MAROMU 15

Narijiv̄idze wanyatru, ɓadi tsi wasi wenyewe

1Wasi rilio wahodari, rilazimu rireme ɓega udziro wa wale kawasi wahodari, wala tsi ha udzijiv̄idza wasi wenyewe. 2Kula moja hari mwasi najiv̄idze munyawe ha indjema, ile pare ahodarishihe. 3Mana Kristi waye kadzijiv̄idza iwaye yahe, ɓadi mauri ɗe iheli yaangihwa moni na uMuangishio: «Maruhano ya wao wahuruhanao, yanipara ɗe wami.» 4Mana piya izo zaangihwa rangu zamani ziangihwa ha urifundra, pare ha isuɓira na iɓari ritrilwao na uMuangishio Mutwaharifu, rikane tama.

5Ɓasi Mungu Monyewe suɓira na ɓari namudjaãliyeni muke nia moja hari mwanyu, mufano wa Kristi-Insa, 6ile pare ha nia moja na ji moja mumutukuze Mungu, Ɓaɓa wa Raɓi watru Insa-Kristi.

iHaɓari Ndjema, iyo ya watru wa piya zinishani

7V̄av̄o ɓasi, namurengane wanyu na wanyu, mauri ɗe iheli Kristi amurengani, ha uutukufu wa Mungu. 8Mana nisurongoa amba Kristi arendreha murumishi wa Mayahudi ile aonese ukweli wa Mungu, ha utsimidza zinguwahadi zatolewa ha uwadzaɗe, 9na watru wa zinishani zangina wamutukuze Mungu ha siɓaɓu ya urehema wahe. Mauri ɗe iheli yaangihwa moni na uMuangishio Mutwaharifu:

«Iyo ɗe imana ata nitsohusifuo hari mwa zinishani zangina,

nitsohedza djimbo la utukuza dzina laho.»

10uMuangishio urongoa tsena:

«Wanyu zinishani zangina,

namufurahi v̄umoja na umati wahe!»

11Uja urongoa tsena:

«Namumutukuze wanyu piya zinishani zangina,

piya zingumati nazimusifu.»

12Na tsena, mutrume Izaya#15:12 Izaya: Namuangaliye Izaya 11:10. arongoa:

«V̄utsoja mutse wa inaswila ya Yesi,

uwo atsohimao atawaliye zinishani;

haheju zinishani zitsotria tama yazo.»

13Ɓasi Mungu Monyewe av̄ao tama, namujadziyeni kula furaha na amani hari mwa uaminifu, ile pare itama yanyu yendre na uzidishiha ha ushindzi wa iRoho Ndzitwaharifu.

Hazi yadjukumisiwa Ɓaulusu ha watru tsi Mayahudi

14Yahusu wanyu wananyangu, wami hanguju tsiwafiku amba mujaya uwema, mujadziwa piya uujuzi, musushindra muv̄ane shauri wanyu na wanyu. 15Ɓadi v̄anu, tsisuɓutu nimuangishiyeni ɓaãdhwi ya trongo ɓila udzizia, ile nimaruse fahamu lanyu, ha siɓaɓu ya ineema Mungu anidjaãlia. 16Anidjaãlia ineema ya uka murumishi wa Kristi-Insa ha zinishani zangina. iHazi nadjukumisiwayo ya utolezi masadaka, ɗe ujudza iIndjili ya Mungu, ile watru wa zinishani zangina wake sadaka lakuɓalishiwa na Mungu, latwaharishiwa na iRoho Ndzitwaharifu.

17V̄av̄o ɓasi, ha uv̄umoja nilionawo na Kristi-Insa, nisudziparia sifa na ihazi yangu ya umurumishia Mungu. 18Mana tsisuɓutu narongoa ata trongo neka tsi ɗe iyo Kristi aifanya ha indzia yangu, ne ɗe uv̄inga watru wa zinishani zangina hari mwa utuĩvu, trongo yafanyiwa ha marongozi na zitrendro, 19tsena ha ushindzi wa ãlama za ãdjaɓu na midjuza, ha ushindzi wa iRoho. Ha izo, rangu Yerusalemu ata upara liɓavu la Iliriko, tsijudza ha ukamilifu iIndjili ya Kristi. 20Djitihadi yangu ɗe wami ujudza iIndjili v̄ahanu v̄ulio amba dzina la Kristi kalapara lavumbulwa, ile nasuundre hari mwa musingi wa mutru wangina. 21Mauri ɗe iheli yaangihwa moni na uMuangishio Mutwaharifu:

«Wao walio amba kawaka wajudziwa

haɓari yamuhusu, watsoona,

na wao kawaka wakia alagulwa, watsoelewa.»#15:21 Namuangaliye Izaya 52:15.

22Iyo ɗe yakonizia wakati mwengi wami uja hanyu.

Mupango wa Ɓaulusu wa uendra Romu

23Ɓadi av̄asa, tsisina tsena v̄ahali v̄ulio amba v̄usutsaha hazi hari mwa liɓavu lini, na iv̄o rangu maha mengi niliona ushauku wa uja nimuoneni, 24nisutumainia nimuoneni wakati nitsokao hari mwa musafara wa uendra Espanya. Tsina tama ya uv̄ira nimuoneni, nipare musada wanyu wa wami uendrelea na umusafara, ɓaanda nitsojiv̄iwao v̄umoja na wanyu hari mwa mwana muda. 25Ɓadi v̄anu nisendra Yerusalemu, nav̄e musada waaminifu. 26Mana waaminifu wa Makadoniya na wa Akaya waãzimia uv̄eleha musada ha zimasikini zilio hari mwa uwaaminifu wa Yerusalemu. 27Waono amba ndjema ya uifanya, ɓadi ha kweli, iyo ika deni mbeli zawo. Mana neka watru wa zinishani zangina wapara fuvu hari mwa zineema za shiroho za Mayahudi, v̄av̄o walazimu wawasaidiye hari mwa zitrongo za maẽsha ya kula suku. 28Wakati nitsomalidzao itrongo iyo, tsitakaɓadhi mutsango uwo mihononi hawo, nitsolawa nendre Espanya ha uv̄iria hanyu. 29Na wami nisujua amba namoja nimuoneneni, nitsoja v̄umoja na ɓaraka ndzikamilifu ya Kristi.

30V̄av̄o ɓasi wananyangu, nisumumiani ha uv̄umoja wa Raɓi watru Insa-Kristi na ha uv̄endza iv̄olwao na iRoho, muwane v̄umoja na wami ha unimilia Mungu, 31ile pare nipukamanisihe na watru tsi waaminifu walio Yudeya, na urumwa wangu Yerusalemu ukuɓalishihe na waaminifu. 32Ha izo, uv̄endza yahe Mungu, nitsoja nimuoneni ha furaha, tsena nipare mwana uv̄umuzi v̄umoja na wanyu. 33Mungu, Monyewe uv̄a usalama, nake v̄umoja na wanyu piyanyu. Amina.

Currently Selected:

MAROMU 15: swb

Highlight

Copy