ठीक्नल 3
3
पत्रुस्की घोङ्रीय च्यीक् ढक्तु ची़प्प १-१०
1ङीन् च्यीक् ॱसुव तोबे छो़त्ल पत्रुस् धङ् युहन्ना छ्यो़गङ्ल छ्युजो़त् ॱसुम्गी छ्यक्चो़त्ल फीम्ब बेत्। 2ॱनी हुदु घोङ्रीय च्यीक् खुर्न युङ्न यो़प्पदङ् ठेप्प बेत्। हुगी मी हुगो कीजो़त्नीरङ् घोङ्रीय यो़प्प बेत्। ॱनी छ्यो़गङ्ल युङ्गेङ्गी मी घयेत्ल ॱसो़ङो़न् लीन्ज्येल हुगी दगु दीबे ङीन् रीम फो़स्स्यी च्यारीगी गोच्च लेसी झ्यीस्स दीदु च्येन स्योक्को़प्प बेत्। 3ॱनी पत्रुस् धङ् युहन्ना हुगी गोच्च दीनी नङ्ल स्युक्पे यङ्ल हुगी घोङ्रीय दीगी हुबल अक् ॱसो़ङो़न् लीम्ब बेत्। 4ॱनी हुब ॱङीबी़ हुगी मी दील फोरील तेन पत्रुस्की हुल ङीत्ल तो़लेत्ते त सीन्न झ्यीब बेत्। 5ॱनी घोङ्रीय दीगी हुबे ॱसो़ङो़न् तीक्केन् ब अक् ॱनो़न हुब ॱङीबुल तेब बेत्। 6हीनी पत्रुस्की हुल ङल ॱसीर् धङ् ॱङु तीच्च्ये त मीत्। ॱनी हीन्न अक्, ङल घङ् यो़प्प दी रङ्ल बीन् योङ्। नासरत्की येशु ख्रीष्ट्की छेन्नी लोङ्ल छ्यम् सीन्न झ्यीब बेत्। 7हुनी पत्रुस्की हुगी लक्प ॱयेब दीनी सीन्न हुगो ॱलोङ बेत्। हीनी ॱस्यर्च्यक् हुगी कङ्बे छीमीक् घयेत् दील ओङ्बु ॱलीत्न, 8घोङ्रीय दी ॱहोक् लोङ्न छ्यम्ब बेत्। हुनी गेसक्की फीर्न को़न्ज्योक्ल यस्सो पुगील्ल पत्रुस् धङ् युहन्नागी दल छ्यो़गङ्गी च्यारीगी नङ् दील स्युनर बेत्। 9ॱनी हुगो छ्यम्न डोव धङ् को़न्ज्योक्ल यस्सो पुब दी उन यो़प्पे मी घयेक्की थोङ बेत्। 10थोङ्नी हुगो छ्यो़गङ्गी च्यारीगी गोच्च लेसी दीदु ॱसो़ङो़न् लीङ्गेन् हीम्ब दी ङु ॱस्यीनी, हुगो हुन्दुक् झ्युङ दील हुब घयेत् गन्दीक्म ॱह पट्टक् लेनर बेत्।
पत्रुस्की छ्यो़गङ्गी च्यारीदु तम् ॱस्येप्प ११-२६
11हुगी घोङ्रीय ढक्नर दी पत्रुस् धङ् युहन्नागी दल सोलोमन्गी छोगङ् सीस्स का गज्येन् च्येम्म दीदु यो़प्प हुगी मी घयेक्की थोङ्नी, हुब कुरीक् ॱह लेन च्यप् च्यीक्ल हुदु ज्युन युङ बेत्। 12ॱनी हुगो थोङ्नी, पत्रुस्की हुदु युङे मी घयेत् दील ॱवे इस्राएली घयेस्सो, खीत् हील घन्डल ॱह लेगुक्क। खीत् घयेक्की ङीत्ल तेनी, हीगी मी हीगो ङीक्की को़न्ज्योक्ल धेप्प मो़ब झ्यीबे ले धङ् ङीक्की ॱस्यीक्की ढक्तु ची़त्न छ्यम्गेल्ल सो़ब ब अक् ॱनो़ज्युङ? 13मेम्बेत्। हीगो हज्यरङ्गी पुबु ॱमुमु अब्राहाम्, इसहाक् धङ् याकुब्गी को़न्ज्योक्की खोङ् रोरङ्गी ॱयोक्पु येशु तो़त्वङ् च्येम्मे ओ़च्च्यल तो़म्ब बेत्। ॱनी येशु हुगो पीलातस्की तोङ्ज्ये ॱनो़ब झ्यीन अक्, खीत्रङ् घयेक्की पीलातस्ल मीत् युङेत् सीन्न येशु ॱसो़त्तु ची़प्प बेत्। 14धक्पर् धङ् ढङ्बु च्येम्म दील खीत्रङ्गी मीत् युङेत् सीन्न खोङ्गी छप्पुल मीस्सेन् हुगो तोङ्रो झ्यी सीन्न झ्यीब बेत्। 15छीये दक्पु दी खीत्रङ्गी ॱसेप्प बेत्। ॱनी हीन्न अक्, ढोङ्नरे ॱसनेनी को़न्ज्योक्की ॱसोम्बुल ॱलोङ बेत्। ॱनी हुगी पङ्बु ङीस्सो हीन्। 16ॱनी येशु हील ङीक्की छ्य स्यक्न ॱलो केबे लम्नी खीत्रङ्गी ङु ॱस्यीगेङ्गी हीगी मी हील ओङ्बु ताब बेत्। हीगो ढक्न डो छुज्ये दी खोङ्गी छेन् धङ् खोङ्ल छ्य स्यक्न ॱलो केन युङे लम्नी झ्युङ बेत्। ॱनी हीगो खीत्रङ्गी इक् थोङ बेत्।
17फम पी़न् घयेस्सो, खीत्रङ्गी येशुल घन्ड झ्यीब बेक्क हुगो ॱस्यो़च्च्ये मीप्पल खीत्रङ् धङ् खीत्रङ्गी मी छ्यीया घयेक्की झ्यीब बेत्। हीगो ङे ॱह घोज्युङ्। 18ॱनी म दी हीगो धङ्बु कलुङ् ॱस्यो़क्केन् घयेक्की ॱस्येप्पे ॱङो़स्स्यी घयेत्ल थो़ङ्गेन्, च्यप्को़ल्ल को़न तङे ख्रीष्ट्ल दुक्स्यी नोङ्न ढोङ्गेन् बेत् सीर दी हुन्दुक् झ्यीन ताब बेत्। 19ह खीत्रङ् घयेत् ॱएङ्गी लम्नी ॱसीम् ज्युर्न ॱस्योक्। हुनी क खीत्रङ्गी दीक्प घयेत् धक्केन् बेत्। 20खीत्रङ् लोक्लेत्। हुनी क खीत्रङ्ल चोव ज्यीन्दक् च्यानी थङ् ॱसो़बे ॱमेल्लम्गी धी़ युङ्गेन् बेत्। ॱनी एल्लादु खीत्रङ्गी ढीक्ल च्यप्को़ल्ल को़न तङे ख्रीष्ट् येशु उक् यङ् को़न्ज्योक्की तङ्न युङ्गेन् बेत्। 21ॱनी घङ् यो़प्प छङ्म थम्ज्येत् हीगो कुरीक् को़न्ज्योक्की यङ् ॱङस्स ॱङन्नेल्ल ॱलोक्पे धी़ नम् ॱलीत् ॱलीत् थुक्ल येशु तेङ् यी़दु स्यु गोगेन् बेत्। हीगी ढीक्ल ॱङो़न् धङ्बुनी झ्यीनी कलुङ् ॱस्यो़क्केन् चङ्म घयेत्ल को़न्ज्योक्की ॱस्यो़त्तु ची़प्प बेत्। 22ॱनी हीगी ढीक्ल मोशागी इस्राएली घयेत्ल ॱस्येप्प थो़ङ्गेन् बेत्।
खीत्रङ्गी चोव ज्यीन्दक् को़न्ज्योक्की खीत्रङ् इस्राएली घयेत्ल ङ डस्सीगी कलुङ् ॱस्यो़क्केन् च्यीक् खीत्रङ् फम पी़न् घयेक्की छीक्नी तो़ङ्गेन् बेत्। ॱनी हुगी घङ् ॱस्येप्पल खीत्रङ् नेन् गोगेन् बेत्। 23ॱनी हुल मीत् नेङ्गेन् ॱसु यो़दङ् हुगो को़न्ज्योक्की खोङ् रोरङ्गी मीमङ्गी छीक्नी पी़त्न खरप्ल तोङ्गेन् बेत्। (ठीम्लु १८:१८-१९)
24धङ्बु कलुङ् ॱस्यो़क्केन् शमुएल्नी झ्यीनी थो़न्न युङे कलुङ् ॱस्यो़क्केन् कुरीक्की हीगी धी़ हीगो युङ्गेङ्गी ढीक्ल ॱस्येप्प बेत्। 25ॱनी कलुङ् ॱस्यो़क्केन् हुबे ज्यी़त् दी हज्यरङ् बेत्। को़न्ज्योक्की हज्यरङ्गी पुबु ॱमुमु घयेत्तङ् स्यक्पे कगो़त् धम्स्यक् दी हज्यरङ्गी ढीक्ल बेत्। को़न्ज्योक्की अब्राहाम्ल हीन्दुक् ॱसुङ बेत्।
रङ्ल छ्येप्पे ज्यी़त्नी जम्बुलीङ्गी ज्यी़त् घयेत्ल ॱमेल्लम् थीप्केन् बेत्। (छ्यारप् २२:१८)
26खीत्रङ् री री ङेम्बे लम्नी लोक्च्ये यो़प्पल धङ् ॱमेल्लम् ॱनङ्दु सीन्न को़न्ज्योक्की खोङ् रोरङ्गी ॱयोक्पु ॱसोम्बुल ॱलोङ्न ॱएन्स्युक्ल खीत्रङ् च्याल तङ बेत् सीन्न ॱस्येप्प बेत्।
Currently Selected:
ठीक्नल 3: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
