MATTHEW 5

Naghuto lo Kükütsü

1Aqokitikhi ithulu no Jisü no naghuto lakhi lo iqhove, eno iqa akelo pa khopemi no pa lau ighi.

Lokivipu Kükümgha

(Lk 6:20-23)

2Tileno pa kichi xükhope pa no timiqo kütsüshika thuve:

3“Aghungu lo kumlhomi shikemi kümghapue, kughengu kungugha yekipe ye panow ke.

4“Khunono mloqa cheni keno akümghapue, kughengu panongu lokughuno tsünani.

5“Mtshaivü kemi kümghapue, kughengu panongu no ayeghi mheghi ighilu nani.

6“Achipiu mikucho ghenguno khunono müzü tüghü cheni keno akümghapue, kughengu panongu ye aghaqi qhiyilu nani.

7“Kimiyeqhiyi chekemi kümghapue, kughengu panongu ye kimiyeqhiyi keu ithulu nani.

8“Amlo tsüghükhüi kemi kümghapue, kughengu panongu no Alhou ithulu nani.

9“Külakishimi kümghapue, kughengu panongu ye Alhou tianuli ipi ku nani.

10“Achipiu mikucho ghenguno khuno ghimeni keno akümghapue, kughengu kungugha yekipe ye panow ke.

11“Kughou I je ghenguno kütami no nongu thaigha, ghimeqhi eno akumou lono nongu lau atsa lhoksa pipukuni keno, nongu ye akümghapue. 12Alovilo eno amlokiqi shialo, kughengu kungugha lo nongu saxü ye kije ani, eno nongu lau shike toi panongu ye nongu züu tungkupmi ghi ghimeqhi püanike.

Küpülümi ye Amti eno Aküvü

(Mk 9:50; Lk 14:34-35)

13“Nongu ye ayeghi lomi miti ke, ikemu amti no aküqhü kühave aye, kishino ti ye qhümzai kithelu peni kea? Ti ye kiumu avehu kühave no ikhipe apukhu no nedave cheni.

14“Nongu ye ayeghiqha küvü ke. Atoghi lo aphughi akeu ye küsüve mlae. 15Tike kumono timi ye akulu küqüpe ali no qhove chemoe, ikemu akibepu lo qhino aki lo akemi kümtsü lau aküvü tsü cheni. 16Tipaphi lono, kütami zülo nongu kulu vüqailu pelo, tishikeu lono panoqo no nongu kümla kivi ithulu no ajuküvü pesü nongu Papu kungugha lo akeu tsü nani.

Ayezah Shikupu nike Ighi

17“Ni ye Moses vecheo tsükeu Yezah momu Tungkupmi no pikeu kubove tsüniye ighie pi kümsü kevilo; I no ighikeu ye tipaqo kubove tsünike kumono shikupu tsüniye ke. 18Kughengu mtsüqheino I no nongu vilo piani, atsütsü eno ayeghi no hauve moke kutolo, Ayezah lo kiyethi akulotiu, momu choküsü lakhimu shikupu khamoke kutolo hauvemo nani. 19Tighenguno khukhumu azakütsü hipaqo dolo akimkheu mu kughuchove no kütami ghi titoi shika piye cheghi keu ye kungugha yekipe lo akitilau shi kihi nani, ikemu khuu no tipaqo pekupulu no kütami vilo ghi pelu penike pini keno kungugha yekipe lo akijeu shi kihi nani. 20Kughengu I no nongu vilo piani, nongu no Ayezah kükütsümi ngo Phariseemi nguno alau Alhou lopushi amikucho shilumo kelo nongu ye khilemu kungugha yekipe lo ilolumo nani.

Amlokighide

21“Khaghilo timiqo vilo piche keu nongu no chiluve ake, ‘No ye timi pithi kevilo; khukhumu timi pithive keu ye küghaküthapu lo ilo nani.’#Ipe 20:13; Zak 5:17 22Ikemu I no nongu vilo piakeu ye khukhumu pa thiküzümi shou amloide keu ye küghaküthapu lo ilo nani; eno pa thiküzümi thaigha keu ye hoho lau khochile masa nani; eno itaghi khukhumu kütami vilo ‘No aghüzüu’ ipikeu ye aghimepu mi pesü küghatha nani. 23Ikehu nono o kümllagho pesü akümlla-khache lo ighi kelo tileno o thiküzümi no o lau amlo kishikumo akeu nono kümsülu aye, 24o gho ye tile akhache lo qhipüaghi no wulo. O thiküzümi sasü külashi luve paghilo, tithiu no ighi no o gho pesü mlla lo. 25Khuana no nguku keu lono o sasü küghaki lo wu aye, no ye ala lonomu pa sasü pekithi luvelo, tikumo aye o nguku akeu no o küghape küghaküthau tsüve no tilauno ghukhemi no o pesü akughu shive nosae. 26Mtsüqheino I no o vilo piani, nono pisa kuhu aghulou kutolo tsükhamo kelo no ye khilemu ipeghi lumo nani.

Amlo lono Jumine

27“Ishi piche keu nongu no chiluvae, ‘No ye salha kevilo.’#Ipe 20:14; Zak 5:18 28Ikemu I no nongu vilo pi akeu ye khuu no mineqhiyi kütami nipu juni keno pa mlo lou no li sasü kütüqhavae. 29O nhethi ajeu no o pelo axine shipe cheghi aye chixejope pevelo. Kughengu o phimpi kuchopu amiyizü lo ilove kepu ye o philo asaje lakhi pühave keu pavi. 30Tsala o u ajeu no o pelo axine shipe cheghi aye ghithape pevelo. Kughengu o phimpi kuchopu amiyizü lo ilove kepu ye o philo asaje lakhi pühave keu pavie.

Aküghüxa

(Mt 19:9; Mk 10:11-12; Lk 16:18)

31“Itaghi ishi pi püani, ‘Khukhumu anipu sasü ixaveni keu ye aküghüxa shepe pa nipu tsüvelo.’#Zak 24:1 32Ikemu I no pi akeu ye khileala anipu no kütami sasü kütüqhave kelono kumo aye khukhumu anipu sasü ixave keu ye pa no li pelo kütüqhaliu shivepe ae, eno khukhumu ixave keu totimi sasü külave keu ghi kütüqha anie.

Ashoqhi

33“Itaghi khaghi lomi vilo pikeu nongu no chiluvae, ‘No ye akumou lono tushoqhi kevilo, ikemu Ampeu lau nono kiu tushoqhi püani keno athoshi papelo.’ 34Ikemu I no nongu vilo piani, kiu shoqhimu shi kevilo, tike kumono kungugha mu jeku kevi, kughengu ti ye Alhou lakhü-a ke, ayeghi mu jeku kevi, kughengu ti ye Pa pukhu kinepu-a ke, 35momu Jerusalem namu jeku kevi, kughengu ti ye Akükau akijeu phughi ke. 36O kütsü mu pesü tushoqhi kevilo, kughengu no ye asathi lakhi mu pesü metsüghoi momu tsübui shivetsü mlae. 37Nongu ye ‘Iyei’ pi kepu lo mtsümishei ‘Iyei’ pive, momu ‘Moe’ pi kepu lo ‘Moe’ pivelo, hinguno alau ye alhoksau launo ighi cheni.

Amkhükulu

(Lk 6:29-30)

38“Ishi pikeu nongu no chiluvae, ‘Anhethi theli lo anhethi, ahu theli lo ahu.’#Ipe 21:24; Achi 24:20; Zak 19:21 39Ikemu I no nongu vilo piani, alhoksami mjochile kevilo. Ikemu khuana no o gimuchu ajeu ghatsü aye, tüxau ghi pa lau kugho puwo tsülo. 40Eno khuana no o sasü atsakügha no o phiküzü luvetsü kepu shiaye, pa pelo ow hebephi ghi luve pelo. 41Itaghi khuana no anguka lono o pelo pa kho xapusü kilometer kini wupe aye, nou no pa sasü kilometer bidi mu wuvelo. 42Khuana no o qhüiniju khu ighi aye tsülo, eno o lau tüsütüna shi ighi kelo mili kevilo.

O Ghümi Kimiyelo

(Lk 6:27-28,32-36)

43“Ishi pikeu nongu no chiluvae, ‘O kisüghümi kimiyelo eno o ghümi ye mithilo.’ 44Ikemu I no nongu vilo piani, No ghümi kimiyelo eno khunono nongu ghimeqhi cheni keno, panongu ghenguno inikhu tsülo, 45tishikeu lono nongu ye khuu kungugha lo ani keno nongu Papu tianuli kepi piyelu nani. Kughengu khetsünhe ghi Paw ke Pa no tsütsüni pesü alhoksami ngo akivimi lau tsücheni, eno tsütsüghu pesü müzüchoi kemi ngo ihoghülai kemi lau puwu tsücheni. 46Kughengu nongu kimiye kemi likhi nongu no kimiye aye, tile nongu saxü kiu anani kea? Yepekaw zame küqhamiu ghi tishi chenike kumo? 47Eno nongu no ithikile kemi athiküzü achelimi lau likhi agi küvüshi petha shiaye, nongu ye kütami nguno alau kiu shilu ani kea? Khalaumiu thotsü tishi chenike kumo? 48Tighenguno kungugha lo nongu Papu no kupukülai ketoi nongu ghi kupukülai masae.

Currently Selected:

MATTHEW 5: SUMRVBSI

Highlight

Copy