MAROMU 13

Utuĩ uwendza yezi

1Kula mutru natuĩ wendza yezi watawalia itsi, mana kav̄u yezi kayala ha Mungu, na wendza yezi walio, Mungu ɗe awahetsi. 2Iyo ɗe imana ata mutru andrao kinyume na iyezi, v̄av̄o asendra kinyume na trongo Mungu aihetsi; na wao wandrao kinyume, watsodziv̄ingia mahukuma. 3Mana wao watawala kawasi wa uriwa neka mutru asufanya ndjema, ɓadi ɗe neka asufanya mbovu. Hali usutsaha usuriye mwendza yezi? V̄av̄o fanya ndjema, na wawe utsopara sifa zahe. 4Mana waye a hari mwa urumwa wa Mungu ha itanafu yaho. Ɓadi neka usurendra mbovu, v̄av̄o ria, mana tsi ha ɓure ɗe av̄ingao shombo#13:4 shombo: iShigiriki isurongoa: upanga, yaãni, ãlama ya uãdhaɓisha. ya uãdhaɓisha; waye a hari mwa urumwa wa Mungu, ile aonese ihadhaɓu yahe mbeli za ule arendrao mbovu. 5Iyo ɗe imana ilio farudhwi ya utuĩ, tsi ha siɓaɓu ya uria hadhaɓu tu, ɓadi tsena ha siɓaɓu iv̄o mutru ajuao rohoni hahe iyo yalazimu.

6Na tsena, iyo ɗe imana ata muliv̄ao latete, mana wendza yezi wao, wa ju la urumwa wa Mungu ha zihazi wazifanyao. 7Namuv̄e kula mutru yamulazimu: latete ha uwo alazimu ilatete, ushuru ha uwo alazimu uushuru, staha ha uwo alazimu istaha, hishima ha uwo alazimu ihishima.

Uv̄endza, iyo utsimidza iSharia

8Musuke na deni ha mutru atsokao yotsi neka tsi ɗe uv̄endzana wanyu na wanyu. Kweli amba mutru av̄endzao munyahe, v̄av̄o atsimidza iSharia. 9Mana ziãmuri zini: usufanye hawara, usuule, usuhiɓe, usudzihafukanise, na zasalia piya, zirongolesheha hari mwa iãmuri moja ini: «Utsov̄endza munyaho mauri ɗe iwawe yaho.» 10Mutru av̄endzao munyahe, waye kamurendre mbovu. Ha izo uv̄endza, iyo utsimidza iSharia.

Udzitayarisha ha umujilio wa Kristi

11Namufanye zizo, iv̄o mujuao wakati rilio: wakati upara ya wanyu ulamuha hari mwa tsindzi zanyu. Mana av̄asa uhuyifu wa kariɓu na wasi rahana wakati raja raamini. 12Uku uendre mbeli, wa kariɓu na usha. Ɓasi narilishe zitrendro za shidzani, riɓange zizombo za iheu. 13Naridziv̄inge ha namuna yalazimu yastahiki umutsana, ɓila uv̄endzoɗya, wala ulevi, ɓila uzani, wala taɓia kayalazimu, ɓila umani, wala uwivu. 14Ɓadi namudzipindrise Raɓi Insa Kristi, wala musudzishuhulise na itaɓia ya shiuɓinadamu ha ujiv̄idza zingushauku zayo.

Currently Selected:

MAROMU 13: swb

Highlight

Copy