लुका 14
14
येशुसो फरीसी च्यीक्की खीम्दु १-१४
1हुनी ङीत्तुवे ङीन् च्यीक् येशुसो फरीसी मी छ्यीया च्यीक्की खीम्ल स्यालक्ल भो़नी खोङ्जोसो हुदु झ्यो़म्ब बेत्। ॱनी खोङ्ल च्यीव झ्यीक्केङ्गी मी इक् यरी उन यो़प्प बेत्। 2ॱनी हुदु सी़बु बो़न नगेन् नेप्प च्यीक् खोङ्गी ढुङ्दु ठीक्न युङ बेत्। 3ॱनी येशुगी हुगी फरीसी दीब धङ् छ्यो़डीम्गी चयेलम घयेत् दीबल ङीत्तुवे यङ्ल नेप्प ढक्तु ची़च्च्ये युङ्गेन् बेक्क न मीत् युङ्गेन् बेक्क? सीन्न ढीब बेत्। 4हील हुब घयेत् ॱसीङ् थागी लेनर बेत्। हुनी येशुगी हुगी नेप्प दील सुङ्न ढक्तु ची़त्न तङ बेत्। 5हुनी खोङ्गी हुगी डोम्बु घयेत् दील खीत्रङ्गी भु हीन्, यङ् ॱलङ् हीन्न अक्, हुगो ङीत्तुवे ङील्ल इनर्ल जान ॱनी, हुगो ॱस्यर्च्यक् ॱमीत् तो़म्ब स्योक्केन् दी खीत् ॱसु दी यो़प्प ॱनी? सीन्न ढीब बेत्। 6ॱनी हुबे हील लेम्बु ॱलोक् ॱमत् छुब बेत्।
7ॱनी हुगी डोम्बु घयेत् दीब नङ्ल स्युनी नङ् दीदु दो़स्स ढे तेङ्ल दो़च्च्येल दम्बा झ्यीप्प येशुगी थोङ्नी खोङ्गी हुब घयेत्ल पी च्यीक् हीन्दुक् सीन्न ॱसुङ बेत्। 8भालीङ्गी डो़ल्ल भो़न रङ् फीन्न ॱनी, रङ् रङ्स्यीगी ढे तेङ्ल दम्न मत् दो़च्च्यीत्। तीङ्ला रङ्ले डोम्बु छ्यीया च्यीक् युङ्नी, 9हुनी खीत्रङ् ॱङीबु भो़क्केन् ज्यीन्दक् दीगी रङ्ल हीगी दो़स्स हीदु डोम्बु ॱयोङ्म दो़त्तु ची़क्केन्। रङ् ॱमेक्तु दो़त् सीक्केन् बेत्। हुनी रङ् ढे होक्स्युक्ल दो़त् गो़ ॱस्यर्न ङु छय युङ्गेन् बेत्। 10बोर रङ् भालील्ल भो़स्स दीदु रङ् रङ्स्यीगी ढे होक्स्युक्ल दो़च्च्यीत्। ॱनी ज्यीन्दक् दी युङ्नी हुगी रङ्ल दगु यच्चो़त्ल दो़त् सीक्केन् बेत्। हुनी डोम्बु ॱयोङ्म घयेत् दीबे रङ्ल गस्सी हीम्ब छोर्केन् बेत्। 11मी ॱसी़ रोरङ्गी रोरङ् छ्यीया हीम्ब ॱसम्गो़दङ् हुगो च्युङाल तोङ्गेन् बेत्। ॱनी यङ् ॱसी़ रोरङ्गी रोरङ् च्युङा हीम्ब ॱसम्गो़दङ् हुगो छ्यीयाल तो़ङ्गेन् बेत् सीन्न ॱसुङ बेत्।
12हुनी हुगी फरीसी खीम्दक्प दील येशुगी रङ्गी डो़न् दी रङ्ल ढील्लेन् च्यो़ छुगेन्, रङ्गी दगु घयेत्, पी़न् ङीया छेङ्गोर् घयेत् धङ् रङ्गी खीम्जीब छ्युक्पु घयेत्ल ॱमत् तोङ्ज्यीत्। 13बोर रङ्गी डो़न् दी ढील्लेन् च्यो़ ॱमीत् छुगेन्, टङ्बु घयेत्, घोङ्रीय कङ्लक् यालक् ॱस्योर्नर घयेत् धङ् ॱमीक्मीत् घयेत्ल तोङ्ज्यीत्। 14हुनी क रङ् ॱसोदी च्येम्म युङ्गेन् बेगो। रङ्ल हुबे ढीन् च्यो़ ॱमत् छुन आक्, को़न्ज्योक्की मी ढङ्बु घयेत् ॱसोम्बुल लोङे यङ्ल हुगी ढीन् दी रङ्ल को़न्ज्योक्की ॱनङ्गेन् बेगो सीन्न ॱसुङ बेत्।
डो़न्से छ्यीम्मुल डोम्बु भो़बे पी १५-२४
15ॱनी येशुगी केच्च्य हुगो उन खोङ्दङ् दल दो़क्केन् डोम्बु च्यीक्की ॱह घोनी हुगी खोङ्ल इगी को़न्ज्योक्की ज्यागक्तु डो़न्सेल जोम्न सम सज्ये ॱनोङ्गेन् दी ॱसोदी छ्यीम्मु च्येम्म बेगो सीन्न झ्यीब बेत्। 16ॱनी हुल खोङ्गी हीन्दुक् ॱसुङ बेत्। मी च्यीक्की डो़न्से छ्यीम्मु च्यीक् तङ्न हुल मी गज्येन् डो़ल्ल ॱसा तङ्न भो़ब बेत्। 17ॱनी ॱसा तङ घयेत् दी ठीक्तु हुगी ज्यीन्दक् दीगी धी़जो़त्ल रोरङ्गी ॱयोक्पु घयेत् दील खीत्रङ् ज्युक्ल हुबल ह कुरीक् ठोक्क झ्यी छरेन्। ह झ्यो़र्रो झ्यी सीन्न ठीक्तु तोङ्गेन् बेत्। 18ॱनी डोम्बु घयेत् दीब कुरीक्की ॱएन्दीङ् ॱस्यीक् ॱस्यीक् धो़न् ॱयोङ्ल ॱङेत्तो झ्यीन हीन्दुक् सीक्केन् बेत्। च्यीक्की ङे हन्देन् स्यीङ्ग च्यीक् नो़बेन्। हुल तदु डो गोगो़त्। गोङ्ब चोङ्रो मत् झ्यीत्। ङ युङ् ॱमीत् छुबेत् सीक्केन् बेत्। 19ॱनी ॱयोङ्म च्यीक्की ङे हन्देन् ॱलङ् छ्य ॱङ नो़बेन्। ॱमो़ल गलो़त् डोगो़दङ् नम् च्यो़त्तु डो गोगो़त्। गोङ्ब चोङ्रो मत् झ्यीत्। ङ युङ् ॱमीत् छुबेत् सीक्केन् बेत्। 20ॱनी यङ् ॱयोङ्म च्यीक्की ङे हन्देन् ॱनम ठीक्पेन्। ह युङ् ॱमीत् छुबेत् सीक्केन् बेत्। 21हुनी हुगी ॱयोक्पु दी लोक्नी ज्यीन्दक् दील हीगी केच्च्य हीगो कुरीक् ॱस्येत्न टेप्प बेत्। ॱनी ज्यीन्दक् दी खोङ्डोक् लङ्न ॱयोक्पु दील ज्योक्सी झ्यीन रङ् सार्की ॱसट्टक् धङ् लम् घयेत्ल ज्युक्ल टङ्बु, घोङ्रीय, ॱमीक्मीत् धङ् कङ्लक् ॱस्योर्नर घयेत्ल डो़ल्ल ॱस्योक् सीन्न ठीक्तु तोङ्गेन् बेत्। 22ॱनी ॱयोक्पु दी फीन्न यङ् हुनी लोक्न युङ्नी ज्यीन्दक् दील नीज्यरङ्गी ॱङाब दी ह ङे झ्यी छरेन्। ॱनी हरुङ्द डोम्बु गज्येन् हीदु ॱस्योङेत् सीन्न झ्यीब बेत्। 23ॱनी हुल ज्यीन्दक् दीगी हुगो हीन्न, हरुङ्द रङ् ज्युक्ल ङे खीम् हीगो डोम्बी़ टेक् घेङ्ज्ये यो़प्पल रङ् ज्यलम् धङ् लम् घयेत्ल फीन्न मी कुरीक्ल डो़ल्ल युङ्रो झ्यीगी झ्यी सीन्न ठीक्लेत्। 24ङे खीत्रङ्ल ॱस्येत् योङ्। ङे ॱएम्मा भो़बे डोम्बु घयेत् हुबल च्यीगी च्यीक्ल आक् ङे टो़क्केङ्गी सम चक्की तज्ये च्यीक् इक् ॱमीत् ॱनोङ्गेन् बेत् सीन्न सीक्केन् बेत्। सीन्न खोङ्गी ॱसुङ बेत्।
येशुगी ॱलोप्टुक्ल युङे लेमु २५-३५
25ॱनी हुगी यङ्ल येशुदङ् कङ्ज्यीक्ल लम्ल मी छेत्मीत् डोगीन् यो़प्प बेत्। ॱनी खोङ्गी हुब ङो़ल दोङ् ज्युर्न हीन्दुक् ॱसुङ बेत्। 26ङे लम्ल युङ्गेन् मी ॱसी़ रोरङ्गी फम, पी़न्, मीजङ् धङ् रोरङ्ल थम्ज्येत् फङ मीप्प झ्यीन युङ्गुक्क हुगोरङ् क ङे ॱलोप्टुक् हीम्बल युङ् छुगेन् बेत्। 27मी रोरङ्गी कुरुस् खुर्न ङे लम्ल युङ्गेन् दी मेन्द, ङे ॱलोप्टुक् हीम्बल युङ् ॱमीत् छुगेन् बेत्।
28खीत्रङ् ॱसी़ खीम् थोन्दीम च्यीक् सोज्ये ॱनो़ब झ्यीक्को़दङ् हुगी ॱअल एल्ला रोरङ्गी पयीसक् दीगी हुगो जेङ् सो छुगो़दङ् ॱमीत् छुगो़दङ् ॱनो़न ची तङ्न तगेन् मेम्बेक्क ॱनी? 29स्येन् ॱसप्स्योङ् ज्यप्न डेन्न युङ्नी, यङ् हुगो जेङ् सो ॱमत् छुन ॱनी, मी कुरीक्की छ्यस्सी़त् ज्यप्न हीन्दुक् सीक्केन् बेत्। 30हीगी खीम् सोज्येम दी डेन्सोङ्। ॱनी म दी जेङ् सो ॱमत् छुसोङ्।
31हीनी यङ् ज्याबु च्यीक् ज्याबु ॱयोङ् च्यीक्तङ् ॱमक् थुक्तु डो गो़ झ्युङ्न ॱनी, हुगी ॱसीम्ल ङे ॱमक्मी ठी च्यीक्की हुगी ॱमक्मी ठी ॱङील ॱअल छगो़दङ् ॱमीत् छगो़दङ् ॱनो़न ॱनोक्सम् तङ्न ढो़ झ्यीक्केन् मेम्बेक्क ॱनी? 32ॱनी हुगी ॱअल छदोक्प मीत्न ॱनी, ॱएन्जो़त्नी गो घुक्न स्यीव युङ्ज्ये यो़प्पल डीक्च्या झ्यीत्तु हुगी रोरङ्गी ॱस्युङ्जप् घयेत् हुगो च्याल तोङ्गेन् बेत्।
33ॱनी खीत्रङ् रङ्ल घङ् यो़प्प घयेत् कुरीक् ॱलो़ तङ्न युङ्गेन् दी मेन्द, ङे ॱलोप्टुक् हीम्बल युङ् ॱमीत् छुगेन् बेत्।
34छ हुगो गङ्ज्येन् बेत्। ॱनी हीन्न अक्, छे ढुव दी येन खुर्न ॱनी, हुगो यङ् घन्दुक् झ्यीन छगुवल सोगेन् ॱनी? 35हुगो घो ॱमीत् छ्यो़त्ल ॱसोङ्न खुर्नी, स्यीङ्गे छ्याल आक् ॱमीत् फेङ्गेन् बेत्। बोङ्ल ॱलुक्न स्यक्न अक्, ॱमीत् फेङ्गेन् बेत्। हुगो पुर्च्येमे सोक्ल डोगेन् बेत्। ॱसी़ आम्ज्योक्की घोगुक्क हुगी हीगो नेन्ज्यीत् सीन्न ॱसुङ बेत्।
Currently Selected:
लुका 14: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
