MATTHEW 6

Aveküsami Kuphulo

1“Mthamini nongu ye timi pelo ithulu peniye aküpülü khuaye nongu no papelu chekeu pesü aqha zülono shipiyelu nosake tsükhüi lo, nongu no tishi aye kungugha lo nongu Papu launo ajume ithulumae.

2“Ikehu, kughou nono aveküsami kuphuni keno, khilemu o fuko küigha ghi shikevilo,#6:2 Hipa kiqi ye aqha zülono asheshu ajepipi keu piani ti ye keghilishi kemi no timi pelo sheqhe peniye sinagog eno alaghila lono tishi cheni. Kuchou no I no nongu vilo piani, panongu ye pano jume ithulu khavae. 3Ikemu kughou nono aveküsami kuphuni keno, o u ajeu no kiu shiani keno o u piyiu pelo ithipe kevilo, 4tishianguno nono tsü akeu ye tuqhou vehu shilu nani. Eno tuqhou no ithulu chekeu o Pu no ajume o tsü nani.

Ampeu Kighini

(Lk 11:2-4)

5“Eno kughou nongu no inikhuni keno, khilemu keghilishi kemi toi kevilo. Kughengu panongu ye timi pelo ithulu peniye sinagog lo eno alaphe lo puthugho no inikhuni keu no pano lokütü cheni. Kuchou no I no nongu vilo piani, panongu ye pano jume qhoi ithulu khavae. 6Ikemu kughou nono inikhuni keno, o chebo lo ilolo eno aki khaveno tuqhoushi achekeu o Pu lau inikhu lo. Eno tuqhou no ithulu chekeu o Pu no ajume o tsü nani.

7“Kughou nongu no inikhuni keno, khalaumi toi akiqi küha keu tsa chilo pi kevilo, kughengu panongu ye atsa kutomo eno kushuo pikeu huno Alhou no chilu tsü nanie pi kümsü cheni. 8Panoqo toi shikevilo, kughengu nongu no kiu avehupu shiani keno nongu Papu lau khumphi züuno Pa ye qhoi ithi anie. 9Tishiaye hitoi inikhu lo:

“O ni Pu kungugha lo küau,

O je akimthe shilo,

10O yekipe ighilo,

kungugha lo toi ayeghi lo ghi

O pulou shilo.

11Tsalakipe chuqupu ishi tsala lo ningu tsülo,

12eno ni lau alhoksa shikeqo kipimi nino pevetsü ketoi,

ningu kipimi ghi peve tsülo.

13Eno ghukuju lo ningu sailotsü kevilo,

ikemu alhoksau launo ni xaphe tsülo.”

14Kughengu kütami no nongu shou axine shive kelo nongu no pano kipimi pevetsü aye, nongu Papu kungugha lo akeu ghi nongu kipimi pevetsü nani, 15ikemu nongu no kütami kipimi peve tsümo aye, nongu Papu ghi nongu kipimi peve tsümo nani.

Kümvükeu

16“Kughou nongu no kümvüni keno keghilishi kemi toi nongu ye khümüi keu ju piye kevilo, kughengu panongu ye kümvü anie pi timi pelo ithulu peniye panoqo gi mu phamono thibui piye cheni. Kuchou no I no nongu vilo piani, panongu ye pano jume qhoi ithulu khavae. 17Ikemu kughou nono kümvüni keno, o gi phave no thazü pesü o kütsü lo nuvelo, 18tishianguno tuqhoushi achekeu o Pu nguno alau ye nono kümvü akeu kütami no ithulu monani. Eno tuqhou no ithulu chekeu o Pu no ajume o tsü nani.

Kungugha lo Akini Pekütsülo

(Lk 12:33-34)

19“Nongu ghenguno khile apila ngo ayisa no shipüsave cheni eno küpkami no hepho ilo xüleve cheni keno, ayeghi lo nongu kini pekütsü kevilo, 20ikemu nongu ghenguno khile apila ngo ayisa no shipüsalu chemo eno küpkami no hepho ilo xülemla keno, kungugha lo nongu kini pekütsü lo. 21Kughengu o kini no khile ani keno, o mlo ghi tile anani.

22“Anhethi no aphimpi lo akulu ke. Ikehu o nhethi no tsüghükhüi aye, o phimpi kuchopu aküvü likhi nani, 23ikemu o nhethi no alhoksa shiaghi aye, o phimpi kuchopu aküzü likhive nani. Tishiaye o lolo aküvü akeu huno aküzü shive aye, kishita aküzü kije shinia kelae!

24“Khunomu ampeu kini qeküqha mlae, kughengu pa ye lakhi mithive no lakhiu kimiye nani, momu lakhi qhoqhü no lakhiu thogha nani. Nongu ye Alhou ngo küakini qeküqha mlae.

Kütakihi Kevilo

25“Tighenguno I no nongu vilo piani, nongu ye xüani ke ghenguno kiu chuni momu kiu shoni, moaye nongu phimpi ghenguno kiu pepuni kelapi amlo kütakihi kevilo. Aküxü ye achuqupu nguno akijeu eno aphimpi ye aphimini nguno akijeu kekumo? 26Atsütsü lo aghauqo julo: tipaqo ye apiti yisü chemo keke ghile huchemo momu ale lo pekütsü chemoe, ikeghi kungugha lo nongu Papu no tipaqo loji cheni. Nongu ye aghauqo nguno ameküapu kekumo? 27Nongu gholo khuu no amlo kütakihi keu lono pa küxü lo asüchedo lakhimu süküpha lunani kea? 28Eno nongu ye kushiye aphimini ghenguno amlo kütakihi cheni kea? Aluza lo lapu xamunu no kishi thuwu cheni keno kümsüju lo: panoqo ye ichheime aphimini gho chemoe, 29ikeghi I no nongu vilo piani, Solomon ghi pa küakini no qhivütsünyi anamu axamunu hipaqo toi jukighilepu shi pepumoe. 30Tsala alupi ishi ye xüa no thoghiu ye nhüpe ami lo vesüveni keu thotsü Alhou no jukivi shi tucho cheghi aye, Pa ye tinguno alau nongu tucho nani, O nongu aküpülü mikhelo keqo. 31Tighenguno nongu ye amlo kütakihi ishi pi kevilo, ‘Ningu ye kiu chuni kea?’ momu ‘Ningu ye kiu shoni kea?’ moaye ‘Ningu ye kiu pepuni kea?’ 32Kughengu thime hipaqo ye Alhou kümthami no akhotoshi phu acheni, eno kungugha lo nongu Papu no nongu ye hi kümtsü avehupu shiani kepi ithi ani. 33Ikemu atüghüshi Alhou yekipe eno Pa mikucho phulo, eno thime hi kümtsü pesü nongu lau küphatsü nani.

34“Tighenguno thoghiu ghenguno amlo kütakihi kevilo, kughengu thoghiu no tipa sala kütakihi kepu aphike. Atsala lo aküküpna sholu akeu no tipa tsala ghenguno lukümkhae.

Currently Selected:

MATTHEW 6: SUMRVBSI

Highlight

Copy