MATTHEW 27

Pilate lau Jisü Sawu

(Mk 15:1; Lk 23:1-2; Jhn 18:28-32)

1Inaqhe itheno achinetomi ngo Jewmi layemi kümtsü no Jisü pithive nike ghenguno kughu. 2Panongu no pa tshüve no sawo Angh Pilate tsüve.

Judas Kithi

(Apo 1:18-19)

3Kughou Jisü thekuchuu Judas no Jisü ye pithive niye shivae pi ithi keno pa ye amlo kilive eno achinetomi ngo layemi lau ghükayi shighi pechile ighi, 4eno pi, “Küqümo keu timi thechuve keu lono I no axine shivae.” Panongu no khochile, “Nino kiu shitsü lopi kea? Ti ye o makhoae.” 5Judas no ghükayi pesü achineki lo vesüve tsüno ipeve, eno pa ye wuno pa likhi pa tshüqhi pithive. 6Achinetomi no pisa kiche pesü pi, “Hi ye aküxü qhükeu me#27:6 Momu aji pisa keke achineki kinibo lo pekütsü kelau kumoe.” 7Ikehu panongu no pulo küqha no shoinami kumo kuqho-a shitsüni ye pisa tipau pesü ali kümlami lu qhüve. 8Tighenguno alu tipau pesü ishi kutolo Aji no qhükeu Lu ipi cheni. 9Tishikeu lono tungkupu Jeremiah no kiu pipüa keno kimshi luve: “Panongu no ghükayi shighi ikhiluve, ti ye Israelmi khami no pa pesü jekimjeve keu me ke, 10eno Ampeu no I kichetsü ketoi, panongu no tipau pesü ali kümlau lu qhüve.”#Zec 11:13

Pilate Zülo Jisü

(Mk 15:2-5; Lk 23:3-5; Jhn 18:33-38)

11Jisü no Angh zülo puthugho akelo Angh no pa vilo pi, “No ye Jewmi Kükau keshea?” Jisü no khochile, “Nono pivae.” 12Ikemu achinetomi ngo layemi no pa nguku kelo pa ye kiumu khochile moe. 13Ikehu Pilate no pa vilo pi “Panongu no hi kümtsü pesü o nguku akeu no ye chilu anima?” 14Ikemu Jisü no atsa lakhimu khochilemo, ikehu Angh ye shishe akichiqhive.

Jisü Pithive nike Xathave

(Mk 15:6-15; Lk 23:13-25; Jhn 18:39-19:16)

15Hechekulu Ghulhu atsütsü Angh no timiqo no lunishi keu kiqi lono akughumi lakhi khaqhiphe tsüche. 16Tipa ghuloki lo akughumi lakhi alhoksa lono ajekipimi Barabbas ipikeu ae. 17Ikehu timiqo no kumqo akelo, Pilate no panoqo vilo pi, “Nongu ye I pelo Barabbas keo Messiah ipi chekeu Jisü khaqhi phetsü penishi ani kea?” 18Panongu ye Jisü ju anheshu kelauno ikhiphepe tsüvae pi Pilate ye ithi ae. 19Tilikhi kumono Pilate no küghakütha lakhü lo iqa akelo pa nipu no atsa lakhi pa lau pi puwu, “Amikuchomi tipau shou kiumu shikevilo, kughengu iji I samou no ni ye pa ghenguno shishe imevae.” 20Ikemu achinetomi ngo layemi no aqokitikhi hakilhepe Barabbas kuqhove no Jisü pithive penike Pilate vilo khue. 21Angh no itaghi panoqo vilo pi, “I pelo hi pama dolo khikhiu nongu lau khaqhi phetsü penishi ani kea?” Ikelo panongu no khochile, “Barabbas.” 22Pilate no panoqo vilo pi, “Tishiaye Messiah ipi chekeu Jisü pesü ni ye kiu shilopi kea?” Timi kümtsü no pi, “Kros lo pa yedave lo!” 23Tile Pilate no pi, “Kushiye kea? Pa ye kiu lhoksa shive kea?” Ikemu panongu no alaushi ighamku, “Kros lo pa yedave lo!”

Jisü Yedave Penike Tsüve

24Kughou Pilate no pa ye kiumu shimlave keu ithive, eno halau no mqhumza ipeghiuve keno, pa no timiqo zülono azü pesü pa u mütsüve no pi, “Timi hipau ji pelekeu lo I kipimi kühae, hi ye nongu makhoae.” 25Timi kümtsü no khochile, “Timi hipau ji peleve keu ngusü ye ni shou eno ni tianuli shou ikughi peni!” 26Tishino Pilate no panoqo lau Barabbas kuqhophe tsü, eno Jisü küghape ghaqhi püzü yedave penike ikhiphe tsüve.

Jisü Thaigha

(Mk 15:16-20; Jhn 19:2-3)

27Tileno Angh ghüshimi no Jisü sasü Anghw oking lo wuve, eno ghüshimi aqokitikhi sawo pa süho luve. 28Panongu no pa phimini xavetsü no hughüike phi pa puu, 29asahubo ghoküna keu kütsükuqho pesü pa pipe, pa u ajeu ayeghü küsü sütsü. Eno pa zülo qhoqhünhepe pa thaigha, “Jewmi Kükau, axü pushulo!” 30Panongu no pa müsüte eno ayeghü küsü pesü pa kütsü lo ghatsüe. 31Pa thaigha tave kethiu, panongu no hughüike phi xaluve, eno pa phimini puuve no yeda nike sünhe sawuve.

Kros lo Yedave

(Mk 15:21-32; Lk 23:26-43; Jhn 19:17-27)

32Panongu no wuche kelo Cyrene noghami Simon ipikeu sholu. Ghüshimi no anguka lono pa pelo Jisüw kros xapupe. 33Kughou panongu no Golgotha (tipau kiqi ye Aboghe-a) ipikeu-a lo ighi keno, 34pa pelo sho penike atsaiji gholo akukhu lekiteve keu pesü pa tsü kemu pa no micheju no yemove. 35Panongu no kros lo pa yedave no asaqhi püzü pa phimini pano dolono kije luve. 36Tishino tile iqa ghi pa khekuto ae. 37Panongu no pa kütsü sholo akipimi tsükeu ishi yepe qhitsü, “Hi no Jewmi Kükau Jisü.” 38Panongu no timi heqhi buqhi no süxaluve chekemi kini Jisü gholono kros lo yeda, lakhi no pa u ajeu eno lakhi no pa u piyiu. 39Tipau vechesü wuche kemi no pano kütsü küngü ghi Jisü thaigha, 40eno pi, “No achineki xaleve no ghulo küthü lono shipuku luveni küau, no ampi xaluve lo! Nono Alhou Nu shiaghi aye kros lono iqighive lo.” 41Tipaphi lono achinetomi ngo Ayezah shikükami eno layemi no pa thaqhi pi, 42“Pa ye kütami xalu kemu pa ampi ye xamlae. Pa ye Israel Kükaue; itehi pa no kros lono iqighive aye ningu no pa shou pülübeni. 43Pa no Alhou shou pükhübe chenike Alhou ye pa xapheni shinani mala junie. Kughengu pa no, ‘Ni ye Alhou Nu,’ ipi chenie.” 44Timi hekiqhimi pa gholo yeda püakeu pama ghi kütami gholono pa thaigha.

Jisü Kithi

(Mk 15:33-41; Lk 23:44-49; Jhn 19:28-30)

45Tile puchou mta lono avelau ayi küthü kihe kutolo ayeghiqha kümtsü aküzü no nhaluve. 46Avelau ayi küthü qhau Jisü no aghügha kuloghi shi igha, “Eli, Eli, lema sabachthani?” ti ye, “I Lhou, I Lhou, No ye kushiye I pheve ani kea?” 47Tile puthugho akemi khami no ti chilu no pi, “Pa ye Elijah ku anie.” 48Panongu lakhi no mtazü posü wuno aghüshi pesü akiqhi ji lo pütsü püzü ayeghü lono jipe pa pelo müsüye penike chhopuku tsü. 49Ikemu kütami no pi, “Qele, Elijah no ighi püzü pa xaluni mala junie.” 50Jisü no itaghi aghügha kuloghi shi igha no süthauve.

51Eno julo, achineki lo kokütha tozü shi nhaqhiphi achekeu ye akütsüqa lono abophi kutolo ala kini shi ixü kütüta shive. Tishino ayeghi itha thuve eno atuquqo no ipo kütüta shive. 52Akumokiqo lhapheve eno küpülümi thive keqo kutomo xüputhuve, 53Jisüw xüchilekulu thiu panongu no akumoki lono ipeghi no akimthe phughi lo ilo eno timi kutomo lau ipeghi piye. 54Ghüshimi aqhe shou zatsüu eno pa gholo akeqo no Jisü khekuto akelo ayeghi küghütha eno tile kiu shive keno kümtsü ithulupe thüghüive no pi, “Pa ye kuchou no Alhou Nue!”

55Tilehi totimi kutomo no putou ngono juae, panongu ye Galilee lono Jisü pape ighi no pa tucho chekeqo ke. 56Tipaqo gholo Mary Magdalene, James ngo Joseph pama paza Mary eno Zebedee nu pama paza ishi ae.

Jisü Shiqhove

(Mk 15:42-47; Lk 23:50-56; Jhn 19:38-42)

57Kughou avelau shive keno, Arimathea lono kinimi lakhi Joseph ipikeu ighi, pa ghi Jisü papemi lakhie. 58Pa no Pilate lau wuno Jisü sükumo khu kelo Pilate no pa tsü penike azah tsüve. 59Ikehu Joseph no Jisü sükumo luve no phepheike phi kimthe pesü ti küzüve, 60eno pewo pa sala atuqu chhutha ilo akumoki kithe shipüa keu lo süve. Tishino pa no atupha kije tukulu sawo akumoki kulaghi khaveno wuve. 61Mary Magdalene ngo Mary lakhiu no tile akumoki ghüngü lo iqa ae.

Akumoki Kheu

62Tishiwo thoghiu, ti ye Sabbath tsala lo, achinetomi ngo Phariseemi no Pilate zülo ighi 63eno pi, “Akijeu, hu kühaküghau no xüaphi lono pikeu nino kümsülu ani, ‘Atsala küthü thiu ni ye ithughive nani.’ 64Tighenguno atsala küthü kutolo akumoki jukuto khe penike azah tsülo, tikumo aye pa khopemi no wuno pa kumo pükape wuve no timiqo vilo, ‘Pa ye akithi lono xüthuvae’ ipi nosae, tishive aye akimki ashekhau hi no atüghüu nguno alhoksau shiniae.” 65Pilate no panoqo vilo pi, “Aghukhemi sawu no kishekulu shi akumoki kheluve lo.” 66Ikehu panongu no wuno atupha shou amchipu shive eno aghukheu pesü tile qhive.

Currently Selected:

MATTHEW 27: SUMRVBSI

Highlight

Copy