लुका 10
10
येशुगी ॱलोप्टुक् दी़न्ज्यु धो़न्नी को़न तङ १-१६
1हीनी चोव ज्यीन्दक्की ॱयोङ्म मीरङ् दी़न्ज्यु धो़न्नी को़न खोङ् रोरङ् झ्यो़न्ज्ये ॱनो़बे सार् धङ् युगङ् घयेत् दील हुब एल्ला मीरङ् ॱङी ॱङी छ्य झ्यीन हीनी झ्यीब दी तङ बेत्। 2ॱनी हुब घयेत्ल खोङ्गी हीन्दुक् ॱसुङ बेत्। तो़न्दोक् ह गज्येन् छो़दुक्। ॱनी ॱङलक्प दी को़न्सी दुक्। तो़न्दोक्की दक्पुल तो़न्दोक् दी़क्केङ्गी ॱङलक्प तोङ्रो झ्यी सीन्न खीत्रङ् ॱसुव तोप्। 3ह खीत्रङ् ज्युक्। तेदे, च्यङ्गु घयेक्की छीक्ल लुक्टुक् तङ डस्सी खीत्रङ् तोङ्गेनो। 4पयीसक्, ज्यम्बेक्, जुत्त घन्ड अक् ॱमत् खुर्च्यीत्। लम्ल ॱसुल आक् छ्यक्सुम् थेमु मत् झ्यीज्यीत्। 5खीम् घङ्गोल स्युक् गो़ झ्युङ्न अक्, गोम दी खीत्रङ्गी हीगी ढोङ्ब हीदु स्यीव दीव युङ स्योक्च्यीत् सीन्न झ्यीज्यीत्। 6हुगी ढोङ्ब दी दीवे ज्यी़त् हीन्न ॱनी, खीत्रङ्गी झ्यीबे दीव दी हुदु युङ्गेन् बेत्। ॱनी मेन्न ॱनी, हुगो खीत्रङ् च्यालरङ् लोक्न युङ्गेन् बेत्। 7खीत्रङ् गोम खीम् घन् दील स्यु यो़दङ् हुदुरङ् दो़च्च्यीत्। सम थुङ्म घङ् टेप्प सज्यीत्। घन्ड हीन् सीन्न लेमीयल ॱल थोप् ओ़ब युङ्गेन् बेत्। खीम् च्यीक्नी च्यीक्ल गीर्न पो़न मत् डोज्यीत्।
8हुनी खीत्रङ् सार् घल स्युन फीन्न आक्, हुदु ॱनेजङ् ॱयर्न दो़स्स दीदु ॱनेजङ दीगी घङ् टेप्पे सम सज्यीत्। 9हुनी हुगी सार्की नेप्प घयेत् ढक्तु ची़च्च्यीत्। को़न्ज्योक्की ज्यागक् ॱस्यच्चल ॱलीत् छर बेत् सीन्न ॱस्यो़च्च्यीत्। 10खीत्रङ् सार् च्यीक्ल फीन्नी, हुगी सार्की मी घयेत् दीगी खीत्रङ्ल थोङ् मत् झ्येन ॱनी, हुगी सार् दीगी ॱसट्टक्ल थो़न्न 11हुबल खीत्रङ्गी ङीक्की कङ्बल ज्यरे हीगी सार्की थल घयेत् हीगो खीत्रङ्ल छ्येप्प फोक्केन् हीम्बे ढीक्ल हीदु दप्न स्योक्केन्। को़न्ज्योक्की ज्यागक् ॱस्यच्चल ॱलीत् छर बेत्। हीगो ॱह घोव झ्यीज्यीत् सीन्न ॱस्यो़च्च्यीत्। 12ङे खीत्रङ्ल ॱस्येत् योङ्। ठीम्ज्यो़क्की ङीङ्गी यङ्ल हुगी सार् हुल नोङ्गेङ्गी दुक्पले त सदोम्ल फोक्पे छ्येप्प हुगो गुर् थेक्पा युङ्गेन् बेत्।
13खोराजीन् सार् खो़त् घन्डे दुक्प। बेथ्सेदा सार् खो़त् घन्डे दुक्प। घन्ड हीन् सीन्न खीत्रङ्गी घुङ्दु तो़म्बे ॱस्यीक् छ्यीम्मी़ ले घयेत् हुगो टायर् सार् धङ् सीदोन् सार्तु तो़म्ब हीन्न, बोर हुगी मी हुब एल्ला ॱएङ्गी लम्नी ॱसीम् ज्युर्न हुगी ढीक्ल बोरागी घो़ घो़न्न गोल घोदा कप्न देत् यो़ट्टो। 14ठीम् च्यो़प्पे ङीङ्गी यङ्ल खीत्रङ्ल नोङ्गेङ्गी दुक्प हुले त टायर् धङ् सीदोन्ल फोक्पे छ्येप्प हुगो गुर् थेक्पा युङ्गेन् बेत्। 15ॱवे कफर्नहुम्, खो़त् इगी तेङ् यी़ल ते च्यो़गेन् बेत् ॱनो़ब ॱसम्गो़प्प? रङ् ॱस्यीवे यी़ल तोङ्गेन् बेत्।
16खीत्रङ्गी झ्यीबे खल नेङ्गेन् दीगी ङे झ्यीबे खल आक् नेङ्गेन् बेत्। ॱनी खीत्रङ्ल थोङ् मीत् झ्यीक्केन् दीगी ङल अक् थोङ् मीत् झ्यीक्केन् बेत्। ॱनी ङल थोङ् मीत् झ्यीक्केन् दीगी ङ तोङ्गेल्ल आक् थोङ् मीत् झ्यीक्केन् बेत् सीन्न ॱङान तङ बेत्।
ॱलोप्टुक् दी़न्ज्यु धो़न्नीबु लोक्न युङ १७-२०
17हुनी दी़न्ज्यु धो़न्नीबु दी गेस लङ्गील्ल लोक्न युङ्न हुब घयेक्की येशुल चोव ज्यीन्दक् नीज्यरङ्गी छेन्नी ॱनो़प्प अयेक्प घयेत् एत् ङीक्की ॱवङ्यो़त्ल नेन्ज्युङ् सीन्न झ्यीब बेत्। 18हील येशुगी शैतान् हुगो ङे इगी तेङ् यी़नी मल्ल डुक्की च्यीला तो़म्ब डस्सी ॱसल छर थोङ्ज्युङ्। 19तेदे, डी़, दीक्परज घयेत् धङ् हुगी ड हुल यो़प्पे ॱस्यीक् दी खीत्रङ्गी कङ्बे होक्ल ॱनो़न् छुगेल्ल ङे खीत्रङ्ल ॱवङ् टेप्पेन्। हुन्दुक् झ्यीबे खीत्रङ्ल च्यो़न् तोङ् ॱमीत् छुगेन् बेत्। 20ॱनी हीन्न अक्, खीत्रङ्गी गेस दी ॱनो़प्प अयेक्प घयेत् खीत्रङ्गी ॱवङ्यो़त्ल नेन्ज्युङ् ॱनो़बल मेम्ब, खीत्रङ् घयेक्की मीङ् दी इगी तेङ् यी़गी थोल ढीन यो़प्पे ढीक्ल गेस झ्यीज्यीत् सीन्न ॱसुङ बेत्।
येशुगी को़न्ज्योक्ल थु छ्यी पुब २१-२४
21हुगी यङ्ल धम्बे थुगी येशुल गेस छ्यीम्मु लङ्न खोङ्गी को़न्ज्योक्ल हीन्दुक् ॱसुङ बेत्। तेङ् यी़ धङ् ॱस जम्बुलीङ्गी चोव ज्यीन्दक्, पब, नीज्यरङ्गी हीगो मी खेबा धङ् ॱस्यीब च्येम्म घयेत्ल ॱमत् तो़म्ब, भीज डस्सी झ्यीबे मी घयेत्ल तो़न्न युङ बेत्। हीगी ढीक्ल नीज्यरङ्ल थु छ्यी, थु छ्यी। हीगो पब नीज्यरङ्गी थुल ॱसोङ्न यो़क्केन् बेत् सीन्न ॱसुङ बेत्।
22छङ्म थम्ज्येत् कुरीक् ङे यप्की ङे लक्ल टेत्न यो़क्केन् बेत्। ॱनी ॱरेबु दीम्बरङ् ङु ॱस्यीगेन् दी यप् मेन्द, ॱयोङ् ॱसु उक् मीप्प बेत्। ॱनी यङ् यप् दीम्बरङ् ङु ॱस्यीगेन् दी इक् ॱरेबु धङ् ॱरेबी़ ॱसुल ङोस्स्यीन् टो़च्च्ये ॱनो़न टेत् यो़दङ् हुगी मेन्द, ॱयोङ् ॱसी़ इक् ङु ॱमीत् ॱस्यीगेन् बेत् सीन्न ॱसुङ बेत्। 23हुनी खोङ्गी दोङ् ज्युर्न ॱलोप्टुक् दीबलरङ् हीन्दुक् ॱसुङ बेत्। खीत्रङ् ॱसोदी च्येम्मे मी बेगो। खीत्रङ्गी ॱमीक्की हीगो कुरीक् थोङ बेत्। 24ङे खीत्रङ्ल ॱस्येत् योङ्। खीत्रङ्गी घङ् थोङ धङ् घङ् घोव घयेत् हीगो धङ्बी़ कलुङ् ॱस्यो़क्केन् धङ् ज्याबु घयेक्की इक् दो़न्दो़त् तगीन् थेप्प धङ् नेङ्गीन् थेप्प झ्युङ बेत्। ॱनी हुबल तज्ये ॱमत् ॱनोङ, नेन्ज्ये एक् ॱमत् ॱनोङ बेत् सीन्न ॱसुङ बेत्।
सामरीयागी मी च्यीक्की झ्यम्ब २५-३७
25हीनी छ्यो़डीम्गी चयेलम च्यीक् येशुल छो़त्लीन् तदु युङ्न हुगी खोङ्ल चयेलम ङल फु तक्पे छी थोबे ढीक्ल ङे घन्दुक् झ्यीब झ्यीत् गोगेन् बेक्क? सीन्न ढीब बेत्। 26ॱनी हीगी लेल्ल खोङ्गी छ्यो़डीम्ल घन्ड ढीदुक्क? खोक्की हुगो डोनी, घन्दुक् सीर दुक्क ॱनी? सीन्न ढीब बेत्। 27ॱनी हीगी लेल्ल हुगी
रङ्गी चोव ज्यीन्दक् को़न्ज्योक्ल रङ्गी ॱसीम्बे यीक्नी, रङ्गी ओङ्बु घङ् यो़प्प घयेक्की धङ् रङ्गी ॱस्यीरप् रीक्प छङ्मे झ्यम्ब खुर्च्यीत्। ॱनी रङ्गी लोल यो़क्केङ्गी मील रङ्गी रङ् डस्सीरङ् ॱसम्न झ्यम्ब झ्यीज्यीत् सीर दुक् झ्यीब बेत्। (ठीम्लु ६:५)
28ॱनी हुल खोङ्गी रङ्गी सीक्केन् हीगो गन्दीय बेत्। रङ्गी हुन्दुक् दीरङ् झ्यीक्को़त्न ॱनी, रङ् फुगी ढीक्ल ॱसो़गेन् बेत् सीन्न ॱसुङ बेत्। 29ॱनी हुगी मी दीगी रोरङ् दीम्बा हीम्ब तो़न्ज्येल खोङ्ल यङ् ङे लोल यो़क्केङ्गी मी सीक्केन् दी ॱसुल डोगेन् बेक्क? सीन्न ढीब बेत्।
30ॱनी हीगी लेल्ल येशुगी मी च्यीक् यरुशलेम्नी यरीहोल भप्न युङ बेत्। हुल लम्दु झ्यक्प ज्यप्न हुगी घो़ दी ठोन हुल दुङ्न ॱस्यीमी रोमील्ल तङ्न स्यक्न टप्नर बेत्। 31ॱनी छ्यो़प्पो़न् च्यीक् हुगी लम्नी मल्ल झ्यीन युङ बेत्। ॱनी फच्चो़त्नी हुगी मी दी थोङ्नी, हुगो तेङ्जो़त्नी फल्ल झ्यीन कोर्न टप्नर बेत्। 32ॱनी हुगो डस्सीरङ् यङ् लेवीगी ज्यी़त् च्यीक् इक् हुगी लम् दीलरङ् युङ बेत्। ॱनी फच्चो़त्नी हुगी मी दी थोङ्नी, हुगो ओक् तेङ्जो़त्नी फल्ल झ्यीन कोर्न टप्नर बेत्। 33ॱनी यङ् सामरीयागी मी च्यीक् इक् हुगी लम् दीलरङ् युङ्नी हुगी मी झ्यीस्स दील ॱलीत्न हुगो थोङ्नी, हुल ॱङीङ् छय बेत्। 34हुनी हुगो च्याल फीन्न हुगी ॱम च्येप्प घयेत् दील हुगी ॱनुम् धङ् गोङ्ज्यङ् ॱलुक्न ॱमेट्टी टीन बीम्ब बेत्। हुनी रोरङ् स्यो़न्न युङे भोङ्गु दील हुगो केन सगङ् च्यीक्तु खुर्न ॱमेन्ज्योर् झ्यीब बेत्। 35हुनी नेम्बेत् दी सगङ्गी दक्पु दील टङ्ग दीनार् ॱङी टेत्न हीगी मी हील नीज्यरङ्गी नेत्योक् झ्यीत्रो झ्यी। हीले ॱल्हक्मागी खर्च ॱसोङ्न, ङ युङ्नी ङे जप् योङ् झ्यीब बेत्। 36ॱनी खोक्की ॱनो़बल झ्यक्पागी दुङ् तङे मी हुगी लोल यो़क्केङ्गी मी सीक्केन् दी हुब ॱसुम्गी छीक्नी घङ्गो दी ॱनेगुक्क? सीन्न ढीब बेत्। 37ॱनी हुगी लेन् दील ॱङीङ् छा झ्यीक्केन् दी ॱनेगुक् झ्यीब बेत्। ॱनी हुल येशुगी ज्युक्ल रङ् अङ् हुगो डस्सीरङ् झ्यीज्यीत् सीन्न ॱसुङ बेत्।
येशु मार्था धङ् मरीयम् झ्यीबे केच्च्य ३८-४२
38हुनी येशु धङ् खोङ्गी ॱलोप्टुक् दीब लम् स्युन फीन्नी युगङ् च्यीक्ल ॱलीब बेत्। हुदु भुमु मार्था सीक्केन् च्यीक्की खीम्ल डेन्डी़ स्यी़ब बेत्। 39ॱनी मार्था दील भुमी़ पी़न् मरीयम् सीक्केन् च्यीक् यो़प्प बेत्। ॱनी हुगो येशुगी कङ्स्यम्दु खोङ्गी ॱसुङ्स्येत् नेङ्गील्ल देप्प बेत्। 40ॱनी मार्था दील उन नङ्योक् झ्यीच्च्येमे ले छेत्मीत् यो़प्प बेत्। ॱनी हुल डेन्सीन् लङ्न येशु च्याल युङ्न खोङ्ल चोव ज्यीन्दक् ङे पी़न् हीगी हीन नङ्योक्की ले घयेत् दी ङल जेङ् झ्यीत्तु ची़क्कुक्। नीज्यरङ्गी हीगो ॱमीत् थोङेक्कक्? हुगो ङे दगुल तोङ्रो झ्यी सीन्न झ्यीब बेत्। 41ॱनी हीगी लेल्ल चोव ज्यीन्दक्की मार्था, मार्था खो़त् घन्डल ले घयेक्की ढीक्ल च्युगा खुर्न ॱसीम्दुक् झ्यीक्केन्। 42ले चा छ्यीस्स्यो दी च्यीगी च्यीक्रङ् यो़क्केन् बेत्। ॱनी हुगो क मरीयम्गी दम्न यो़क्केन् बेत्। हुगो ॱयोङ्गी या टो़ज्ये मीत् युङ्गेन् बेत् सीन्न ॱसुङ बेत्।
Currently Selected:
लुका 10: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
