MAV̄INGIZI-RISALA 28

Ɓaulusu hari mwa ishisiwa ya Malta

1Ɓaanda rahuyiha v̄ale, ripara amba ishisiwa ile uhiriwa Malta. 2Wanyeji warionesa uwema wa midjuza halisi, warikariɓisa hari mwa moro muɓole waka wauvudza, mana vua yakoshuka, tsena v̄uka ɓaridi. 3Ɓaulusu arundria wana miri ya kuni, akwendra ayitriye moroju; ɓas, ha siɓaɓu ya livushe la umoro, v̄ulawa nyoha, imulembea umuhono. 4Wakati wanyeji waona inyoha iv̄o yalembea muhonoju hahe, waambiana: «Ɓila shaka amba mutru unu, waye muula, mana iHaki kayamulisha aẽshi, ata wala ukana avuku na iɓahari.» 5Ɓadi Ɓaulusu ahukutra shinyama ile moroju, wala karendra ata trongo. 6Watru wale wakodzilindrilia amba azimbe au awe, afe ha hafula. Ɓadi ɓaanda walindra wakati mwengi wala kawamuona amba aparwa na trongo mbovu, wagaudza fikira, warongoa amba waye mungu.

7Na mukaɓala ule v̄uka mazamba yaka ya mutru akohiriwa Ɓibliusu, djukuma hari mwa ishisiwa ile. Arikariɓisa ɗagoni hahe shi wandzani, ariladza suku traru. 8Ɓaɓahe wa Ɓibliusu aka shitrandrani na ɓuhuo, amwesa akokodza mimba ya ɓawaswili. Ɓaulusu andre amuono, amia Mungu na umukadzia yimihono, amuzihira. 9Ɓaanda ya v̄ale, wawaɗe wangina wa ishisiwa ile waja wajau, wazihiriwa. 10Wariv̄a sheo ha uwengi, tsena wakati rakolawa, waritamania izo zaka zarilazimu.

Musafara wa Ɓaulusu rangu Malta ata Romu

11Ɓaanda ya mezi miraru, ripashia djahazi ya shi Aleksandriya laka lav̄itsa uwakati wa ɓaridi shisiwani v̄ale, lakana ãlama ya Miungu ya Mbiliju#28:11 Miungu ya Mbiliju: V̄anu Kastori na Poluksi ɗe warongolwao, wana mbiliju hari mwa zihale za shi miungu ya masanamwe ya yaMagiriki. Hari mwa uwakati ule watru wakofanya hazi ɓaharini wakowaona amba wakosalimisha mav̄ingizi-marikaɓu.. 12Rishukia Sirakuza, riketsi suku traru. 13Rangu v̄ale rirambadzia ata riwaswili Regiyumu. iSuku yaɗunga pev̄o ya swihilini ihimi, ata hari mwa suku mbili rifanya indzia ata ringia Puziyoli. 14V̄ale ripara wananya wa shi uaminifu, warimia riɓaki v̄umoja na wao suku saɓa. Ɗe ha inamuna iyo ɗe rawaswili Romu. 15Wakati wananya wa shi uaminifu wa liɗago lile wakia ihaɓari ya umuwaswilio watru, v̄wa waja waripara Ɓazari ya Apiyusu, na wangina hari mwa liɓandza la ziNyumba Traru za Wadjeni. Uwaona yahe, Ɓaulusu amushukuria Mungu, tsena angia ɓari. 16Ata ramowaswili Romu, Ɓaulusu aruhusiwa aketsi weke na djeshi limugogeye.

Ɓaulusu ɗagoni Romu

17Suku traru uv̄ira yazo, Ɓaulusu ahiri makizi-mbeli ya Mayahudi. Ungulidzana yawo, awaambia: «Wananyangu wala ukana tsafanya trongo itsokao yotsi kinyume na inishani yatru, wala zimila za wadzaɗe watru, tsiɓaliwa shiv̄ani Yerusalemu, tsena tsiv̄elehwa mihononi ha Maromu. 18Ɓaanda wanitafiti, wakotsaha wanijeledze, mana kawanipara na trongo itsokao yotsi yastahiki uulawa. 19Ɓadi yaMayahudi waharalia itrongo, ata ika farudhwi ya wami utsaha ihukuma ya Kaiswara, wala tsi ha nia ya ushitaki inishani yangu na trongo itsokao yotsi. 20Ɓasi iyo ɗe imana ata natsaha nimuoneni, nilaguwe na wanyu. Ɗe ha siɓaɓu ya itama ya Israila ɗe nilio hari mwa isilisili ini.»

21Wamudjiɓu: «Wasi karapara ulawa Yudeya ɓarua litsokao lotsi lahuhusu, wala kav̄waja ata moja hari mwa wananyatru ahusaliti au ahurongolea mbovu. 22Ɓadi risuona afudhwali rihuvulishiye wawe yaho na zifikira zaho, mana risujua amba ishama iyo isukanyushiwa kula v̄ahanu.»

23Wafungu uparana suku, tsena waja ha uwengi zaidi wamupara nyumbani hahe v̄ale. Rangu asuɓuhi ata utswa ya lijua, Ɓaulusu awaeledza na uwatolea ushahidi Utawalizi wa Mungu, na uzunguha ulawa rangu iSharia ya Musa na yimitrume awav̄inge ata wakuɓali izo zahusuana na Insa. 24Ɓaãdhwi wakuɓali zitrongo akozirongoa, ɓadi wasalia kawaamini. 25Ɓaanda wakwendra dzawo ɓila uwafikiana, Ɓaulusu arongoa zini: «Kweli yamarongozi iRoho Ndzitwaharifu yakoambia maɓaɓanyu ha ndzia ya mutrume Izaya:

26‹Endra ha umati uwo, wauambiye:

«Mutsoka na ukia, wala kamutsoelewa,

mutsoka na uangalia, wala kamutsoona.»

27Mana umo wa umati uwo ufu guru,

wadziulu yamakio, tsena wadziɓala yamatso,

ile pare matso yawo yasuone, na makio yawo yasukiye,

wala umo wawo usuelewe,

tsena ile wasunizingiye naja nawazihira.› »

28Amwesa Ɓaulusu awaambia: «Ɓasi namujuwe amba ukombozi wa Mungu uwo uv̄elehwa ha watru wa zinishani zangina, na wao watsovulishia.» [29Uhisa yahe urongoa zile, Mayahudi yale yandre dzawo na mashindrano mahali wao na wao.]

30Ɓaulusu aketsi maha mili yatsimu moni na nyumba aka aiwadjiri; akokariɓisa piya wao wakoja wamuone. 31Akojudza uUtawalizi wa Mungu na usomedza zapatana na Raɓi Insa-Kristi ha uhodari watsimu, ɓila udhuri utsokao yotsi.

Currently Selected:

MAV̄INGIZI-RISALA 28: swb

Highlight

Copy