰ ga nee le bɨ, kuɗa al kokorɨyo ko.

Jesu tumoy Piladɨ

(Matɨyo 27:1-2,11-14; Marg 15:1-5; Lug 23:1-5)

28Ka-dɔrɛ tumoy Jubɨn̰əŋ sayɨn̰ge dan̰ Jesu a da Kayip orɨn̰ge danayi a duroy ƴaa sɔmɛ gɨ da Piladɨ ba-kɨbɨ kɨlma gɨ gumu gɨ ni Rɔmɛ̰. Na dan̰ te kɨɗɨn̰. Jubɨn̰əŋ ga ka-orɨn̰ge danayi le, dɨbge tɨbayge a duroy ƴaa sɔmɛ gɨ da ba-kɨbɨ kɨlma gɨ gumu gɨŋ naŋ, age na gamɨn̰ dɔrɛ mɨra da gusɨge bɨ, ɗe age na ɓalɨn̰ dɨn̰ hɨnga dɔɔ ga da kɨdɨrɛ gɨ ni Pakɨ gɨ da Jubɨn̰əŋ. 29Na toy di hɨn̰ wo̰ ma, Piladɨ ba-kɨbɨ kɨlma gɨ gumu, andaŋ doŋ wayge le. Bɨ ban ɨngɨrge ye hɨn̰: «Ungo gɨ kɛ le, kɨŋ boy na koldi wa sii cayi ga?» 30Kan dɨbiige cay nee yeyige hɨn̰: «Hɨn̰ gɨ gɨlmi gɨ kɛ le, ni na laa hɨnga ga ɨsɨni naŋ na, kɛ ni ni kɨya ɨrgan̰ danayi dobii kobɨn̰ coŋ ga?» 31Ɨni na, Piladɨ yege hɨn̰: «Ayayigɨŋ bɨ, bɨyagɨŋ kɔl cayi kɨŋ-gandi gusɨgɨŋ kogɨŋ dan̰ gɨyəŋ gɨ da gasɨn̰-kɔl kogɨŋ.» Jubɨn̰əŋ yeyige hɨn̰: «Kan binige gɨyəŋ gɨ ni dɨɗɨn̰ ungo naŋ.»

32Na wo̰ ma, kɔl gɨ Jesu ba ye ojɨn̰ cay gɨyəŋdi tɨmaydi di ɗi na kɨya mare le, or kɨɗɨn̰di gaŋ. 33Piladɨ jogɨ ƴen̰ duroy ƴaa sɔmɛ gɨ da ba-kɨbɨ kɨlma gɨ gumu gɨŋ. Bɨ ban te Jesu ɨngɨri yeyi hɨn̰: «Kɛ ji na kɨlma gɨ da Jubɨn̰əŋ le ga?» 34Jesu dɨbi cay nee yeyi hɨn̰: «Kɛ ji ye kɔl gɨ nee le na dan̰ cay gusɨn̰ kon̰ wala, na kalaŋ ga ɗaŋ ba yen̰ge hɨn̰ wo̰ ojɨn̰ canɨ ga?» 35Piladɨ dɨbii cay nee yeyi hɨn̰: «Kɛ ɨŋ-bandi ɨŋ na Jubɨ ga? Na kan ga a te wɔɔ gɨ da kalaŋ kan̰ gaŋ bɨ, ka-cay ka-bɔgɛ kɨbar bɨ, ba dobɨn̰ge kɔbɔŋ. Kɛ ji laaga na wa ga?» 36Jesu dɨbi cay nee yeyi hɨn̰: «Dɔɔ-ƴaa tɨnge na dɔɔ-ƴaa di cay gɨsəŋ gaŋ kɛ naŋ. Hɨn̰ gɨ dɔɔ-ƴaa tɨnge ni naa dɔɔ-ƴaa di a cay gɨsəŋ gaŋ kɛ na, kalaŋ kange ni kɨya sɔge dɨbege wɔrɨn̰ɛ kol canɨ, narɨn̰ Jubɨn̰əŋ ƴɔmɔŋ coŋ. Ama haw kɛ dɔɔ-ƴaa tɨnge na dɔɔ-ƴaa di a cay gɨsəŋ gaŋ kɛ naŋ.» 37Ɨni na, Piladɨ yeyi hɨn̰: «Hɨnga le, ji na kɨlma ga?» Jesu dɨbi cay nee yeyi hɨn̰: «Ji ba yɔ, ɨŋ na kɨlma. Wɔɔŋge bɨ, ɨŋ ɨrga a cay gɨsəŋ gaŋ bɨ, na kɨya lɔɔ tɨmon̰ a cay kɔl gɨ ɨŋ ba ye le.» Waŋ waŋ gɨ na gey kɔl gɨ cɨndi na, kɨya jɔɔ kɔl hɨnge. 38Piladɨ ɨngɨri yeyi hɨn̰: «Kɛ kɔl gɨ cɨndi le na wa ga?»

Kɨɗɨn̰ ga Piladɨ ye kɔl gɨ nee le ɨni na, ban jogɨ doŋ ɗaŋ or gusi Jubɨn̰əŋ bɨ yege hɨn̰: «Ɨŋ-bandi na, ɨŋ wa kɔl pɨna wo̰ gɨ ƴɨma cayi ungo gɨ nee le naŋ.» 39Ama hɨn̰ gɨ hada togɨŋ naa gɨ ɨŋ na dɨra ungo pɨna dangay dɨŋ bɨgɨŋ kɨya kɨdɨrɛ gɨ ni Pakɨ le na, kɛ kɨŋ gey gɨ ɨŋ na dɨra naa kɨlma gɨ da Jubɨn̰əŋ bɨgɨŋ ga? 40Ɨni na, kan bee noyge pɨna wɨlalɨn̰ge yen̰ge hɨn̰: «Ban naŋ pa pa, ama na ban gɨ kan teeyige Barabas, Barabas le na ba dɨɗe kalaŋ.»

Currently Selected:

Ja̰ 18: gab

Highlight

Copy