लुका 11
11
ॱसुव तोप्लु धङ् स्युदेन् ज्यक्लु १-१३
1हीनी ङीन् च्यीक् येशु ॱसने च्यीक्तु देत्न ॱसुव तब बेत्। ॱसुव तप् छर्नी, ॱलोप्टुक् च्यीक्की खोङ्ल युहन्नागी रोरङ्गी ॱलोप्टुक्प घयेत्ल ॱसुव तोप्च्ये ॱलब डस्सी ङीत्ल अक् चोव ज्यीन्दक् नीज्यरङ्गी ॱलोप्रो झ्यी सीन्न स्यी़ब बेत्। 2ॱनी खोङ्गी हीन्दुक् ॱसुङ बेत्। खीत्रङ्गी ॱसुव दी हीन्दुक् सीन्न तोप्च्यीत्।
पब, नीज्यरङ्गी चङ्म हीम्बे छेल्ल तो़प्प युङ्ज्ये यो़प्प स्योक्च्यीत्। नीज्यरङ्गी ज्यागक् हीदु छुज्ये यो़प्प स्योक्च्यीत्। 3ङीत्ल ङीन् रीदङ् रील गो़बे सम ॱनङ्रो झ्यी। 4ङीक्की दीक्प धक्तु ची़त्रो झ्यी। घन्ड हीन् सीन्न ङीक्की इक् ङीत्ल ॱसी़ ङीब झ्यी यो़दङ् हुगो धक्तु ची़क्को़त्। नीज्यरङ्गी ङीत्ल छो़त्लीन् तरो ॱमत् ॱनङ् सीन्न तोप् गोगेन् बेत् सीन्न ॱसुङ बेत्।
5ॱनी हरुङ्द हुबल खोङ्गी खीत्रङ् नङ्दु दगु च्यीक् दगु च्यीक्की खीम्ल छेङ्गी घुङ्ल फीन्न गोक्केक्नी ॱवे दगु ङल ढोप्ची ॱसुम् कीम्ब तोङ्दे। 6ङीत् च्येल्ल थारीङ्नी ङीक्की ॱनेन्डो़न् च्यीक् ॱलीच्च्युङ्। हुल सम टो़च्च्येम ङीत्ल घन्ड अक् मीत् सीन्न सीक्केन् बेत्। 7ॱनी नङ् दीनी मल्ल दगु दीगी लेल्ल ङल छीर ॱमत् ॱलोङ्लेत्। गोच्च च्येत् छरेन्। ङे भीज घयेत् एत् ङदङ् दल नान यो़त्। ङ लोङ्न टो़त् ॱमीत् छुबेत् सीन्न सीक्केन् बेत्। 8ङे खीत्रङ्ल ॱस्येत् योङ्। हुगी छ्यी मी दी रोरङ्गी दगु हीम्ब ॱह घोन अक्, मीत् लोङ्गेन् बेत्। ॱनी छ्यी दगु दीगी गन्दीक्म धु टेत्नी, हुनी लोङ्न हुल गो़ब दी टो़क्केन् बेत्।
9ङे खीत्रङ्ल ॱस्येत् योङ्। ॱनङ्रो झ्यी सीन्न स्यी़। हुनी ॱनङ्गेन् बेत्। ॱयेङ्न तो़। हुनी ॱङीक्केन् बेत्। गोच्च टु। हुनी पीक्केन् बेत्। 10घन्ड हीन् सीन्न ॱसी़ स्युगुक्क हुल थोप्केन् बेत्। ॱसी़ ॱयेङ्गुक्क हुल ॱङीक्केन् बेत्। ॱसी़ गोच्च टुक्कुक्क हुल पीक्केन् बेत्। 11खीत्रङ्गी छीक्नी ॱसी़ भीजे रोरङ्गी पबल ने ॱस्य ॱनङ् सीन्न लीङ्गुक्क हुल खीक्की न मेम्ब, डी़ तीक्को़प्प बेक्कक् ॱनी? 12ॱनी यङ् गोङक् ॱनङ् सीन्न लीन्न ॱनी, हुल खीक्की दीक्परज तीक्को़प्प बेक्कक् ॱनी? 13खीत्रङ् मी ङेम्बे एक् त रोरङ्गी भीजल गागी ढङ् तीत् ॱस्यीगेल्ल तेङ् यी़न स्युगेन् खीत्रङ्गी यप्ल लीङ्गेल्ल ॱसुम्ब खोङ्गी ॱलो यङ्सी झ्यीन धम्बे थु ॱनङ्गेन् बेत्।
येशुल बाल्जीबुल्की ॱवङ् दुक् सीर १४-२३
14ॱनी लेन् च्यीक् ॱनो़प्प अयेक्प स्यीन्न तम् लप् ॱमीत् छुगेन्, मी च्यीक्की नङ्नी हुगी ॱनो़प्प दी येशुगी तो़न्न दीत् तङ बेत्। ॱनी ॱनो़प्प दी थो़न्न ॱसोङ्नी, हुगी मी दी तम् लप् छुगेल्ल ॱसोङ बेत्। हील उन यो़प्पे मी घयेत् दी ॱह लेब बेत्। 15ॱनी यङ् हुगी मी यरीगी खोङ्ल हुगी मी हुल ॱनो़प्प अयेक्प घयेक्की चोबो़न् बाल्जीबुल्की ॱवङ् यो़प्पेत्। ॱनी हुगी ॱवङ् दीगी क ॱनो़प्प अयेक्प ॱयोङ्म घयेत् दी तो़न्न दीक्को़प्पेत् झ्यीब बेत्। 16ॱनी यङ् यरीगी खोङ्ल ङीत्ल इगीनी मक्की यीक् छ्यीम्मी़ लेगी ता च्यीक् तो़र्रो झ्यीदे सीन्न छो़त्लीन् तेब बेत्।
17ॱनी बाल्जीबुल्की ॱवङ् बेत् सीरे हुबे ॱनो़बे केच्च्य दी येशुगी ॱह घोनी हुनी खोङ्गी हुबल ज्यागक् घङ्गोल अक् नङ्दु मत् डीक्प, गो ॱङील भीन ॱनी, हुगो रुम्न मीत्तल डोगेन् बेत्। ढोङ्बे नङ्दु उक् मत् डीक्प, गो ॱङील भीन ॱनी, हुगो रुम् डोगेन् बेत्। 18शैतान् शैतान् रोरङ्सो नङ्दु मीत् डीक्प यो़त्न ॱनी, हुगी ज्यागक् हुगो घन्दुक् झ्यीन ॱने छुगेन्? खीत्रङ्गी ङल बाल्जीबुल्की ॱवङ्गी ॱनो़प्प अयेक्प तो़न्न दीक्कुक् सीगुक्। 19ङे त बाल्जीबुल्की ॱवङ्गी ॱनो़प्प तो़न्न दीप्प झ्ये। ॱनी तीङ्ला खीत्रङ्गी भीज घयेत् दीबे ॱसी़ ॱवङ्गी तो़न्न दीक्केन् बेक्क ॱनी? हुगी यङ्ल खीत्रङ्गी भीज दीबेरङ् हीगी ढीक्ल खीत्रङ् फम्दु ची़क्केन् बेत्। 20ॱनी हुगो मेम्ब, ॱनो़प्प अयेक्प घयेत् हुगो को़न्ज्योक्की थीप्च्युङ्मे झ्यीन ङे तो़न्न दीक्केन् हीन्न ॱनी, को़न्ज्योक्की ज्यागक् खीत्रङ् च्याल ॱलीत् छर हीम्बल डोगेन् बेत्।
21मी ज्यीक्पोक्म च्यीक्की रोरङ्गी खीम् धङ् नोर् घयेत् छ्योप्च्येल छो़न्ज्य घयेत् खुर्न ॱरुङ्गीन् दो़क्केन् बेत्। 22ॱनी हुले ज्यीक्पा ॱयोङ्म च्यीक् युङ्न हुल घप्केन् बेत्। ॱनी ॱयोङ्म दी ज्यला थो़न्न ॱनी, हुगी खीम्गी दक्पी़ देङ् खीन यो़प्पे छो़न्ज्य घयेत् दी ठोन हुनी हुगी नोर् घयेत् दी लुप्न खुर् डोगेन् बेत्। हुनी लुबे नोर् घयेत् दी हुबे गो़न झ्यीक्केन् बेत्। 23ॱसु ङे छ्योल मीन्दुक्क हुगो ङे ड हीम्बल डोगेन् बेत्। ॱसु ङदङ् दल छ्य झ्यीन दी़त्रो मीत् झ्यीप्पेक्क हुगी हरुङ् तोर्न मीत्तल तोङ्गेन् बेत्।
ॱनो़प्प अयेक्प च्यीक्की ॱनो़प्प दी़न् ठीक्न युङ्गेन् २४-२६
24ॱनो़प्प स्यीलोक्पोक्म स्यीन्नरे मी च्यीक्की नङ्नी ॱनो़प्प दी थो़न्नी, हुनी हुगो ॱस कम्बु ठोक्मीक्की लुङ्बल ङेस ॱयेङ्दु डोगेन् बेत्। ॱनी ङेस दी ॱमत् ॱङीबल हुगी यङ् रोरङ्ल ङरङ् एल्ला दो़स्स दीलरङ् लोक्केन् सीन्न लोक्न युङ्गेन् बेत्। 25युङ्नी, एल्लागी दो़स्स दी ॱनुम्रीलीक्ल छ्यान डीक्पोक्म ॱसेन तोङ् ठोलीक्ल यो़प्प ठेक्केन् बेत्। 26हुनी हुगो फीन्न यङ् रोरङ्ले दुक्पागी ॱनो़प्प अयेक्प ॱयोङ्म दी़न् ठीक्न युङ्न हुब कुरीक् हुल स्युन दो़क्केन् बेत्। हुनी हुगी मी दीगी मीजी दी एल्लागी दीले दुक्पा युङ्गेन् बेत् सीन्न ॱसुङ बेत्।
27खोङ्गी हुन्दुक् ॱसुङ्नी, हुगी मी घयेत् दीगी छीक्नी भुमु च्यीक्की येशुल नीज्यरङ् कीगेन्, नीज्यरङ्ल नुम तीक्केङ्गी आम हुगो घन्डे ॱसोदी छ्यीय आ सीन्न केत् ज्यब बेत्। 28हीगी लेल्ल खोङ्गी को़न्ज्योक्की ॱसुङ्रप् नेन्न हुगी क धङ् धम्ल चीगेन् घयेत् ॱसुम्ब हुले ॱसोदी छ्यीया युङ्गेन् बेत् सीन्न ॱसुङ बेत्।
योनागी लेमी़ पी च्यीक् २९-३२
29ॱनी हुदु हरुङ् मी मङ्दु जोम्न युङ्नी, येशुगी हुब घयेत्ल हीन्दुक् ॱसुङ बेत्। धीङ्सङ्गी मी ङेम्ब घयेत् हीबे यीक् छ्यीम्मी़ ता तो़ल्लेत् सीक्केन् बेत्। हुन्दुक् झ्यीबल योनाल झ्युङे ता हुगो डस्सी मेन्द, ता ॱयोङ् ॱमीत् तो़ङ्गेन् बेत्। 30नीनवेगी मी घयेक्की ढीक्ल योना यीक् छ्यीम्मी़ ताल झ्युङ डस्सी कोलीमीगी ॱरेबु उक् धीङ्सङ्गी मी हीबल हुन्दुक् दीरङ् युङ्गेन् बेत्। 31धङ्बु ॱल्हो जम्बुलीङ्गी ॱल्हो ङो़गी ज्यामु च्यीक् सोलोमन्गी झ्यी़रीक्ल तदु युङ बेत्। हुगो झ्यीनी, ठीम्ज्यो़क्की ङीङ्गी यङ्ल हुगी इक् धीङ्सङ्गी मी हीबल ङीब कोप् छुगेन् बेत्। घन्ड हीन् सीन्न हुन्दो हीन सोलोमन्ले त छ्यीया च्यीक् यो़क्केन् बेत्। 32नीनवेगी मी घयेत्ल योनागी केच्च्य ॱस्येत्नी, हुनी हुबे ॱएङ्गी लम् दीनी ॱसीम् ज्युर्न युङ बेत्। हुगो झ्यीनी ॱनी, ठीम्ज्यो़क्की ङीङ्गी यङ्ल हीगी धीङ्सङ्गी मी हीबल हुब घयेक्की इक् ङीब कोप् छुगेन् बेत्। घन्ड हीन् सीन्न हुन्दो हीन ॱस्यो़क्केन् हीगो योनाले त छ्यीया च्यीक् बेत्।
ली़गी बत्ती ॱमीक् हीम्ब ३३-३६
33बत्ती पर्नी ॱनी, यङ् हुगो ढुज्युक्ल बेन धङ् ॱनो़च्च्ये घबुक् ज्यप्न ॱसु दीगी स्योक्को़प्प बेक्क? नङ्ल स्युक्केन् घयेत्ल मेङ्ग युङ्ज्ये यो़प्पल बत्ती केन स्योक्सल स्योक्केन् हीन्डो न ॱनी। 34रङ्गी ली़गी बत्ती दी रङ्गी ॱमीक् बेत्। ॱनी रङ्गी ॱमीक् दी ॱसेबोक्म यो़त्न ॱनी, ली़बु छङ्मल मेङ्ग युङ्गेन् बेत्। ॱनी यङ् रङ्गी ॱमीक् दी ङेम्बोक्म यो़त्न ॱनी, रङ्गी ली़बु दी इक् मेन्नक् ॱनक् थीङीय युङ्गेन् बेत्। 35हुगो झ्यीनी, रङ्गी ली़गी मेङ्ग दी मेन्नक्ल ॱसोङ् ॱमत् ॱसोङ् च्यङ्जो़त् झ्यीन नम् च्येत्न तो़ज्यीत्। 36रङ्गी ली़गी ढज्यक् ढुज्युक्ल मेन्नक् मीप्प मेङ्ग च्यङ्ज्यङ् यो़त्न ॱनी, रङ्गी ली़बु दी छङ्म टक्सी बत्ती पेक्प डस्सी युङ्गेन् बेत् सीन्न ॱसुङ बेत्।
छ्यो़डीम् ॱस्यीगेन् घयेत्ल लप्स्य ३७-५२
37ॱनी येशुगी हुगी केच्च्य हुगो ॱस्येत् छर्नी, हुनी फरीसी च्यीक्की रोरङ्गी खीम्ल येशु डेन्डी़ स्यी़ब बेत्। हुनी हुगी खीम् दीदु खोङ् झ्यो़न्न सम सदु स्युब बेत्। 38ॱनी येशुगी लक्प ॱमत् टी़ब, ठी़ मत् ज्यब सम सदु दो़प्प थोङ्नी हुगी फरीसी दी हुल ॱह लेब बेत्। 39ॱनी चोव ज्यीन्दक्की हुगोल हीन्दुक् ॱसुङ बेत्। खीत्रङ् फरीसी घयेक्की थार फोप्पे छ्यी दीरङ् ॱय च्येत्न चङ्मल सोगुक्। ॱनी खीत्रङ्गी नङ् दील लुप्केन् धङ् ङेम्बे ढङ्गी घेङ्न दुक्। 40खीत्रङ् म दी ॱलीन्सो़ दुक्। छ्यी सोगेन् दीगी नङ् दी इक् सो़ब मेम्बेक्क ॱनी? 41ॱअल खीत्रङ्गी फोप्पे नङ्ल यो़प्प घयेत् दी तो़न्न टङ्बु घयेत्ल हीन्दुक्रङ्ल टो़त्। हीनी क खीत्रङ् छ्यी धङ् नङ् चङ्बोक्म हीम्बल युङ् छुगेन् बेत्।
42खीत्रङ् फरीसी घयेत् घन्डे दुक्प। ॱस्येमेन्, हुनी ॱमेन्न ॱयोङ्म धङ् छो़त्म ॱङोजीगी ढङ् घयेत् दीनी त गो च्युल तङे गो च्यीक् को़न्ज्योक्ल पुगेन् बेत्। ॱनी खीत्रङ्गी दम्ङीत् मीप्प झ्यीत् गोगेन् दी धङ् को़न्ज्योक् ङो़गी झ्यम्ब दी फङ्न हुगो ॱनङ्ज्युङ्ल स्योक्केन् बेत्। खीत्रङ्गी स्येन् हीगो ओक् झ्ये। ॱनी हुगी पुज्येम दी इक् झ्यीच्च्येम यो़क्केन् बेत्।
43खीत्रङ् फरीसी घयेत् घन्डे दुक्प। छ्यो़गी छोगङ्गी नङ्दु ढे तेङ्ल दो़च्च्येल धङ् ठोम् छुसदु मी घयेक्की ॱसे स्यी़न युङल मो़सी झ्यीक्केन् बेत्। 44खीत्रङ् घयेत् घन्डे दुक्प। खीत्रङ् म दीरङ् रो बेक्सदङ् छ्येत्मीत् बेत्। हुगो रो बेक्स हीम्ब ॱस्यो़च्च्ये मीप्पल मी घयेत् हुगी थोक्ल छ्यम्न गोम्ज्योङ् तोङ्गेन् बेत् सीन्न ॱसुङ बेत्।
45हीगी लेल्ल छ्यो़डीम्गी चयेलम घयेक्की छीक्नी च्यीक्की खोङ्ल चयेलम नीज्यरङ्गी ॱसुङे केच्च्य हुगो ङीत् इत् ॱनेन्ज्ये ॱमीत् छोरेत् सीन्न झ्यीब बेत्।
46हुल खोङ्गी खीत्रङ् छ्यो़डीम्गी चयेलम घयेत् एत् घन्डे दुक्प। खीत्रङ्गी मी घयेत्ल खेद दी थेक्चो़त् को़गुक्। ॱनी हुल खीत्रङ्गी म दी खेद तोक्चो़त् च्यीक् इक् ॱरोङ्रो मीत् झ्यीक्केन् बेत्। 47खीत्रङ् घयेत् घन्डे दुक्प। खीत्रङ्गी धङ्बी़ कलुङ् ॱस्यो़क्केन् घयेक्की रो बेक्स घयेत् दी स्योङ्ले झ्यीक्केन् बेत्। ॱनी धङ्बु हुब घयेत् ॱसो़क्केन् दी खीत्रङ्गी पुबु ॱमुमु घयेत् बेत्। 48हुगी ले हुगोल खीत्रङ् ॱअङ् थी़ङ्गेन् बेत्। हीगो हीन् धङ् मेल्ल खीत्रङ्गी स्योङ्गेन् पुक्कङ् हुगो छ्यबङ्ल थो़ङ्गेन् बेत्। हुब घयेक्की कलुङ् ॱस्यो़क्केन् घयेत् ॱसेत् तङ बेत्। 49हीगी ढीक्ल को़न्ज्योक्की झ्यी़रीक्की केच्च्य च्यीक् थो़ङ्गेन् बेत्। ङ हुब घयेत् च्याल कलुङ् ॱस्यो़क्केन् धङ् ठीक्नल घयेत् को़न तोङ्गेन्। ॱनी हुगो यरी हुबे ॱसेत् तोङ्गेन् बेत्। यरीबल दुक्प अयेक्प तोङ्गेन् बेत् सीर थो़ङ्गेन् बेत्। 50ॱस धङ् ॱनम् छ्यादु ची़प्पनी झ्यीनी हजो़त् थुक्ल ॱसेत् तङे कलुङ् ॱस्यो़क्केन् घयेक्की ठक्की ङेल्लेन् दी हीगी धीङ्सङ्गी मी हीबल फोक्केन् बेत्। 51ङे गन्दीय ॱस्येत् योङ्। हबील् ॱसेप्पनी झ्यीनी जकरीया ॱसेप्प थुक्की ठक्की ङेल्लेन् थम्ज्येत् धीङ्सङ्गी मी हीबल फोक्केन् बेत्। जकरीया हुगो छ्यो़प्प पुस धङ् छ्यो़गङ्गी ॱअर्तक्तु ॱसेप्प बेत्।
52खीत्रङ् छ्यो़डीम्गी चयेलम घयेत् घन्डे दुक्प। धो़न् ॱस्यीबे दीमीक्की च्यी दी खीत्रङ्गी दक्पु झ्यीनी, हुनी खीत्रङ् ॱअङ् पीक्न मीत् स्युक्। ॱयोङ्म स्युक्केल्ल अक् क च्यो़क्केन् बेत् सीन्न ॱसुङ बेत्।
53-54हुनी येशु ॱयोङ्ल झ्यो़म्ब बेत्। हीनी झ्यीनी फरीसी धङ् छ्यो़डीम्गी चयेलम घयेत् येशुगी डल ज्यीक्सी लोङ्न सील्लुङ् तान ॱङेत्त ॱयेङ्ज्येल खोङ् च्याल यङ् अङ् यङ् अङ् युङ्न तम् च्युर बेत्।
Currently Selected:
लुका 11: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
