लुका 13
13
ॱसीम् मत् ज्युर्न खरप्ल डोगेन् १-५
1हुनी हुगी मी यरीबे येशुल हीन्दुक् झ्यीब बेत्। गालीलागी मी यरी छ्यो़प्प पुबे यङ्ल छ्यो़प्प पुसदु पीलातस्की ॱसो़त्तु ची़प्प बेत्। ॱनी हुबे ठक् दी हुदु धी़न्डो ॱरोक्ल पुबे ठक्की दल रीन आक्सी झ्युङ बेत् सीन्न ॱस्येप्प बेत्। 2ॱनी येशुगी लेम्बुल हुबल हुन्दुक् झ्यीब झ्युङ्दुक् सीन्नी गालीलागी मी ॱयोङ्म घयेत्ले हुबे ॱल्हक्मा दीक्प झ्यीब बक् ॱनो़गुक्क? 3ङे ॱस्येत् योङ्। हुगो मेम्बेत्। ॱनी मेन्न अक्, खीत्रङ्गी ॱसीम् दी ॱएङ्गी लम्नी ज्युर्न मत् युङ्न ॱनी, खीत्रङ् ॱअङ् खरप्ल डोगेन् बेत्। 4ॱनी सीलोआम्दु उक् खीम् थोन्दीम च्यीक् नुक्रङ् रुम्न खुर्नी, हुदु मीरङ् च्यप्च्येत् ॱस्यीनर बेत् सीगुक्। ॱनी यरुशलेम्गी मी ॱयोङ्म घयेत्ले हुबे ङीब मङा झ्यीब बक् ॱनो़गुक्क? 5ङे ॱस्येत् योङ्। हुगो मेम्बेत्। ॱनी मेन्न अक्, खीत्रङ्गी ॱसीम् दी ॱएङ्गी लम्नी ज्युर्न मत् युङ्न ॱनी, खीत्रङ् ॱअङ् खरप्ल डोगेन् बेत् सीन्न ॱसुङ बेत्।
डेबु ॱमत् छ्यान आक् गुक्केन् ६-९
6हुनी येशुगी पी च्यीक्ल हीन्दुक् ॱसुङ बेत्। मी च्यीक्की अप्ले दोङ्बु च्यीक् रोरङ्गी गोङ्गोङ् चुक्से स्यीङ्गल चुन यो़प्प बेत्। ॱनी हुल डलु कोक्तु सीन्न हुगो फीन्नी हुल डलु च्यीगी च्यीक् इक् ॱमत् ठेप्प बेत्। 7ॱनी स्यीङ्गल तगेङ्गी ॱयोक्पु दील हुगी दक्पु दीगी हीगी अप्ले दोङ्बु हील डलु च्यीगी च्यीक् ॱमत् छ्याबल लोङ ॱसुम् ॱसोङ्। ह हीगो ॱहेङ्न पुर्लोङ्। घन्ड झ्यीच्च्ये हीगो, ॱसने घोदो कक्पे कक्रो सीन्न ॱङक्केन् बेत्। 8ॱनी ॱयोक्पु दीगी लेम्बुल नीज्यरङ् ॱअल हीगो लो च्यीक् थुक् स्योक्। ङे हील छ्या ॱलुक्न धेन्द झ्यीगी। 9हुनी ॱसङ्बो़त् डलु छ्यागो़ट्टो। हुनी ॱमत् छ्यान ॱनी, ॱहेङ्न आक् डीक्को़ट्टो सीक्केन् बेत् सीन्न ॱसुङ बेत्।
भुमु कीक्कुक्म च्यीक् ढक्प १०-१७
10हुनी ङीत्तुवे ङीन् च्यीक् येशु छ्यो़गी छोगङ् च्यीक्तु मी घयेत्ल ॱलोप्स ज्यप्न टेप्प बेत्। 11ॱनी उन भुमु कीक्कुक्म च्यीक् यो़प्प बेत्। हुल ॱनो़प्पे कीक्कुक्मल तङ्नी, लोङ च्यप्च्येत् ॱसोङ हीङ्गो़प्प बेत्। हुगो घुक्नी, यल्ल ॱसीरील झ्यीत् दीरङ् ॱमीत् छुगो़प्प बेत्। 12हुगो येशुगी थोङ्नी खोङ्गी हुगो रोरङ् च्याल भो़न हीन्दुक् ॱसुङ बेत्। भुमु ह रङ्गी नज हीगो ढक् छर बेत् सीन्न 13हुगोल खोङ्गी छ्यक्वङ् केनी, हुनी ॱस्यर्च्यक् हुगी कीक्कुक्म दी ॱसीरील लोङ् छुब बेत्। हुनी भुमु दीगी को़न्ज्योक्ल तो़प्प पुब बेत्।
14ॱनी हुन्दुक् झ्यीन ङीत्तुवे ङील्ल नेप्प ढक्तु ची़त्नी, हुगी छ्यो़ छोगी गोयो़प्प दी खोङ्डोक् लङ्न उन यो़प्पे मी घयेत् दील हीन्दुक् झ्यीब बेत्। दी़न्डक्ल ङीम ढुक्रङ् क ले झ्यीत् गोगेन् बेत्। ॱनी हीदु नेप्प ढक्च्येल युङ्ज्ये ॱनो़न, खीत्रङ् ङीत्तुवे ङील्ल मेम्ब, स ॱयोङ्मागी यङ्ल युङ् गोगेन् बेत्। 15ॱनी चोव ज्यीन्दक्की हुगोल खीत्रङ् छ्यीलेल नङ् मत् लेबे मीसो, ङीत्तुवे ङील्ल खीक्की खीत्रङ्गी ॱलङ् हीन्, भोङ्गु हीन्न अक्, भजङ्नी तङ्न छ्यु थुङ्दु ॱमीत् ठीक्को़प्प ॱनी? 16तेदे अब्राहाम्गी ज्यी़त् हीगो शैतान्गी लक्ल ॱस्योर्नी, लोङ च्यप्च्येच्चो़त् ॱसोङ बेत्। ॱनी हीगी भुमु हीगो ङीत्तुवे ङील्ल हुगी लक्नी या टो़ज्ये मीत् युङ्गेन् बेत् सीक्केन् ॱनी? झ्यीब बेत्। 17ॱनी हीगो ॱह घोनी, उन खोङ्गी ड घयेत् दी ङु छय बेत्। ॱनी मी ॱयोङ्म घयेत् दी यङ् खोङ्गी ॱह लेसी जेप्पे ले घयेत् दीगी ढीक्ल गेस झ्यीब बेत्।
को़न्ज्योक्की ज्यागक्की ढीक्ल पी ॱङी १८-२१
18हुनी येशुगी यङ् को़न्ज्योक्की ज्यागक्की लेमु घन्दुक् झ्यीब युङ्गेन् बेक्क? घन्डदङ् छ्येत्मीत् डगेन् बेक्क? 19हीगो मी च्यीक्की रोरङ्गी गोक्रल तोरीगी ॱसो़न् ॱसो़न्दोक् च्यीक् तब डस्सी युङ्गेन् बेत्। हुगो कीनी दोङ्बु डस्सील झ्युङ्न, हुगी यल्लक् घयेत् दील ॱनम्गी झ्यज्युङ्म घयेक्की इक् छङ् सो़न दो़क्केन् बेत्।
20ॱनी हरुङ्द येशुगी को़न्ज्योक्की ज्यागक्की लेमु घन्डदङ् छ्येत्मीत् युङ्गेन् बेक्क? 21हुगो हीगो डस्सी युङ्गेन् बेत्। भुमु च्यीक्की चम्ब खेगुर् च्युक्सुम्जो़त् च्यीक्ल च्युर् च्युङेत्मु च्यीक् ज्यप्न जीनी, हुगो जेङ् च्युर्ल ॱसोङ्न बो़गेन् बेत् सीन्न ॱसुङ बेत्।
गोच्च धोक्पोक्मनी स्युक् गोगेन् २२-३०
22हुनी येशुसो यरुशलेम्ल लम् स्युन फीम्ब बेत्। ॱनी डोये यङ्ल लम्ल ॱनेगेन् सार् धङ् युगङ् घयेत्ल ॱलोप्स ज्यक्कील्ल फीम्ब बेत्। 23ॱनी मी च्यीक् येशु च्याल युङ्न हुगी खोङ्ल चोव ज्यीन्दक् छी थर्वल थो़ङ्गेङ्गी मी गक् मीत् युङ्गेन् बेक्क? सीन्न ढीब बेत्। ॱनी हीगी लेल्ल खोङ्गी हुगी मी घयेत् दील 24गोच्च धोक्पोक्मनी यल्ल स्युक् छुज्ये यो़प्पल टेत् टो़च्च्यीत्। ङे ॱस्येत् योङ्। मी गज्येन् युङ्न स्युक्च्ये ॱनो़ब त झ्यीक्केन् बेत्। ॱनी हीन्न अक्, स्युक् ॱमीत् छुगेन् बेत्। 25खीम्दक्प लोङ्न नङ्नी मल्ल गोच्च च्येत् तोङ्गेन् बेत्। हुनी क खीत्रङ् युङ्न छ्यीदु गोच्चल धोक् धोक् सीगी बेन्न ज्यीन्दक् ङीत्ल गोच्च पीक्रो झ्यी सीन्न स्युव ज्यक्केन् बेत्। ॱनी खोङ्गी लेम्बुल ङे खीत्रङ् म दीरङ् ङु ॱमीत् ॱस्यीबेत्। घनीगी मी हीन् हीन् सीन्न सीक्केन् बेत्। 26ॱनी हीगी लेल्ल खीत्रङ्गी हीन्दुक् सीक्केन् बेत्। ङीत् नीज्यरङ्दङ् कङ्ज्यीक्ल से थुङ् झ्यीबे मी हीन्। नीज्यरङ् ङीक्की ॱसट्टक् घयेत्ल झ्यो़न्न ॱलोप्स ज्यप्न बीन्ज्युङ् न ॱनी सीन्न सीक्केन् बेत्। 27ॱनी खोङ्गी लेम्बुल खीत्रङ् ङे ङु ॱमीत् ॱस्यीबेत्। घनीगी मी हीन् हील्ल सीन्न सीक्केन् बेत्। खीत्रङ् ङीब झ्यीक्केन् घयेत् ङ च्यानी फल्ल ज्युक्। 28अब्राहाम्, इसहाक्, याकुब् धङ् धङ्बी़ कलुङ् ॱस्यो़क्केन् घयेत् इगी को़न्ज्योक्की ज्यागक्तु दो़प्प खीत्रङ्गी थोङ्गेन् बेत्। ॱनी हीन्न अक्, खीत्रङ् नङ्ल स्युक्तु ॱमीत् ची़प्प, छ्यील दीत्न तोङ्गेन् बेत्। हुनी खीत्रङ् हुदु ङुजी ज्यक्केन् धङ् ॱसोन्जीन् डीक्केन् युङ्गेन् बेत्। 29इगी को़न्ज्योक्की ज्यागक्तु ॱस्यर्, नुप्, झ्यङ् धङ् ॱल्हो ङो़नी मी गज्येन् युङ्न स्यालक्ल दो़च्च्ये ॱनोङ्गेन् बेत्। 30तेदे हुदु तीङ्मा दीब यरी एल्ला थो़न् डोगेन् बेत्। ॱनी ॱएम्मा दीब यरी तीङ्ल झर् डोगेन् बेत् सीन्न ॱसुङ बेत्।
यरुशलेम्गी ढीक्ल ३१-३५
31ॱनी हुगी यङ्ल येशु च्येल्ल फरीसी यरी युङ्न हुबे खोङ्ल नीज्यरङ् ह हीनी ॱयोङ्ल झ्यो़न्। हेरोद्गी नीज्यरङ् ॱसो़च्च्येमल ॱयेङ्गुक् सीगुक् सीन्न झ्यीब बेत्। 32ॱनी खोङ्गी लेम्बुल खीत्रङ् घयेत् हुगी चीप्च्यङ् हुगो च्याल ज्युक्ल हुल हीन्दुक् सीन्न ॱस्यो़त्। ङ हरीङ् धङ् नेम्बेत् थुक्ल ॱनो़प्प अयेक्प घयेत् तो़न्न दीक्केन्। मी नेप्प घयेत् ढक्तु ची़क्केन्। हुनी ॱनाङ् थुक्ल ङे ले ढुप् डोगो़त् सीन्न ॱस्यो़त्। 33हरीङ्, नेम्बेत् धङ् ॱनाङ् थुक्ल ङ लम् स्युन डोगेन्। कलुङ् ॱस्यो़क्केन् ॱस्यी गो़ ॱस्यर्न ॱनी, यरुशलेम्दु ॱस्यी गोगेन् बेत्। ॱयोङ्दु ॱस्युली मीत् युङ्गेन् बेत्।
34ॱवे यरुशलेम्, यरुशलेम् कलुङ् ॱस्यो़क्केन् घयेत् ॱसो़क्केन् धङ् को़न्ज्योक्की तङे मी घयेत्ल दोर्तुङ् बेन्न ॱसो़क्केन्, यरुशलेम्गी मीस्सीर् खीत्रङ् घयेत् झ्यमु आमे रोरङ्गी छ्यीरुक् ॱस्योक्पक्की होक्ल इब डस्सी ङे खीत्रङ् घयेत् लेम्म गज्येन् इप्च्ये ॱनो़ब झ्यीबेन्। ॱनी खीत्रङ् ॱलीत्मोङ्। 35तेदे, खीत्रङ्गी छ्यो़गङ् हुगो ह खीम्दोङ् ले डोगेन् बेत्। हरुङ्द ङे खीत्रङ्ल ॱस्येत् योङ्। चोव ज्यीन्दक्की छेन्नी युङ्गेन् दी ॱमेल्लम् च्येम्म हीनो सीन्न खीत्रङ्गी सीरे यङ्ल मेन्द, खीत्रङ्गी ङ ॱमीत् थोङ्गेन् बेत् सीन्न ॱसुङ बेत्।
Currently Selected:
लुका 13: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
