ठीक्नल 2
2
धम्बे थु युङे तम् १-१३
1हीनी पेन्तीकोस् सीक्केन् यहुदी घयेक्की धी़रीम्गी ङीन् च्यीक् ॱलीब बेत्। ॱनी हुगी यङ्ल हुब घयेत् ॱसने च्यीक्तु जोम्न यो़प्प बेत्। 2ॱनी हुब घयेत् हुदु यो़प्पे यङ्ल इगीनी मल्ल भुयुक् डस्सीगी केत् च्यीक् हुरुरु रु सीन्न युङ्नी, हुगी केत् दीगी हुब दो़स्से खीम् दी टेक् घेङ्नर बेत्। 3ॱनी मीज्येगी गो डस्सी ॱमलोप् कोलोप् गज्येन् थो़न्न युङ्न उन यो़प्पे मी घयेत् दी कुरीक्ल रीदङ् रील हुगो थोर्न घप्न युङ हुबे थोङ बेत्। 4हीनी हस्सो़त् हुब कुरीक्ल धम्बे थु स्युन घेङ्न युङ बेत्। ॱनी धम्बे थुगी घजो़त् च्यीक्की ची केच्च्य ॱस्यो़च्च्येम टेत् यो़दङ् उजो़त् च्यीक् हुब घयेक्की केच्च्योक् ॱमीत् च्यीक्पल तम् ॱस्येप्प बेत्।
5ॱनी हुगी यङ्ल यरुशलेम्दु को़न्ज्योक्ल धेप्प झ्यीक्केन् यहुदी घयेत् जम्बुलीङ्गी लुङ्ब ख ख ॱसोस्सोनी गज्येन् युङ्न यो़प्प बेत्। 6ॱनी हुगी खीम् दीदु भुयुक् डस्सीगी केत् युङ दी हुगी थप्स्यीगी मी घयेक्की ॱह घोनी ॱस्यर्च्यक् हुदु मी छेत्मीत् जोम्न युङ बेत्। ॱनी जोम्ब घयेत् दीगी ॱसोस्सोरङ्गी केच्च्योक्ल तम् लब ॱह घोनी, हुब कुरीक् हुल ॱह लेनर बेत्। 7हुब ॱह लेबे रोरङ्सो ॱनम्बु हीगी तम् लप्केन् घयेत् हीगो गालीलागी मी मेम्बेक्क ॱनी? 8हुबे घन्दुक् झ्यीन हज्यरङ् ॱसोस्सो़ केच्च्योक्ल तम् लप् ॱस्यीगो़प्प ब अक्? 9हीन हज्यरङ् पार्थी, मेदीया, एलामी, मेसोपोटामीया, यहुदीया, कापाडोसीया, पोन्टस्, एशीया, 10फ्रीगीया, पम्फीलीया, मीस्र, लीबीयागी लुङ्बे सैरेनीगी छीग ॱनमी़ युगङ् घयेत्, रोम् सार्, 11क्रेट् धङ् अरब् हीन्दुक् झ्यीब लुङ्ब ख ख ॱसोस्सोनी युङे यहुदी घयेत् धङ् यहुदीगी छ्यो़लुल स्युन युङे ज्यी़त् ॱयोङ् ॱयोङ्गी मी घयेत् हज्यरङ् ॱसोस्सोरङ्गी केच्च्योक्ल को़न्ज्योक्की ले छ्यीम्मु घयेक्की धो़ङ्गी तम् ॱह घोगुक् न व सीन्न झ्यीब बेत्। 12हील हुब घयेत् ॱह लेन ओ़न् थोम्न रोरङ्सो ॱनम्बु हुगो घन्ड ब अक् सीन्न ढीरी चीय बेत्। 13ॱनी यरीगी यङ् छ्ये, हुबे गोङ्ज्यङ् थुङ्न सीनर हीङ्गो़प्पेत् सीन्न छ्यस्सी़त् ज्यब बेत्।
पत्रुस्की तम् ॱस्येप्प १४-३६
14हीनी ठीक्नल च्युज्यीक्पु दीगी घुङ्नी पत्रुस् लोङ्न केत् छ्यीम्मु तो़न्न हुदु जोम्न युङे मी घयेत् दील ॱवे यरुशलेम्गी मी हज्यरङ् यहुदी घयेस्सो, ङे तम्ल नेर्रो झ्यी। हन्दा हीदु घन्ड झ्युङ बेक्क हुगी धो़न् दी ङे ॱस्येत् योङ्। 15खीक्की ङीस्सो गोङ्ज्यङ्गी सीनर हीम्ब ब अक् ॱनो़ज्युङ? ङीत् मत् सीय बेत्। नुक्म हुन्दो ॱङेट्टो छ्युजो़त् गी़ छो़त्ल घन्डे सीगो़प्पेक्क? 16हीगो धङ्बु कलुङ् ॱस्यो़क्केन् योएल्की ॱस्येप्पे हीन्दुक् सीरे ॱङो़स्स्यी हीगो हुन्दो ताब बेत्।
17को़न्ज्योक्की ॱसुङल स्युक् थमे धी़ल कोलीमी घयेत्ल ङे धम्बे थु इगीनी मल्ल योन टो़क्केन्। हुनी खीत्रङ्गी भु भुमु घयेक्की कलुङ् ॱस्यो़क्केन् बेत्। मी स्यो़म्ब घयेक्की थोङ्नङ् थोङ्गेन् बेत्। गेम्बा घयेत्ल ॱङीनम्ल तो़ङ्गेन् बेत्। 18हुगी यङ्ल ङे ॱयोक्पु धङ् ॱयोक्मु घयेत्ल ङे धम्बे थु योन टो़क्केन्। हुनी हुब घयेक्की कलुङ् ॱस्यो़क्केन् बेत्। 19ॱनी इगी ॱनम्ल यम् छेम्मे लेमु धङ् ॱमीगी जम्बुलीङ्दु हीन्दुक् झ्यीबे यीक् छ्यीसीगी ता घयेत् तो़ङ्गेन्। ठक् युङ्गेन् बेत्। मी बर युङ्गेन् बेत्। धुवक् ॱमुब डस्सी युङ्गेन् बेत्। 20ङीमे ओ़त् घयेत् ये डोगेन् बेत्। दच्च्य ठक् डस्सील ज्युर् डोगेन् बेत्। हुनी हस्सो़त् चोव ज्यीन्दक्की ङीन् छ्यीम्मु यम् छेम्म ॱलीक्केन् बेत्। 21ॱनी मी ॱसी़ रोरङ् छी थरे ढीक्ल चोव ज्यीन्दक् डेन् ज्यक्कुक्क हुगो छी थर्केन् बेत् सीर यो़क्केन् बेत्। (योएल् २:२८-३२)
22ॱवे इस्राएल्की मी घयेस्सो, ङे तम् हील नेर्रो झ्यी। नासरत्की येशु खीत्रङ्गी ढीक्ल को़न्ज्योक्की को़न तङ्न युङ खुङ्देन् हीन् धङ् मेल्ल खोङ्गी लक् ज्यी़त्नी को़न्ज्योक्की ॱस्यीक् छ्यीम्मी़ ले, यम् छेम्मे ले धङ् यीक् छ्यीम्मी़ लेगी ता घयेत् जेप्प बेत्। हीगो खीत्रङ् घयेक्की घुङ्दु झ्युङ्नी, खीत्रङ्ल हीगो ॱस्यो़च्च्ये यो़क्केन् बेत्। 23खोङ् खीत्रङ् च्याल तोङ्ज्ये दी को़न्ज्योक्की एल्लानी थुल यो़प्पल ॱसम्न खोङ्गी तङ बेत्। ॱनी खीत्रङ् घयेक्की को़न्ज्योक् ॱमीत् ॱसम्गेन् ज्यी़त् ॱयोङ् ॱयोङ्गी मी घयेक्की लक्ल खोङ् ची ज्यप्न कुरुस्ल तान ॱसो़त्तु ची़प्प बेत्। 24ॱनी खोङ् ढोङ्न अक्, ॱस्यीवे ॱवङ्गी होक्ल ॱस्योर् ॱमीत् छुगेल्ल को़न्ज्योक्की खोङ् ॱस्यीवे लक्नी या टेन ॱसोम्बुल ॱलोङ बेत्। 25खोङ्गी ढीक्ल दाऊद्गी हीन्दुक् सीन्न ॱस्येप्प थो़ङ्गेन् बेत्।
ङे चोव ज्यीन्दक् छीगङ् ङदङ् दल स्युन यो़प्प ङे थोङ्ज्युङ्। खोङ् ङे ॱये छ्योदु यो़क्केन् झ्यीनी, ङल ज्यीक्टक् मीत्। 26हुगो झ्यीनी ङल ॱसीम् गव दुक्। ङ गेस लङ्न तम् लप्को़त्। ङे सी़बी़ ढीक्ल रीगो यो़त्। 27घन्ड हीन् सीन्न खोङ्गी ङे ॱसीम् ॱस्यीवे यी़ल ॱलो़ तङ्न मीत् स्योक्केन् बेत्। नीज्यरङ्गी धक्पर् हीम्ब च्येम्मे ॱयोक्पी़ सी़ल इप्रीक् छ्येत्तु ॱमीत् ची़क्केन् बेत्। 28नीज्यरङ्गी ङल छीये लम् ज्यी़ तो़न्ज्युङ्। नीज्यरङ्गी ढुङ्दु युङ्गेन् झ्यीनी, ङल गेस छ्यीम्मु लङ्गुक्। (ॱसुङ्रप्की गुल्लु १६:८-११)
29ङे फम पी़न् घयेस्सो, हज्यरङ्गी पुबु दाऊद्गी ढीक्ल ङे खीत्रङ्ल ॱसङ्सोङ् मीप्प ॱस्येत् योङ्। धङ्बु खोङ् ढोङ्न खुर्नी, कुबुर् दी रो बेक्सल ॱलुक्न स्यक्प बेत्। ॱनी हुगी रो बेक्स दी हुन्दो ओक् हीन यो़क्केन् बेत्। 30खोङ् को़न्ज्योक्की कलुङ् ॱस्यो़क्केन् च्यीक् बेत्। ॱनी को़न्ज्योक्की खोङ्ल रङ्गी ॱवङ् च्येम्मे स्युडी दील रङ्गी ज्यी़त् च्यीक् जेक्तु ची़क्केन् सीन्न ॱन झ्यीन ॱसुङे छ्यो़त्तुम् खोङ्ल एल्लादुरङ् ॱस्यो़च्च्ये यो़प्प बेत्। 31तीङ्ला घन्ड युङ्गेन् बेक्क हुगो को़न्ज्योक्की दाऊद्ल ज्यी़ तो़म्ब बेत्। ॱनी दाऊद्गी ॱस्येप्पे तम् हीगो ॱसीम् ॱस्यीवे यी़ल ॱलो़ तङ्न मीत् स्योक्केन् बेत्। सी़ल इप्रीक् छ्येत्तु ॱमीत् ची़क्केन् सीक्केन् हुगो को़न्ज्योक्की च्यप्को़ल्ल को़न तङे ख्रीष्ट् ढोङ्नी यङ् ॱसोम्बुल लोङे ढीक्ल ॱस्येप्पे केच्च्य बेत्। 32ॱनी येशु हुगो को़न्ज्योक्की ॱसोम्बुल ॱलोङ बेत्। ॱनी ङीस्सो कुरीक् हुगी पङ्बु हीन्। 33हुनी को़न्ज्योक्की येशु हुगो तो़त्न खोङ् रोरङ्गी ॱये छ्योदु स्यक्प बेत्। हुन्दो खीत्रङ्गी थोङ धङ् घोव घयेत् हीगो यप्की खोङ्ल धम्बे थु ॱनङे छ्यो़त्तुम् जेप्प दी थोप्न, खोङ्गी ङीत्ल इगीनी मल्ल योन ॱनङ्नी, हीगो झ्युङ बेत्। 34-35दाऊद् तेङ् यी़ल ॱमत् ॱलीत्न आक्, खोङ्गी हीन्दुक् सीन्न ॱस्येप्प बेत्।
चोव ज्यीन्दक्की ङे चोव ज्यीन्दक्ल हीन्दुक् ॱसुङ बेत्। रङ्गी ड घयेत् रङ्गी कङ्बे होक्ल ङे नम् ॱलुक्न स्योक् स्योक् थुक्ल रङ् ङे ॱये छ्योदु दो़त्। (ॱसुङ्रप्की गुल्लु ११०:१)
36ह खीत्रङ् इस्राएली घयेक्की हीगो गन्दीक्म ॱह घोव झ्यीज्यीत्। खीत्रङ्गी कुरुस्ल तान ॱसेप्पे येशु हुगो चोव ज्यीन्दक् धङ् च्यप्को़न् ख्रीष्ट्ल को़न्ज्योक्की को़न स्यक्प बेत् सीन्न पत्रुस्की ॱस्येप्प बेत्।
मी तोङ्डक् ॱसुम्गी छ्य स्यक्न युङे तम् ३७-४१
37हुनी हुगी मी घयेत् दीगी पत्रुस्की ॱस्येप्पे केच्च्य दी ॱह घोनी, हुब ॱसीम्दुक् लङ्न पत्रुस् धङ् ठीक्नल ॱयोङ्म दीबल हुगो हीन्न, फम पी़न्सो, ङीत् घन्ड झ्यी सीक्केन्? सीन्न ढीब बेत्।
38ॱनी पत्रुस्की हुब घयेत्ल खीत्रङ्गी दीक्प घयेत् धक्च्ये यो़प्पल खीत्रङ् घयेत् ॱएङ्गी लम्नी ॱसीम् ज्युर्न येशु ख्रीष्ट्की छेन्नी बप्तीस्ल स्युज्यीत्। हुनी क खीत्रङ्ल धम्बे थु दी हीन्दुक्रङ्ल ॱनङ्गेन् बेत्। 39धम्बे थु ॱनङे छ्यो़त्तुम् हुगो खीत्रङ् घयेत्ल, खीत्रङ्गी भीज घयेत्ल, थक्रीङ्मी़ मी धङ् चोव ज्यीन्दक् हज्यरङ्गी को़न्ज्योक्की भो़बे मी ॱसु ॱसु यो़दङ् हुब कुरीक्की ढीक्ल बेत् सीन्न ॱस्येप्प बेत्।
40हीनी पत्रुस्की हुब घयेत्ल तम् ॱयोङ्मा आक् गज्येन् ॱस्येप्प बेत्। ॱनी स्युक्तु धीङ्सङ्गी मी छ्यी़रीय घयेक्की छीक्नी खीत्रङ् थो़न्न थर्वे लम्ल ॱस्योक् सीन्न भो़ब बेत्। 41ॱनी पत्रुस्की तम् हुल मी घयेत् दी गस्सी छोर बेत्। ॱनी हुगी ङीन् दी ॱनो़म्ब मीरङ् तोङ्डक् ॱसुम् बप्तीस्ल स्युन छ्य स्यक्न युङ बेत्।
गोम छ्यो़ छोगी लेमु ४२-४७
42हुनी झ्यीनी हुब घयेक्की ठीक्नल दीबे ॱलोप्सल तेन्देन् नेन्न देत्न हुब घयेत् कुरीक् कङ्ज्यीक्प झ्यीन छीगङ् कङ्ज्यीक्ल ढोप्ची च्यक्न से, ॱनी छीगङ् ॱसुव तप् तब झ्ये झ्यीगो़प्प बेत्। 43ॱनी ठीक्नल दीबे लक् ज्यी़त्नी यम् छेम्मे ले धङ् यीक् छ्यीम्मी़ लेगी ता गज्येन् झ्युङ बेत्। हुगो झ्यीनी हुब घयेत् रीदङ् रीगी ॱसीम्ल ज्यीब खुर्न देप्प बेत्। 44ॱनी छ्य स्योक्केन् घयेत् दी कङ्ज्यीक्प झ्यीन रोरङ्सोल घङ् यो़प्प दी फीस्सोम झ्यीगो़प्प बेत्। 45हीनी ॱसुल घन्डे गो़ब यो़दङ् हुल ॱयोङ्म घयेत् दीबे रोरङ्सोल यो़प्पे नोर् धङ् यप्च्य घन्ड हीन्न अक्, हुगो चोङ्न हुल टो़क्को़प्प बेत्। 46ॱनी हुब कुरीक् ङीन् रीम फो़स्स्यी छ्यो़गङ्गी च्यारीदु जोम्गो़प्प बेत्। ॱनी रोरङ्सो़ खीम्दु उक् छीगङ् जोम्न ढोप्ची च्यक्न से, हुनी सम ॱयोङ्म आक् से झ्यीन गेस धङ् ॱनोम्ज्युङ् झ्यीन 47को़न्ज्योक्ल यस्सो पुगो़प्प बेत्। ॱनी हुब घयेत्ल तेनी, छ्यी मी घयेत् दीब अक् गस्सी छोर्न यो़प्प बेत्। ॱनी थर्वे लम्ल डोगेन् घयेत् ङीन् रीम फो़स्स्यी चोव ज्यीन्दक्की फीदु ची़प्प बेत्।
Currently Selected:
ठीक्नल 2: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
