MATTHEW 28

Xüchilekulu

(Mk 16:1-10; Lk 24:1-12; Jhn 20:1-10)

1Sabbath tsala thiu tüghakhani inaqhe vüqai ipeche kelo, Mary Magdalene ngo Mary lakhiu no akumoki juniye wu. 2Tile ayeghi küghütha kije ighi, kughengu kungugha lono Ampeuw kungumi iqighi no atulupha tukulove no tipau shou iqave. 3Pa koghe ye tsütsüpha toi eno pa phimini no mürasü toi metsüghoike. 4Ghukhemi no pa msa kelauno khokhoshi eno kithimi toive. 5Kungumi huno totimiqo vilo pi, “Msa kevilo, kughengu nongu ye kros lo yedave keu Jisü juniye chenie pi I no ithi ani. 6Pa ye hile kühae, pa no piveke toi pa ye xüthuvae. Ighilo, khile pa qhipüa keno julo. 7Tishino mtazü wuno pa khopemi vilo pa ye akithi lono xüthuvae pilo, eno pa ye nongu züuno Galilee lo wu cheae; nongu no tilau no pa ithulu nani. I no nongu vilo pikeu ithilo.” 8Ikehu panongu no akümsa ngo alokivi lono akumoki qhive no mtazü akhopemi vilo pinike posü wuve. 9Eno julo, Jisü no panoqo sasü kusholu no pi, “Aloino lo!” Panongu no ighi no pa pukhu tsüqüpe pa mlla. 10Jisü no panoqo vilo pi, “Msa kevilo; wulo eno I thiküzümi vilo Galilee lo wulo pilo, eno tilano panongu no ni ithulu nani.”

Ghukhemi Shepe

11Totimiqo no wuche kelo akumoki khemi khami no mishighüna lo ilo achinetomi vilo kishive keno qhoi pive. 12Achinetomi no layemi sasü kusho no kuchughuve, eno pisa kutomo pesü ghüshimi tsüve 13eno pi, “Timiqo vilo pilo, ‘Ningu no züake lono pa khopemi no putho lono ighi püzü pa sükumo püka pewuve.’ 14Tsala hi no Angh kini lo ilove namu nino pa vilo pikide küdaive no nongu pelo küpüna pemo nani.” 15Ikehu panongu no pisa luve no panongu vilo pike toi shive. Eno ishi kutolo Jewmi gholo hipa tsa pekishe acheni.

Jisü no Akhopemi lau Ipeghi

(Mk 16:14-18; Lk 24:36-49; Jhn 20:19-23; Apo 1:6-8)

16Akhopemi chighiqhaqhi no Galilee lo naghuto khikhi Jisü no kichetsü keno tipau lo wuve. 17Kughou panongu no pa ithulu keno pa mlla, ikemu khami ye lipive. 18Jisü no kupunu ighi no panoqo vilo pi, “Kungugha lo ngo ayeghi lo kükagha kümtsü I tsüvae. 19Tighenguno wulo eno shiye kümtsü pesü I khopemi shitsülo, Apu jeku, Anu jeku, eno Aghungu Kimthe jeku panongu baptiz shitsülo, 20eno I no azah nongu tsükeu kümtsü pelu penike panoqo shikalo. Eno julo, tiqheli shekha kutolo ni ye alhokuthu nongu gholo anani.”

Currently Selected:

MATTHEW 28: SUMRVBSI

Highlight

Copy