ठीक्नल 5
5
हननीया धङ् सफीरागी तम् १-११
1हुगी यङ्ल हननीया धङ् सफीरा नङ्जङ् ॱङी यो़प्प बेत्। ॱनी हुबे रोरङ्सो़ ॱस च्यीक् चोङ्न 2हुगी ॱसरीन् दीनी फक् च्यीक् पी़त्न हननीया दीगी रोरङ्सोल स्यक्प बेत्। ॱनी नङ्जङ् दील अक् हुगो ॱस्यो़च्च्ये यो़प्प बेत्। ॱनी हुगी ॱल्हक्टो़ दी हननीयागी ठीक्नल दीबे लक्ल टेप्प बेत्। 3ॱनी हननीया दील पत्रुस्की घन्दुक् झ्यीन खोक्की ॱसीम् हुगो नुक्म शैतान्गी लक्ल ॱस्योर्च्युङ। खोक्की ॱसरीन् हुनी घन्डल फक् पी़त्न स्यक्न धम्बे थुल ॱएलम ज्यक्केन्। 4रङ्गी ॱस हुगो चोङ्न आक्, हुगी रीन् दी रङ्गीरङ् बेत्। ॱनी हुगो ॱमत् चोङ्न आक्, हुगो रङ्गीरङ् बेत्। ॱनी खोक्की ॱसीम्ल घन्दुक् झ्यीन हीन्दुक् झ्यीबे ॱसम्ल छ्यर्च्युङ? रङ्गी ॱएलम हीगो मील मेम्ब, को़न्ज्योक्ल ज्यबल डोगेन् बेत् सीन्न झ्यीब बेत्। 5ॱनी हीगी तम् हीगो ॱह घोलोङ् मीक्ल हननीया टक् ॱस्यीन ॱसल ज्यदक् छर्नर बेत्। ॱनी हीगो ॱह घोगेङ्गी मी घयेत्ल ज्यीक्टक् छ्यीम्मु झ्युङ बेत्। 6ॱनी उन यो़प्पे स्यो़म्ब घयेत् युङ्न हुगी रो दी घुलक्की तुम्न छ्यील तो़न्न खुर्न फीन्न रो बेक्सल ॱलुक् स्यक्प बेत्।
7हुनी छ्युजो़त् ॱसुम्जो़त् च्यीक् ॱसोङ्नी, नङ्जङ् दी पत्रुस् झ्यीस्सल स्युन युङ बेत्। ॱनी हुदु झ्युङे लेमु घयेत् दी हुल ॱस्यो़च्च्ये मीप्प हीङ्गो़प्प बेत्। 8ॱनी पत्रुस्की हुल खीक्की ॱस दी हीजो़त् च्यीक्लरङ् चोङ हीम्ब? सीन्न ढीब बेत्। ॱनी हुगी लेम्बुल उजो़त् च्यीक्लरङ् चोङेन् सीन्न झ्यीब बेत्। 9ॱनी पत्रुस्की लेल्ल घन्डल खीत् ॱङीगी चोव ज्यीन्दक्की थुल छो़त्लीन् तज्येल ढो़ झ्यीब? तेदे रङ्गी छ्योबु रो बेक्सल ॱलुक्न स्योक्केङ्गी मी दीब हुन्दो उन छ्यीन ॱलीच्चो़त् झ्यीसोङ्। हुबे रङ् अङ् हुन्दुक्रङ् झ्यीन खुर्न च्यो़गेन् बेत् सीन्न झ्यीब बेत्। 10ॱनी हुगो सील्लोङ् मीक्ल हुगो च्यप् च्यीक्ल टक् ॱस्यीन पत्रुस्की दोङ्दु ॱसल ज्यदक् छर्नर बेत्। हुनी हुगी स्यो़म्ब दीब नङ्ल स्युन हुगो ॱस्यीनर यो़प्प ठेत्नी, हुगी रो दी खुर्न एल्ला रोरङ्गी छ्योबी़ रो बेक्स दीगी लो दीदु ॱलुक् स्यक्प बेत्। 11ॱनी छ्यो़ छोगी मी छङ्म धङ् हीगी केच्च्य हीगो ॱह घोवे मी घयेत्ल म दीरङ् ज्यीक्टक् छ्यीम्मु झ्युङ बेत्।
ठीक्नल घयेक्की नेप्प गज्येन् ढक्तु ची़प्प १२-१६
12ॱनी मी घयेक्की थोङ्सल ठीक्नल दीबे लम्नी यीक् छ्यीम्मी़ लेगी ता धङ् यम् छेम्मे ले गज्येन् झ्युङ बेत्। ॱनी सोलोमन्गी छोगङ् सीस्स का गज्येन् च्येम्म दीदु छ्य स्योक्केन् घयेत् जोम्न छीगङ् छ्यो़ छो छुगो़प्प बेत्। 13ॱनी छ्यी मी घयेत् दीब छ्य स्योक्केन् घयेत्ल गस्सी हीम्ब छोर बेत्। ॱनी छोर्न आक्, ज्यीबे हुब ॱसु उक् मुल दो़त्तु मत् युङ बेत्। 14ॱनी हीन्न अक्, छ्योगो भुमु मी ॱसम्ब गज्येङ्गी चोव ज्यीन्दक्ल छ्य स्यक्न युङ्न, छ्यो़ छो दी हरुङ् मङ्दु फीन युङ बेत्। 15ॱनी हीन्दुक् झ्यीब अक् झ्युङ बेत्। मी यरीबे नेप्प घयेत् यरी पलङ्ल धङ् यरी तेन्दङ् डक्च्यक्ल खुर्न युङ्न, पत्रुस् डोये यङ्ल खोङ्गी ढीक्मक् च्यीक् ॱयम्ल फोक्न आक्, ढक्को़ट्टो ॱनो़ब ॱसम्न नेप्प घयेत् ॱसट्टक्तु च्यो़गो़प्प बेत्। 16ॱनी यरुशलेम्गी छीग ॱनमी़ युगङ् घयेत्नी इक् नेप्प घयेत् धङ् ॱनो़प्प स्यीलोक्पोक्म स्यीन्नरे मी गज्येन् च्यो़दु युङ बेत्। ॱनी हुब कुरीक् ढक्नर बेत्।
ठीक्नल घयेत् चो़ल्ल ॱस्योरे तम् १७-२०
17हीनी छ्यो़प्पो़न् चो छ्यीस्स्यो दी धङ् हुगी दगु सदुकी छ्योगी मी घयेत् दीब गन्दीक्म सीगुक् लङ बेत्। 18हुनी हुब घयेक्की ठीक्नल दीब सुङ्दु तङ्न चो़ल्ल ॱलुक् तङ बेत्। 19ॱनी हुगी गोङ् दी तेङ् यी़गी चोव ज्यीन्दक्की भङ्ज्येम्ब च्यीक् युङ्न हुगी चो़ङ्गङ्गी गोच्च घयेत् दी पीक्न ठीक्नल दीब छ्यील तो़न्न, 20हुबल ह खीत्रङ् हीनी ज्युक्। छ्यो़गङ्गी च्यारीदु फीन्न मी कुरीक्ल छीये केच्च्य ॱस्येत्न टो़त्लेत् सीन्न ॱङान तङ बेत्। 21ॱनी ठीक्नल दीब हील नेन्न नेम्बेत् दी ॱङेन्ज्याल फीन्न छ्यो़गङ्गी च्यारीगी नङ्ल स्युन हुदु यो़प्पे मी घयेत्ल ॱलोप्स ज्यब बेत्।
ठीक्नल दीबल छ्यो़गी छोक्तेन् छ्यीम्मुदु २१-४२
हुनी छ्यो़प्पो़न् चो छ्यीस्स्यो दी धङ् हुगी छ्यीट्टो घयेत् दीब जोम्न हुबे इस्राएल्की गेम्बा चो छ्यीया घयेत् कुरीक् भो़न छ्यो़गी छोक्तेन् छ्यीम्मु छुब बेत्। ॱनी हुब घयेक्की ठीक्नल दीब हुगी छोक्तेन् छ्यीम्मु दीदु चो़न्नी ठीक्तु तङ बेत्। 22ॱनी ठीक्केन् दीब चो़ल्ल फीन्न तेनी, ठीक्नल दीब चो़न् दीन मीप्प ठेप्प बेत्। हुनी लोक्न युङ्नी, 23हुबे हुगी छोक्तेन् छ्यीम्मी़ मी घयेत् दील चो़ङ्गी गोच्च घयेत् कुरीक् धम्बोक्म दीमीक् ज्यप्न दुक्। गोराब दीब अक् गन्दीक्मरङ् ॱरुङ्गीन् दो़क्कुक्। ॱनी ङीत् नङ्ल स्युन फीन्न उन ॱसु उक् मीन्दुक् सीन्न ॱस्येप्प बेत्। 24ॱनी हीगी केच्च्य हीगो हुदु छ्यो़गङ्गी गोराब घयेक्की पेम्बु दी धङ् छ्यो़प्पो़न् चो छ्यीया घयेत् दीबे ॱह घोन हुब कुरीक्की घन्ड झ्युङ ब अक् ॱनो़न ओ़न् थोम्नर बेत्।
25हुनी मी च्यीक् छ्यो़गी छोक्तेन् छ्यीम्मु दीदु युङ्न हुगी मी छ्यीया घयेत् दील खीत्रङ्गी चो़ल्ल ॱलुक्पे मी दीब हुन्दो यान छ्यो़गङ्गी च्यारीन मी घयेत्ल ॱलोप्स ज्यक्कुक् सीन्न ॱस्येप्प बेत्। 26ॱनी हीगो ॱह घोनी, हुगी पेम्बु दीगी रोरङ्गी होक्की गोराब घयेत् दी ठीक्न छ्यो़गङ्नी ठीक्नल दीब ठीक्तु फीम्ब बेत्। ॱनी गोराब दीबे हुनी खेरक् तङ्न ठीक्न ॱनी, मीमङ् घयेत् छ्योरी लङ्न दोर्तुङ् बेङ्गो़ट्टो ॱनो़न ज्यीबे हुबे ज्यम्गी झ्यीन ठीक्प बेत्।
27हुनी हुगी छोक्तेन् छ्यीम्मी़ दोङ् दीदु ठीक्नल दीब ठीक्नी, हुबल हुगी छ्यो़प्पो़न् चो छ्यीस्स्यो दीगी हीन्दुक् सीन्न तम् च्युर बेत्। 28हुगी मीङ्नी मी घयेत्ल ॱलोप्स ॱस्युली मत् ज्यक्च्यीत् सीन्न ङीक्की खीत्रङ्ल खक्को़ ज्यबेन् न ॱनी। ॱनी हीन्न अक्, खीत्रङ्गी म दीरङ् केच्च्य घल अक् ॱस्येत्न, यरुशलेम् जेङ्ल धर्नत्तुक्। हुगी मी हुगी ठक् तो़म्बे नक् दी ङीत्ल कोप्च्ये ॱनो़ब झ्यीक्कुक् सीन्न झ्यीब बेत्।
29ॱनी हुबे लेल्ल पत्रुस् धङ् ठीक्नल ॱयोङ्म दीबे खीत्रङ्गी झ्यीबल मेम्ब, को़न्ज्योक्की कल मङा नेन् गोगेन् बेत्। 30खीत्रङ्गी कुरुस्ल तान ॱसेप्पे येशु हुगो हज्यरङ्गी पुबु ॱमुमु घयेक्की को़न्ज्योक्की यङ् ॱसोम्बुल ॱलोङ बेत्। 31इस्राएली घयेत् ॱएङ्गी लम्नी ॱसीम् ज्युर्न युङ्न हुबे दीक्प धक्च्ये यो़प्पल येशु हुगो को़न्ज्योक्की खोङ् रोरङ्गी छ्यक् ॱये छ्योदु तो़त्न स्यक्न चो छ्यीम्मु धङ् च्यप्को़ल्ल सो़ब बेत्। 32हीगी केच्च्य घयेत् हीगी पङ्बु दी ङीस्सो हीन्। ॱनी को़न्ज्योक्की खोङ् रोरङ्गी कल चीगेन् घयेत्ल ॱनङे धम्बे थु उक् हीगी पङ्बुरङ् बेत् सीन्न ॱस्येप्प बेत्।
33हीगो ॱह घोनी, छ्यो़गी छोक्तेन् छ्यीम्मी़ सदस्यीय घयेत् दी खोङ्डोक्की म दीरङ् झ्येत्ङे दीरङ् ज्युर्न ठीक्नल दीब ॱसो़क्कीन् थेस्सी झ्युङ बेत्। 34हुनी हुबे छीक्न फरीसी गामलीएल् सीक्केन् छ्यो़डीम्गी चयेलम च्यीक् यो़प्प बेत्। हुल मी कुरीक्की छ्यीया हीम्ब ॱसम्गो़प्प बेत्। ॱनी गामलीएल् दी हुदु लोङ्न धोबा च्यीक्की ढीक्ल ठीक्नल दीब छ्यील तङ्न 35हुगी छ्यो़गी छोक्तेङ्गी सदस्यीय घयेत् दील ॱवे इस्राएल्की मी घयेस्सो, हुगी मी हुबल घन्ड झ्यीक्केन् ॱअल ॱसम्ल तोङ्। 36ननीङ् स्यीनीङ् थुदास् सीक्केन् च्यीक्की रोरङ् छ्यीम्मु हीन् सीन्न थो़म्ब बेत्। ॱनी हुगी छ्योल मीरङ् ज्यब स्यीजो़त् च्यीक् युङ्न देप्प बेत्। ॱनी तीङ्ला हुगो ॱसेत् तङ बेत्। हुनी हुगी छ्योगी मी घयेत् दी छ्यो स्यील थोर्न, हुगी ले दी मीप्पल येनर बेत्। 37हुनी तीङ्ला जनसङ्गीय ढीये यङ्ल गालीलागी मी यहुदा सीक्केन् च्यीक् थो़म्ब बेत्। ॱनी हुगी इक् मी गज्येन् रोरङ् छ्योल ॱयो कोर बेत्। ॱनी तीङ्ला हुगो ओक् ॱसेत् तङ्नी, हुगी छ्योगी मी घयेत् दी इक् कुरीक् थोर्नर बेत्। 38हुगो झ्यीनी हरीङ् हीदु झ्युङे केच्च्य हीगी ढीक्ल ङे ढो़ च्यीक् टेत् योङ्। खीत्रङ्गी हुगी मी हुबल घन्ड अक् मत् झ्यीब तोङ्लोङ्। घन्ड हीन् सीन्न हुबे ले हुगो रोरङ्सो़ कोलीमी च्यानी झ्युङ हीन्न ॱनी, हुगो नुक्रङ् ये डोगेन् बेत्। 39ॱनी हीगो मेम्ब, हुगो को़न्ज्योक् च्यानी झ्युङ हीन्न ॱनी, खीत्रङ्गी हुबे ले हुगो क च्यो़त् ॱमीत् छुगेन् बेत्। खीत्रङ्गी म दीरङ् को़न्ज्योक्ल ड झ्यीबल डोगेन् बेत् सीन्न ॱस्येप्प बेत्। ॱनी हीगी केच्च्य हील हुगी छोक्तेन् छ्यीम्मी़ मी ॱयोङ्म घयेत् दीब थी़न्न नेम्ब बेत्।
40हुनी ठीक्नल दीब यङ् नङ्ल ठीक्न हुबल डेङ्ज्यक् बेन्दु ची़त्न येशुगी मीङ्नी केच्च्य घन्ड अक् ॱमत् ॱस्यो़च्च्यीत् सीन्न ॱङान तङ बेत्।
41हुनी ठीक्नल दीब हुगी छोक्तेन् छ्यीम्मु दीनी छ्यील थो़न्न युङ बेत्। ॱनी येशुगी छेङ्गी ढीक्ल रोरङ्सो ॱम पप्न युङल हुगो ओ़ब झ्युङ को़न्ज्योक्की ॱसम्गेन् झ्यीनी, हुल हुब गेस झ्यीब बेत्। 42ॱनी हुबे रोरङ्सो़ ले दी ॱलो़ ॱमत् तङ, ङीन् रीम फो़स्स्यी छ्यो़गङ्गी च्यारीदु धङ् खीम् खीम्ल आक् फीन्न केच्च्य ॱनेम्बी़ ॱलोप्स ज्यप्न येशु च्यप्को़ल्ल को़न तङे ख्रीष्ट् बेत् सीरे केच्च्य कुरीक्ल ॱस्येत्न टेप्प बेत्।
Currently Selected:
ठीक्नल 5: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
