Ja̰ 20

Umboŋ gɨ dɨbɨge Jesu boy nee le woy kalɨn̰

(Matɨyo 28:1-10; Marg 16:1-8; Lug 24:1-12)

1Dan̰ wɔlɛ gɨ ni dɨmasɨ dan̰ te kɨɗɨn̰ cururu, gɨ kɨɗɨn̰ ba ɨndi ƴee na, Mari di cay ƴaado na Magɨdala or a cay kamɨn̰aŋ gaŋ. Bɨ hɨndi sol garma gɨ kan lɨgɨn̰ge kɨbɨ kamɨn̰aŋ le yawɨraŋ walaŋ. 2Hɨndi gɨre or wan̰ Simo Pɨyɛr dan̰ ba-aye-cay-tɨbayi gɨ ɗaŋ, gɨ Jesu geyi tɔgɨ le bɨ, yege hɨn̰: «Dorge gundi Ba-gulɔŋ boy umboŋ kamɨn̰aŋ gaŋ coŋ. Ama ni sɨla kɨɗɨn̰ ga kan dɨbiige boy nee naŋ.» 3Ɨni na, Pɨyɛr dan̰ ba-aye-cay-tɨbay Jesu gɨ ɗaŋ le, andaŋge bɨ ayge gɨyəŋ sɔɔ toge dɨŋ orɨn̰ge jɨn̰ cay kamɨn̰aŋ gaŋ. 4Kan sɔɔ-toge dɨŋ gɨrgɨge, ama ba-aye-cay-tɨbay Jesu gɨ ɗaŋ le, gɨre ɗɨn̰ Pɨyɛr bɨ bugoŋ tumoyi a cay kamɨn̰aŋ gaŋ. 5Ban lɨnge dugo dɨŋde kamɨn̰aŋ bɨ sol kɨbɨ badɨge ga Jesu surɔŋ ɗe le, ba wɔyɛ kɛgɛgɛ kɨɗɨn̰dɨge gaŋ. Ama ban andaŋ boy umboŋ kamɨn̰aŋ gaŋ naŋ. 6Kardi nee pa dɨm ma Pɨyɛr ɨrga koyi ƴee. Bɨ ban andaŋ boy umboŋ kamɨn̰aŋ gaŋ. Simo Pɨyɛr sol kɨbɨ badɨge ga Jesu surɔŋ ɗe le, ba wɔyɛ kɛgɛgɛ kɨɗɨn̰dɨge gaŋ bɨ. 7Kɨbɨ badɨge ga Jesu surɔŋ ɗe le, nunguroŋ woy kɨɗɨn̰dɨge gaŋ dan̰ kɨbɨ badɨge ga kan nongɨrdɨn̰ge Jesu gusi. 8Kardi nee pa dɨm ma ba-aye-cay-tɨbay Jesu gɨ ɗaŋ gɨ bugoŋ tumoy Pɨyɛr le, andaŋ boy umboŋ kamɨn̰aŋ gaŋ ƴee. Ban sol hɨnga le dan̰ cɨndi bɨ bee kuduroyi cay nee bɨ. 9Sɨlagɨŋ bɨrɨŋ gɨsɨn̰ haw kɛ kɔl gɨ kan walge tumɔ a duroy Magtubu di da Kumu dɨŋ ye hɨn̰: Jesu na kɨya bɔyɛ lɨbe a duroy kalaŋ ga madɨrdaŋ gaŋ le, ka-aye-cay-tɨbayi sɨlage duroy naŋ ƴee. 10Kardi nee ɨni na, ka-aye-cay-tɨbayi ga sɔɔ le jogɨge taage.

Jesu gɨl gusi bɨn̰ Mari di Magɨdala

(Marg 16:9-11)

11Kɨɗɨn̰ ga nee le Mari jɨga ɨre doŋ mɨnde dan̰ kɨbɨ umboŋ kamɨn̰aŋ ɨle. Kɨɗɨn̰ ga hɨndi ɨre ɨle na, hɨndi lɨnge cɨndo dugo boy umboŋ kamɨn̰aŋ gaŋ solɨn̰ kɨɗɨn̰. 12Ɨni na, hɨndi sol ka-ƴɔbɛ ga daa nii won̰ge sɔɔ, ga tobɨge badɨge ga bɛdɨrdɛŋ tɨrɨjɨ tɨrɨjɨ, somge a kɨɗɨn̰ ga tumɔ ba dɨbɨn̰ge gundi Jesu boy nee le. Pɨna cayi bɨ, pɨna a gondii bɨ. 13Marɨne ga sɔɔ le, ɨngɨrɨn̰ge Mari kɔl yege hɨn̰: «Tama, kɛ na kɨya wa ma me ɨle ga?» Hɨndi dɨbɨge cay nee hɨn̰: «Ɨŋ ɨle na kɨya gɨ kan dorge Ba-gulonɨ boy umboŋ kamɨn̰aŋ gaŋ coŋ. Bɨ ɨŋ sɨla kɨɗɨn̰ ga kan orɨn̰ge danayi dɨbii nee naŋ.»

14Kɨɗɨn̰ ga hɨndi ye kɔl gɨ nee le na, hɨndi pɨlɨn̰ bɨ, sol Jesu ɨre daa dan̰ tɨbayi kɨɗɨn̰ ga nee gaŋ le. Ama hɨndi sɨla gɨ naa Jesu naŋ. 15Jesu yoo hɨn̰: «Tama, kɛ na kɨya wa ma me ɨle ga? Me mal na waŋ ga?» Hɨndi sol Jesu leen̰ na marɨna ba-lɔɔ gɨye busɔnɛ hɨya kalɨn̰ wo̰ ƴɔbɨ. Na toy di hɨn̰ wo̰ ma, hɨndi yeyi hɨn̰: «Ba-gulɔŋ, hɨn̰ gɨ ji na ba dɨray na, gɨləŋ kɨɗɨn̰ ga ji dɨbii nee le bɨ, ɨŋ kɨya ɔrɛ ayi.» 16Jesu yoo hɨn̰: «Mari!» Ɨni na, hɨndi pɨlɨn̰ bɨ yeyi dan̰ kɨbɨ əbɨro hɨn̰: «Rabuni», duroy na ba-gɨlɨn̰ kalaŋ hɨnga.

17Jesu jɨga yoo hɨn̰: «Ɨsɨbəŋ naŋ, kɨya wa ɨŋ ɨra a gusi Banɨ naŋ ƴee. Kɛɛ me-hɨndi na, ɨra wayan̰ karmɨnɨ bɨ, yage gɨ ɨŋ or na gusi Banɨ gɨ na Baygɨŋ bɨ, gusi Kumu hɨnge gɨ na Kumu kogɨŋ bɨ le.»

18Lee gɨ Mari di cay ƴaado na Magɨdala le, or yen̰ ka-aye-cay-tɨbay Jesu yege hɨn̰: «Ɨŋ sol Ba-gulɔŋ ɨni bɨ, sɨlagɨŋ kɔl gɨ ban ba yəŋ ba kɔ.»

Jesu andaŋ a cay ka-aye-cay-tɨbayi

(Matɨyo 28:16-20; Marg 16:14-18; Lug 24:36-49)

19Borundo di da dɨmasɨ di nee le na, ka-aye-cay-tɨbay Jesu somge ƴen̰ lɨgɨge kɨbɨ-ƴaa cayge rɛj rɛj kɨya wa kan hɨndarge na Jubɨn̰əŋ. Ɨni na, Jesu ɨrga ɨre duroyge bɨ, leege lapɨya yege hɨn̰: «Gusi-dɔbɛ baa danagɨŋ.» 20Kɨɗɨn̰ ga ban ɨre ye kɔl gɨ nee le na, ban gɨlge kobɨn̰i bɨ, gasɨbi bɨ. Kɨɗɨn̰ ga ka-aye-cay-tɨbayi solge Ba-gulondɨge na, kan leege gusi-mɔwa tɔgɨ. 21Ɨni na, ban yege ɗaŋ coŋ hɨn̰: «Gusi-dɔbɛ baa danagɨŋ. Ɨŋ-bandi ɨŋ kɨya gɨyigɨŋ cay gɨsəŋ gaŋ, hɨn̰ gɨ Banɨ ba gɨyigəŋ a cay gɨsəŋ gaŋ bɨ.» 22Kɨɗɨn̰ ga ban ye kɔl gɨ nee le hɨn̰ wo̰ ɨni na, ban pɨye habe cayge puu bɨ yege hɨn̰: «Ƴagɨŋ Turnɔ ɗe-kuduroy-bɛrɛ! 23Kan ga kɨŋ kɨya ɗɔɔ kuduroygɨŋ jalɨwa, a cay ɨsɨna koge gɨŋ na, kɨya wɔɔge kuduroy jalɨwa. Bɨ kan ga kɨŋ kɨya ɗɔɔ kuduroygɨŋ jalɨwa, a cay ɨsɨna koge gɨŋ naŋ na, kɨya wɔɔge kuduroy jalɨwa naŋ bɨ.»

Jesu dan̰ Tomas

24Kɨɗɨn̰ ga Jesu ba andaŋ duroyge le, Tomas gɨ tɨrɨmbalayi na «Mɨgɨna» gɨ na ba-aye-cay-tɨbay Jesu gɨ pɨna duroy kan ga mɔjɨ-cayge-sɔɔ le, ban wɨya danage naŋ. 25Ɨni na, ka-aye-cay-tɨbay Jesu ga ɗaŋ yeyige hɨn̰: «Ni-gandi ni sol Ba-gulɔŋ le dan̰ cɨndɨni ɨni.» Ama Tomas dɨbɨge cay nee yege hɨn̰: «Hɨn̰ gɨ ɨŋ na sɨla ban̰di umboŋ gagɨle di ponde gɨ duroy kobi gɨŋ dan̰ cɨnɨ naŋ bɨ, hɨn̰ gɨ ɨŋ na dɨba tɨbɨnənɨ ban̰di umboŋ da gagɨledi gɨŋ naŋ bɨ, hɨn̰ gɨ ɨŋ na dɨba kɔbɔŋ gasɨbi gaŋ naŋ bɨ na, ɨŋ kɨya bɔgɛ kuduronɨ cay kɔl gɨ nee le naŋ.»

26Dɨmasɨ di ɗaŋ dɨŋ na, ka-aye-cay-tɨbayi jɨgage dayaŋge ɗaŋ coŋ a duroy ƴaa gɨ nee gɨŋ le. Tomas woy danage boy wɔlɛdi gɨ nee le, kɨbɨ-ƴaa lugudoŋ gag gag daa. Naa hɨn̰ wo̰ kalɨn̰ ma, Jesu andaŋ ɨre duroyge, leege lapɨya yege hɨn̰: «Gusi-dɔbɛ baa danagɨŋ.» 27Kardi nee ɨni na, ban jɨga yen̰ Tomas hɨn̰: «Ɗa kobɨn̰ kɛ ban̰di ɨyadi kɔbɔŋ gɨŋ. Bɨ ɨrɨn̰ dan̰ tɨbɨnen̰ tumɔ kɛ dɨba gasɨbɨnɨ bɨ. Bɔgɛ kudurɔ kon̰ cay nee naŋ le ɗa ba, ama bɨga kuduron̰ cay bɔyɛ lɨbe hɨnge gɨŋ.» 28Tomas dɨbi cay nee yeyi hɨn̰: «Ba-gulonɨ bɨ, Kumu hɨnge bɨ.» 29Jesu dɨbi cay nee yeyi hɨn̰: «Ji bee kuduron̰ canɨ na kɨya gɨ ji sɔlɔŋ dan̰ cɨndɨn̰. Ama kan ga ba beege kuduroyge canɨ dɨle sɔlɔŋ dan̰ cɨndɨge le, tumoy wolwa woy kol cayge.»

30Jesu lee hɨnga ga ɗɨn̰ cɨn̰-kɨɗɨn̰ ga ɗaŋ dan̰ kondiige kɨɗɨn̰ ga ka-aye-cay-tɨbayi won̰ge danayi, ama hɨnga ga ɗɨn̰ cɨn̰-kɨɗɨn̰ ga nee le, ɨŋ ya koldɨge duroy magtubu di kɛ dɨŋ le naŋ. 31Ama hɨnga ga ni belin̰əŋ ga ɨŋ ba ye koldɨge duroy magtubu di kɛ dɨŋ le, ɨŋ ye na gɨ ɗe agɨŋ na been̰ kuduroygɨŋ cay Jesu, gɨ ban naa Kɨris Kurɨn̰-Kumu. Bɨ hɨn̰ gɨ kɨŋ na bɨga kuduroygɨŋ cayi na, kɨŋ kɨya wɔɔ sɔmɛ-bɨra kol cayi bɨ.

Currently Selected:

Ja̰ 20: gab

Highlight

Copy