MAROMU 14

Usunamuwe munyaho

1Namurenge ha uzuri uwo kasina uaminifu muhodari, wala musushindrane yahusu fikira zahe. 2Mauri v̄wa aaminio amba atsojua aɗye kula shitru, v̄wa wangina amba uaminifu wahe kausi muhodari, kaɗyi neka tsi mafeliki. 3V̄av̄o ule aɗyao, asuoneye ule kaɗyi; na ule kaɗyi, asunamuwe ule aɗyao, mana Mungu amukariɓisa. 4Wawe ɗe mbani ata unamuao murumishi wa mutru wangina? Neka amba ahimi hari mwa urumishi wahe, au awu, yao mashuhuli ya umurumisa wahe. Na waye atsosimamia uhima, mana Mola ana ushindzi wa umusimamisa.

5V̄wa waonao amba v̄wa suku muhimu rahana zaɓaki, v̄wa wangina wazionao amba piya sawa. Ɓasi kula mutru nawafiku rohoni na iheli aonao. 6Mutru atafautishao zisuku, v̄ale asuzitafautisha ha siɓaɓu ya Mola. Na ule aɗyao, asuɗya ha siɓaɓu ya Mola, mana waye uhimidia Mungu. Na uwo kaɗyi, ha siɓaɓu ya Mola ɗe waye kaɗyi, na asumuhimidia Mungu wajau. 7Kav̄u hari mwasi aẽshio ha inafusi yahe monyewe, wala kav̄u afao ha inafusi yahe monyewe. 8Mana neka risuẽshi, v̄av̄o risuẽshi ha isifa ya Mola, na neka risufa, risufa ha isifa ya Mola. Ɓasi neka risuẽshi, au risufa, wasi wa Mola.

9Mana neka amba Kristi afu, tsena aregezewa hayi, ɗe iv̄o ake Raɓi wa wao wafa, na wa wao walio hayi. 10Ɓasi wawe, manatrini ata unamuao munyaho? Au wawe, manatrini uoneao munyaho? Wasi piyasi ritsohima mbeli na ishiri ya mahakama ya Mungu. 11Mana v̄uangihwa moni mwa uMuangishio:

«Ha ikweli nilio hayi, arongoa Mola,

kula mutru atsovundza malondro mbeli zangu,

na kula hanyo itsokuɓali amba wami Mungu.»

12Ha izo, kula moja hari mwasi atsodzieledza mbeli za Mungu ha iwaye yahe.

Usukwalise munyaho

13Ɓasi rasunamuwane tsena wasi na wasi, ɓadi v̄av̄o namurenge ãzima amba mwasuke siɓaɓu ya ukwalisa munyawe, au ya umutria hari mwa dhambi. 14Nisujua tsena tsina yakini ha uv̄umoja wangu na Raɓi Insa, amba kav̄u ata shitru ilio nagisi ha iwayo yayo; ɓadi neka mutru asuona amba shitru ya nagisi, v̄av̄o ya nagisi na ule aionao nagisi. 15Neka ha siɓaɓu ya shahula usutria utungu roho ya mwananya muaminifu, v̄av̄o kusuɗunga tsena indzia ya mahaɓa. Usutsonge ha ishahula yaho uangamifu wa uwo alio amba Kristi afu ha umukomboa. 16Izo zilio ndjema hanyu, zasuonehane amba mbovu na wasalia. 17Mana Utawalizi wa Mungu tsi ɗe uɗya na unwa, ɓadi ɗe uhaki, amani, na furaha, ha iRoho Ndzitwaharifu. 18Uwo amurumishiao Kristi ha inamuna iyo, waye umujiv̄ia Mungu, tsena ukuɓaliwa na uwanadamu.

19Ha izo, nariɗunge izo ziv̄ingao amani, tsena zitsorisaidio wasi na wasi rendre mbeli. 20Usuangamidze ihazi ya Mungu ha siɓaɓu ya shahula. Ha kweli, piya zahula izo halali, ɓadi iyo mbovu neka ha iyo aɗyao, mutru asukwalisa mwananya muaminifu. 21Iyo ndjema neka mutru kasuɗya nyama, kasunwa maji ya zaɓiɓu, tsena asudziɓalidza na kula shitru itsokwalisao munyahe.

22Uaminifu waho ulionawo, usike uke waho mbeli za Mungu. Furaha uwo kasudzituhumia na izo aonao amba ndjema. 23Ɓadi uwo adzituhumiao na ishitru aiɗyao, v̄av̄o ahukumulwa na kosa amoiɗya, mana kasina uaminifu na trongo aifanyao. Na kula trongo kayaketsi hari mwa uaminifu, lilo dhambi.

Currently Selected:

MAROMU 14: swb

Highlight

Copy