MAROMU 1

1Wami Ɓaulusu, murumishi wa Kristi-Insa|Kristi, nahirwa nike Muv̄ingizi-Risala, tsena nahetsiwa nijudze iHaɓari Ndjema ya Mungu, 2ilio amba aitolea wahadi rangu zamani moni na yiMiangishio Mitwaharifu ha ndzia ya yimitrume yahe, 3Haɓari Ndjema yahusu uMwana wahe alio amba ha mwili, aka shilembwe ya Daudu. 4Adhiɓitishiha amba Mwana wa Mungu ha ushindzi, ha ndzia ya iRoho ya utwaharifu ha umuregeo hayi wahe ulawa ha uwafu, waye Insa-Kristi Raɓi watru, 5alio amba ha ndzia yahe ridjaãliwa ineema ya uv̄inga iRisala ha piya zinishani, ile zituĩ uaminifu, ha utukufu wa lidzina lahe. 6Wanyu wajau mwa mengoni mwao, wanyu mwahirwa muke wa Insa-Kristi.

7Nisumuangishiani wanyu piyanyu mulio ɗagoni Romu, mulio wav̄endzewa wa Mungu, mwahiriwa muke watwaharifu.

V̄av̄o ineema na utrulivu zilawao ha Ɓaɓatru Mungu na Raɓi watru Insa-Kristi nazimuendreleyeni.

Ɓaulusu asumilia iDjama Ndziwaminifu ɗagoni Romu

8Raɓuzi, nisumuhimidia Mwalangu Mungu ha ndzia ya Insa Kristi ha wanyu piyanyu, ha iv̄o uaminifu wanyu usifiwao hari mwa lidunia kamili. 9Mungu nimurumishiao rohoni hangu ha ujudza iIndjili ya uMwana wahe, a shahidi wangu amba ha daima wami umumiliani. 10Hari mwa piya mamilio yangu, wami umia amba ha yamav̄endzeleo yahe, nipare iv̄o iɓahati ya uja nimuoneni.

11Mana tsina ushauku wa umuonani ile nimuv̄ingiyeni zawadi ya shiroho, pare muhodarishihe. 12V̄av̄o nisutsaha nirongowe amba ritriyane ɓari wasi na wasi, yaãni, kula mutru uaminifu wahe utriye ɓari munyahe. 13Wananyangu, tsisutsaha yaka amba kamusujua amba mara nyengi nakoka na inia ya uja hanyu, ile nirundre wana mavuna hari mwanyu, mauri ɗe hari mwa zinishani zangina tsi Mayahudi; ɓadi ata upara av̄asa tsashindra.

14Mauri tsa denini mbeli za wanadamu piya, rangu Magiriki, ata tsi Magiriki, na wendza ĩlimu, ata wao kawasina. 15Ha izo, tsina ushauku muhodari nimujudzeni wanyu wajau iIndjili, wanyu mulio Romu.

Ushindzi wa iHaɓari Ndjema

16Kweli amba tsisuonea haya iIndjili, mana uwo ushindzi wa Mungu ha uhuyifu wa yotsi aaminio, rangu Muyahudi ata uwo kasi#1:16 uwo kasi: Au: Mugiriki. 17Mana moni na iIndjili ini ɗe v̄wav̄enuha umuhakisho wa Mungu ha indzia ya uaminifu, ɓadi tsi ha trongo yangina, mauri ɗe inamuna yaangihwa moni na uMuangishio Mutwaharifu amba: «Uwo ahakishiha ha uaminifu wahe, atsokana uhayati.»

Wanadamu piya wamukoso Mungu

18Ha yakini amba ihadhaɓu ya Mungu iv̄enuha rangu pev̄oni kinyume na kula uovu na upeu wa wanadamu walio amba ha uovu wawo, wasutsonga ukweli usujulihane. 19Mana izo zishindrao zijulihwane zamuhusu Mungu ziwav̄enushia dhwahiri, iv̄o Mungu waye-waye awav̄enuliazo. 20Kweli amba izo kazionehana ha Mungu, mauri ɗe ushindzi wahe kauna mupaka, na uungu wahe, zisupara zionehana dhwahiri rangu lidunia uumbwa yalo, zamoangaliwa ha iãkili hari mwa izo aziumba. Ha izo, kawasina haki itsokao yotsi.

21Mana ata ha iv̄o wamujua Mungu, ne kawamutukuza amba Mungu, wala kawamuhimidia, ɓadi walatsiha hari mwa fikira kazina mana zawo na inafusi yendza ujinga yawo ifinikiha na shidza. 22Wasudzirendra wendza ãkili, ne wafanyiha wajinga. 23Amwesa wagaudza utukufu wa Mungu kafu ha masanamwe mufano wa mwanadamu mufa, wa nyunyi, wa zinyama za mindru minne, na zirambao.

24Iyo ɗe imana ata Mungu awajeledza hari mwa utshafi walingana na zingushauku za umo wawo, ha namuna amba wasupatsa aĩɓu#1:24 aĩɓu: Au: wasupatsana aĩɓu wao na wao. wao wanyewe yimili yawo. 25Wao waɓadili ukweli wa Mungu na unafiki, waãɓudu na urumishia shiumbe ha ɓadala ya uMuumbizi, alio amba atukuziha ha daima. Amina.

26Iyo ɗe imana Mungu awajeledza hari mwa shahawa zendza aĩɓu. Washe wawo wagaudza inamuna ya uendrelea ya ãswili ha maendreleo kinyume na inamuna waumbwa. 27Ɗe namuna iyo wajau watruɓaɓa; walishi inamuna ya uendrelea na watruwashe ya ãswili, ne waremwe na ushauku wa kusudi wao na wao, wafanyiane watruɓaɓa na watruɓaɓa taɓia zendza aĩɓu. Wasudziparia wao wenyewe mavuna yalingana na upotevu wawo.

28Ɓaanda kawatsaha wamujua Mungu, Mungu awajeledza hari mwa fikira mbovu zawo, wafanye zilio amba kazalazimu. 29Wajaya na kula namuna ya uovu, ya upeu, ya ushifuɓa, na taɓia mbi; wajaya uwivu, fikira za uula, umani, udjandja, na roho mbovu mbeli za wanyawo. Wao ufitiniana, 30usingidziana trongo za peu, waengefu-Mungu, wafudhuli, udziona, na udzirendra; wao utrunga mbovu, wala kawastehi wadzaɗe wawo. 31Kawasina ãkili, kawatsimidza nguwahadi zawo, kawasina mahaɓa, wala poreho. 32Wala ukana wasujua iãmuri ya Mungu irongoao amba watru wafanyao trongo mauri ɗe zizo wastahiki wafe, tsi tu amba wasuzifanya, ɓadi wasukuɓali wale wazifanyao.

Currently Selected:

MAROMU 1: swb

Highlight

Copy