लुका 12
12
छ्यीलेल नङ् मत् लेबे मी केत्मीक्की ले १-३
1ॱनी हुगी यङ्ल येशु च्याल मी छेत्मीत् तोङ्डक्की ढङ्म जोम्न युङ्नी, कङ्ब पो़स्स आक् मीप्प, च्यीक्तङ् च्यीक्की कङ्बल पो़ब बेत्। ॱनी येशुगी गोम ॱएन्स्युक्ल खोङ् रोरङ्गी ॱलोप्टुक् दीबल हीन्दुक् ॱसुङ बेत्। फरीसी घयेत् हुब छ्यीलेल नङ् मत् लेब, ढोप्चील ॱरीक् ज्यक्च्येमे च्युर् डस्सी बेगो। हुबे च्युर् हुनी खीत्रङ् धोजीम् झ्यीन दो़च्च्यीत्। 2घङ् बेन स्यक्प घयेत् थोङ्सल ॱमीत् तो़ङ्गी धो मीप्प बेत्। केत्मीत्ल झ्यीबे लेमु घयेत् घोगेल्ल मीत् सोगी धो मीप्प बेत्। 3हुगो झ्यीनी खीत्रङ्गी मेन्नक्ल ॱसोप्तक्ल घङ् लब घयेत् मेङ्गल कुरीक्की ॱह घोगेन् बेत्। खीम्गी ढुज्युक्तु केत्मीत्ल घङ् लब घयेत् खङ्दोक्की चीमुङ्नी केच्च्येल्ल कुरीक्ल ॱस्यो़क्केन् बेत्।
येशुगी मी हीन् धङ् मेन् सीरे ढीक्ल ४-१२
4ङे दगुसो, खीत्रङ्ल ङे ॱस्येत् योङ्। सी़बु हीगोरङ् ॱसो़त् छुगेन्, हुनी ॱयोङ् घन्ड अक् झ्यीत् ॱमीत् छुगेन् घयेत्ल खीत्रङ् ज्यीब मत् झ्यीज्यीत्। 5खीत्रङ्गी ज्यीब दी ॱसुल झ्यीत् गोगेन् बेक्क हुगो ङे तो़न्न ॱस्येत् योङ्। सी़बु हीगो ॱसेत्नी हुनी ॱनलल पुर् छुगेन्, ॱवङ् च्येम्म दीलरङ् ज्यीब झ्यीज्यीत्। ङे ॱस्येत् योङ् खोङ्ल ज्यीब झ्यीज्यीत्। 6पेन्ज्यी ॱरीब ॱङल रीन् दी सङ्गी टङ्ग ॱङी सीक्केन् बेत्। ॱनी हुन्दुक् झ्यीबे ॱनङ्ज्युङ्ल आक् त को़न्ज्योक्की च्यीगी च्यीक्ल आक् टोक् मत् ज्यीब, तगेन् बेत्। 7खीत्रङ्सोल ॱसुम्ब खीत्रङ् रीदङ् रीगी गो़ टत्तोक् घयेत्ल अक् को़न्ज्योक्की ढङ्ज्युक् ज्यप्न यो़क्केन् बेत्। ज्यीब मत् झ्यीज्यीत्। पेन्ज्यी ॱरीब घयेत्ले त खीत्रङ् थोङ् छ्यीया यो़क्केन् बेत्।
8ङे खीत्रङ्ल हीगो ओक् ॱस्येत् योङ्। मी घयेक्की घुङ्दु ॱसी़ ङ येशुगी मी हीन् सीन्न सीगुक्क हुल कोलीमीगी ॱरेबी़ इक् इगीदु को़न्ज्योक्की भङ्ज्येम्ब घयेक्की ढुङ्दु हुगो ङे मी हीन् सीन्न सीक्केन् बेत्। 9ॱनी यङ् मी घयेक्की घुङ्दु ॱसी़ ङ ॱनी येशुगी मी मेन् सीन्न सीगुक्क हुल ङ अक् इगीदु को़न्ज्योक्की भङ्ज्येम्ब घयेक्की ढुङ्दु हुगो ङे मी मेन् सीन्न सीक्केन्। 10कोलीमीगी ॱरेबी़ ढीक्ल मी ॱसी़ तम् अयेक्प च्यीक् लप्कुक्क हुगो धक्तु ची़त् छुगेन् बेत्। ॱनी धम्बे थुगी ढीक्ल मी ॱसी़ ॱमो़म्बी़त् तोङ्गुक्क हुगो मीत् धक्केन् बेत्।
11खीत्रङ् ठीम्सल यहुदीगी छ्यो़गी छोगङ्ल धङ् पेम्बु घयेत् च्याल सुङ्न ठीक्पे यङ्ल खीत्रङ्गी ॱसीम्ल घन्डे लेम्बु ॱलोक्च्ये ब अक्? घन्डे केच्च्य ॱस्यो़च्च्ये ब अक्? ॱनो़न च्युगा ॱमत् खुर्च्यीत्। 12हुदु घन्ड लप् गोगेन् बेक्क हुगी यङ्लरङ् धम्बे थुगी खीत्रङ्ल तो़न्न ॱलोप्केन् बेत् सीन्न येशुगी ॱसुङ बेत्।
नोर्ल ॱलो को़गेङ्गी मी ॱलीन्सो़ च्यीक्की पी १३-२१
13हुनी हुगी मी घयेत् दीगी छीक्नी छुल्ल मी च्यीक्की येशुल चयेलम नीज्यरङ्गी ङे अज्योल केच्च्य ॱस्येत्न ङीक्की ढोङ्ब गो़त्तु ची़त्न ङल थोप्केङ्गी फक् दी टो़त्तु ची़त्रो झ्यी सीन्न स्यी़ब बेत्। 14ॱनी खोङ्गी लेल्ल व मी ॱसी़ ङ खीक्की ढीक्ल ठीम्बो़न् धङ् ॱअर्की मील को़न यो़प्प? सीन्न ॱसुङ बेत्। 15हुनी खोङ्गी हुगी मी घयेत् दील खीत्रङ् घयेत् ॱसीम्ब च्यङ्जो़त् झ्यीन लोप्की ढङ् घयेत्नी जीम्न दो़च्च्यीत्। मी मीजील नोर्की भङ्जेत् घन्डरङ् यो़त्न अक्, हुगो छ्युवक्की घो मीत् ज्यक्केन् बेत् सीन्न ॱसुङ बेत्।
16हुनी खोङ्गी हुगी मी घयेत् दील हीन्दुक् सीन्न पी च्यीक् ॱसुङ बेत्। मी छ्युक्पु च्यीक्ल रोरङ्गी स्यीङ्ग दीनी तो़न्दोक् गन्दीक्म लो लेन युङ बेत्। 17ॱनी हुगी ॱसीम्बे नङ्ल हीगी तो़न्दोक् घयेत् हीगो ह जो़त्ल ॱस्योङ्दोक्प मीन्दुक्। ह घन्दुक् च्यीक् झ्यीच्च्ये न? सीन्न ॱनोक्सम् तङ बेत्। 18हुनी हुगी ङ हीन्दुक् झ्यीक्केन्। ङे जो़त् घयेत् हीगो ॱरुम्नी कुरीक् ॱसम्ब छ्यीदु ॱलीङ् सोगेन्। हुनी ङे ॱअन्न धङ् नोर् घयेत् दी हुल ॱलुक्केन्। 19हुनी ङरङ्गी ङरङ्ल हीन्दुक् सीक्केन्। ह रङ्ल लो गज्येन् कोबे नोर् ॱसान यो़क्केन् बेत्। ह रङ्गी मीजील से थुङ् झ्यीन कीप् कीप् ज्या ज्या झ्यीन दो़च्च्यीत् सीक्केन्। 20हुनी हुल को़न्ज्योक्की ॱवे ॱलीन्सो़, हरीङ्गी गोङ्लरङ् रङ्गी छी दी ङ दोक्केन्। हुनी रङ्गी ॱसाबे नोर् घयेत् हुगो ॱसु दीगी झ्यीक्केन् ॱनी? सीन्न ॱसुङ बेत्। 21मी रोरङ्गी ढीक्ल हीदु घजो़क्की नोर्रङ् ॱसान यो़त्न अक्, हुल को़न्ज्योक् ङो़गी नोर् दी मीत्न ॱनी, हुगो ओक् हुगी मी ॱलीन्सो़ हुगो डस्सीरङ् युङ्गेन् बेत् सीन्न येशुगी ॱसुङ बेत्।
च्युगा खुर् मीत् गो़गेङ्गी ढीक्ल २२-३४
22हुनी यङ् खोङ्गी ॱलोप्टुक् दीबल हीन्दुक् ॱसुङ बेत्। हुगो झ्यीनी ङे खीत्रङ्ल हीगो ॱस्येत् योङ्। खीत्रङ्गी मीजील घन्ड सज्ये ब अक्? घन्ड घो़न्ज्ये ब अक् ॱनो़बे च्युगा ॱमत् खुर्च्यीत्। 23समले ॱसीम् चा छ्यीया युङ्गेन् बेत्। घो़ले सी़बु चा छ्यीया युङ्गेन् बेत्। 24ॱनम्गी घरोक् घयेत्ल तेन नम् च्यो़त्। हुबे ॱसो़न् तोप्च्ये न, न तो़न्दोक् दी़च्च्ये न, न हुबल जो़त् युङ्ज्ये न, न गम् युङ्ज्ये। ॱनी हुन्दुक् झ्यीबल अक् त को़न्ज्योक्की सम ॱनङ्गेल्ल, ॱनी ॱनम्गी झ्य घयेत् हुले त खीत्रङ् गज्येङ्गी चा छ्यीया बेत्। 25च्युगा खुर्नी खीत् ॱसु दीगी रोरङ्गी छी ठु घङ्गी ची ज्योङ् छुगो़त् सीक्केन्? 26नुक्मे ले च्युङ आक् त खीक्की झ्यीत् ॱमीत् छुबे, खीत्रङ्गी मीजीगी ले घयेक्की ढीक्ल घन्डल च्युगा खुर्केन्।
27ॱङोमक्की मीन्दोक् घन्दुक् झ्यीन ॱस्यर्कुक्क हुल तेन नम् च्यो़त्। हुबे कले च्यो़च्च्ये न, न की़त्तोक् खेज्ये। हीगी ढीक्ल ङे ॱस्येत् योङ्। ज्याबु सोलोमन्गी तो़प्प च्येम्मे नम्सा ज्येम्बे यङ्गी तेक्मुले त ॱङोमक् च्यीक्ल को़म्बे हुगी घो़ हुगो लेबा युङ्गेन् बेत्। 28ॱवे छ्य गन्दीक्म मीत् स्योक्केन्सो। हरीङ् कीनी, नेम्बेत् मील ॱहे तोङ्गेङ्गी ॱङोमक्ल आक् त को़न्ज्योक्की नुक्मे घो़ को़ङ्गुक् सीन्न ॱनी, हुले ॱसुम्ब खीत्रङ् चा छ्यीया ॱसम्न को़ङ्गेन् मेम्बेक्क ॱनी?
29खीत्रङ्गी घन्ड सज्ये ब अक्? घन्ड थुङ्ज्ये ब अक् ॱनो़बे ॱसम्ल ॱमत् तोङ्ज्यीत्। हुगी ढीक्ल च्युगा ॱमत् खुर्च्यीत्। 30जम्बुलीङ्गी ज्यी़त् ॱयोङ् ॱयोङ्गी मी घयेक्कीरङ् हुन्दुक् झ्यीबे ॱसम्ल तोङ्गेन् बेत्। हुगो डस्सी मेम्ब, खीत्रङ्ल घङ् गो़बे खोज्येत् घयेत् खीत्रङ्गी यप्ल कुरीक् ॱस्यो़च्च्ये युङ्गेन् बेत्। 31ॱअल म दी धो़न् ङोम दी को़न्ज्योक्की ज्यागक् दी खीत्रङ्गी चा छ्यीस्स्यो हीम्ब ॱसम्न हुगी ॱवङ्ल ॱसीम्ब तोङ्ज्यीत्। हुनी क हुन्दुक् झ्यीबे गो़ज्येत् घयेत् दी इक् खीत्रङ्ल थोप्केन् बेत्।
32मज्यु ॱयो़ च्युङेत्मुसो, ज्यीब मत् झ्यीज्यीत्। खीत्रङ्ल हुगी ज्यागक् हुगो ॱनङ्ज्येल खीत्रङ्गी यप् थु गुव यो़क्केन् बेत्। 33खीत्रङ्गी नोर् घयेत् दी चोङ्न टङ्बु घयेत्ल ॱङीङ् छय झ्यीन बीन्ज्यीत्। तोङ्ब मीत् लेगेङ्गी ज्यगुक्, मीत् सेक्केङ्गी तीर्कदङ् छ्येत्मीत् युङ्गेङ्गी नोर् इगी तेङ् यी़दु ॱसोज्यीत्। इगीदु की़न्नक्प ॱस्योरे टो मीप्प बेत्। मुक्प छ्येप्पे टो मीप्प बेत्। 34खीत्रङ्गी नोर् दी घदु यो़दङ् हुदु खीत्रङ्गी ॱसीम् दी इक् डोगेन् बेत्।
ॱसीम् च्यङ्जो़त् झ्यीन दो़त् गोगेन् ३५-४८
35खीत्रङ् ठोक्क छ्ये ज्यप्न खीत्रङ्गी बत्ती दी बर् बर दीरङ् दो़च्च्यीत्। 36ज्यीन्दक् भालीन्नी नम् लोक्न युङ्गो़दङ् ॱनो़न गुक्केन् गोच्चल धोक् धोक् सीगी बेन्न ॱनी, ॱस्यर्च्यक् गोच्च पीक्केङ्गी ॱयोक्पु डस्सी खीत्रङ् युङ झ्यीज्यीत्। 37ज्यीन्दक् युङे यङ्ल ॱङीत् मत् लोक्पल दो़क्केङ्गी ॱयोक्पु दीब ॱसोदी च्येम्म युङ्गेन् बेगो। ङे खीत्रङ्ल गन्दीय ॱस्येत् योङ्। खोङ्गी रोरङ्गी छ्येदक् दी धो दीन्दीक्म ज्यप्न ॱयोक्पु दीबल सम टेत्न स्यप्च्यी़ ज्युक्केन् बेत्। 38ज्यीन्दक् युङे धी़जो़त् दी छेम्मु छ्युजो़त् गुबनी झ्यीनी छ्युजो़त् ॱसुम् थुक्की नङ्ल घजो़क्की धी़ल युङ्गो़दङ् हुगी यङ्ल ॱयोक्पु घयेत् दीब ॱङीत् मत् लोक्पल दो़प्प ठेत्न ॱनी, हुब ॱसोदी च्येम्म युङ्गेन् बेगो।
39खीत्रङ्ल हीगो ॱस्यो़च्च्ये यो़क्केन् बेत्। की़न्नक्प युङे धी़जो़त् दी खीम्दक्प दील एल्ला ॱस्यो़च्च्ये झ्युङ्न ॱनी, हुगी की़न्नक् कुदु ॱमीत् ची़क्केन् बेत्। 40ॱनी हुगी खीम्दक्प हुगो डस्सी खीत्रङ् ॱअङ् ठोक्क झ्यीन दो़च्च्यीत्। घन्ड हीन् सीन्न कोलीमीगी ॱरेबु खीत्रङ्गी मीत् युङ्गो़ट्टो ॱनो़ब ॱसम्बे धी़जो़त्ल युङ्गेन् बेत् सीन्न ॱसुङ बेत्।
41ॱनी पत्रुस्की येशुल चोव ज्यीन्दक् नीज्यरङ्गी ॱसुङे पी हीगो ङीक्की धो़ल्ल छ्युवक् हीम्ब न? न मी कुरीक्की धो़ल्ल अक् बेक्क? सीन्न ढीब बेत्।
42हीगी लेल्ल चोव ज्यीन्दक्की हीन्दुक् ॱसुङ बेत्। ॱयोक्पु तेम्बोक्म धङ् खेबोक्म च्यीक् यो़त्न ॱनी, हुगो दक्पु दीगी ॱयोक्पु ॱयोङ्म घयेत् दीबे गोयो़प्पल को़न धी़जो़त् धी़जो़त्ल हुब घयेत्ल गो़बे समे फक् टो़च्च्यीत् सीन्न ॱङान स्योक्केन् बेत्। 43ॱनी दक्पु दी लोक्न युङे यङ्ल ॱयोक्पु घन् दीगी हुन्दुक् दीरङ् दक्पी़ ॱङाब दी डस्सी झ्यीप्प ठेक्को़दङ् हुगो ॱसोदी च्येम्मल ॱनेगेन् बेगो। 44हीगी ढीक्ल ङे खीत्रङ्ल गन्दीय ॱस्येत् योङ्। हुगी ॱयोक्पु हुगो दक्पु दीगी रोरङ्गी नोर् छङ्म थम्ज्येत्ल तगेङ्गी गेल्लीङल को़क्केन् बेत्। 45ॱनी हुगो डस्सी मत् झ्येब, हुगी ॱयोक्पु दीगी रोरङ्गी ॱसीम्ल नुक्मे ज्योब दक्पु घन्डे युङ्ज्ये ॱनो़न ॱयोक्पु धङ् ॱयोक्मु ॱयोङ्म घयेत् दीबल हुगी दुङ्ज्येम झ्यीक्केन् बेत्। हुनी रोरङ् से सेब, थुङ् थुङ धङ् सी सीय झ्यीक्केन् बेत्। 46हुन्दुक् झ्यीबे ॱयोक्पी़ ॱसीम्ल ज्यीन्दक् नुक्मे ज्योब घन्डे युङ्ज्ये ॱनो़बे यङ्ल थोप्तक् मीत्ल ज्यीन्दक् दी युङ्गेन् बेत्। हुनी हुगो धुम्बु धुम्बुल दुम्न छ्य मीत् स्योक्केन् घयेत् तोङ्सल तोङ्गेन् बेत्। 47ज्यीन्दक्की थुल यो़प्पे लेमु घयेत् ॱयोक्पुल ॱस्यो़च्च्ये झ्यीनी इक्, हुगी ठोक्क झ्यीन अक् मीत् दो़क्केन्, ॱङाबल आक् मीत् नेङ्गो़त्न ॱनी, हुन्दुक् झ्यीबे ॱयोक्पुल डेङ्ज्यक् गज्येन् बेङ्गेन् बेत्। 48ॱनी यङ् ॱस्यो़च्च्ये मीप्पल ङीब झ्यीबे ॱयोक्पुल छ्येप्प को़ ओ़ब यो़त्न अक्, हुगी ॱयोक्पु हुल यङ् नुङा बेङ्गेन् बेत्। ॱसुल मङा टेत्न दुक्क हुगो च्यानी मङारङ् डुप्न युङ्गो़ट्टो ॱनो़न तगेन् बेत्। ॱसुल मङा च्योन स्यक् यो़दङ् हुगो च्यानी यङ् मङारङ् युङ्गो़ट्टो ॱनो़न को़न्ज्योक्की तगेन् बेत्।
स्यीव मेम्ब ठुक्पल चोक्केन् ४९-५३
49ङ ॱनी ॱस जम्बुलीङ्ल मी ॱङक्तु युङ हीन्। ङे हीगो स्येन् ज्योक्पु ङागो़ट्टो ॱनो़बे रीगो झ्यीबेन्। 50ङ बप्तीस् च्यीक्ल स्युक् गोगो़त्। हुगो नम् डुप् डुप् थुक्ल ङ घन्डे छीर आ।
51ङ जम्बुलीङ्ल स्यीव टो़त्तु युङ ब अक् ॱनो़गो़प्प न? ङे खीत्रङ्ल ॱस्येत् योङ्। स्यीव टो़त्तु मेम्ब, ङ ठुक्पल चोक्तु युङ हीन्। 52हीनी झ्यीब दी ढोङ्ब च्यीक्की मीजङ् ॱङ यो़प्प च्येम्म गो ॱङील डोगेन् बेत्। च्यीक् ङो़ल ॱङी धङ् च्यीक् ङो़ल ॱसुम्ल भीगेन् बेत्। 53हुन्दुक् झ्यीन गो ॱङील ॱसोङ्नी, पबे डल भु, भी़ डल पब, आमे डल भुमु, भुमी़ डल आम, ज्युक्मी़ डल ॱनम धङ् ॱनमे डल ज्युक्मु लोङ्गेन् बेत्।
धी़ नम् च्यो़क्केन् ५४-५९
54हुनी येशुगी हुगी मी घयेत् दील खीत्रङ्गी नुप् ङो़नी यल्ल ॱमुब लोङ थोङ्न ॱनी, ह छ्येप्प ज्यक्केन् बेत् सीन्न सीक्केन् बेत्। ॱनी हुगो दीम्बरङ् युङ्गेन् बेत्। 55ॱनी यङ् खीत्रङ्गी ॱल्हो ङो़नी छुल्ल ॱलुङ्बु ज्यक्प ॱह घोन ॱनी, ह छेत्लुम् युङ्गेन् बेत् सीन्न सीक्केन् बेत्। ॱनी हुगो ओक् दीम्बरङ् युङ्गेन् बेत्। 56खीत्रङ् छ्यीलेल नङ् मत् लेबे मी घयेस्सो, हुन्दुक् झ्यीन ॱस धङ् ॱनम्स्यी गा धङ् आक्पा युङ खीत्रङ्गी नम् च्यो़त् ॱस्यीगेन् बेत्। ॱनी हन्देङ्गी हीगी धी़ हीगी ढीक्ल नम् च्यो़त् ॱमीत् ॱस्यीगेन् बेत्।
57घङ्गो झ्यीन ढक्पा युङ्गुक्क हुगो खीत्रङ्गी नम् च्येत्न ॱह घोव झ्यीज्यीत्। 58रङ्ल खम्ज्यु ज्यक्केन्दङ् दल रङ् ठीम्सल डोये यङ्ल लम्दु रङ् हुगोदङ् डीक् छुब झ्यीज्यीत्। स्येन् हुगी रङ् ठीम् च्यो़स्सल ढी़क्केन् बेत्। हुनी हुगी ठीम्बो़न् दीगी रङ्ल ठीम् च्येत्न पेम्बु ॱयोङ्ल ची टेत्न, हुनी रङ् चो़ल्ल ॱलुक्केन् बेत्। 59हीगी ढीक्ल ङे खीत्रङ्ल ॱस्येत् योङ्। रङ्ल फोक्पे छ्येप्प दी पयीसक् च्यीप्टे च्यीक् इक् मीप्प, जप् छर्नी मेन्द, रङ् हुनी थो़न् ॱमीत् छुगेन् बेत् सीन्न ॱसुङ बेत्।
Currently Selected:
लुका 12: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
