MATTHEW 26

Jisü Pithive nike Kuchughu

(Mk 14:1-2; Lk 22:1-2; Jhn 11:45-53)

1Kughou Jisü no hi kümtsü pitave keno, pa no akhopemi vilo pi, 2“Hechekulu Ghulhu shini keu ghulo kini likhivae pi nongu no ithi ani, eno Timi Nu pesü kros lono yedave penike pephe tsüveni cheni.”

3Tile achinetomi ngo Jewmi layemi ye achinetou Caiaphas kilo kumqo, 4eno küsüu no Jisü küghape pithive nike kuchughu küqhave. 5Panongu no pi, “Timiqo no mqhumza ipeghive nosake aghulhu ghuloki loye shimoni.”

Bethany lo Jisü Nukishe

(Mk 14:3-9; Jhn 12:1-8)

6Kughou Jisü no Bethany lo apüghau Simon kilo akeno, 7totimi lakhi no alabaster külabo lo amekusho xokütsüngü pesü pa lau ighi, eno pa no chusho akelono li no pa kütsü lo lepuku tsüe. 8Ikemu akhopemi no ti ithulu no axuideve eno pi, “Kushiye ishi kilheve ani kea? 9Hi ye ame kutomo no jepe kumlhomi tsükulupu shiae.” 10Jisü no ti vethaluve no panoqo vilo pi, “Nongu ye kushiye atotiu pünaqhi ani kea? Li ye I ghenguno jukighilepu shive tsüae. 11Kughengu kumlhomi ye alhokuthu nongu gholo anani, ikemu ni ye alhokuthu nongu ani chemoe. 12Li no axokütsüngü hipau I philo lepukuve keu ye ni shiqho nike kutotsü ayae. 13Kuchou no I no nongu vilo piani, ayeghiqha kümtsü lo khile khilemu hipa tsakiviu pikülha wu kelo, li kümsüchile lughi li no kiu shive akeno tighi piche nani.”

Judas No Jisü Thechu

(Mk 14:10-11; Lk 22:3-6)

14Akhopemi chighikini gholo lakhi, Judas Iscariot no achinetomi lau wu 15eno pi, “I no nongu pelo Jisü küghalu penike ikhiphe tsü aye nongu ye kiu I tsüni kea?” Panongu no ghükayi shighi pesü pa tsüve. 16Tithiu Judas ye Jisü thechuni ke adokivi phu thuve.

Hechekulu Ghulhu

(Mk 14:12-21; Lk 22:7-14,21-23; Jhn 13:21-30)

17Kholaqhi sümokeu Sho ghulhu tsala atüghüu lo akhopemi no Jisü lau ighi no pa vilo pi, “No ye ni pelo khileno Hechekulu Ghulhu o ghenguno kutotsü penishi ani kea?” 18Pa no pi, “Nongu ye aphughi lo timi lakhi lau wuno pa vilo pilo, ‘Shikükau no piani, I do ye kupunuve ake ni ye I khopemi sasü o ki lono Hechekulu Ghulhu ikhiluni cheni.’” 19Jisü no panoqo vilo pike toi akhopemi no Hechekulu Ghulhu kutove.

20Kijiliu shive kelo, Jisü no pa khopemi chighikini sasü chusho nike iqa. 21Panongu chusho akelo Jisü no pi, “Kuchou no I no nongu vilo piani, nongu gholo milakhi no I thechu nani.” 22Akhopemi no amlo imeuve eno lakhikhi no pa vilo pi thuve, “Ampeu, ti ye ni keshea?” 23Jisü no khochile “Khuu no pa u pesü I gholo akhu lakhi lono asho pütsü chu ani keno pa no I thechu nani.#Lesh 41:9 24Kuchoyesü lo pa ghili yepüake toi Timi Nu ye wuve nani, ikemu khuu no Timi Nu thechu keno pa hasapue! Timi tipau ghengu ye punu move keu pavini chekena.” 25Jisü thechu niye akeu Judas huno pi, “Rabbi, ti ye ni keshea?” Jisü no pa vilo pi, “Nono piluvae.”

Ampeu Ghulhu

(Mk 14:22-26; Lk 22:15-20; 1Ko 11:23-25)

26Panongu no chusho akelo, Jisü no asho ikhilu, eno shikimthi tsüve kethiu ti süphope pa khopemi tsüno pi, “Hi ikhipe chulo, hi ye I phimpi ke.” 27Tishino pa no ajukhu ikhilu, eno shikimthi tsüve kethiu tipau pesü panoqo tsüno pi, “Nongu kümtsü hi sholo, 28kughengu hi ye timi kutomo xine qhitsü nike peleve keu Iw puloshoqhi ji ke. 29I no nongu vilo piani, I Pu yekipe lono nongu sasü anileshi shomoke tsala kutolo, ni ye hipa tsaibo lo pekighi zü shomoae.” 30Panongu no ale lakhi pheve kethiu Olive Toghi lo iqhove.

Peter Ghili Azünatha Pi

(Mk 14:27-31; Lk 22:31-38; Jhn 13:36-38)

31Tile Jisü no panoqo vilo pi, “Itiji nongu kümtsü I qhive no pokhave nani. Kughengu ishi yepüani, ‘I no ambekheu ghiqhive nani, eno ambe loji ye apanaghave nani.’#Zec 13:7; Jhn 16:32 32Ikemu I xüputhuve kethiu I no nongu züuno Galilee lo wunani.” 33Peter no pa khochile, “Panongu kümtsü no o qhive namu, ni ye khilemu o qhimo nani.” 34Jisü no pa vilo pi, “Kuchou no I no piani, itiji awudu no igha mphilo, no ye ni mthae pi ghuthu küthü milive nani.” 35Peter no pi, “Ni ye o gholono thive kepushi namu o milive monani!” Akhopemi kümtsü no tishi pive.

Gethsemane lono Inikhu

(Mk 14:32-42; Lk 22:39-46)

36Tithiu Jisü no pa khopemi sasü Gethsemane ipikeu lo wuno panongu vilo pi, “I no hule wuno inikhu akelo hile iqa aghilo.” 37Pa no Peter ngo Zebedee nu pama pa gholo sawu, eno pa ye amlo ghime eno amlo kughuju shive. 38Pano küthü vilo pa no pi, “Ni ye thiveni keshi ighono amlo iju ani; hile ngolo eno I gholono khekuto lo.” 39Pa no kitila azüu wuno agi no ayeghi dape inikhu, “I Pu, shikulupu shi aye ajukhu hipau I launo ikhiluve tsülo; tishinamu I gho kumono o pulou shilo.” 40Pa no akhopemi lau ideighi kelo pano küthü ye zü aghive, tile pa no Peter vilo pi, “No küthü ye ayi kihedo lakhi I gholo khemlave keshea? 41Ghukuju lo ilovemo kepushi tsükhüi shino inikhu lo. Aghungu ye pulo ani kemu ashi no qeinai anie.” 42Itaghi, ghuthu akiniu Jisü no wuno ishi inikhu, “I Pu, ajukhu hipau I no shomo kelo ikhiluve tsümla aye, o pulou shilo.” 43Pa no itaghi ideighi kelo pano küthü ye zünishi kelauno anhethi mu tsükhomla zü aghive. 44Panoqo qhive no Jisü no itaghi wuve, eno ghuthu aküthüu azüu tsatho inikhue. 45Tithiu pa no akhopemi lau ighi no pi, “Kutou no zü eno akulhoqhi alo. Julo, ado ye ighivae, eno Timi Nu ye axinemi u lo phesüvae. 46Ithulo, ningu wuveni shilo; julo, I thekuchuu ye hi cheae.”

Jisü Küghaluve

(Mk 14:43-50; Lk 22:47-53; Jhn 18:3-12)

47Jisü no atsapi aphi lono, chighikini gholo lakhi Judas ighive, eno pa gholo achinetomi ngo Jewmi layemi no puwu kemi timi kutomo no azütakikihi ngo asüthalu pesü ighi. 48Thekuchuu no amchipu lakhi timiqo tsüpüa, “I no müma keu kene, pa tsüqü luvelo.” 49Judas no mtazü Jisü lau ighi no “Petha lulo, Rabbi!” ipi püzü pa mümae. 50Jisü no pa vilo pi, “Aküsau, nono kiu shiniye ighi keno shilulo.” Tileno panongu no iqhoghi püzü Jisü tsüqü luve no mtotoi pa tshüluve. 51Jisü gholo akemi lakhi no pa zütakikihi süjope achinetou qeu shou ghipuku no pa kini küsavetsü. 52Tile Jisü no pa vilo pi, “O zütakikihi abohu lo süvelo. Kughengu azütakikihi kipemi kümtsü ghüyi lono wonani. 53I no I Pu qhüiniju kelo Pa ye mtazü kungumi aqo chighikini nguno alau I lau puwu tsü nanie pi nongu ye kümsü mla keshea? 54Ikemu tishive aye Kuchoyesü lo hitoi shimasae pi püakeu ye kishino shikupuni kea?” 55Tileno aqokitikhi vilo Jisü no pi, “Ni ye heqhi buqhi kemi toi nongu ye azütakikihi ngo asüthalu pesü I kügha niye ighi ani keshea? Ghulo atsütsü I no achineki lo iqa no kütsü anamu nongu ye I küghamoe. 56Ikemu tungkupmi no Kuchoyesü lo yepüa keu shikupu niye hi kümtsü shi ani.” Tileno akhopemi kümtsü no pa qhive no pove.

Judahmi Hoho Zülo

(Mk 14:53-65; Lk 22:54-55,63-71; Jhn 18:13-14,19-24)

57Jisü küghalu keqo no pa sasü achinetou Caiaphas kilo Ayezah shikükami ngo layemi kumqo akeu lo wu. 58Peter ye putou no Jisü papesü achinetou kikhala kutolo ighi, eno ashekha lo kishive nani keno aghukhemi gholo ilo iqa no juae. 59Jisü pithive niye achinetomi ngo hoho mpemi kümtsü no kichile thopi phuae, 60kichile thopimi kutomo no pi akemu kiumu phumlave. Ashekha lo timi kini no azüu ighi 61eno pi, “Timi hipau no pi, ‘Niye Alhou chineki xave no atsala küthü lono shiluve nani.’” 62Achinetou no puthughove no Jisü vilo pi, “Timi hi pama no o shou ngukube akeu lo khokichile küha keo?” 63Ikemu Jisü no inaqhoi ngove. Achinetou no itaghi pa vilo pi, “Aküxüpu Lhou je lono I no ashoqhi tsa o vilo piani, no ye Alhou Nu Messiah kemo keno ni vilo pilo.” 64Jisü no pa vilo pi, “Nono pivae. Ikemu I no nongu vilo piani, hinguno hilauye Timi Nu no Akumtou u ajeu iqa no atsütsü lo khüngküsü lono ipe cheghi keu nongu no ithulu nani.” 65Tile achinetou no pa phi süxüve no pi, “Pa ye Lhoupiküptha tsa pivae. Ningu ye thopimi kütami kiu avehupu shini kea? Itehi nongu no paw piküptha tsa chiluvae. 66Nonguw xakütha ye kiu kea?” Panongu no khochile, “Pa ye thive küzüpue.” 67Tishino panongu no pa gilo müsü puku eno pa chishiqhi. Khami no pa ghaqhi ghi pi, 68“Tungkuptsa ni vilo pilo, no Messiah! O heqhi akeu ye khuu kea?”

Peter no Jisü Milive

(Mk 14:66-72; Lk 22:56-62; Jhn 18:15-18,25-27)

69Peter no aki khala lo iqa akelo achinetou qelimi lakhi no pa lau ighi no pi, “No ghi Galileemi Jisü gholo cheke lae.” 70Ikemu panongu kümtsü zülono pa no ishi milive, “Nono kiu piani keno ni ye mthae.” 71Pa no akulaghi lo ipeve, ikelo aqeliu kütami no pa ithulu no tile akeqo vilo pi, “Timi hipau ye Nazarethmi Jisü gholo cheke.” 72Itaghi Peter no ashoqhi shi milive, “Ni ye timi hu mthae.” 73Ado hami thiu tile timi puthugho akeqo no Peter lau ighi no pi, “Mtsüqheino no ghi panoqo gholo lakhie, kughengu o tsapi ghola no o küta ani.” 74Tile Peter no pa ampi ghushouve no ishi tushoqhi, “Ni ye timi hipau mthae.” Tipa mtsa awudu no ighave. 75Eno Jisü no pikeu tsa Peter no kümsüchilelu, “Awudu no igha mphilo no ye ni mthae pi ghuthu küthü milive nani.” Peter no khalau ipeve no amloiju qae.

Currently Selected:

MATTHEW 26: SUMRVBSI

Highlight

Copy