MAROMU 2

Mungu atsohukumu ha haki piya uwanadamu

1V̄av̄o ɓasi, kusina muswamaha, wawe mutru yotsi unamuao wanyaho. Mana wamonamua wanyaho, v̄av̄o usudzihukumu ɗe wawe, mana wawe unamuao, usufanya ɗe wizo zile. 2Na wasi risujua amba ha ukweli ɗe Mungu anamuao watru wafanyao trongo mauri ɗe zizo. 3He wawe mwanadamu unamuao wanyaho wafanyao trongo mauri ɗe zizo, ne uzifanyao wawe-wawe, usufikiri amba utsoshindra utrale ihukuma ya Mungu? 4Au usudharau utadjirifu wa uwema wahe, wa isuɓira na ustahamilifu wahe, ata kusujua amba v̄av̄o uwema wa Mungu uwo usutsaha uhuv̄inge wendre toɓa?

5Ɓadi ha siɓaɓu ya ukaidi waho na uumo kauandilishiha, usudzihetsia ãkiɓa ya hadhaɓu ya isuku ya ihadhaɓu, wakati ihukuma ya haki ya Mungu itsov̄enuhao, 6amba aliv̄e kula mutru ulingana na zitrendro zahe: 7uhayati mukamilifu wa daima ha watru walio amba ha idjitihadi yawo ya ufanya ndjema, wasutsaha utukufu, hishima na uhayati wa daima. 8Ɓadi hadhaɓu na hasera ha wao wadzinafasishao, waharao ukweli na uɗunga udhuluma. 9Matreso na utungu ha mutru yotsi arendrao mbovu, raɓuzi ha uMuyahudi|Muyahudi, iv̄o ha uwo kasi. 10Na ha kinyume, utukufu, hishima na utrulivu ha yotsi arendrao ndjema, raɓuzi ha uMuyahudi, iv̄o ha uwo kasi. 11Mana ha Mungu kav̄u utsahulivu.

12Piya wao waãswi ɓila ujua iSharia, watsoangamia wajau ɓila iSharia, na piya wao waãswi ha ujua iSharia, watsohukumulwa na iSharia. 13Kweli amba tsi ɗe wao wakiao iSharia ɗe watsokuɓalishiao mbeli za Mungu, ɓadi wao waiɗungao ɗe watsokuɓalishiao. 14Ha mufano, neka watru wa zinishani zangina kawaji iSharia wasufanya ha ãswili izo zarongolwa na iSharia, v̄av̄o wasuonesa amba wa hari mwa sharia, wala ukana kawaji iSharia. 15Wasuonesa ha zitrendro zawo amba izo zatsahwa na iSharia, ziangihwa rohoni hawo. Izo wazifikirio rohoni hawo, zisuitolea ushahidi, mana v̄wa wakati zifikira zawo zisuwasingidza amba wafanya kayalazimu, au v̄wa wakati uwaambia amba wafanya yalazimu. 16Iyo ɗe itsov̄enuhao, mauri iIndjili ini niijudzao irongoao, isuku Mungu atsohukumuo zisiri za wanadamu ha ndzia ya Insa Kristi.

Uwo kasuɗunga iSharia, asudzihire Muyahudi

17Ɓasi wawe udzihirao amba Muyahudi, utumainiao iSharia, tsena udzisifuo na umukayo v̄umoja waho na Mungu, 18ujuao yamav̄endzeleo yahe na utafautishao indjema iv̄o wasomedzewa na iSharia, 19wawe udzihetsio amba ushindra uv̄inge wafa-matso na uka mwenge ha wao walio shidzani, 20tsena fundi wa wajinga usomedzao uwatiti iv̄o ujuao iSharia, amba v̄av̄o wa hari mwa likoho la iĩlimu na ukweli. 21Ɓasi wawe usomedzao wanyaho, wala kusudzisomedza monyewe! Wawe ufundrao wanyaho amba wasuhiɓe, ne usuhiɓa! 22Wawe uambiao watru wasuzani, ne usuzani! Wawe uengao trongo ya uãɓudu masanamwe, ne usurav̄a moni na zinyumba za uyaãɓudu? 23Wawe udziv̄ao sifa hari mwa iSharia, ne usumudharau Mungu iv̄o uvundzao iSharia! 24Kweli amba v̄uangihwa moni na uMuangishio: «Ha siɓaɓu ya wanyu, lidzina la Mungu lisukufuriwa na zinishani zangina.»

25 Utahiri una faida neka usustehi iSharia. Ɓadi neka usuvundza iSharia, utahiriwa waho usugauha mauri kwatahiriwa. 26Neka ɓasi amba mutru katahiriwa asuɗunga ziãmuri za iSharia, hali katahiriwa yahe kaitsorengwa amba atahiriwa? 27V̄av̄o mutru katahiriwa mwilini ne astehio iSharia, atsomuhukumuni wanyu mwatahiriwa muliona iSharia yaangihwa, ne muivundzao.

28uMuyahudi wa kweli tsi wa sura, na utahiriwa wa kweli tsi ɗe wa mwilini. 29Ɓadi uMuyahudi ɗe wa moni, na utahiriwa ɗe wa iroho, trongo ifanyiwao na iRoho Ndzitwaharifu, wala tsi ha ulingana na shitru yaangihwa. Sifa ya mutru mauri ɗe uwo kailawa ha wanadamu, ɓadi ha Mungu.

Currently Selected:

MAROMU 2: swb

Highlight

Copy