ठीक्नल 4
4
पत्रुस् धङ् युहन्ना छ्यो़गी छोक्तेन् छ्यीम्मुदु १-२२
1ॱनी पत्रुस् धङ् युहन्नागी हुन्दुक् झ्यीन हुदु जोम्बे मी घयेत्ल तम् ॱस्यो़प्पे यङ्ल छ्यो़प्पो़न् घयेत्, छ्यो़गङ्गी गोराब घयेक्की पेम्बु धङ् सदुकी घयेत् हुदु युङ बेत्। 2ॱनी ठीक्नल ॱङीबु दीगी हुदु मी घयेत्ल येशु ढोङ्नी यङ् ॱसोम्बुल लोङ बेत् सीर धङ् हीगी ढीक्की केच्च्य ॱस्येप्प दी हुबे ॱह घोनी, खोङ्डोक् गन्दीक्म लङ बेत्। 3हुनी पत्रुस् धङ् युहन्ना सुङ बेत्। ॱनी हुगी यङ्ल गोङ्ज्यो झ्यीनी, नेम्बेत् दी थुक् चो़ल्ल ॱलुक्न स्यक्प बेत्। 4ॱनी पत्रुस्की केच्च्य ॱस्येप्पल हुगी ङीन् दी मी गज्येङ्गी छ्य स्यक्न युङ बेत्। हुन्दुक् झ्यीन छ्य स्योक्केङ्गी मी घयेत् दी तोम्दु तोङ्डक् ॱङ छीब बेत्।
5हीनी नेम्बेत् दी लुङ्बे चो छ्यीया घयेत्, गेम्बा चो छ्यीया घयेत् धङ् छ्यो़डीम्गी चयेलम घयेत् यरुशलेम्दु जोम्ब बेत्। 6हुबे घुङ्दु छ्यो़प्पो़न् चो छ्यीस्स्यो दी हन्नास् यो़प्प बेत्। ॱनी हुगी दुङ्ज्यी़त् ङो़गी मी कैयाफा, युहन्ना, अलेक्जेन्डर् धङ् हुनी ॱयोङ्म आक् जोम्न यो़प्प बेत्। 7ॱनी हुब च्येन्दु पत्रुस् धङ् युहन्ना ठीक्न च्येब बेत्। ॱनी हुदु छोबे मी घयेत् दीगी हुब ॱङीबुल खीक्की हुगो घन्डे ॱस्यीक्की ढक्तु ची़त्न, ॱसी़ मीङ्नी झ्यीब? सीन्न च्युर बेत्। 8ॱनी पत्रुस्ल धम्बे थुगी घेङ्न, रोगी लेम्बुल ॱवे लुङ्बे चो छ्यीया धङ् गेम्बा चो छ्यीया घयेस्सो, 9खीक्की ङीत्ल तम् च्युर्केन् हीगो घोङ्रीय हुगोल ङीक्की गये ले झ्यीन ॱसी़ मीङ्नी ढक्तु ची़प्प बेक्क हुगी ढीक्ल हीम्ब? 10हुगो हीन्न ॱनी, खीत्रङ् धङ् इस्राएली घयेत् कुरीक्की हीगो ॱह घोव झ्यीज्यीत्। हीन ढक्नरे मी हीगो नासरत्की येशु ख्रीष्ट्की छेन्नी ढक्तु ची़प्प बेत्। ॱनी खोङ् खीत्रङ्गी कुरुस्ल तान ॱसेत्न आक्, यङ् को़न्ज्योक्की खोङ् ॱसोम्बुल ॱलोङ बेत्। ॱनी खोङ्गी ॱस्यीक्की क हस्सो़त् हीगो ढक्न यो़क्केन् बेत्। 11ॱसुङ्रप्ल थो़ङ्गेन् हीगो खोङ्ल डोगेन् बेत्।
खीत्रङ् सोबो़न् घयेक्की घो ॱमीत् छ्यो़त्ल ॱसम्न पुर् तङे दो दी यङ् सुर्की दो घो छ्यो़स्स्योल झ्युङ्न यो़क्केन् बेत्। (ॱसुङ्रप्की गुल्लु ११८:२२)
12थर्वे लम् दी खोङ् मेन्द, ॱयोङ् ॱस्युली मीप्प बेत्। हज्यरङ् कोलीमी घयेत्ल छी थर्व दी खोङ्गी छेन्नी मेन्द, ॱस जम्बुलीङ्ल को़न्ज्योक्की ॱयोङ् ॱमत् ॱनङ बेत् सीन्न ॱस्येप्प बेत्।
13हीनी पत्रुस् धङ् युहन्नागी यीगी गक् मत् डोब हीन्न अक्, ज्यीक्टक् मीप्प तम् ॱस्येप्प हुगी छोक्तेन् छ्यीम्मी़ मी घयेत् दीगी ॱह घोनी, हुब घयेत् ॱह लेनर बेत्। ॱनी हुगी यङ्ल क हुब घयेक्की हुब ॱङीबु येशुदङ् दल देप्पे मी हीम्ब ॱह घोन ङु ॱस्यीब बेत्। 14ॱनी हुब ॱङीदङ् दल हुदु हुगी मी ढक्नर दी इक् टङील दो़प्प थोङ्नी, हुगी मी घयेत् दीगी लेम्बु घन्ड अक् ॱलोक् ॱमत् छुब बेत्।
15हुनी पत्रुस् धङ् युहन्ना हुगी छ्यो़गी छोक्तेन् छ्यीम्मु दीनी छ्यील तङ्न हुगी मी घयेत् दी रोरङ्सो छ्युवक्रङ् हीन्दुक् सीन्न ढो़ झ्यीब बेत्। 16हुगी मी ॱङीबु हुल हज्यरङ् घन्ड झ्यीक्केन्? हुबे यीक् छ्यीम्मी़ लेगी ता तो़म्ब हुगो यरुशलेम्गी मी कुरीक्ल ॱस्यो़च्च्ये यो़क्केन् बेत्। हज्यरङ्गी हुगो मेम्बेत् सीन्न सीर् ॱमीत् छुगेन् बेत्। 17ॱनी हीन्न अक्, ह हीगी केच्च्य हीगो मी घयेत् कुरीक्ल ज्यीक्तु ढम्ज्ये मीप्पल हुब ॱङीबुल हज्यरङ्गी ॱसुल आक् हुगी मीङ्नी केच्च्य घन्ड अक् ॱमत् ॱस्यो़च्च्यीत् सीन्न ज्यीक्टक् ॱलङ्दोङ् सीन्न ढो़ झ्यीब बेत्।
18हुनी पत्रुस् धङ् युहन्ना यङ् नङ्ल ठीक्न हुगी मी घयेत् दीगी हुब ॱङीबुल येशु हुगी मीङ्नी खीत्रङ्गी घन्ड अक् ॱमत् ॱस्यो़च्च्यीत्। घन्डे ॱलोप्स आक् मत् ज्यक्च्यीत् सीन्न क टेप्प बेत्। 19ॱनी पत्रुस् धङ् युहन्नागी लेम्बुल ङीत् खीक्की खल नेन्ज्ये न को़न्ज्योक्की खल नेन्ज्ये? को़न्ज्योक्की ढुङ्दु घङ्गो दीम्बा युङेक्क? हीगो खीत्रङ्गी ॱयुव पीक्। 20ङीक्की घङ् थोङ धङ् घङ् घोव घयेत् ॱमत् ॱस्येप्पल दो़त् दीरङ् ॱमीत् छुबेत् सीन्न झ्यीब बेत्।
21हुनी हुगी मी घयेत् दीगी यङ् पत्रुस् धङ् युहन्नाल हरुङ् ज्यीक्टक् ॱलङ्न तङ् तङ बेत्। हुगी मी घयेत् दीगी पत्रुस् धङ् युहन्नाल छ्येप्प को़ ॱमत् छुब बेत्। घन्ड हीन् सीन्न हुदु घोङ्रीयल घङ् झ्युङ दीगी ढीक्ल मी कुरीक्की को़न्ज्योक्ल तो़प्प पुब बेत्। 22हुगी यीक् छ्यीम्मी़ लेगी ढक्पे घोङ्रीय दी फोलो स्यीप्च्युले ॱल्हक्चो़त् ॱलीब यो़प्प बेत्।
छ्य स्योक्केन् घयेक्की ॱलोप्स्यीक् स्यी़बे तम् २३-३१
23हीनी पत्रुस् धङ् युहन्ना रोरङ्सो़ छ्य च्यीक्की दगु घयेत् दीब च्याल लोक्न युङ्न छ्यो़प्पो़न् चो छ्यीया घयेत् धङ् गेम्बा चो छ्यीया घयेत् दीबे रोरङ्सोल घङ् झ्यीबे तम् दी हुबल ॱस्येत्न टेप्प बेत्। 24ॱनी हुगी तम् दी ॱह घोनी, हुब कुरीक् ॱसीम् च्यीक् झ्यीन को़न्ज्योक्ल हीन्दुक् सीन्न ॱसुव तब बेत्। ॱवङ् च्येम्मे दक्पु नीज्यरङ्गी तेङ् यी़, ॱस जम्बुलीङ्, छ्यु ज्यम्जो छ्यीम्मु धङ् घङ् यो़प्प कुरीक् नीज्यरङ्गी छ्यादु ची़प्प बेत्। 25धम्बे थुगी झ्यीन नीज्यरङ्गी ॱयोक्पु ङीक्की पुबु दाऊद्गी खनी नीज्यरङ्गी हीन्दुक् सीन्न ॱस्यो़त्तु ची़प्प बेत्।
ज्यी़त् ॱयोङ् ॱयोङ्गी मी घयेत् हुब घन्डल गन्दीक्म खोङ्डोक् झ्यीक्केन् बेक्क? मी घयेत् घन्डल धो़म्मीक्की ॱनोक्सम् तोङ्गेन् बेक्क? 26जम्बुलीङ्गी ज्याबु घयेत् धङ् चो छ्यीया घयेत् जोम्न चोव ज्यीन्दक्ल धङ् खोङ् रोरङ्गी च्यप्को़ल्ल को़न तङे ख्रीष्ट्ल ड झ्यीत्तु युङ्गेन् बेत्। (ॱसुङ्रप्की गुल्लु २:१-२)
27ॱनी हुगो डस्सी गन्दीयरङ् हीगी सार् हीदु हेरोद्, पोन्तीयस् पीलातस्, ज्यी़त् ॱयोङ् ॱयोङ्गी मी घयेत् धङ् इस्राएली घयेत् छ्य झ्यीन नीज्यरङ्गी को़न तङे धक्पर् च्येम्मे ॱयोक्पु येशुगी डल लोङ बेत्। 28ॱनी म दी हीगो एल्लानी नीज्यरङ्गी थुल यो़प्पे ॱस्यीक् च्येम्मे ॱसम्ल घयेत् दी डुब बेत्। 29ह चोव ज्यीन्दक् नीज्यरङ्गी सीरो झ्यी। हुब घयेक्की ङीत्ल घन्दुक्मे ज्यीक्टक् छ्यीय ॱलोङ्गुक्क। नीज्यरङ्गी केच्च्य ज्यीक्टक् मीप्प ङीक्की ॱस्यो़त् छुज्ये यो़प्पल नीज्यरङ्गी ॱयोक्पु ङीस्सोल ॱस्यीक् ॱनङ्रो झ्यी। 30नीज्यरङ्गी ॱस्यीक्की नेप्प घयेत् ढक्तु ची़त्न यीक् छ्यीम्मी़ लेगी ता धङ् यम् छेम्मे ले घयेत् नीज्यरङ्गी धक्पर् च्येम्मे ॱयोक्पु येशुगी छेङ्गी लम्नी जेत्रो ॱनङ् सीन्न ॱसुव तब बेत्। 31हुन्दुक् झ्यीन ॱसुव दी तप् छर्नी, रोरङ्सो घयेत् जोम्से ॱसने दी म दीरङ् भीरीरी भीर् झ्यीन हुब कुरीक्ल धम्बे थु स्युन घेङ्न युङ बेत्। हुनी हुब कुरीक् ज्यीब मीप्प, को़न्ज्योक्की केच्च्य ॱस्येप्प बेत्।
छ्य स्योक्केन् घयेक्की नोर् दी फीस्सोम झ्यीब ३२-३७
32ॱनी छ्य स्योक्केन् घयेत् दी कुरीक् ॱसीम् च्यीक् ली़ च्यीक् झ्यीन दो़क्को़प्प बेत्। ॱनी ॱसुल नोर् घन्ड यो़त्न अक्, हुगो ङे हीन् मीत् सीगो़प्प बेत्। बोर हुगो कुरीक्की फीस्सोम झ्यीगो़प्प बेत्। 33ॱनी ठीक्नल दीबल ॱस्यीक् छ्यीम्मु ॱङीत्न, चोव ज्यीन्दक् येशु ढोङ्नी यङ् ॱसोम्बुल लोङे ढीक्ल पङ्बु झ्यीन मी कुरीक्ल ॱस्येत्न टेप्प बेत्। ॱनी छ्य स्योक्केन् कुरीक्ल को़न्ज्योक्की थुज्यी छ्यीम्मु ॱनङ्न यो़प्प बेत्। 34ॱनी छ्य स्योक्केन् घयेक्की नङ्दु ॱसुल आक् घन्डे तोक्प आक् मत् युङ बेत्। घन्ड हीन् सीन्न फस्स्यी मस्स्यी यो़प्प च्येम्म दीबे गो़ब तोक्पे यङ्ल हुगो चोङ्गो़प्प बेत्। हुगो चोङे रीन् दी 35हुबे ठीक्नल दीबे लक्ल टो़क्को़प्प बेत्। हुनी ठीक्नल दीबे हुगो लीन्न, ॱसु ॱसुल गो़ब तोक्प दुक्क हुब घयेत्ल गो़न टो़क्को़प्प बेत्। 36ॱनी सैप्रस् लुङ्बनी थो़म्बे लेवीगी दुङ्ज्यी़त्ल कीबे मी युसुफ् सीक्केन् च्यीक् उन यो़प्प बेत्। ठीक्नल दीबे हुल बार्नाबास् सीन्न मीङ् पो़ब बेत्। हुगी धो़न् दी ॱलोप्स्यीक् टो़क्केन् सीक्केन् बेत्। 37ॱनी हीगी युसुफ् हीगी रोरङ्गी स्यीङ्ग दी चोङ्न हुगी रीन् दी ठीक्नल दीबे लक्ल टेप्प बेत्।
Currently Selected:
ठीक्नल 4: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
