लुका 9
9
ॱलोप्टुक् च्युन्नीबुल तम् ॱङान तङ १-९
1हुनी येशुगी खोङ् रोरङ्गी ॱलोप्टुक् च्युन्नीबु दी लोल भो़न हुबल ॱनो़प्प अयेक्प घयेत् तो़न्न दीच्च्येम धङ् नज घयेत् ढक्तु ची़च्च्येमे ॱस्यीक् धङ् ॱवङ् ॱनङ्न 2को़न्ज्योक्की ज्यागक्की केच्च्य ॱस्यो़त्तु धङ् नेप्प घयेत् ढक्तु ची़त्तु खोङ्गी तङ बेत्। 3ॱनी खोङ्गी हुबल हीन्दुक् सीन्न तम् ॱङान तङ बेत्। खीत्रङ् लम्ल डोये यङ्ल घन्ड अक् ॱमत् खुर्च्यीत्। तोक्लङ् ॱमत् खुर्च्यीत्। जप्पेक् ॱमत् खुर्च्यीत्। सम ॱमत् खुर्च्यीत्। पयीसक् ॱमत् खुर्च्यीत्। ली़ज्ये नङ् घो़ ॱङी ॱमत् खुर्च्यीत्। 4खीत्रङ् खीम् घङ्गोल स्युन देत्न अक्, हुगी यु दीनी नम् थो़न्न डो डो थुक्ल हुदुरङ् ॱसने च्यीक्तु दो़च्च्यीत्। 5खीत्रङ् सार् घदु स्युक्को़दङ् हुगी मी घयेत् दीगी खीत्रङ्ल थोङ् मत् झ्येन ॱनी, हुगी सार् दीनी थो़न्न डोये यङ्ल हुबल छ्येप्प फोक्केन् हीम्बे ढीक्ल खीत्रङ्गी जुत्तल ज्यरे थल दी हुबे थोङ्सदु दप्ल स्योक्च्यीत् सीन्न ॱङाब बेत्। 6हुनी हुब युगङ् घयेत्ल फीन्न केच्च्य ॱनेम्बु ॱस्यो़क्कील्ल धङ् नेप्प घयेत् ढक्तु ची़क्कील्ल गीर बेत्।
7-8ॱनी येशुगी ढीक्की केच्च्य घयेत् पो़न् हेरोद्गी इक् ॱह घोव बेत्। ॱनी हीगी ढीक्ल मी यरीबे हुगी मी हुगो युहन्ना ॱस्यीन खुर दी यङ् ॱसोम्बुल लोङ हीङ्गो़प्पेत् सीन्न झ्यीब बेत्। यङ् यरीबे हुगो धङ्बी़ एलीया दी जम्बुलीङ्ल थो़न्न युङ हीङ्गो़प्पेत् सीन्न झ्यीब बेत्। ॱनी यङ् यरीबे हुगो धङ्बी़ कलुङ् ॱस्यो़क्केन् ॱयोङ्म च्यीक् ॱसोम्बुल लोङ हीङ्गो़प्पेत् सीन्न झ्यीब बेत्। ॱनी हेरोद् हील गो थोम्ब बेत्। 9हेरोद्गी ॱनो़बल युहन्नागी गो दी ङे दुम्न ॱसेप्पेन्। ॱनी हुन्दो यङ् ॱयोङ्म च्यीक्की ढीक्ल केच्च्य गज्येन् घोगुक्। हुगो यङ् ॱसु च्यीक् ब अक्? सीन्न हेरोद्गी येशु ठेच्च्ये ॱनो़ब झ्यीब बेत्।
मी तोङ्डक् ॱङल सम टेप्प १०-१७
10हीनी येशुगी ठीक्नल घयेत् दी कुरीक् लोक्न युङ्नी, हुबे रोरङ्सो़ घन्ड घन्ड झ्यीब बेक्क हुगो कुरीक् खोङ्ल ॱस्येत्न टेप्प बेत्। हुनी येशुगी हुब घयेत् ठीक्न रोरङ्सो छ्युवक् बेथ्सेदा सार्ल फीम्ब बेत्। 11हुनी मी घयेत् दीगी खोङ्जोसो डोव ॱह घोनी, हुनी हुब अक् तीङ् दीत्न युङ बेत्। ॱनी हुब युङल खोङ् उ मत् दुब, को़न्ज्योक्की ज्यागक्की ढीक्की केच्च्य ॱस्येत्न टेप्प बेत्। ॱनी हुब ॱसु ॱसुल नज ढक् गो़ब दुक्क हुब घयेत् खोङ्गी ढक्तु ची़प्प बेत्।
12ॱनी ङीम रीप्नी, ॱलोप्टुक् च्युन्नीबु दी खोङ्गी लोल युङ्न हुबे खोङ्ल हीगो मी मीस्से ॱसने बेत्। हीगी मी घयेत् हीब रोरङ्सोल गो़बे सम धङ् दो़स्स ॱयेङ्दु फच्चो़त्ल युगङ् धङ् खीम् छ्यीक्कीरीक्प यो़स्स घयेत्ल तोङ्रो झ्यी सीन्न झ्यीब बेत्। 13हीगी लेल्ल खोङ्गी हीब घयेत्ल गो़बे सम खीत्रङ्गी टो़त् सीन्न ॱसुङ बेत्। ॱनी ॱलोप्टुक् दीबे लेल्ल नुक्मे मी मङल कोबे सम नोदु फीन्न मेन्द, ङीत्ल ॱनी ढोप्ची ॱङ धङ् न ॱङीरङ् यो़त् झ्यीब बेत्। 14उन तोम्दु मी तोङ्डक् ॱङजो़त् च्यीक्की ची यो़प्प बेत्। ॱनी येशुगी ॱलोप्टुक् दीबल हीगी मी हीब ॱङप्च्यु ॱङप्च्यी़ पोङ्ज झ्यीन ॱसल दो़त्तु ची़त् सीन्न ॱङाब बेत्। 15ॱनी ॱलोप्टुक् दीबे दो़त्तु ची़प्प बेत्। 16हुनी खोङ्गी ढोप्ची ॱङबु दी धङ् न ॱङीबु दी छ्यक्ल ॱनम्न इगी तेङ् यी़ ङो़ल तेन को़न्ज्योक्ल थु छ्यी पुब बेत्। हुनी ढोप्ची दी च्यक्न मी घयेत् दील गो़न टो़त्लेत् सीन्न ॱलोप्टुक् दीबे लक्ल टेप्प बेत्। 17ॱनी मी कुरीक्की हुगो ढोप्प डङ् डङ् सेब बेत्। ॱनी स ॱमत् छुबे ॱल्हक्टो़ फरक् फीरुक् घयेत् दी ॱलोप्टुक् दीबे डुनी, हुगो डालो च्युन्नी घेङ बेत्।
पत्रुस्की येशुल ख्रीष्ट् बेत् झ्यीब १८-२२
18ॱनी लेन् च्यीक् येशु ॱसुव तोबे यङ्ल खोङ्दङ् दल ॱलोप्टुक् दीबरङ् यो़प्प बेत्। ॱनी खोङ्गी ॱलोप्टुक् दीबल मी घयेक्की ङल ॱसु बेत् सीन्न सीगुक्क? सीन्न ढीब बेत्। 19ॱनी हीगी लेल्ल हुबे मी यरीबे युहन्ना बप्तीस् हीङ्गो़प्पेत् सीगुक्। यरीबे एलीया हीङ्गो़प्पेत् सीगुक्। यरीबे धङ्बी़ कलुङ् ॱस्यो़क्केन् च्यीक् ॱसोम्बुल लोङ हीङ्गो़प्पेत् सीगुक् सीन्न झ्यीब बेत्। 20ॱनी खोङ्गी हुबल खीक्की हीगी ढीक्ल ङल ॱसु बेत् सीगो़प्प ॱनी? सीन्न ढीब बेत्। ॱनी हीगी लेल्ल पत्रुस्की नीज्यरङ् को़न्ज्योक्की को़बे च्यप्को़न् ख्रीष्ट् बेत् सीन्न झ्यीब बेत्। 21हुनी येशुगी हुबल हीगी केच्च्य हीगो मी ॱसुल आक् ॱमत् ॱस्यो़च्च्यीत् सीन्न गन्दीक्म ॱङाब बेत्। 22ॱनी खोङ्गी हरुङ्द कोलीमीगी ॱरेबुल दुक्स्यी गज्येन् नोङ्गेन् बेत्। लुङ्बे गेम्बा चो छ्यीया घयेत्, छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेक्की ॱलोल मीत् झ्यीप्पल ॱसो़क्केन् बेत्। हुनी स्यक्पु ॱसुम् ॱसोङे ङीन् दी यङ् ॱसोम्बुल लोङ्गेन् बेत् सीन्न ॱस्येप्प बेत्।
येशुगी ॱलोप्टुक्ल युङे मीजीगी लेमु २३-२७
23हीनी येशुगी मी घयेत् दील हीन्दुक् सीन्न ॱसुङ बेत्। ङे लम्ल मी ॱसु युङ्गीन् थेक्को़दङ् हुगी रोरङ्गी धेच्च्यो घयेत् फङ्न ङीन् रीम फो़स्स्यी रोरङ्गी कुरुस् खुर्न युङ् गोगेन् बेत्। 24ॱनी मी ॱसी़ रोरङ्गी छी दी तोर् योङ् ॱनो़न फङ झ्यीगुक्क हुगी छी दी तोर् डोगेन् बेत्। ॱनी यङ् ॱसी़ ङे धो़ल्ल रोरङ्गी छील फङ मीप्प झ्यीक्को़दङ् हुगी रोरङ्गी छी दी सुङ् छुगेन् बेत्। 25जम्लीङ् की़न् दीरङ् लक्ल झ्युङ्ज्यङ्, रोरङ् मीत्तल ॱसोङ्न ॱनी, हुल घन्डे फेन्दो दी युङ्गेन्? 26ॱनी ङ धङ् ङे केच्च्यल मी ॱसु ङु छय झ्यीगुक्क हुल तीङ्ला कोलीमीगी ॱरेबुल रोरङ्गी तो़त्वङ्, यप्की तो़त्वङ् धङ् इगीगी भङ्ज्येम्ब चङ्म घयेक्की तो़त्वङ् झ्युङ्न युङे यङ्ल खोङ्गी इक् हुल ङु छय झ्यीक्केन् बेत्। 27ङे खीत्रङ्ल दीम्बरङ् ॱस्येत् योङ्। हुन्दो हीन यो़क्केन् खीत्रङ् यरीगी ॱमत् ॱस्यीयलरङ् को़न्ज्योक्की ज्यागक् युङ थोङ्गेन् बेत्।
येशुगी ली़ ज्युर २८-३६
28हीनी झ्यीनी स्यक्पु ज्येच्चो़त् च्यीक् ॱसोङ्नी, येशुगी पत्रुस्, युहन्ना, याकुब् झ्यीब ठीक्न लदोक् च्यीक्ल ॱसुव तोप्तु जेन फीम्ब बेत्। 29ॱनी हुगी लदोक् दीदु खोङ्गी ॱसुव तोबे यङ्ल खोङ्गी दोङ्ब दी ज्युर्न घो़ दी इक् ओ़त् छ्यीम् छ्यीम् झ्यीक्केन् कप्पु च्यत् थीङीयल ॱसोङ बेत्। 30हुगी यङ्ल हुदु मीरङ् ॱङी मोशा धङ् एलीया 31तो़त्वङ् च्येम्मे ओ़च्च्यल इगीनी मल्ल येशुदङ् तम्स्यु लप्तु थो़म्ब बेत्। ॱनी हीगी तम्स्यु दी येशु यरुशलेम्दु ढोङ्न, हुदु कुरीक् डुप्केन् हीम्बे ढीक्ल लब बेत्।
32ॱनी पत्रुस् धङ् रोरङ्गी दगु दीब उन ॱङीत्ल ॱसोङ्न यो़प्प बेत्। हुनी ॱङीत् दी सेत्न, हुबे तेनी येशु खोङ् रोरङ्गी तो़त्वङ् च्येम्मे ओ़च्च्यल झ्युङ्न खोङ्दङ् दल मीरङ् ॱङी डङील लोङ्न दो़प्प थोङ बेत्। 33हुगी मीरङ् ॱङीबु दी खोङ्दङ् घीबे यङ्ल पत्रुस्की येशुल चयेलम हज्यरङ् हीदु दो़प्पल गस्सी युङेत्। हीदु दीर ॱसुम् सो़दोङ्, च्यीक् नीज्यरङ्ल, च्यीक् मोशाल, च्यीक् एलीयाल झ्यीब बेत्। हीगो पत्रुस्की नुक्रङ् ॱनोक्सम् ॱमत् तङल लब हीङ्गो़प्प बेत्।
34पत्रुस्की हुन्दुक् सीरे यङ्ल ॱमुब च्यीक् युङ्न खोङ्जोसो तुम् तङ बेत्। हुनी ॱलोप्टुक् दीबल ज्यीक्टक् लङ बेत्। 35ॱनी ॱमुबे नङ् दीनी मल्ल हीगो ङे दम्बे भु हीन्। हीगी झ्यीबल खीत्रङ् नेन्ज्यीत् सीरे ॱसुङ्गेत् च्यीक् युङ बेत्। 36हुगी ॱसुङ्गेत् दी यो़नी, ॱलोप्टुक् दीबे उन येशुरङ् च्यीगी च्यीक्पु यो़प्प थोङ बेत्। ॱनी हुब ॱसुम्बी़ रोरङ्सो़ घङ् थोङ घयेत् दी हुगी धी़ल मी ॱसुल आक् ॱमत् ॱस्येप्प बेत्।
ॱनो़प्प अयेक्प स्यीन्नरे भीज च्यीक् ढक्प ३७-४५
37ॱनी हुगी नेम्बेत् दी खोङ्जोसो हुगी लदोक् दीनी मल्ल भप्न युङ्नी मी छेत्मीत् ठेप्प बेत्। 38ॱनी मी घयेत् दीगी छीक्नी मीरङ् च्यीक् थो़न्न हुगी खोङ्ल फच्चो़त्नी केत् ज्यप्न चयेलम ङ नीज्यरङ्ल स्युव ज्यक्केन्। ङे भु हील सीरो ॱनङ्। ङल भीज दी इक् हीगो च्यीगी च्यीक्रङ् यो़त्। 39हील ॱनो़प्प अयेक्प स्युक्कुक्। ॱनी हुगो स्युक्पे यङ्ल ॱस्यर्च्यक् ओ़लोक् ज्यप्न ॱसल ज्यदक् टीन कक् च्यीरीक् कुक् च्यीरीक् झ्यीन खे नङ्नी बुजुप् थो़ङ्गुक्। हुगी दुक्स्यी गज्येन् तोङ्गुक्। ॱनी छम् छम्रङ् क हीनी हुगो थो़न्न डोगुक्। 40ङे नीज्यरङ्गी ॱलोप्टुक् हीबल हीगो तो़न्न दीत्रो झ्यी सीन्न स्यी़बेन्। ॱनी हुबे हीगो तो़न् ॱमत् छुसोङ् झ्यीब बेत्। 41ॱनी हीगी लेल्ल येशुगी हुगी मी घयेत् दील ॱवे छ्य मीत् स्योक्केन् धङ् छ्यी़रीय धीङ्सङ्गी मी घयेस्सो, खीत्तङ् दल ङ घजो़त् च्यीक्रङ् दो़च्च्ये व ॱनी? घजो़त् च्यीक्रङ् गुर्च्ये व ॱनी? रङ्गी भीज हुगो हीदु ठीक्लेत् सीन्न ॱसुङ बेत्। 42हुनी छुल्ल युङे यङ्ल ॱनो़प्प स्यीम्बे भीज दी हुगी ॱनो़प्प अयेक्प दीगी टीन हुगी सी़ दी कक् च्यीरीक् कुक् च्यीरीक्ल सो़ तङ बेत्। ॱनी येशुगी हुगी ॱनो़प्प स्यीलोक्पोक्म दील कगो़त् तङ्न तो़न्न दीप्प बेत्। हुनी भीज दी ढक्नर बेत्। हुनी पब दील टेप्प बेत्। 43ॱनी को़न्ज्योक्ल नुक्मे ॱवङ् ज्यीक्प यो़प्प थोङ्नी, हुगी मी घयेत् दी ॱह लेब बेत्।
ॱनी हुन्दुक् झ्यीन मी घयेत् येशुगी जेप्पे ले घयेत्ल ॱह लेन यो़प्पे यङ्ल खोङ्गी ॱलोप्टुक् दीबल 44ङे केच्च्य हीगो खीत्रङ्गी ॱसीम्बे यीक्ल सुङ्ज्यीत्। कोलीमीगी ॱरेबु मी घयेक्की डलक्ल तोङ्गेन् बेत् सीन्न ॱस्येप्प बेत्। 45हीगी धो़न् दी ॱलोप्टुक् दीबे ॱह मत् घोव बेत्। ॱनी म दी को़न्ज्योक्की हुबल ॱमत् तो़म्बल हुबे हुगो ॱह मत् घोव बेत्। ॱनी खोङ्ल तम् ढीयल अक् हुब ज्यीब बेत्।
ॱसु छ्यीस्स्योल थो़न् लप्री चीय ४६-४८
46हुनी ॱलोप्टुक् दीब रोरङ्सो ॱनम्बु हज्यरङ् घयेक्की छीक्नी ॱसु छ्यीया थो़ङ्गो़दङ् सीन्न लप्री चीय बेत्। 47ॱनी हुबे ॱसीम्बे नङ्गी केच्च्य दी येशुगी ॱह घोनी भीज च्यीक् खुर्न खोङ् रोरङ्गी लोदु टङील स्यक्प बेत्। 48हुनी खोङ्गी हुबल ङे मीङ्गी ढीक्ल हीगी भीज हीगो डस्सील मी ॱसी़ थोङ् झ्यीगुक्क हुगी ङल झ्यीबल डोगेन् बेत्। ॱनी ॱसी़ ङल थोङ् झ्यीगुक्क हुगी ङ तोङ्गेल्ल आक् थोङ् झ्यीबल डोगेन् बेत्। खीत्रङ्गी घुङ्न ॱसु च्युङ्स्यो यो़दङ् हुगो छ्यीस्स्योल युङ्गेन् बेत् सीन्न ॱसुङ बेत्।
49हुनी युहन्नागी खोङ्ल चयेलम मी च्यीक्की नीज्यरङ्गी छेन्नी ॱनो़प्प अयेक्प घयेत् तो़न्न दीप्प ङीत्तङ् ठेच्च्युङ्। हुगो हज्यरङ्दङ् दल दो़क्केन् मेम्बल ङे हुल मत् झ्यीत् झ्यीबेन् झ्यीब बेत्। 50ॱनी हुल येशुगी हुगो क ॱमत् च्यो़त्। ॱसी़ खीत्रङ्ल ड मीत् झ्यीप्पेक्क हुगो खीत्रङ् छ्योगी मील डोगेन् बेत् सीन्न ॱसुङ बेत्।
येशु यरुशलेम्ल डोये यङ्गी केच्च्य ९:५१–१९:२७
सामरीयागी येशुल थोङ् मत् झ्यीब ५१-५६
51येशु ह ज्योक्पु तेङ् यी़ल झ्यो़म्बे धी़ ॱलीच्च्येम ॱयेङ्नी, खोङ् यरुशलेम्ल झ्यो़म्बल ॱहब दुब मत् झ्यीब बेत्। 52खोङ्गी ढीक्ल दो़स्स दो़त्मी डीक्तु मी एल्ला तङ बेत्। ॱनी हुब सामरीयागी लुङ्बे युगङ् च्यीक्ल ॱलीब बेत्। 53ॱनी येशुसो यरुशलेम्ल डोगुक् सीर ॱह घोनी, खोङ्जोसोल हुगी युबा घयेत् दीबे ॱनेजङ् ॱमत् ॱयर बेत्। 54ॱनी हीगो ॱह घोनी ॱलोप्टुक् याकुब् दी धङ् युहन्ना दीगी येशुल चोव ज्यीन्दक् ङीक्की इगी तेङ् यी़नी मल्ल मीरोक् पप्न हीगी युबा घयेत् हीब छीक्तु ची़त्न, हीगो नीज्यरङ्गी थुल युङेक्कक्? सीन्न ढीब बेत्। 55ॱनी खोङ्गी हुब ॱङीबुल तेन [खीत् ॱङीबी़ ॱसम्ल हुगो घन्ड बेक्क, हुन्दुक् झ्यीब? 56कोलीमीगी ॱरेबु मी घयेत् खरप्ल तोङ्दु युङ मेम्ब, छी थर्वल तो़न्दु युङ बेत् सीन्न] लप्स्य तङ बेत्। हुनी खोङ्जोसो यु ॱयोङ् च्यीक्ल फीम्ब बेत्।
येशुगी ॱलोप्टुक्ल युङे ढीक्ल ५७-६२
57खोङ्जोसो लम्ल झ्यो़म्बे यङ्ल मी च्यीक्की येशुल नीज्यरङ् घल झ्यो़न्न अक्, ङ अक् नीज्यरङ्गी तीङ्ल युङ्गेन् सीन्न झ्यीब बेत्। 58ॱनी हुल येशुगी चीप्च्यङ्ल आक् दो़स्से धोङ् यो़क्केन् बेत्। ॱनम्गी झ्यल अक् छङ् यो़क्केन् बेत्। कोलीमीगी ॱरेबुलरङ् ॱङे ज्यक्से ॱसने च्यीक् इक् मीप्प बेत् सीन्न ॱसुङ बेत्।
59ॱनी ॱयोङ्म च्यीक्ल यङ् खोङ्गी ङे ॱलोप्टुक्ल ॱस्योक् सीन्न ॱसुङ बेत्। हुगी मी दीगी लेल्ल चोव ज्यीन्दक् ॱअल ङे पबे कुबुर् रो बेक्सल ॱलुक्न स्यक्नी, हुनी ङ युङ्गेन् झ्यीब बेत्। 60ॱनी हुल खोङ्गी ॱस्यीनरे रो ॱस्यीगोरोक् रोरङ्सोलरङ् ॱलुक्तु ची़त्लोङ्। रङ् को़न्ज्योक्की ज्यागक्की केच्च्य ॱस्यो़त्तु ज्युक् सीन्न ॱसुङ बेत्।
61ॱनी यङ् मी ॱयोङ्म च्यीक्की खोङ्ल चोव ज्यीन्दक् ङ नीज्यरङ्गी ॱलोप्टुक्ल युङ्गेन्। ॱनी हुन्दो ॱअल ङे मीजङ् घयेत्ल ङ तोङ्रो झ्यी सीत्तु फीङ्गी सीन्न झ्यीब बेत्। 62ॱनी हुल खोङ्गी हीन्दुक् ॱसुङ बेत्। थोङ्बल लक्प सुङ्न ॱमो़ ॱमो़क्केन् मी ॱसी़ तक्ल लोक्न तगुक्क हुगो को़न्ज्योक्की ज्यागक्की लेल ओ़ब मीत् युङ्गेन् बेत्।
Currently Selected:
लुका 9: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
