MATTHEW 7

Kütami shou Küghathabe

(Lk 6:37-38,41-42)

1“Kütami shou küghathabe kevilo, tishiaye nongu shou küghathabe monani. 2Kughengu nongu no küghathabe keu kiqi lono nongu shou küghathabe nani, eno nongu no akimghipu peitha keu qhemi lono nongu mighiju nani. 3Kushiye o thiküzümi nhethi lo amihi akeu ye ithulu cheni püzü o nhethi lo asülu akeu ye ithi move cheni kea? 4Momu o likhi o nhethi lo asülu apülaghi no ye kishino o thiküzüu vilo, ‘O nhethi lo amihi akeu I no shipheve tsüni,’ ipi luni kea? 5No kühaküghau, atüghüshi o nhethi lo asülu ikhipheve lo, tithiuno amihi ikhiphe nike nono mtsümishei ithulu nani.

6“Thime kiu no akimthe keno pesü atsüqo tsü kevilo, eno mlapuchi pesü awoqo zülo veqhitsü kevilo, tikumo aye tipaqo no kütsave tsüno nongu mikiqhi nosae.

Khulo, Phulo, Kukhulo

7“Khulo, eno ti nongu tsü nani; phulo, eno nongu no phulu nani; kukhulo, eno nongu lau khaqhitsü nani. 8Kughengu khukhumu khukeu no ithulu cheni, phukeu no ithulu cheni, eno kukhu keu lau khaqhitsü cheni. 9Momu nongu gholo khuu no, tsala anu no asho khu aye atu pesü tsü nani kea? 10Momu akha khu aye, apighi pesü tsü nani kea? 11Nongu alhoksami thotsü kishi thime kivi pesü nongu tianuli tsükepu keno ithi aghi aye, khuu kungugha lo ani keno, nongu Papu huye Pa vilo khukeqo lau tinguno alau tsü nani.

Ameküa Khuaye

12“Ikehu kütami pelo o lau kiu shipenishi kümsü cheni keno, nou ghi titoi panoqo lau shilo, kughengu hi no Ayezah ngo Tungkupu kaku shekuho tsake.#Lk 6:31

13“Kibikhoi keu khagho lono ilolo. Kughengu ililai keu khagho eno mlalei keu la ye kütsakungo keu lo sawuve cheni, eno kutomo no tipa laghi lono ilo cheni. 14Ikemu kibikhoi keu khagho eno kushokütsü la no aküxüpu lo sawu cheni, eno tipa la phulu kemi ye aghulo likhie.

Axathi vecheo Asübo Ithi nani

(Lk 6:43-44)

15“Kichile tungkupmi khunoqo ashou ye ambe yiko xapu ikemu alou ye tüngtügha yiküsa toi ighi cheni keno, nongu ye tipaqo jukutolo. 16Nongu no panoqo xathi vecheo ithi nani. Atsaithi ye asahubo lono xolu cheni keo, moaye koghesahubo lono mubuthi xolu cheni kea? 17Tihutoi, asübo kivi no axathi kivi pithi cheni, ikemu asübo lhoksa no axathi lhoksa pithi cheni. 18Asübo kivi ye axathi lhoksa pithi mlae, momu asübo lhoksa ye axathi kivi pithi mlae. 19Asübo khipaqo no axathi kivi pithi moni keno qhoi yeqhipe ami lo vesüve cheni. 20Ikehu nongu no tipaqo xathi vecheo ithi nani.

Ni ye Khilemu Nongu Mthae

(Lk 13:25-27)

21“I vilo, ‘Ampeu, Ampeu,’ ipi kemi kümtsü no kungugha yekipe lo ilo lunike kumoe, ikemu khukhumu I pu kungugha lo akeu pulou shicheghi keu huno ke. 22Tipa tsala lo kutomo no I vilo pi nani, ‘Ampeu, Ampeu, ningu ye o je lono Alhou tungkuptsa pi, o je lono tüghamiqo haphe, eno o je lono akümzapu kümla kutomo shipüani ke kumo keshea?’ 23Tileno I no panongu lau shuphe nani, ‘Ni ye khilemu nongu mthae; nongu ayezah heküxamiqo, I launo chevelo.’

Atu Shou Nongu Ki Shiqhelo

(Lk 6:47-49)

24“Tishiaye khukhumu I tsa hipaqo chilu no pekupulu keu ye alokütsümi lakhi no atu shou pa ki shiqhe keu toike. 25Tsüqhu-tsüghu ighi, atshünazü ighi, eno amülhü no aki tipau lo fupuku, ikemu ti ye atu shou shipüa kehu ikiqi moe. 26Khukhumu I tsa hipaqo chilu no pekupu move keu ye mbomzümi lakhi no asaye shou pa ki shiqhe keu toike. 27Tsüqhu-tsüghu ighi, atshünazü ighi, eno amülhü no aki tipau lo fupuku, ikelo ti ye ikiqive, eno mzamghalei ikiqi qhoi kütsa khave.”

Jisü Kükagha

28Kughou Jisü no atsa hipaqo pive keno, aqokitikhi ye pa no kütsü keu chilu no akümzave, 29kughengu Ayezah pesü panoqo kütsü chekemi toi mono pa ye kükagha akemi toi panoqo kütsü ke.

Currently Selected:

MATTHEW 7: SUMRVBSI

Highlight

Copy